Opens in new windowទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បង្ហាញថា ពីមួយឆ្នាំទៅមួយឆ្នាំ កម្ពុជា នៅតែខ្វះអ្នកស្រាវជ្រាវ បើទោះបីជាកម្ពុជា មានវិទ្យាស្ថានសិក្សាស្រាវជ្រាវច្រើនហើយក្តី។
ចំណែកក្រុមយុវជនវិញត្អូញត្អែរថា ពួកគេនៅមានការយល់ដឹងតិចបំផុតពីសារសំខាន់នៃការសិក្សាស្រាវជ្រាវ។ ទន្ទឹមគ្នានេះ ពួកគេស្នើឲ្យរដ្ឋាភិបាល លើកទឹកចិត្តចំពោះស្នាដៃស្រាវជ្រាវឲ្យបានទូលំទូលាយ ដើម្បីបង្កើនចំនួនអ្នកស្រាវជ្រាវនៅកម្ពុជា។
ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បារម្ភថា កង្វះអ្នកស្រាវជ្រាវនឹងអាចឲ្យកម្ពុជា មានកំណើនសេដ្ឋកិច្ចយឺត និងមិនអាចឆ្លើយតបនឹងតម្រូវការសង្គមជាក់ស្តែងបានទាន់ពេលវេលានោះទេ។
ការលើកឡើងរបស់ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ នៅពេលនេះ ត្រូវបានធ្វើឡើងក្នុងវេទិកាស្រាវជ្រាវអភិវឌ្ឍន៍នៅកម្ពុជា កាលពីថ្ងៃទី១៥ ខែកញ្ញា។ វេទិកានេះ មានគោលបំណងកសាងសមត្ថភាព វប្បធម៌ស្រាវជ្រាវ និងចែករំលែកបទពិសោធន៍ និងចំណេះដឹងស្រាវជ្រាវ ដើម្បីកាត់បន្ថយគម្លាតរវាងការស្រាវជ្រាវ និងគោលនយោបាយ។
ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ លោក ម៉ី កល្យាណ មានប្រសាសន៍ថា បើទោះបីជាកម្ពុជា មានកន្លែងសិក្សាស្រាវជ្រាវគ្រប់គ្រាន់ ហើយរដ្ឋាភិបាលព្យាយាមតម្រែតម្រង់ផ្លូវឲ្យសិស្ស ងាកមកសិក្សាស្រាវជ្រាវឲ្យបានច្រើនក្តី ផ្ទុយទៅវិញ កម្ពុជា មានអ្នកស្រាវជ្រាវមានតិចតួចនៅឡើយ។ លោកថា បញ្ហានេះបណ្ដាលមកពីកត្តាបុគ្គលមិនសូវចាប់អារម្មណ៍ កត្តាប្រាក់ខែ និងគុណភាពរបស់វិទ្យាស្ថានស្រាវជ្រាវមិនមានស្តង់ដារ។
ជាងនេះទៀត ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ រូបនេះ ជំរុញឲ្យយុវជនស្រាវជ្រាវពីបញ្ហាតូចៗឲ្យបានច្រើន កុំចាំតែរឿងរ៉ាវធំដុំ និងចាំតែមានថវិកានោះ ព្រោះការសិក្សាស្រាវជ្រាវមានសារសំខាន់សម្រាប់ការអភិវឌ្ឍសង្គមជាតិ៖ «យុវជនខ្មែរចាប់ផ្ដើមអនុវត្តការងារស្រាវជ្រាវទាំងរឿងបច្ចេកទេស ធ្វើយ៉ាងម៉េច ចឹងបើយើងអត់ធ្វើការសិក្សាស្រាវជ្រាវ យើងមិនដឹងនោះទេ ហើយមិនចាំបាច់តែអ្នកវិទ្យាសាស្ត្រ ចឹងតូចតាចក៏ស្រាវជ្រាវ អាធំក៏ស្រាវជ្រាវ»។
សាស្ត្រាចារ្យ និងជាអ្នកស្រាវជ្រាវមកពីសាកលវិទ្យាល័យភូមិន្ទកសិកម្ម លោក សេង វេយ៉ាណែត បាននិយាយដែរថា លោកទទួលស្គាល់ថា កម្ពុជា នៅតែមានចំនួនអ្នកស្រាវជ្រាវតិច ពិសេសអ្នកស្រាវជ្រាវវ័យក្មេង។ ជាងនេះទៀត លោកថា មនុស្សម្នាក់ៗចាំបាច់ត្រូវមានចំណេះដឹងស្រាវជ្រាវ ព្រោះការស្រាវជ្រាវជួយជំរុញឲ្យសង្គមទទួលបានភាពច្បាស់លាស់ និងឆ្លើយតបទៅនឹងសេចក្តីត្រូវការរបស់មនុស្ស។ លោកស្នើឲ្យយុវជន ត្រូវតែចាប់ផ្តើមអនុវត្តទាំងទ្រឹស្ដី និងការស្រាវជ្រាវ៖ «ការស្រាវជ្រាវវាផ្តល់ឲ្យយើងនូវគំនិតទស្សនៈ ការបត់បែន ហើយនឹងការបើកចំហនូវគំនិតរបស់យើង ដើម្បីឲ្យយើងអាចប្រកួតប្រជែងទីផ្សារសេដ្ឋកិច្ចជាតិផង»។
ចំណែកឯយុវជនដែលបានចូលរួមវេទិកានេះ និងជាសិស្សត្រៀមបញ្ចប់និក្ខេបបទ កញ្ញា ព្រំ សោភា បាននិយាយថា កញ្ញាចាប់អារម្មណ៍ការងារស្រាវជ្រាវ ប៉ុន្តែកន្លងមកមិនសូវមានអ្នកជំនាញផ្នែកនេះ ចែករំលែកបទពិសោធន៍ពីរឿងនេះបានទូលំទូលាយប៉ុន្មាននោះទេ ហើយកញ្ញាស្នើឲ្យរដ្ឋាភិបាល និងស្ថាប័នពាក់ព័ន្ធ យកចិត្តទុកដាក់លើកទឹកចិត្ត គាំទ្រស្នាដៃស្រាវជ្រាវយុវជន ហើយរដ្ឋាភិបាលគួរតែផ្តល់ជាថវិកា និងទីកន្លែងបច្ចេកទេស សម្ភារៈមានស្តង់ដារ ដើម្បីបង្កលក្ខណៈងាយស្រួលលើផ្នែកស្រាវជ្រាវដល់និស្សិត៖ «យុវជនយើងគាត់មានការស្រាវជ្រាវច្រើន ប៉ុន្តែបែរជាអ្វីដែលគាត់ធ្វើការស្រាវជ្រាវរួចហើយ បាត់ទៅៗ ចឹងសំខាន់ណាស់ការលើកទឹកចិត្ត»។
ទោះជាយ៉ាងណា វេទិកាស្រាវជ្រាវអភិវឌ្ឍន៍នៅកម្ពុជា មិនទាន់បញ្ជាក់ច្បាស់ពីចំនួនអ្នកស្រាវជ្រាវនៅកម្ពុជា នៅឡើយ ខណៈទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានបង្ហាញបញ្ហាកង្វះអ្នកស្រាវជ្រាវនៅកម្ពុជា។ អ្នកចូលរួមជាង ២០០នាក់ដែលភាគច្រើនជាយុវជនមកពីសាកលវិទ្យាល័យ និងអ្នកស្រាវជ្រាវវ័យក្មេង ក៏បានស្នើឲ្យរដ្ឋាភិបាលមានគោលនយោបាយច្បាស់លាស់ផ្នែកស្រាវជ្រាវ ដើម្បីឲ្យកម្ពុជា ដើរទាន់សមាគមសេដ្ឋកិច្ចអាស៊ាន នៅចុងឆ្នាំ២០១៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។