Opens in new windowមន្ត្រីឃ្លាំមើលសិទ្ធិមនុស្សខេត្តក្រចេះ ចោទសមត្ថកិច្ចខេត្តនេះ ថាចាប់ឃុំខ្លួនពលរដ្ឋបីនាក់ខុសនីតិវិធី។ ការចោទប្រកាន់នេះ ធ្វើឡើងបន្ទាប់ពីពលរដ្ឋ ៣នាក់ ត្រូវបានសមត្ថកិច្ចចាប់ខ្លួនកាលពីថ្ងៃទី៣១ សីហា ព្រមទាំងត្រូវបញ្ជូនមកតុលាការ បន្ទាប់ពីពួកគាត់បានប្រកែកតវ៉ា ចំពោះការផាកប្រាក់ពិន័យចំនួន ១លានរៀលដោយមន្ត្រីប៉ូលិសចរាចរណ៍នៅមូលដ្ឋាន។
មន្ត្រីឃ្លាំមើលសិទ្ធិមនុស្សខេត្តក្រចេះ នៅថ្ងៃទី៤ កញ្ញា អំពាវនាវឲ្យសាលាដំបូងខេត្តក្រចេះ ដោះលែងពលរដ្ឋ ៣នាក់ ដែលសមត្ថកិច្ចបានចាប់ខ្លួនកាលពីថ្ងៃទី៣១ សីហា ក្រោមបទចោទថា ប្រើអំពើហិង្សាលើសមត្ថកិច្ច។ ការអំពាវនាវនេះ ធ្វើឡើងនៅពេលដែលពលរដ្ឋ ៣នាក់ ត្រូវបានសាលាដំបូងខេត្តក្រចេះ ឃុំខ្លួនបណ្ដោះអាសន្ននៅពន្ធនាគារខេត្តក្រចេះ នៅឡើយ។
មន្ត្រីសម្របសម្រួលនៃសមាគមអាដហុក (ADHOC) ខេត្តក្រចេះ លោក ឌិន ខន្នី រកឃើញថា ការចាប់ខ្លួនធ្វើឡើងពុំមានដីកាពីតុលាការ ជាការចាប់ខ្លួនខុសច្បាប់ ដ្បិតមិនមែនជាបទល្មើសជាក់ស្តែង។ លោកបន្តថា សមាគមអាដហុក កំពុងធ្វើលិខិតអន្តរាគមន៍ទៅសាលាដំបូងខេត្តក្រចេះ និងស្ថាប័នពាក់ព័ន្ធផ្សេងទៀត ដើម្បីឲ្យដោះលែងពលរដ្ឋចំនួន ៣នាក់ឲ្យនៅក្រៅឃុំ។ លោក ឌិន ខន្នី ចាត់ទុកករណីនេះថា គឺជាការរំលោភសិទ្ធិមនុស្សធ្ងន់ធ្ងរ ហើយការអនុវត្តច្បាប់របស់មន្ត្រីនគរបាល គឺផ្ទុយពីច្បាប់៖ «ករណីខុសហើយ មានច្បាប់ចរាចរណ៍អីណាគ្រាន់តែជិះម៉ូតូ ល្បឿនមិនដល់ ៤០ផង ផាកគាត់ ១លាន មានច្បាប់អីណាផាក យើងឃើញជាក់ស្តែងមែន មានរបួសក្បាលមានរបួសក ហើយនិងរបួសដៃ ដែលគាត់ព័ទ្ធដៃគាត់ទៅក្រោយ ហើយសន្លប់បែកពពុះមាត់យកទៅពេទ្យឆ្លូង»។
មន្ត្រីឃ្លាំមើលសិទ្ធិមនុស្សខេត្តក្រចេះ រកឃើញថា ហេតុផលដែលបង្កឲ្យមានការចាប់ខ្លួននេះ គឺផ្ដើមចេញពីសមត្ថកិច្ចម្នាក់ គឺជាប៉ូលិសចរាចរណ៍ផង ជាប៉ូលិសព្រហ្មទណ្ឌផង ដែលមានឈ្មោះថា ទូច ស៊ីដា ហៅ វែង កំពុងឋិតក្នុងស្ថានភាពស្រវឹង បន្ទាប់មកក៏ឃាត់ម៉ូតូពលរដ្ឋ ព្រមទាំងជំរិតទារប្រាក់ចំនួន ១លានរៀល ដើម្បីជាថ្នូរនៃការដោះលែង។ បន្ទាប់ពីការចាប់ខ្លួនពលរដ្ឋចំនួន ៣នាក់ដោយកងកម្លាំងសមត្ថកិច្ច គឺមានស្លាកស្នាមវាយដំលើពលរដ្ឋរហូតដល់សន្លប់។
ពលរដ្ឋម្នាក់រស់នៅភូមិវាលកន្សែង ឃុំកំពង់ដំរី ស្រុកឆ្លូង លោក ម៉ាក់ វិចិត្រ ជាអ្នកដែលបានដឹងហេតុការណ៍។ លោករៀបរាប់ថា កាលពីរសៀលថ្ងៃទី៣១ សីហា បុរសម្នាក់ឈ្មោះ រិទ មន្នីឧត្តម បានជិះម៉ូតូតាមផ្លូវឌុបក្មេងប្រុស ឋិតនៅឃុំកំពង់ដំរី ស្រុកឆ្លូង តែត្រូវបានប៉ូលិសម្នាក់មានឈ្មោះថា ទូច ស៊ីដា ហៅ វែង បានចេញពីកន្លែងផឹកស៊ី រួចក៏ឃាត់ម៉ូតូ លោក រិទ មន្នីឧត្តម និងពិន័យជាប្រាក់ចំនួន ១លានរៀល ដើម្បីជាការដោះដូរ។ ទោះជាយ៉ាងណាក៏ដោយ ការផាកពិន័យរបស់មន្ត្រីប៉ូលិសរូបនោះ ធ្វើឲ្យម្ចាស់ម៉ូតូបដិសេធ ទើបបង្កឲ្យមានការឈ្លោះប្រកែកគ្នាខ្លាំង ព្រោះមន្ត្រីប៉ូលិសកំពុងឋិតក្នុងស្ថានភាពស្រវឹង។ បន្ទាប់ពីការឈ្លោះប្រកែកគ្នា មេប៉ុស្តិ៍ឃុំកំពង់ដំរី លោក ប៉ែន គន្ធា និងមន្ត្រីនគរបាលមួយចំនួនទៀត បានចាប់ខ្លួនពលរដ្ឋចំនួន ៣នាក់នៅល្ងាចថ្ងៃទី៣១ សីហា និងបញ្ជូនទៅតុលាការ៖ «ប៉ូលិសសព្វថ្ងៃហ្នឹងមើលទៅស្រវឹងស្រាតាមផ្លូវ ដល់ពេលធ្វើបាបប្រជាជនអ៊ីចឹង ដល់ពេលចឹងក្រោយប្រជាជនអ្នកខុសដដែល អ៊ីចឹងមានន័យថា មិនធ្វើឲ្យប្រជាជនទុកចិត្តទេ ប៉ុន្តែប្រជាពលរដ្ឋមិនដឹងរើបម្រាស់ដោយវិធីណាទេ ប៉ូលិសវាស្រវឹងស្រាអត់ដឹងខុសដឹងត្រូវ។ តើវាសមទេស្លៀកខោមួយ មកផាកម៉ូតូតម្លៃរាប់លាន?»។
វិទ្យុអាស៊ីសេរី មិនអាចទាក់ទងសុំការអធិប្បាយពីមេប៉ុស្តិ៍ឃុំកំពង់ដំរី លោក ប៉ែន គន្ធា បានទេនៅថ្ងៃទី៤ កញ្ញា ព្រោះទូរស័ព្ទហៅចូល តែពុំមានអ្នកទទួល។
បច្ចុប្បន្ន ពលរដ្ឋចំនួន ៣នាក់មានឈ្មោះថា រិទ មន្នីឧត្តម សេង មករា និង ហេង ហាក់ ដែលត្រូវជាសាច់ញាតិនឹងគ្នា កំពុងជាប់ឃុំជាបណ្ដោះអាសន្នក្នុងពន្ធនាគារខេត្តក្រចេះ ចំណែកសមាគមអាដហុក គ្រោងនឹងរកមេធាវីការពារក្តីឲ្យពលរដ្ឋទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។