សាលាឧទ្ធរណ៍បានបើកការជំនុំជម្រះលើអង្គសេចក្ដីទាក់ទិនសំណុំរឿងរបស់អ្នកស្រី ថាក់ ឡានី ដែលចោទលោកនាយករដ្ឋមន្ត្រី ហ៊ុន សែន ថាជាអ្នកបញ្ជាឲ្យបាញ់សម្លាប់លោកបណ្ឌិត កែម ឡី។ សវនាការនេះ ធ្វើឡើងក្រោយពេលមេធាវីតំណាងរបស់សមាជិកព្រឹទ្ធសភាពីខាងបក្សប្រឆាំង សម្រេចប្ដឹងឧទ្ធរណ៍ប្រឆាំងសាលក្រមរបស់សាលាដំបូងរាជធានីភ្នំពេញ។
សវនាការលើអង្គសេចក្ដីលើបណ្ដឹងឧទ្ធរណ៍របស់អ្នកស្រី ថាក់ ឡានី នៅព្រឹកថ្ងៃទី១០ ខែសីហា គឺចំថ្ងៃខួប ១៣ខែ នៃឃាតកម្មលើលោកបណ្ឌិត កែម ឡី ដែរ។
សវនាការដែលពុំមានវត្តមានមេធាវី គឺលោក សំ សុគង់ និងជនជាប់ចោទគឺអ្នកស្រី ថាក់ ឡានី ចូលរួមនោះ ត្រូវបានប្រធានក្រុមប្រឹក្សាជំនុំជម្រះនៃសាលាឧទ្ធរណ៍លោក ប្លង់ សំណាង សម្រេចប្រកាសសាលដីកាសំណុំរឿងនេះ នៅថ្ងៃទី២៩ ខែសីហា ខាងមុខ។
ការជជែកដេញដោលនៅក្នុងបន្ទប់ជំនុំជម្រះនៃសាលាឧទ្ធរណ៍កាលពីព្រឹកថ្ងៃទី១០ សីហា គឺមានតែមេធាវីតំណាងដោយអាណត្តិរបស់លោក ហ៊ុន សែន។
ក្រោយចេញពីបន្ទប់ជំនុំជម្រះលោក គី តិច មេធាវីតំណាងដោយអាណត្តិរបស់លោកនាយករដ្ឋមន្ត្រី ប្រាប់ក្រុមអ្នកកាសែតថា ការចោទប្រកាន់របស់អ្នកស្រី ថាក់ ឡានី មកលើលោក ហ៊ុន សែន នេះ គឺជាការចោទប្រកាន់ទាំងកម្រោល។ លោកបន្តថា ប្រហែលសមាជិកព្រឹទ្ធសភារូបនេះ មើលឃើញឱកាសចំណេញខាងនយោបាយពីសពលោកបណ្ឌិត កែម ឡី តាមរយៈអ្នកគាំទ្ររាប់ម៉ឺននាក់នេះហើយ បានជាប្រើល្បិចនយោបាយទាំងពុំមានភស្តុតាងដាក់បន្ទុកប្រឆាំងលោក ហ៊ុន សែន៖ «គាត់មហាជនច្រើន ហើយម្នាក់ៗសុទ្ធតែខឹង ពុះកញ្ជ្រោល អ៊ីចឹងហើយបានផ្ទេរកំហឹងជះទៅសម្ដេចតេជោតែម្ដង។ កន្លែងនេះហើយដែលសម្ដេចតេជោគាត់មិនសុខចិត្តទេ គឺឲ្យប្ដឹងមកដល់ថ្ងៃនេះ»។
ឆ្លើយតបរឿងនេះ លោក សំ សុគង់ មេធាវីតំណាងរបស់អ្នកស្រី ថាក់ ឡានី ច្រានចោលការចោទប្រកាន់នេះ ដោយអះអាងថា នេះពុំមែនជាការបោះបង់សិទ្ធិចូលរួមសវនាការទេ ប៉ុន្តែដោយសារលោកបានដាក់ពាក្យសុំពន្យារពេលសវនាការនេះរួចហើយដែរ។ ម្យ៉ាងទៀតខាងតុលាការពុំបានជូនដំណឹងអំពីថ្ងៃជំនុំជម្រះនេះថែមទៀត។
លោកបន្តថា៖ «មិនអាចទទួលយកបានទេ។ នេះជាការលើកឡើងរបស់មេធាវីខាងដើមបណ្ដឹងរដ្ឋប្បវេណី។ ប៉ុន្តែអ្វីដែលយើងនិយាយនៅពេលនេះ គឺយើងនិយាយទាក់ទងបញ្ហាផ្លូវច្បាប់ គឺច្បាប់ហើយនិងនីតិវិធី ហើយអ្វីដែលមេធាវីការពារក្តីឲ្យលោកជំទាវបានដាក់បណ្ដឹងឧទ្ធរណ៍នេះគឺមេធាវីការពារមានភស្តុតាងបន្ថែមគ្របគ្រងដើម្បីតតាំង»។
អ្នកស្រី ថាក់ ឡានី ត្រូវបានតុលាការរាជធានីភ្នំពេញ ផ្ដន្ទាទោសដាក់ពន្ធនាគារ ១ឆ្នាំកន្លះ កាលពីថ្ងៃទី១៧ ខែវិច្ឆិកា ឆ្នាំ២០១៦។ អំណាចសាលក្រមនេះបានបង្គាប់ឲ្យអ្នកស្រីបង់ប្រាក់ចូលរដ្ឋ ៨លានរៀល ក្រោមបទចោទថា ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។ ក្រៅពីនេះ អ្នកស្រីក៏ត្រូវបានតុលាការបង្គាប់ឲ្យសងជំងឺចិត្តលោកនាយករដ្ឋមន្ត្រី ហ៊ុន សែន ១០០រៀលថែមទៀត។
អ្នកស្រី ថាក់ ឡានី បានរត់គេចខ្លួនទៅក្រៅប្រទេស នៅពេលលោក ហ៊ុន សែន រកឃើញថា អ្នកស្រីបានប្រព្រឹត្តកំហុស កាលពីថ្ងៃទី២៩ ខែកក្កដា ឆ្នាំ២០១៦ នៅខេត្តរតនគិរី។ ប្រធានគណបក្សប្រជាជនកម្ពុជា បានផ្ដល់ភារៈឲ្យមេធាវីរបស់លោក គឺលោក គី តិច ធ្វើជាដើមបណ្ដឹង ដោយចោទប្រកាន់ថា សមាជិកព្រឹទ្ធសភាបក្សប្រឆាំងរូបនេះ ចោទប្រកាន់លោកថា ជាអ្នកបញ្ជាឲ្យបាញ់សម្លាប់លោកបណ្ឌិត កែម ឡី គឺជារឿងដែលធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយស និងសេចក្ដីថ្លៃថ្នូររបស់លោក។
យ៉ាងណាក៏ដោយ អ្នកស្រី ថាក់ ឡានី ធ្លាប់ប្រាប់អាស៊ីសេរី ថា អ្នកស្រីមិនបាននិយាយថា លោក ហ៊ុន សែន ជាអ្នកសម្លាប់បណ្ឌិត កែម ឡី នោះទេ ហើយថា ឃ្លិបវីដេអូជិត ២នាទីដែលគេផ្សព្វផ្សាយតាមបណ្ដាញសង្គមនោះ ជាការកាត់តសំឡេងដើម្បីទម្លាក់កំហុសលើអ្នកស្រីតែប៉ុណ្ណោះ។
សវនាការលើអង្គសេចក្ដីលើបណ្ដឹងឧទ្ធរណ៍របស់អ្នកស្រី ថាក់ ឡានី នៅព្រឹកថ្ងៃទី១០ សីហា គឺចំថ្ងៃខួបនៃឃាតកម្មលើលោកបណ្ឌិត កែម ឡី ដែរ។ គិតមកដល់ពេលនេះ មានរយៈពេល ១៣ខែមកហើយ ក្រោយពីឃាតកបាញ់សម្លាប់លោក កែម ឡី កាលពីថ្ងៃទី១០ កក្កដា ឆ្នាំ២០១៦។ ក្រុមគ្រួសារនៅតែចាត់ទុកថា យុត្តិធម៌សម្រាប់អ្នកវិភាគបញ្ហាសង្គម និងនយោបាយរូបនេះ គឺពុំទាន់មាននៅឡើយទេ។
លោក កែម រិទ្ធិសិត ប្អូនប្រុសលោកបណ្ឌិត កែម ឡី អះអាងកាលពីថ្ងៃទី៤ ខែសីហា ថា លោកនឹងរៀបចំសំណើសុំសាលក្រមពីតុលាការក្រុងភ្នំពេញ រឿង ជួប សម្លាប់ ទុកធ្វើជាទុនក្នុងការរៀបចំបណ្ដឹងនៅពេលខាងមុខ ដើម្បីស្វែងរកយុត្តិធម៌ឲ្យបងប្រុសរបស់លោក។ មកដល់ពេលនេះ តុលាការក្រុងភ្នំពេញ នៅពុំទាន់មានតម្រុយណាមួយថ្មីនៅឡើយទេ ជុំវិញការបំបែកសំណុំរឿងជាពីរ អំពីឃាតកម្មលោកបណ្ឌិត កែម ឡី នេះ។
ករណីរឿងក្ដីអ្នកស្រី ថាក់ ឡានី នេះ ប្រធានគ្រប់គ្រងផ្នែកអង្កេតអង្គការលីកាដូ (LICADHO) លោក អំ សំអាត យល់ឃើញថា សវនាការដែលកាត់ទោសដោយកំបាំងមុខបែបនេះ មានន័យថា ភាគីពាក់ព័ន្ធនឹងពុំបានទទួលយុត្តិធម៌តាមរយៈការជំនុំជម្រះនេះទេ៖ «ពេលនិយាយអំពីរឿងយុត្តិធម៌វាទាល់តែភាគីដែលពាក់ព័ន្ធមានវត្តមាននៅក្នុងអង្គសវនាការ ដើម្បីជជែកដេញដោល ជាពិសេសគឺមេធាវីដែលការពារឲ្យជនជាប់ចោទដែលត្រូវការពារ»។
មកដល់ពេលនេះ មានមនុស្សចំនួន ៤នាក់ហើយ ត្រូវជាប់បណ្ដឹងនៅតុលាការ ក្រោយពេលរិះគន់ថា លោក ហ៊ុន សែន និងក្រុមគ្រួសាររបស់លោក ស្ថិតនៅពីក្រោយឃាតកម្មលើលោកបណ្ឌិត កែម ឡី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។