Opens in new windowតុលាការខេត្តស្វាយរៀង សម្រេចឃុំខ្លួនជនជាតិចិន ចំនួន ២២នាក់ នៅថ្ងៃទី៣១ ខែសីហា នេះ ក្រោយចោទប្រកាន់ចំនួន ៥បទល្មើស បន្ទាប់ពីចាប់ឃាត់ខ្លួនកាលពីថ្ងៃទី២៩ ខែសីហា ទាក់ទងការលួចប្រើប្រព័ន្ធប្រព្រឹត្តិកម្មទូរគមនាគមន៍របស់ក្រសួងប្រៃសណីយ៍ ក្នុងបំណងដើម្បីជំរិតទារប្រាក់តាមអ៊ីនធឺណិត។
នាយការិយាល័យព្រហ្មទណ្ឌកម្រិតស្រាលខេត្តស្វាយរៀង លោក កែវ សុថា មានប្រសាសន៍ថា ជនជាតិចិន ទាំង ២២នាក់ ដែលមានស្រីចំនួន ៣នាក់នោះ បានជាប់ចោទពីបទប៉ះពាល់ដល់ការសម្ងាត់នៃការសន្ទនាតាមទូរស័ព្ទ បទចូលទៅដល់ ឬឋិតនៅនឹងប្រព័ន្ធប្រព្រឹត្តិកម្មស្វ័យប្រវត្តិ នៃទិន្នន័យ បទបង្កើតជាឧបសគ្គដល់ដំណើរការនៃប្រព្រឹត្តិកម្មស្វ័យប្រវត្តិនៃទិន្នន័យ បទបញ្ចូល និងលុបបំបាត់ ឬកែប្រែដោយទុច្ចរិតនូវទិន្នន័យ និងបទចូលរួមក្នុងក្រុមប្រមូលផ្តុំ ដើម្បីរៀបចំប្រព្រឹត្តបទល្មើស។
លោកវរសេនីយ៍ទោ កែវ សុថា បញ្ជាក់ថា សាលាដំបូងខេត្តស្វាយរៀង បានចេញដីកាឃុំខ្លួនជនជាប់ចោទទាំង ២២នាក់នោះនៅពន្ធនាគារខេត្តបណ្ដោះអាសន្ន នៅល្ងាចថ្ងៃទី៣១ ខែសីហា នេះ ដើម្បីរង់ចាំជំនុំជម្រះក្តីនៅពេលក្រោយ៖ «បញ្ជូនទៅឃុំទាំងអស់តែម្តងបាទនៅល្ងាចនេះ។ គេសារភាពថា ទី១ គ្នារបស់គេនោះបើកលេងល្បែងតាមប្រព័ន្ធអនឡាញ (Online) ហើយទី២ ជាប់ពាក់ព័ន្ធនឹងការជំរិតតាមប្រព័ន្ធអ៊ីនធឺណិត»។
ជនជាតិចិន ទាំង ២២នាក់ ត្រូវបានសមត្ថកិច្ចឡោមព័ទ្ធចាប់បាននៅក្នុងផ្ទះវីឡាដ៏ស្កឹមស្កៃមួយកន្លែង ស្ថិតនៅក្នុងភូមិតាជោ សង្កាត់ស្វាយតឿ ក្រុងស្វាយរៀង ខេត្តស្វាយរៀង កាលពីថ្ងៃទី២៩ ខែសីហា តាមបណ្ដឹងរបស់ក្រសួងប្រៃសណីយ៍ និងទូរគមនាគមន៍។
សេចក្តីរាយការណ៍ពីសមត្ថកិច្ច ថាម្ចាស់ផ្ទះបានជួលឲ្យជនជាតិចិន ស្នាក់នៅតាំងពីដើមឆ្នាំ២០១៥ ក្នុងតម្លៃ ១.៣០០ដុល្លារក្នុងមួយខែ ហើយជនជាតិចិន មិនអនុញ្ញាតឲ្យអ្នកណាចេញចូលផ្ទះនោះឡើយ សូម្បីតែម្ចាស់ផ្ទះក្តី។
នាយការិយាល័យព្រហ្មទណ្ឌកម្រិតស្រាលខេត្តស្វាយរៀង ឲ្យដឹងថា ម្ចាស់ផ្ទះជួលនោះត្រូវបានតុលាការសម្រេចដោះលែងវិញនៅថ្ងៃដដែលនេះ ព្រោះរកពុំឃើញមានជាប់ពាក់ព័ន្ធជាមួយជនជាប់ចោទទាំងនោះឡើយ ដោយសំអាងលើឯកសារ និងកិច្ចសន្យាផ្ទះជួលត្រឹមត្រូវ។
ក្នុងរយៈពេលប៉ុន្មានឆ្នាំចុងក្រោយនេះ ជនជាតិចិន មកពីកោះតៃវ៉ាន់ និងដីគោក បានយកប្រទេសមួយចំនួនក្នុងតំបន់អាស៊ាន រួមទាំងកម្ពុជា ផង ធ្វើជាទីតាំងសម្រាប់ជំរិតទារប្រាក់ពីជនជាតិចិន ដូចគ្នា តាមប្រព័ន្ធអ៊ីនធឺណិត ប៉ុន្តែពួកគេត្រូវបានកម្លាំងសមត្ថកិច្ចពាក់ព័ន្ធកម្ពុជា បើកការស្រាវជ្រាវចាប់ខ្លួនជាបន្តបន្ទាប់ ទាំងនៅក្នុងរាជធានីភ្នំពេញ និងតាមបណ្ដាខេត្ត ហើយបញ្ជូនទៅកាន់ប្រទេសកំណើតរបស់ពួកគេវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។