ស្ត្រីឈ្មោះ ទេព សូភា តំណាងឲ្យកម្មករដែលមកធ្វើការតវ៉ានោះពន្យល់ពីមូលហេតុដែលពួកគាត់មកសុំឲ្យសហព័ន្ធសហជីពខ្មែរជួយពួកគាត់នោះថា ថៅកែរោងចក្រកំពុងប្រើល្បិចដោយធ្វើការគាបសង្កត់និងដកការងារដើម្បីឲ្យពួកគាត់ធុញទ្រាន់ដើរចេញពីការងារដោយខ្លួនឯង។ កម្មករទាំងនោះបានចោទប្រកាន់សហជីពសេរីកម្មករផងដែរថា បានបោះបង់ពួកគាត់ចោលមិនព្រមជួយពួកគាត់។
ស្ត្រីឈ្មោះ ទេព សូភា បានឲ្យដឹងថា ៖ «ក្រុមខ្ញុំ ក្រុមហ៊ុនដាក់បន្តិចៗឲ្យដេរ នាំគ្នាចេះតែតវ៉ាទៅទាមទារអាវច្រើនមកដេរ ហើយដល់អ៊ីចឹងក្រុមហ៊ុនគេអត់ដាក់ឲ្យទេ រួចហើយខ្ញុំក៏ទៅប្រាប់ខាងតំណាងកម្មករឲ្យទៅជួយនិយាយខាងក្រុមហ៊ុន ឲ្យក្រុមហ៊ុនដាក់ឲ្យច្រើនដូចជាក្រុមដទៃទៀត ឲ្យដេរបានអត្ថប្រយោជន៍ដូចក្រុមដទៃទៀត រួចហើយគឺអត់ដែលបានសោះ!»។
កម្មការិនីឈ្មោះ ឆាយ រ៉ន បន្ថែម ៖ «សូមឲ្យក្រុមហ៊ុនយកការពិចារណាមកសាថ្មីវិញ មិនមែនចេញជាសេចក្ដីបង្គាប់ហើយដាក់ពិន័យពួកខ្ញុំ បើមិនចូលធ្វើការទេ ៤៨ម៉ោងហ្នឹងនឹងជាប់ពន្ធនាគារហើយបង់ជាប្រាក់ពិន័យទៀត ហើយពួកខ្ញុំមិនបានទៅបង្កជាភាពចលាចលឬក៏ធ្វើប៉ះពាល់ខូចខាតដល់របស់ក្រុមហ៊ុន»។
ប្រតិកម្មតវ៉ារបស់កម្មករត្រូវបានថៅកែប្តឹងចោទប្រកាន់ថាជាការធ្វើបាតុកម្ម រួចក៏ប្តឹងទៅក្រុមប្រឹក្សាអាជ្ញាកណ្តាលនិងប្តឹងបន្តទៅតុលាការឲ្យចេញដីកាបង្គាប់ឲ្យកម្មករចូលធ្វើការវិញក្នុងរយៈពេល៤៨ម៉ោង បើពុំដូច្នោះទេនឹងរងការបញ្ឈប់ពីការងារ។
តំណាងរោងចក្រ ភីស៊ីស៊ីអេស និងជាប្រធានរដ្ឋបាលរោងចក្រ គឺលោក យូ ម៉េងទ្រី បានមានប្រសាសន៍ថា ជាការកែទម្រង់ការងារឲ្យបានប្រសើរក្នុងដំណើរនៃសង្វាក់ផលិតកម្មប៉ុណ្ណោះ។
លោក យូ ម៉េងទ្រី បានបញ្ជាក់ថា ៖ «គាត់សុំឲ្យក្រុមហ្នឹងដដែល គឺក្រុមហ៊ុនមិនអាចធ្វើអ៊ីចឹងបានទេ ពីព្រោះប្រព័ន្ធខាងផលិតហ្នឹងគេរៀបបង្រួញទៅតាំងពីក្រុមគាត់ទៅ។ ដល់អ៊ីចឹងគាត់អត់ព្រម គាត់ចង់ឲ្យក្រុមគាត់ដដែល អ៊ីចឹងក្រុមហ៊ុនមិនអាចធ្វើតាមក្រុមគាត់បានទេ ព្រោះអីការរៀបចំរបស់ក្រុមហ៊ុនអ៊ីចឹង!»។
ចំណែកលោក ជា មុនី ប្រធានសហជីពសេរីកម្មករ ពន្យល់ចំពោះបញ្ហាខាងលើនេះថា ៖ «គេថា អាជ្ញាកណ្ដាលកោះហៅឡើង គាត់អត់បានប្រាប់ការកោះរបស់អាជ្ញាធរកណ្ដាលមកយើងទេ ដូច្នេះអាជ្ញាកណ្ដាលគេបិទសំណុំរឿង។ អ៊ីចឹងការដែលគាត់ស្វែងរកសហជីពនានាដើម្បីឲ្យជួយរកដំណោះស្រាយរបស់គាត់ហ្នឹង សម្រាប់ខ្ញុំ ខ្ញុំអត់មានបញ្ហាអីទេ ខ្ញុំគាំទ្រ ឲ្យតែសហជីពណាជួយគាត់បានលទ្ធផល គឺខ្ញុំគាំទ្រជានិច្ច»។
តុលាការរាជធានីភ្នំពេញបានចេញដីកានៅថ្ងៃនេះបង្គាប់ឲ្យកម្មករក្នុងក្រុម២៧និង២៨ត្រូវចូលធ្វើការងារវិញជាកំហិតក្នុងរយៈពេល៤៨ម៉ោង បើពុំដូច្នោះទេកម្មករទាំងនោះនឹងត្រូវបញ្ឈប់ពីការងារនិងទទួលទោសតាមកំណត់នៃច្បាប់។ កម្មករក្នុងក្រុមនីមួយៗមានចំនួនប្រមាណ៤៥នាក់៕