༄༅༎འཛམ་གླིང་གི་འགྱུར་འགྲོས་ལ་བལྟ་ཚུལ་ཇི་ཡིན་དྲིལ་བསྒྲགས་ཆེད་རྒྱ་ནག་གཞུང་གིས་བདུན་ཕྲག་འདིའི་རེས་གཟའ་ལྷག་པ་ནས་ཡོ་རོབ་ཀྱི་སྣ་ཚོགས་ཁྲོམ་རའི་ནང་བརྙན་འཕྲིན་རྒྱང་སྲིང་བྱེད་འགོ་འཛུགས་རྒྱུ་ཡིན་པ་རེད།

རྒྱ་ནག་གཞུང་གི་གཞུང་འབྲེལ་ཤིན་ཧཱ་གསར་འགྱུར་ལས་ཁང་དང་ཡོ་རོབ་ཀྱི་རྒྱང་སྲིང་ལས་ཁང་ཁག་ཅིག་མཉམ་སྦྲེལ་ཐོག་ནས་ཉིན་ལྟར་ཆུ་ཚོད་གཅིག་དང་ཕྱེད་ཀའི་རིང་བརྙན་འཕྲིན་རྒྱང་སྲིང་བྱ་རྒྱུ་ཡིན་ཞིང་རྒྱང་སྲིང་བྱ་རྒྱུའི་བརྙན་འཕྲིན་ཁག་རྒྱ་ནག་གཞུང་གི་ཡོ་རོབ་ཀྱི་ཡུལ་གྲུ་ཁག་ཏུ་ཡོད་པའི་གཞུང་ཚབ་ཁང་སོ་སོའི་མདུན་དང་དེ་མིན་སྣ་ཚོགས་ཁྲོམ་ར་ཁག་གི་བརྙན་འཕྲིན་ནང་སྟོན་རྒྱུ་ཡིན་པ་རེད། འོན་ཀྱང་ཡོ་རོབ་ཀྱི་སྣ་ཚོགས་ཁྲོམ་ར་ཁག་ནས་ས་གནས་གང་དུ་སྟོན་མིན་དང་རྒྱ་ནག་གཞུང་གིས་ཁྲོམ་རའི་བདག་པོར་བརྙན་འཕྲིན་སྟོན་གླ་ཇི་ཙམ་སྤྲོད་མིན་ཐད་ཞིབ་ཕྲ་གསལ་བཤད་གནང་མེད་པ་རེད།

རྒྱ་ནག་གཞུང་གིས་གསར་འགྱུར་བརྒྱུད་ལམ་གྱི་ནུས་པ་ཤེས་རྟོགས་བྱས་ནས་རྒྱལ་སྤྱིའི་ནང་རྒྱ་ནག་གི་དབང་ཤུགས་དང་ཤུགས་རྐྱེན་ཇེ་ཆར་གཏོང་ཐབས་སུ་རྒྱ་ནག་གཞུང་གིས་གསར་འགྱུར་བརྒྱུད་ལམ་བཀོལ་སྤྱོད་བྱ་རྒྱུ་ཡིན་ཞིང་རྒྱ་ནག་གཞུང་གི་གཞུང་འབྲེལ་དྲིལ་བསྒྲགས་བརྙན་འཕྲིན་སི་སི་ཊི་ལྦི་ཞེས་པ་དེ་འཛམ་གླིང་ཁྱོན་ཡོངས་ནང་སྔར་བས་རྒྱ་ཁྱབ་ཆེ་རུ་གཏོང་རྒྱུར་གཞུང་གྲོན་ཨ་སྒོར་ཐེར་འབུམ་དྲུག་དང་ཕྱེད་ལྷག་ཙམ་སྔོན་རྩིས་གཏན་འབེབས་གནང་ཡོད་པ་རེད། ཡང་འཛམ་གླིང་ཡུལ་གྲུ་གང་གི་ནང་རྒྱ་ནག་གཞུང་གི་བརྙན་འཕྲིན་རྒྱ་སྐྱེད་བྱེད་མིན་སོགས་ཞིབ་ཕྲའི་གནས་ཚུལ་ད་ལྟ་ཕྱིར་བསྒྲགས་གནང་མེད་པ་རེད། རྒྱ་ནག་གུང་ཁྲན་ཏང་གིས་ལོ་ངོ་༧༥སྔ་རོལ་དུ་གུང་ཁྲན་ཏང་གི་དྲིལ་བསྒྲགས་ལས་དོན་ཁོ་ནའི་ཆེད་བཙུགས་པའི་ཤིན་ཧཱ་གསར་འགྱུར་བརྒྱུད་ལམ་ལས་ཁང་གིས་རྒྱ་ནག་རྒྱལ་ཡོངས་ནང་གསར་འགྱུར་འགྲེམས་སྤེལ་དང་མིག་སྟོན་ཇི་བྱེད་སྟངས་འཛིན་ཡན་པོར་མ་སོང་བར་བྱས་དང་བྱེད་བཞིན་པ་རེད།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.