Opens in new windowក្រុមមន្ត្រីពាក់ព័ន្ធនៃអាជ្ញាធរស្រុកអណ្ដូងមាស បានសម្រេចចុះដោះស្រាយការតវ៉ារបស់ពលរដ្ឋជនជាតិដើមភាគតិចភូមិដាល ឃុំញ៉ាង ដែលបានចោទប្រកាន់ក្រុមហ៊ុនសម្បទានសេដ្ឋកិច្ច ចាង លី ថាបានឈូសឆាយព្រៃស្រោង ព្រៃគោរពបូជា ព្រៃការពារ និងព្រៃកប់សពសហគមន៍។ ចំណែកអ្នកភូមិ បដិសេធមិនទទួលយកការវាស់វែងដីជាលក្ខណៈគ្រួសារឡើយ។
អាជ្ញាធរស្រុកអណ្ដូងមាស បានសម្រេចឲ្យសហគមន៍បោះបង្គោលបង្ហាញតំបន់ព្រៃអភិរក្សរបស់ខ្លួន ដើម្បីអាជ្ញាធរជំនាញចុះវាស់វែងធ្វើរបាយការណ៍ជូនអាជ្ញាធរខេត្ត សម្រេចកាត់ដីនោះជូនប្រជាពលរដ្ឋតាមការទាមទារ ឬយ៉ាងណា។
ការសម្រេចនេះ ធ្វើឡើងបន្ទាប់ពីប្រជាពលរដ្ឋបដិសេធមិនទទួលយកការវាស់វែងដីជាលក្ខណៈគ្រួសារ តាមរយៈក្រុមសមត្ថកិច្ចចម្រុះ មានមន្ត្រីព្រៃឈើ មន្ត្រីភូមិបាល និងអាជ្ញាធរមូលដ្ឋាន បានចុះវាស់វែងដីជូនប្រជាពលរដ្ឋកាលពីចុងខែកញ្ញា។
អភិបាលស្រុកអណ្ដូងមាស លោក នង ដារិទ្ធ កត់សម្គាល់ថា កន្លងទៅ ការទាមទាររបស់សហគមន៍មិនបានកំណត់ជាក់លាក់ពីតំបន់ដីដែលអ្នកភូមិតវ៉ា ហេតុនេះក្រុមជំនាញពិបាកស្វែងរកដំណោះស្រាយបញ្ចប់ជម្លោះ ទាក់ទិនដីដែលអ្នកភូមិអះអាងថា ក្រុមហ៊ុនបានរំលោភ។ លោកបន្តថា សមត្ថកិច្ចជំនាញរង់ចាំការសម្រេចជាក់លាក់របស់សហគមន៍ ដែលប្រជុំឯកភាពគ្នាកំណត់ទីតាំងព្រំដីដែលសហគមន៍ទាមទារ ដើម្បីសមត្ថកិច្ចជំនាញវាស់វែងធ្វើពង្រាងផែនទីដី ហើយធ្វើរបាយការណ៍ជូនអាជ្ញាធរខេត្តសម្រេច៖ «ឥឡូវយើងកំពុងធ្វើរួមឲ្យគាត់ហើយ ឲ្យគាត់ចង្អុលមកធ្វើយ៉ាងម៉េច បន្ថែមមកកន្លែងណាដែលថាអារក្ស យើងកាត់ឲ្យគាត់ ឬស្នើសុំយ៉ាងម៉េច? ជំហានទី១ យើងធ្វើតាមសំណូមពរគាត់ឲ្យគាត់កំណត់មក ព្រោះយើងមិនងាយដើរទេព្រៃហ្នឹង»។
ក្រុមហ៊ុន ចាង លី ទទួលបានដីសម្បទាន ១.៩០០ហិកតារនៅស្រុកអណ្ដូងមាស កាលពីឆ្នាំ២០១០ ក៏ប៉ុន្តែប្រជាពលរដ្ឋអះអាងថា ក្រុមហ៊ុននេះបានកាប់ឈើមានតម្លៃក្នុងព្រៃស្រោង និងព្រៃត្រណមរបស់ពលរដ្ឋជនជាតិដើមភាគតិច។ ដោយឡែកទៀត ក្រុមហ៊ុនបានរារាំងមិនឲ្យពលរដ្ឋចូលព្រៃរកអនុផលព្រៃឈើជាលក្ខណៈប្រពៃណី តាមទម្លាប់សហគមន៍ជនជាតិដើមភាគតិចទៀតផង។
សមាជិកសហគមន៍ភូមិដាល លោក សល់ ផាត់ រៀបរាប់ថា អ្នកភូមិត្រូវការរក្សាទុកព្រៃឈើទាំងនោះ ដើម្បីអ្នកភូមិស្នើសុំជាព្រៃការពារសហគមន៍ គ្រាអ្នកភូមិចុះបញ្ជីដីធ្លីសហគមន៍ផ្លូវការនៅពេលខាងមុខនេះ ជាកម្មសិទ្ធិសមូហភាព។ ហេតុនេះ អ្នកភូមិទាមទារឲ្យក្រុមហ៊ុនបញ្ឈប់ឈូសឆាយព្រៃនៅតំបន់នោះ។ លើសពីនេះទៀត លោកកត់សម្គាល់ថា កន្លងទៅនេះ ព្រៃនៅតំបន់នោះប្រមាណ ១៥០ហិកតារ ត្រូវបានក្រុមហ៊ុនឈូសឆាយយកដីដាំកៅស៊ូ៖ «គេថាយល់ព្រមថ្ងៃមុនទៅវាស់ហើយ គេវាស់ត្រឹមចម្ការស្រែប៉ុន្មានម៉ែត្រហ្នឹង ក្រៅពីហ្នឹងគេថាអត់វាស់ទេ អ្នកភូមិមកក្រោយគេទៅផ្ទះអស់»។
ចំណែកប្រធានគណៈកម្មការសហគមន៍ លោក កាឡាន ប៉ិច ទទួលស្គាល់ថា មន្ត្រីមូលដ្ឋានថ្នាក់ឃុំ-ស្រុក យកសំអាងថា តំបន់ព្រៃឈើនោះរដ្ឋបានផ្តល់ជាដីសម្បទាន។ ហេតុនេះ មន្ត្រីមូលដ្ឋានទាំងនោះមិនបានយកចិត្តទុកដាក់ដោះស្រាយការតវ៉ារបស់ពលរដ្ឋនោះឡើយ។ លើសពីនេះទៀត ក្រុមហ៊ុនចូលមកឈូសឆាយដីដោយមិនបានពិគ្រោះយោបល់ ឬសិក្សាផលប៉ះពាល់ជាមួយពលរដ្ឋដែលអភិរក្សតំបន់នោះតាមប្រពៃណីជនជាតិដើម៖ «យើងអត់ព្រម ដោយសារអ្វី? ដីបីបួនម៉ែត្រអ៊ីចឹង យើងវាស់ម៉េចបាន។ យើងចង់បានទាមទារដីបម្រុងទុក ដីអភិរក្ស ដីសែនអារក្ស ដីចម្ការវិលជុំ ដីទួលសុវត្ថិភាព និងដីកប់ខ្មោច»។
មន្ត្រីអាជ្ញាធរស្រុកអណ្ដូងមាស ឲ្យដឹងថា រហូតមកទល់នឹងបច្ចុប្បន្ន ក្រុមហ៊ុន ចាង លី នៅសល់ផ្ទៃដីសម្បទានប្រមាណ ៦០០ ទៅ ៧០០ហិកតារតែប៉ុណ្ណោះ ដោយសាររាជរដ្ឋាភិបាលបានកាត់ចេញដីមានផលប៉ះពាល់ប្រជាពលរដ្ឋតាមគោលនយោបាយចាស់សកម្មភាពថ្មី កាលពីឆ្នាំ២០១២។ អាជ្ញាធរស្រុកឲ្យដឹងដែរថា ក្រុមហ៊ុន ចាង លី រហូតមកទល់នឹងបច្ចុប្បន្ន ដាំកៅស៊ូបានប្រមាណ ២០០ ទៅ ៣០០ហិកតារក្នុងបរិមាណដីដែលនៅសេសសល់។
មន្ត្រីសម្របសម្រួលនៃសមាគមអាដហុក (ADHOC) ខេត្តរតនគិរី លោក ឆាយ ធី ថ្លែងបញ្ជាក់ថា ពាក្យប្ដឹងរបស់អ្នកភូមិ សមាគមបានអន្តរាគមន៍ជូនអាជ្ញាធរខេត្ត និងថ្នាក់ជាតិរួចហើយ ដើម្បីពិនិត្យដោះស្រាយជូនប្រជាពលរដ្ឋ។ លោកថា ក្រុមអាជ្ញាធរត្រូវកាត់ផលប៉ះពាល់ប្រជាពលរដ្ឋ ស្របតាមគោលនយោបាយរបស់រាជរដ្ឋាភិបាលបានណែនាំ៖ «យើងស្នើសុំឲ្យអាជ្ញាធរ និងក្រុមហ៊ុនបង្ហាញភាពច្បាស់លាស់កាត់ដីទុកឲ្យសហគមន៍ត្រឹមណា បានទំនាស់ហ្នឹងដោះស្រាយបានល្អប្រសើរ»។
ទាក់ទិនករណីនេះដែរ នាយខណ្ឌរដ្ឋបាលព្រៃឈើខេត្តរតនគិរី លោក វង សុកសិរី មានប្រសាសន៍បញ្ជាក់ថា អាជ្ញាធរបានចាត់មន្ត្រីជំនាញពាក់ព័ន្ធ ចុះវាស់វែងដីដើម្បីបែងចែកសម្រាប់សហគមន៍ និងផ្តល់ជូនក្រុមហ៊ុនធ្វើការវិនិយោគបន្ត៖ «គណៈកម្មការខេត្ត-ស្រុក កំពុងចុះ ខាងព្រៃឈើក៏ចូលរួមដែរ ហើយយើងដាក់ឯកសារមកខេត្ត ដើម្បីកំណត់មួយណាជូនប្រជាជន មួយណាជូនក្រុមហ៊ុនធ្វើបន្ត»។
ប្រជាពលរដ្ឋរស់នៅភូមិកាហល់ ឃុំម៉ាលិច ស្រុកអណ្ដូងមាស ក៏បានចោទប្រកាន់ក្រុមហ៊ុនសម្បទានសេដ្ឋកិច្ច ចាង លី ថាបានកាប់បំផ្លាញព្រៃស្រោង និងព្រៃគោរពបូជាជនជាតិដើមភាគតិច ដែលរក្សាទុកជាព្រៃការពារសហគមន៍។ កាលពីថ្ងៃទី២៣ ខែមករា តំណាងអ្នកភូមិទាំងពីរ បានធ្វើដំណើរមកការិយាល័យសមាគមការពារសិទ្ធិមនុស្ស ដើម្បីស្វែងរកកិច្ចអន្តរាគមន៍ផ្លូវច្បាប់ បញ្ជូនពាក្យបណ្ដឹងអ្នកភូមិទៅស្ថាប័នថ្នាក់ជាតិទាំងពីរ បន្ទាប់ពីពួកគាត់អះអាងថា ក្រុមហ៊ុនកំពុងរំលោភកិច្ចសន្យាសម្បទាន និងរំលោភសិទ្ធិរស់នៅជនជាតិដើមភាគតិច។
ទោះជាយ៉ាងនេះក្តី តំណាងប្រជាពលរដ្ឋភូមិដាល អះអាងថា ពួកគាត់នឹងនៅតែបន្តការតវ៉ា ប្រសិនអាជ្ញាធរមិនបានកាត់ដីតំបន់ព្រៃអភិរក្ស ប្រគល់ជូនសហគមន៍គ្រប់គ្រងតាមការតវ៉ា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។