មជ្ឈមណ្ឌលសិទ្ធិមនុស្សកម្ពុជា (CCHR) បានចេញផ្សាយនូវកម្រងករណីសិក្សាមួយផ្តោតលើគម្រោងអភិវឌ្ឍន៍មួយចំនួនក្នុងរាជធានីភ្នំពេញ ថាបានគំរាមដល់សិទ្ធិមនុស្ស និងបំពានទៅលើច្បាប់ជាតិ និងច្បាប់អន្តរជាតិ។ រីឯមន្ត្រីរដ្ឋាភិបាលច្រានចោលកម្រងករណីសិក្សានេះ ក្រោមហេតុផលថា មិនឆ្លុះបញ្ចាំងការពិតនៅកម្ពុជា។
កម្រងករណីសិក្សាមានកម្រាស់ ១២ទំព័រ ស្ដីពីសិទ្ធិមនុស្សទំនងជាបញ្ហាបន្ទាប់បន្សំពីការអភិវឌ្ឍក្នុងរាជធានីភ្នំពេញ របស់មជ្ឈមណ្ឌលសិទ្ធិមនុស្សកម្ពុជា ដែលវិទ្យុអាស៊ីសេរី ទទួលបាននៅថ្ងៃទី៧ ខែមិថុនា បានរំលេចចេញនូវសាវតានៃគម្រោងអភិវឌ្ឍន៍ជាច្រើនរបស់រដ្ឋាភិបាលក្នុងរាជធានីភ្នំពេញ ដែលពុំបានគិតគូរដល់សិទ្ធិមនុស្ស។
កម្រងករណីសិក្សាបន្តបរិយាយថា លំនៅឋាន និងរបចិញ្ចឹមជីវិតរបស់ប្រជាពលរដ្ឋជាច្រើនពាន់គ្រួសារ ត្រូវបានខូចខាត បាត់បង់ដោយបណ្ដេញចេញដោយបង្ខំជាមួយនឹងប្រាក់សំណងតិចតូច អ្នកខ្លះទៀតជាប់គុក បែកបាក់គ្រួសារយ៉ាងវេទនា ក្រោមឈ្មោះអភិវឌ្ឍសេដ្ឋកិច្ច។ ជាឧទាហរណ៍បញ្ហាដែលមជ្ឈមណ្ឌលសិទ្ធិមនុស្សចងចាំមិនភ្លេចនោះ គឺករណីបុរីកីឡា កាលពីដើមខែមករា ឆ្នាំ២០១២ ដែលមានលក្ខណៈបណ្ដេញចេញដោយបង្ខំធ្ងន់ធ្ងរបំផុតពីសំណាក់កងសន្តិសុខក្រុមហ៊ុនផានអ៊ីមិច និងនគរបាលប្រដាប់ដោយគ្រឿងចក្រ ដំបងឆក់ និងឧស្ម័នបង្ហូរទឹកភ្នែក។ លើសពីនេះ ប្រជាពលរដ្ឋរងគ្រោះត្រូវបានគេដឹកទៅចាក់ចោលនៅតំបន់ដាច់ស្រយាល ខ្វះភ្លើងអគ្គិសនី បង្គន់អនាម័យ ទឹកស្អាត សាលារៀន និងឱកាសការងារ។
ករណីបណ្ដេញចេញ ការធ្វើទុក្ខបុកម្នេញ និងករណីមិនផ្តល់សំណងសមរម្យ កំពុងកើតមាននៅនៅកន្លែងជាច្រើនទៀត ដូចជានៅតំបន់បឹងកក់ តំបន់បឹងទំពន់ តំបន់ជើងឯក និងករណីនៅបឹងត្របែក ព្រមទាំងករណីតំបន់ជ្រោយចង្វារ ជាដើម។
មជ្ឍមណ្ឌលសិទ្ធិមនុស្សកម្ពុជា ថា បញ្ហាទាំងនេះកើតឡើងទៅបានដោយសារតែនីតិរដ្ឋទន់ខ្សោយ និងអំពើពុករលួយរ៉ាំរ៉ៃ ព្រមទាំងរដ្ឋាភិបាលមិនបានគោរពនូវតួនាទីរបស់ខ្លួនក្នុងការលើកកម្ពស់ និងគោរពសិទ្ធិប្រជាពលរដ្ឋឡើយ ទើបបណ្ដាលតួអង្គសាជីវកម្មជាច្រើនដែលអនុវត្តគម្រោងអភិវឌ្ឍន៍ក្នុងរាជធានីភ្នំពេញ រំលោភទៅលើច្បាប់ជាតិ និងច្បាប់អន្តរជាតិជាតិផង។
ឆ្លើយតបបញ្ហានេះ មន្ត្រីនាំពាក្យរដ្ឋាភិបាល លោក ផៃ ស៊ីផាន ថ្លែងថា មជ្ឈមណ្ឌលសិទ្ធិមនុស្សកម្ពុជា ហាក់មើលមិនឃើញពីកិច្ចខិតខំប្រឹងប្រែងរបស់រដ្ឋាភិបាលក្នុងការដោះស្រាយបញ្ហាឡើយបែរជានៅតែបន្តប្រឌិតថា ស្ថានភាពសិទ្ធិមនុស្សនៅតែអាក្រក់ទៅវិញ៖ «អ្វីដែលគេលើក គឺមិនឆ្លើយតបនូវអ្វីដែលជាក់ស្ដែង ហើយយើងឃើញហើយថា យើងធ្វើបណ្តើរ យើងជួបបញ្ហាបណ្តើរ យើងដោះស្រាយបណ្តើរ ដែលនេះជាសកម្មភាពជាក់ស្តែងនៅកម្ពុជា មិនមែនដូចជាភ្នាក់ងារសិទ្ធិមនុស្សដែលទទួលបានប្រាក់ខែ អង្គុយក្នុងម៉ាស៊ីនត្រជាក់ចាំធ្វើរបាយការណ៍»។
លោក ផៃ ស៊ីផាន ក៏អះអាងថា នៅសហរដ្ឋអាមេរិក ក៏ជួបនឹងការរំលោភសិទ្ធិមនុស្សដែរ។
អ្នកសម្របសម្រួលគម្រោងកំណែទម្រង់ដីធ្លីរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត ថ្លែងថា លោកមិនចម្លែកចំពោះជំហររបស់មន្ត្រីរដ្ឋាភិបាលដែលតែងតែបដិសេធមិនទទួលយករបាយការណ៍របស់អង្គការសង្គមស៊ីវិលទេ។ លោកបន្តថា របាយការណ៍ដែលឃើញនេះ គឺអាចជាអនុសាសន៍ ឬជាប្រទីបបំភ្លឺមួយសម្រាប់ឲ្យរដ្ឋាភិបាលកែប្រែជីវភាពរស់នៅរបស់ប្រជាពលរដ្ឋឲ្យកាន់តែប្រសើឡើង។
លោក វណ្ណ សូផាត៖ «យើងក៏ដឹងថា នឹងមានប្រតិកម្ម តែយើងចង់បង្ហាញអោយរដ្ឋាភិបាលឃើញថា បញ្ហាហ្នឹងពិតជាបញ្ហារបស់ប្រជាពលរដ្ឋ ដែលគួរតែរដ្ឋាភិបាលដោះស្រាយ ពីព្រោះថា ថ្មីៗនេះ ក៏ឃើញថា រដ្ឋាភិបាលចាប់អារម្មណ៍ពីការដោះស្រាយជម្លោះដីធ្លីជូនប្រជាពលរដ្ឋ ដូចជានៅក្រសួងដែនដី នគរូបនីយកម្ម បានបង្កើតគណៈកម្មការរហូតដល់ ២៧អីអ៊ីចឹង ដើម្បីដោះស្រាយបញ្ហាដីធ្លី។ ដូច្នេះយើងចង់រំលេចបង្ហាញទៅរដ្ឋាភិបាលថា បញ្ហាអស់ហ្នឹងនៅតែមាន ដូចជានៅរាជធានីភ្នំពេញ ជាដើម គឺសូមអោយរដ្ឋាភិបាល មេត្តាចាប់អារម្មណ៍ ដូចជានៅបឹងត្របែក បឹងទំពន់ និងបឹងជើងឯក ជាដើម»។
មជ្ឈមណ្ឌលសិទ្ធិមនុស្សកម្ពុជា អំពាវនាវឲ្យរដ្ឋាភិបាលមេត្តាផ្អាកគម្រោងអភិវឌ្ឍន៍ដែលបង្កផលប៉ះពាល់ផ្សេងៗរហូតដល់មានការវាយតម្លៃពីផលប៉ះពាល់ផ្នែកបរិស្ថាន និងសង្គមត្រឹមត្រូវ ធ្វើការប្រឹក្សាយោបល់អោយបានគ្រប់ជ្រុងជ្រោយជាមួយប្រជាពលរដ្ឋដែលរងផលប៉ះពាល់ ហើយត្រូវធានាថា សំណងត្រូវផ្អែកទៅលើតម្លៃទីផ្សារ។ ម្យ៉ាងទៀត រដ្ឋាភិបាលត្រូវធានាថា ការបណ្ដេញចេញដើម្បីការអភិវឌ្ឍត្រូវបានធ្វើឡើងតែក្នុងជម្រើសចុងក្រោយ និងឲ្យស្របទៅតាមច្បាប់សិទ្ធិមនុស្សអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។