កម្មកររោងចក្រអ៊ឹម.វ៉េនៅកំពង់ឆ្នាំងដួលសន្លប់លើកទី៣

កម្មការិនីប្រមាណ ៣០នាក់ នៃរោងចក្រ អ៊ឹម.វ៉េ នៅព្រឹកថ្ងៃទី២១ សីហា បានសន្លប់បន្តបន្ទាប់ជាលើកទី៣ ក្នុងខែសីហា ឆ្នាំ២០១២ នេះ។

ដោយ មណ្ឌល កែវ
2012-08-21

h082112pb.mp3

កម្មកររោងចក្រ អ៊ឹម.វ៉េ ដែលដួលសន្លប់ ត្រូវដឹកយកមកសង្គ្រោះនៅមន្ទីរពេទ្យ ខេត្តកំពង់ឆ្នាំង នៅថ្ងៃទី២១ សីហា ឆ្នាំ២០១២។

RFA/Mondulkeo

កម្មការិនីឈ្មោះ មុំ សុថេន ធ្វើការនៅអគារអ៊ិល (L) ផ្នែកប៉ះមុខអាវ បានឲ្យដឹងថា បន្ទាប់ហិតក្លិនក្រណាត់ ដែលខាងរោងចក្របានយកមកឲ្យខាងផ្នែកប៉ះមុខធ្វើការកាត់ព្រុយចេញ នាងទទួលអារម្មណ៍វិលមុខ ធីងធោង និងណែនទ្រូង តែនាងនៅអាចទ្រាំបាន។ ប៉ុន្តែ បន្ទាប់ពីនាងឃើញមិត្តភក្ដិរួមការងារក្នុងបន្ទប់ ចាប់ផ្ដើមដួលសន្លប់ជាបន្តបន្ទាប់ ស្រាប់តែនាងចាប់ផ្ដើមងងឹតមុខ ហើយសន្លប់តែម្ដង៖ «គេយកអាវហ្នឹងមកប៉ះមុខអ៊ីចឹង ពេលខ្ញុំយកមកធ្វើ ក្លិនអាវហ្នឹងក៏ចេញមក ខ្ញុំក៏ពុលក្លិនអាវហ្នឹង។ ណាមួយ ខ្ញុំថប់ដង្ហើមផង ព្រោះខ្ញុំឃើញគេសន្លប់ច្រើនពេក»។

ប្រភពពីមន្ទីរពេទ្យបង្អែកខេត្តកំពង់ឆ្នាំង បានឲ្យដឹងថា នៅព្រឹកថ្ងៃទី២១ សីហា មានកម្មការិនី២៣នាក់ ត្រូវបានខាងរោងចក្រអ៊ឹម.វ៉េ ដឹកមកកាន់មន្ទីរពេទ្យ។ ប្រភពដដែលបានឲ្យដឹងថា កាលពីព្រឹកថ្ងៃចន្ទ ទី២០ សីហា ក៏មានកម្មការិនី៥នាក់ ត្រូវបានដឹកមកសង្គ្រោះនៅមន្ទីរពេទ្យបង្អែកខេត្តផងដែរ។

ប្រធានមន្ទីរពេទ្យបង្អែកខេត្តកំពង់ឆ្នាំង វេជ្ជបណ្ឌិត សូរិន្ទី រ៉ាវុឌ្ឍី មានប្រសាសន៍ថា តាមការពិនិត្យ ពុំមានកម្មការិនីណាម្នាក់មានអាការធ្ងន់ធ្ងរទេ។ លោកថា បន្ទាប់ពីបញ្ចូលសេរ៉ូម និងសម្រាកប្រមាណ៣ទៅ៤ម៉ោងក្រោយ កម្មការិនីទាំងនោះក៏បានធូរស្រាល ហើយត្រឡប់ទៅលំនៅឋានវិញអស់ហើយ៖ «ខ្ញុំព្យាយាមស្វែងរកអ្នកដែលនាំហេតុគេនោះដែរ តែរកមិនឃើញ ដើម្បីយើងចង់ដឹងពីមូលហេតុថា តើមកពីអ្វី ទើបគាត់សន្លប់ តែរកមិនឃើញ។ តែតាមដែលខ្ញុំពិនិត្យកម្មការិនីទាំងអស់នោះទៅ ពុំឃើញថាមាននរណាម្នាក់មានអាការធ្ងន់ធ្ងរទេ»។

ប៉ុន្តែប្រភពពីកម្មករ កម្មការិនី បានឲ្យដឹងថា មានកម្មការិនីប្រមាណ៣០នាក់ បានសន្លប់នៅព្រឹកថ្ងៃទី២១ សីហា នេះ។ តែដោយកម្មការិនីខ្លះមានលក្ខណៈស្រាល ត្រូវបានគ្រួសារដឹកយកទៅព្យាបាលនៅគេហដ្ឋាន។

ប្រធានមន្ទីរការងារខេត្តកំពង់ឆ្នាំង លោក ពៅ ស៊ីថា មានប្រសាសន៍ថា មន្ត្រីជំនាញពុំទាន់រកឃើញហេតុផលដែលនាំឲ្យកម្មការិនីសន្លប់នោះទេ។ លោកថា មន្ទីរការងារបានហាមភាគីរោងចក្រមិនឲ្យបង្ខំកម្មការិនីធ្វើការបន្ថែមម៉ោងនោះទេ។

យ៉ាងនេះក្ដី ប្រធានសហជីពកម្មករប្រចាំរោងចក្រអ៊ឹម.វ៉េ អ្នកស្រី ជួប សំអុល បានឲ្យដឹងថា កត្តាដែលនាំឲ្យកម្មការិនីសន្លប់នេះ គឺមកពីរោងចក្របង្ខំឲ្យកម្មការិនីធ្វើការបន្ថែមម៉ោងច្រើនពេក៖ «បន្ថែមម៉ោងពេក ខ្លះត្រូវទៅដល់ផ្ទះម៉ោង១អធ្រាត្រ ទម្រាំបានងូតទឹក ចូលគេងបានតែ២ឬ៣ម៉ោង គាត់ត្រូវក្រោកឡើងដាំបាយ ដើម្បីមកធ្វើការព្រឹកវិញ។ ហើយនៅថ្ងៃសៅរ៍ គាត់ត្រូវធ្វើការមួយយប់ទល់ភ្លឺ។ ហើយរបៀបនេះជាប់គ្នា៣សប្ដាហ៍ នេះហើយជាមូលហេតុដែលនាំឲ្យពួកគាត់សន្លប់»។

រោងចក្រកាត់ដេរសម្លៀកបំពាក់អ៊ឹម.វ៉េ ខេត្តកំពង់ឆ្នាំង ជារោងចក្រដែលមានប្រវត្តិនៃការដួលសន្លប់កម្មការិនីញឹកញាប់ជាងគេ ក្នុងចំណោមរោងចក្រកាត់ដេរនានា ក្នុងប្រទេសកម្ពុជា។

កាលពីថ្ងៃទី១៥ សីហា ឆ្នាំ២០១២ កម្មការិនីចំនួន៣៥នាក់ បានដួលសន្លប់ម្ដងរួចហើយ។ កាលពីឆ្នាំ២០១១ កម្មការិនីរោងចក្រនេះ ក៏ធ្លាប់បានដួលសន្លប់ចំនួន៤លើកដែរ។ ទាំង៤លើកនេះ មានកម្មការិនីប្រមាណ៥០០នាក់ បានដួលសន្លប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (2)

ចុចត្រង់នេះដើម្បីបន្ថែមយោបល់របស់អ្នក

KT

ពី Phnom Penh

Hmm... working until midnight and take some rest only 2 or 3 hours. who can endured in this bad situation? if our country no have corruption as nowadays then the factory workers won't stay in the hell like that. How's pity my folk!!!

Aug 22, 2012 12:04 AM

អ្នកអានអនាមិក

I think, they work too much, they became too tired and mixte with some smell from material to produce clothes, it makes them falling unconscious. Have to be carefull, I know in europe too, 15 year ago, some asians people working in making clothes were dead on the machine because of sometime working 20-24 h/day for urgent deliverie.

Aug 21, 2012 09:40 AM