មនុស្សជាង១ពាន់នាក់នៅក្រចេះជួបជុំគ្នាក្នុងទិវាអន្តរជាតិប្រឆាំងគ្រឿងញៀន
ដោយ ឱ ភារិទ្ធ
2009-06-27
មនុស្សប្រមាណ១០០០នាក់បានចូលរួមក្នុងមិទ្ទិញទិវាពិភពលោកប្រឆាំងនឹងគ្រឿងញៀនលើកទី៣៧ កាលពីថ្ងៃទី២៦ មិថុនា ដែលរៀបចំឡើងនៅវិទ្យាល័យព្រះកុសមៈ ខេត្តក្រចេះ ក្រោមប្រធានបទ "តើគ្រឿងញៀនត្រួតត្រាជីវិតអ្នកឬ?"។
វាគ្មិនកិត្តិយសបានថ្លែងប្រាប់អង្គមិទ្ទិញថា យើងគួរតែនៅឲ្យឆ្ងាយពីគ្រឿងញៀន ដោយអះអាងថា បើសិនជាគ្រឿងញៀនអាចត្រួតត្រាជីវិតយើងបានហើយនោះ ផលលំបាកតែងតែកើតមានឡើង។
ប្រធានមន្ទីរអប់រំខេត្ត គឺលោក ឡាយ បូរ៉ា បានសុំឲ្យសិស្សានុសិស្សនៅឲ្យឆ្ងាយពីគ្រឿងញៀន ៖ «បារម្ភខ្លាំង។ សូមឲ្យលោកគ្រូ អ្នកគ្រូ ជួយពន្យល់ណែនាំឲ្យបានស៊ីជម្រៅដល់សិស្សយើងអំពីការប្រើប្រាស់គ្រឿងញៀនថា តើទទួលផលវិបាកយ៉ាងដូចម្តេច? គ្រឿងញៀនហ្នឹងកាលណាបើយើងសេពវាតើវាមានផលវិបាកយ៉ាងម៉េចដល់សង្គមជាតិរបស់យើង? ផលវិបាកយ៉ាងម៉េចសម្រាប់ខ្លួនយើង សម្រាប់ក្រុមគ្រួសាររបស់យើង?»។
មន្ត្រីនៃអង្គការក្រៅរដ្ឋាភិបាលគឺអ្នកស្រី ងួន សុផានី នាយិកានៃអង្គការKAFDOC បានសម្តែងការព្រួយបារម្ភដែលថា គ្រឿងញៀនកំពុងតែធ្វើឲ្យប៉ះពាល់ដល់សង្គមជាតិទាំងមូល ហើយអ្នកស្រីសុំឲ្យចៀសវាងពីការអូសទាញរបស់ក្រុមអ្នកចែកចាយនិងក្រុមអ្នកសេពគ្រឿងញៀន។
អ្នកស្រី ងួន សុផានី បានមានប្រសាសន៍ថា ៖ «ចៀសវាងឲ្យផុតអំពីការអូសទាញគ្រប់រូបភាពពីសំណាក់អ្នកចែកចាយនិងអ្នកប្រើប្រាស់គ្រឿងញៀន។ សូមកុំព្យាយាមចង់សាកឬចង់ដឹងអំពីគ្រឿងញៀនឲ្យសោះ។ អាជ្ញាធរមានសមត្ថកិច្ចនិងស្ថាប័នពាក់ព័ន្ធមេត្តាជួយបន្តពង្រឹងនិងការអនុវត្តច្បាប់ស្ដីអំពីការជួញដូរនិងការប្រើប្រាស់គ្រឿងញៀនប្រកបដោយប្រសិទ្ធភាព និងផ្តន្ទាទោសដល់ជនប្រព្រឹត្តល្មើសនឹងច្បាប់ដោយមិនអាចលើកលែងបានជាដាច់ខាត»។
ស្នងការខេត្តក្រចេះគឺលោកឧត្តមសេនីយ៍ ជួង ស៊ាងហាក់ បានជម្រាបអង្គមិទ្ទិញថា កន្លងមកខេត្តក្រចេះធ្លាប់តែជាទីឆ្លងកាត់គ្រឿងញៀនតែប៉ុណ្ណោះ ប៉ុន្តែឥឡូវនេះមានមុខសញ្ញាចែកចាយដ៏គ្រោះថ្នាក់បំផុតនៅក្នុងខេត្តដែលទើបនឹងបង្ក្រាបបានហើយថ្មីៗ។
លោកឧត្តមសេនីយ៍ ជួង ស៊ាងហាក់ បានបញ្ជាក់ថា ៖ «មុខសញ្ញាយ៉ាងឆ្នើមនៅខេត្តក្រចេះគឺមុខសញ្ញាចាប់ថ្ងៃមុនហ្នឹងហើយ។ មុខសញ្ញាមួយនៅអូរឫស្សី២ហ្នឹងគឺជាមុខសញ្ញាដ៏គ្រោះថ្នាក់បំផុត ហើយកំពុងតែជាប់ពាក់ព័ន្ធនឹងប្រពន្ធ ហើយមានពាក់ព័ន្ធនឹងមនុស្សប៉ុន្មាននាក់ទៀតដែលយើងកំពុងតែសុំដីកាដើម្បីស្វែងរកចាប់ខ្លួន។ ជារបស់គាត់ផ្ទះស្នាក់នៅ ប៉ុន្តែគេយកតង់ទៅបាំងជិតជុំវិញទាំងអស់ នៅពីក្រោយផ្ទះរហូតដល់លើដំបូលផ្ទះសុទ្ធតែមានបណ្ដាញចរន្តអគ្គិសនីដើម្បីភ្ជាប់ខ្សែភ្លើង ពេលណាចូលទៅជិតគឺគេកាច់បារ៉ែតខ្សែភ្លើងឆក់ប្រកាច់ងាប់»។
លោកស្នងការបានជម្រាបបន្ថែមថា មានមុខសញ្ញាចែកចាយជាច្រើនកំពុងតែធ្វើសកម្មភាពនៅតាមទីផ្សារនិងតំបន់មួយចំនួនដែលលោកសុំឲ្យមានសហការផ្តល់ដំណឹង ហើយលោកបានបញ្ជាក់ដែរថា ច្បាប់ថ្មីនៃការគ្រប់គ្រងគ្រឿងញៀនអាចសភាសម្រេចក្នុងខែកក្កដាខាងមុខ ដោយលោកបញ្ជាក់ថា ច្បាប់ថ្មីនេះអ្នកជួញដូរគ្រឿងញៀនត្រូវមានការដាក់ទោសទណ្ឌផងនិងរឹបអូសទ្រព្យសម្បត្តិទៀតផង៕
អត្ថបទដែលទាក់ទង
ប៉ូលិសនៅតាកែវរងការចោទថាធ្វើឲ្យស្រ្តីមានផ្ទៃពោះមួយរូបមានគ្រោះថ្នាក់
ប៉ូលិសចរាចរណ៍ក្រុងពោធិ៍សាត់វាយយុវជនម្នាក់ឲ្យរងរបួស
គ្រូបង្រៀននៅកំពង់ចាមទាមទារឲ្យក្រសួងអប់រំដោះស្រាយប្រាក់អតីតភាព
អង្គការសេដាក់គ្រោងនាំអង្ករសរីរាង្គទៅទីផ្សារអឺរ៉ុបនិងអាមេរិក
អាជ្ញាធរស្វែងរកការបិទមន្ទីរព្យាបាលជំងឺមួយនៅរតនគិរី
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីតាំងផលិតប្រេងម្រះព្រៅភ្នំ២កន្លែងនៅពោធិ៍សាត់ត្រូវបានកម្ទេច
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
អាជ្ញាធរខេត្តឧត្ដរមានជ័យរារាំងរថយន្តដឹកព្រះពុទ្ធបដិមារបស់ម៉មសូណង់ដូ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.