លោក ញឹក វណ្ណារ៉ា ជាមន្រ្តីទីប្រឹក្សារបស់រដ្ឋាភិបាល បានមានប្រសាសន៍ប្រាប់វិទ្យុអាស៊ីសេរីនៅថៃ្ងច័ន្ទ ទី៤ ខែមករា ឆ្នាំ២០១០នេះ ថា ការចាប់ឃាត់ខ្លួនយុវជនរូបនោះបានធ្វើទ្បើងក្នុងការណាត់ជួបគ្នាដោយផ្ទាល់នៅក្នុងផ្សារ ស៊ីតនី (Sydney) នៅក្នុងទីក្រុងភ្នំពេញ នៅថៃ្ងច័ន្ទនេះ។
លោក ញឹម វណ្ណារ៉ា បានបញ្ជាក់ថា ៖ «សួរម្ដងទៀតថា ប្រាកដទេថាចង់សម្លាប់ខ្ញុំ? គាត់ក៏ឆ្លើយថា មិនចាំបាច់សួរច្រើនទេ។ ខ្ញុំក៏ជម្រាបទៅក្រសួងមហាផ្ទៃដើម្បីឲ្យគេចាត់វិធានការតាមផ្លូវច្បាប់ទៅ។ ខ្ញុំអត់ស្គាល់ឈ្មោះប្អូនហ្នឹងដែរ។ ព្រឹកមិញហ្នឹងបានណាត់ខ្ញុំជួបនៅផ្សារស៊ីតនី នៅម៉ោង១១ ហើយខ្ញុំរវល់ជាប់ការងារ ខ្ញុំពន្យាររហូតទៅដល់ម៉ោងជិត ១២។ ខ្ញុំអត់ស្គាល់មុខប្អូនហ្នឹង តែប្អូនហ្នឹងស្គាល់ខ្ញុំច្បាស់។ ខ្ញុំជាអតីតអនុប្រធានគណៈកម្មការនាយកនៃគណបក្សសិទ្ធិមនុស្ស។ ពេលដែលជួបភ្លាម ព្រឹកមិញខ្ញុំបានសួរសំណួរទៅគាត់ថា ទី១ ប្អូនជាអ្នកដែល Message (ផ្ញើសារ) មកខ្ញុំ លេខទូរស័ព្ទប្អូនលេខប៉ុន្មាន? អីអ៊ីចឹងទៅ គាត់ក៏ឆ្លើយថា បាទ។ ខ្ញុំក៏ចុច Message (សារ)ហ្នឹងហើយ ខ្ញុំប្រាប់ថា អត្ថន័យក្នុង Message ដាក់ថា សម្លាប់ខ្ញុំ ហើយប្អូនជាអ្នកសរសេរ Message មក គាត់ថាបាទ។ ខ្ញុំសួរថា ចុះហេតុអី? គាត់ឆ្លើយថា ឆ្នាំហ្នឹងមិនល្អទេ! គាត់ឆ្លើយមួយម៉ាត់អ៊ីចឹង! ជម្រាបទៅខាងសមត្ថកិច្ចឲ្យគេឃាត់ខ្លួនគាត់ទៅ ចាប់ម៉ោងប្រហែលជា ១១:៥០នាទី»។
លោកបានទទួលសារគំរាមតាមទូរស័ព្ទដៃនោះកាលពីថៃ្ងអាទិត្យនៅវេលាម៉ោង ៦ល្ងាច ពីទូរស័ព្ទដៃលេខ ០៩២ ៨៥៣៣៦៨ ដែលមានន័យថា ចង់សម្លាប់លោក។
លោកឧត្តមសេនីយ៍ ឆាយ ស៊ីណារិទ្ធ ប្រធាននាយកដ្ឋានព័ត៌មាននៃក្រសួងមហាផៃ្ទ មិនបានធ្វើអត្ថាធិប្បាយណាមួយបានទេ នៅពេលដែលវិទ្យុអាស៊ីសេរីបានទាក់ទងសុំការបញ្ជាក់បន្ថែមជុំវិញករណីគំរាមនេះ។
ប្រភពបានឲ្យដឹងថា សមត្ថកិច្ចនគរបាលក្រសួងមហាផៃ្ទកំពុងតែធ្វើការសាកសួរចម្លើយយុវជននោះក្រោយពីការចាប់ឃាត់ខ្លួន។
លោក អំ សំអាត ជាប្រធានក្រុមអ្នកស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាល ហៅកាត់ថា លីកាដូ បានមានប្រសាសន៍អត្ថាធិប្បាយថា ៖ «យើងជាសង្គមស៊ីវិល យើងចង់ឲ្យគេធ្វើការតាមផ្លូវច្បាប់ ដើម្បីផ្ដន្ទាទោសអ្នកដែលបានប្រព្រឹត្តទៅតាមផ្លូវច្បាប់ ប៉ុន្តែអ្វីមួយដែលយើងព្រួយបារម្ភ បើសិនជាអ្នកនោះមានចេតនា ហើយជាមនុស្សដែលមានស្មារតីរឹងប៉ឹង ស្មារតីត្រឹមត្រូវ ហើយប្រព្រឹត្តនូវទង្វើទាំងអស់នេះ គឺយើងសូមឲ្យធ្វើការទៅតាមផ្លូវច្បាប់»។
គេបានសង្កេតឃើញថា នេះជាករណីលើកទី២ហើយ ក្រោយពីលោក រស់ សុឃិត អាយុ ៤០ឆ្នាំ ជាអ្នកកាសែតម្នាក់ត្រូវបានអាជ្ញាធរក្រសួងមហាផ្ទៃចាប់ឃាត់ខ្លួន កាលពីខែវិច្ឆិកា ឆ្នាំ២០០៩កន្លងទៅ ដោយសារតែលោកបានផ្ញើសារតាមទូរស័ព្ទដៃ មកលោក សយ សុភាព ជាអ្នកយកព័ត៌មាននៃទូរទស្សន៍ CTN ដើម្បីសាកសួរអំពីអំពើពុករលួយនិងការជំរិតទារប្រាក់។ ក្រោយមកតុលាការរាជធានីភ្នំពេញបានកាត់ទោសលោក រស់ សុឃិត ឲ្យជាប់គុករយៈពេល ២ឆ្នាំ កាលពីថៃ្ងទី៦ ខែវិច្ឆិកា ឆ្នាំ២០០៩កន្លងទៅ ក្រោមបទផ្សាយព័ត៌មានមិនពិត៕