មន្រ្តីសហជីពដែលត្រូវបានថៅកែរោងចក្របញ្ឈប់ពីការងាររួមមាន ប្រធានសហជីពសេរីកម្មករ អនុប្រធាននិងអគ្គលេខាធិការ។
តំណាងកម្មករមួយរូបឈ្មោះ សន ស៊ីណាត បានឲ្យដឹងនៅថ្ងៃទី១០ វិច្ឆិកា ថា នៅពេលមានពិធីបុណ្យជាតិឬអន្តរជាតិម្ដងៗ ខាងរោងចក្របានចេញសេចក្តីជូនដំណឹងជាលាយលក្ខណ៍អក្សរដល់កម្មករទាំងអស់ ប៉ុន្តែក្នុងឆ្នាំនេះនៅមុនព្រះរាជពិធីបុណ្យអុំទូកខាងរោងចក្រមិនបានចេញសេចក្តីជូនដំណឹងឲ្យកម្មករឈប់នោះទេ លុះមានការសួរនាំពីប្រធានសហជីពរបស់ខ្លួនទើបខាងក្រុមហ៊ុនបានចេញសេចក្តីជូនដំណឹង។
លោក សន ស៊ីណាត បានឲ្យដឹងថា ៖ «យើងទាំងអស់គ្នាមានការឆោឡោឡើង ហើយយើងឲ្យប្រធានរបស់យើងទាំងបីហ្នឹងចូលទៅជួបចរចាពីបញ្ហាហ្នឹង»។
ប្រធានសហជីពសេរីភាពកម្មករ លោក ជឿន ធីម មានប្រសាសន៍ថា ថៅកែបានបញ្ឈប់ការងារលោកនិងសហការីរបស់លោកដោយពុំបានបញ្ជាក់អំពីមូលហេតុអ្វីនោះទេ។ លោកបានបញ្ជាក់ថា កម្មករទាំងអស់នៅក្នុងរោងចក្រ HM Plastic មានចំនួន៨០នាក់ ក្នុងនោះ៥០នាក់ជាសមាជិករបស់លោក។
លោក ជឿន ធីម បានបន្ថែមថា កាលពីថ្ងៃទី២៨ តុលាកន្លងទៅ លោកបានទៅសួរនាំអំពីថ្ងៃឈប់សម្រាកក្នុងពិធីបុណ្យអុំទូកដែលខាងរោងចក្រមិនបានជូនដំណឹងឲ្យកម្មករដឹង ហើយនៅលា្ងចថ្ងៃដដែលខាងរោងចក្របានចេញសេចក្តីជូនដំណឹងអំពីថ្ងៃឈប់សម្រាក។ បន្ទាប់ពីការសួរនាំ ថៅកែបានបញ្ឈប់ពួកលោកពីការងារនិងកាត់ប្រាក់លើកទឹកចិត្តអស់ចំនួន៧៣ដុលា្លរថែមទៀត។
លោក ជឿន ធីម បានបញ្ជាក់ថា ៖ «ក្រុមហ៊ុនចេញលិខិតព្យួរការងារថ្នាក់ដឹកនាំសហជីពបន្ថែមពីលើហ្នឹងទៀត អ៊ីចឹងធ្វើឲ្យកម្មករកាន់តែជ្រួលច្របល់ ហើយកូដកម្មនឹងកើតមានរហូតមកដល់ថ្ងៃនេះ»។
ជំនួយការរដ្ឋបាលរោងចក្រ HM Plastic ឈ្មោះ ចិន្តា បានបំភ្លឺថា បានជាថៅកែបញ្ឈប់ការងារមន្រ្តីសហជីពទាំងបីនោះ គឺដោយសារតែពួកគេបាននាំកម្មករឲ្យឈប់ធ្វើការនៅថ្ងៃទី២៨ តុលា ៖ «គាត់អត់នាំគ្នាធ្វើការទេ គាត់នាំគ្នាអង្គុយលេងអ៊ីចឹងណា៎! ដល់ពេលអ៊ីចឹងទៅមេខ្ញុំគាត់ខឹង»។
ប្រធានការិយាល័យនៃមន្ទីរការងារបណ្តុះបណ្តាលវិជ្ជាជីវៈខែត្រកណ្តាល លោក ទៀង សារ៉េត បានឲ្យដឹងថា លោកបានទៅធ្វើការសម្រុះសម្រួលកាលពីថ្ងៃទី៥ វិច្ឆិកា ដែលខាងកម្មករទាមទារបួនចំណុចសំខាន់ៗ គឺទី១ ទាមទារឲ្យប្រធានសហជីពទាំងបីនាក់ចូលធ្វើការវិញ, ទី២ ឲ្យថៅកែបើកប្រាក់លើកទឹកចិត្តឲ្យប្រធានសហជីពនោះ, ទី៣ សុំឲ្យរោងចក្រចេញសេចក្តីជូនដំណឹងជាលាយលក្ខណ៍អក្សរនៅថ្ងៃបុណ្យជាតិនិងអន្តជាតិ និងទី៤ សុំមិនឲ្យកាត់ប្រាក់ខែរបស់ពួកគេក្នុងការធ្វើកូដកម្មនេះ។
លោកបានបញ្ជាក់ថា ការដោះស្រាយនេះត្រូវគ្នាតែមួយចំណុចប៉ុណ្ណោះ គឺខាងរោងចក្រឯកភាពជូនដំណឹងថ្ងៃឈប់ គឺថ្ងៃបុណ្យជាតិនិងអន្តរជាតិ រីឯបីចំណុចទៀតខាងរោងចក្រមិនបានឯកភាពតាមការទាមទាររបស់កម្មករទេ។ ដូច្នេះលោកបានបញ្ជូនលិខិតទៅឲ្យក្រុមប្រឹក្សាអាជ្ញាកណ្តាលនៃក្រសួងការងារនៅថ្ងៃទី១០ វិច្ឆិកា ដើម្បីដោះស្រាយបន្ត៕