សូមជម្រាបថា កាលពីថ្ងៃទី៣ កញ្ញា ក្រុមកម្មករប្រមាណ ៣០នាក់ ដែលស៊ីឈ្នួលជីកដីកប់ខ្សែកាបទូរស័ព្ទអុបទិក ឲ្យក្រុមហ៊ុនចិន ឈ្មោះ ហាយស៊ី នៅខេត្តក្រចេះ បាននាំគ្នាឃាត់រថយន្តម្ចាស់ក្រុមហ៊ុននេះ ដើម្បីទាមទារឲ្យសងប្រាក់ថ្លៃឈ្នួលពលកម្ម ដែលបានធ្វើរួច។
ប៉ុន្តែ ក្រោយពីរថយន្តនោះ ត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្ត ដើម្បីដោះស្រាយលទ្ធផលគឺគ្មានឡើយ ហើយតំណាងក្រុមហ៊ុន ក៏បានគេចខ្លួន។ ប៉ុន្តែនៅព្រឹកថ្ងៃទី៤ កញ្ញា កម្មករបានឲ្យដឹងថា ភរិយាម្ចាស់ក្រុមហ៊ុនបានចូលខ្លួនមកដោះស្រាយដោយសម្រួលចង់ឲ្យកម្មករទាំងនោះ ត្រឡប់ទៅភូមិស្រុកសិន ហើយរង់ចាំការដោះស្រាយតាមក្រោយ។
ប៉ុន្តែកម្មករនៅមុខទីបញ្ជាការកងរាជអាវុធហេតុបានអះអាងថា បើមិនសងប្រាក់គ្រប់ ពួកគេមិនទៅឡើយ ៖ «ឈ្មោះ អូល អយ។ កម្លាំងនេះ បានធ្វើហើយ តែដោះស្រាយអត់ចេញ អត់បានលុយទៅផ្ទះ ទៅស្រុកវិញទេ។ គាត់ថាខ្ចីលុយ ២០០ដុល្លារឲ្យទៅ ហើយទៅយ៉ាងម៉េច បើចែកគ្នាមិនបានផង។ នៅដេករង់ចាំទាល់តែបានលុយអស់តែម្ដងបានទៅ»។
កម្មករបានឲ្យដឹងថា ការមិនបានប្រាក់ថ្លៃឈ្នួលការងារនេះ បានធ្វើឲ្យពួកគេធ្វើដល់ដំណាក់កាលមួយ លែងហ៊ានខ្ចីប្រាក់អ្នកស្រុកនៅតាមដងផ្លូវ ដែលស្នាក់ទៅទៀតហើយ ហើយដើររើសខ្ចៅខ្ចងទទួលទានតាមចិញ្ចើមថ្នល់ ដោយលែងខ្វល់ពីសុខភាពទៀតផង ៖ «សុខភាពលែងគិតហើយ វាអត់ពេកហើយ ឲ្យតែរស់រានមានជីវិត។ សំណូមពរឲ្យអាជ្ញាធរជួយដោះស្រាយឲ្យបានលុយថ្ងៃហ្នឹង ព្រោះអត់មានអីហូបទេ»។
តំណាងកម្មករបានឲ្យដឹងថា ពួកខ្លួនបានទទួលម៉ៅការកប់ខ្សែកាបក្នុងដី នៅខេត្តក្រចេះ ប្រវែង ៤៥៩៣ម៉ែត្រ ដោយគិតក្នុងមួយម៉ែត្រ ១ដុល្លារ។ ហើយការធ្វើ មានតែការសន្យាផ្ទាល់មាត់ ជាមួយប្រធានក្រុមហ៊ុនហាយស៊ី ដែលម៉ៅការបន្តពីក្រុមហ៊ុន ហ៊ូវី នៅភ្នំពេញ។
តំណាងក្រុមហ៊ុន ហ៊ូវី នៅភ្នំពេញដែលមិនប្រាប់ពីអត្តសញ្ញាណបានទូរស័ព្ទមកបញ្ជាក់ប្រាប់ថា ក្រុមហ៊ុនហាយស៊ី ទទួលម៉ៅការផ្ទាល់ពីក្រុមហ៊ុនធំនៅភ្នំពេញ តែលោកមិនដឹងថា ក្រុមហ៊ុននេះ មានកុងត្រាបន្តជាមួយកម្មករបែបណាទេ ប៉ុន្តែលោកនឹងជំរុញឲ្យមានការដោះស្រាយ ៖ «មិនដឹងថា កុងត្រាគេ ធ្វើហើយបានគេបង់លុយឬក៏អាច។ បើតាមខ្ញុំដឹង កម្មករហ្នឹង គ្នាដឹងតែរកលុយពីមេការហ្នឹងទេ ប៉ុន្តែមេការហ្នឹង ត្រូវយកលុយពីឈ្មោះ ឈិន ហ្នឹងមកទៀត។ ខ្ញុំមិនដឹងថាមានបញ្ហាអីពីឈ្មោះ ឈិន ហើយនិងមេការ មិនព្រមទម្លាក់លុយ អ៊ីចឹងចេះតែបន្តរហូតទៅ។ ចាំមើល៍ខ្ញុំជួយជំរុញ ឲ្យឆាប់ដោះស្រាយឲ្យចប់ ព្រោះមើលទៅកម្មករហ្នឹង គ្នាអត់មានអីធ្វើ មានតែដេកស៊ី»។
ថៅកែ ឈិន ជនជាតិចិន ម្ចាស់ក្រុមហ៊ុន ហាយស៊ី មិនអាចទំនាក់ទំនងសុំការបំភ្លឺបានឡើយ នៅថ្ងៃទី៤ កញ្ញា ដែលរហូតទល់ម៉ោងជាង ៣រសៀលហើយ ដំណោះស្រាយនៅតែរកច្រកចេញមិនឃើញ។ កម្មករទាំងអស់ ឈានដល់ដំណាក់កាល ធ្វើសំណូមពរផ្សងព្រេងទៅអាជ្ញាធរខេត្ត សុំស្បៀងសង្រ្គោះបន្ទាន់៕