༄༅༎བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནང་ཆོས་དང་དཔལ་འབྱོར་འཛིན་སྐྱོང་བཅས་ནི་ཕན་ཚུན་འབྲེལ་ཆགས་ཡིན་པ་དང་དཔལ་འབྱོར་དཀའ་ཉེན་ཆེ་དུས་འདི་ནི་ཀུན་སྤྱོད་དཀའ་ཉེན་ཆེ་དུས་ཡིན་པར་ཡིད་ཆེས་གནང་གི་ཡོད་སྐོར་བཀའ་གནང་འདུག

འཇར་མིན་གྱི་རྒྱལ་ཡོངས་ཉིན་རེའི་གསར་ཤོག་གི་དཔལ་འབྱོར་དང་དངུལ་རྩིས་ཁང་ཁུངས་ཀྱི་དོན་གནད་རྩོམ་བྲིས་པ་ཧོརྒ་ཨེ་གེན་ཌོཕ་ཡིས་བཞུགས་སྒར་དུ་བཅར་ཏེ་༸གོང་ས་མཆོག་ལ་བཀའ་འདྲི་ཁག་ཅིག་ཞུས་ཡོད་ཅིང་དེ་ཡང་རང་དབང་ཅན་ཁྲོམ་རའི་ལམ་ལུགས་དཀའ་ངལ་འཕྲད་བཞིན་པ་དང་དཔལ་འབྱོར་ཁྲིམས་སྒྲིག་གསར་བཟོར་ཐུགས་འདོད་གནང་གི་མེད་ན་བཅོས་ཐབས་གང་ཡོད་ཅེས་པའི་བཀའ་འདྲི་ཞུས་པའི་ལན་དུ་༸གོང་ས་མཆོག་གིས་སྐྱོ་བོ་ཀུན་གྱིས་འགན་ཁུར་ལེན་དགོས་པ་དང་ད་ཡོད་དཔལ་འབྱོར་དཀའ་ཉེན་ཆེ་དུས་འདི་ནི་དཔལ་འབྱོར་ཁོ་ན་མིན་པར་འགྲོ་བ་མིའི་རིན་ཐང་དཀའ་ཉེན་ཆེ་དུས་ཤིག་ཡིན་པར་ཡིད་ཆེས་གནང་གི་ཡོད་ཅེས་དང་ཡང་ཆུང་བྱིས་པའི་དུས་ནས་སྔོན་འགྲོའི་སློབ་གྲྭ་ནས་འགོ་བཙུགས་ཏེ་རྒྱལ་རབས།རྩིས་རིག།སྐད་ཡིག།དཔལ་འབྱོར་རིག་གནས་སོགས་དང་མཉམ་དུ་བཟང་སྤྱོད་ཀྱི་སློབ་གསོ་སྤྲོད་གལ་ཆེ་བའི་བཀའ་ལན་གནང་འདུག ཡང་འགན་ཁུར་ཡོད་པའི་ཁྲོམ་རའི་རང་བཞིན་ཅན་གྱི་དཔལ་འབྱོར་ལམ་ལུགས་གསར་འཛུགས་ཡོང་བར་དུས་འགོར་ཡོང་གཞི་ཡོད་པ་སྨོས་མེད་ཀྱང་དཔལ་འབྱོར་ལམ་ལུགས་མྱུར་དུ་ཤར་རྒྱུར་ཤུགས་རྐྱེན་ཐེབས་སྲིད་པ་རེད། གཞི་རྩའི་ཕྱི་དངོས་པོའི་དཔལ་འབྱོར་ནུས་པ་ཁོ་ནས་བདེ་སྐྱིད་འགྲུབ་མི་ཐུབ་ཅིང་ནང་སེམས་ཀྱི་བྱམས་པ་དང་བརྩེ་བ་དང་དྲང་བདེན་ཡིད་ཆེས་དང་གྲོགས་པོའི་འདུ་ཤེས་ངང་གནས་ན་བདེ་སྐྱིད་ཆེ་བ་འབྱུང་ཐུབ་པའི་སྐོར་གསུངས་གནང་འདུག ཡང་བོད་མིའི་ཆབ་སྲིད་ཀྱི་འགོ་ཁྲིད་ནི་མི་མང་ནས་ཐད་ཀར་འོས་འདེམས་བྱེད་ཀྱི་ཡོད་པ་དང་ཆོས་ཕྱོགས་ཀྱི་རྒྱལ་མཆོག་སྐུ་ཕྲེང་བཅོ་ལྔ་པ་དགོས་གལ་ཡོད་མིན་བདོ་མི་མང་གིས་ཐག་གཅོད་གནང་དགོས་པ་ཡིན་ཞེས་བཀའ་བསྩལ་འདུག དེ་བཞིན་༸གོང་ས་མཆོག་འཛམ་གླིང་གི་ཡུལ་གྲུ་དུ་མར་ཇི་ལྟར་གསོལ་འདེབས་ཞུས་དོན་བཞིན་ཆིབས་བསྒྱུར་གནང་སྟེ་བོད་དང་བོད་མིའི་བདེ་དོན་མ་ཟད་འགྲོ་བ་མིའི་རིགས་ཀྱི་ཕན་བདེ་འགྲུབ་པའི་ལམ་བཟང་སྟོན་གྱི་ཡོད་པའི་སྐོར་ཡང་གསལ་བཤད་གནང་འདུག ཕྱོགས་མཚུངས་རྒྱ་ནག་གི་དཔལ་འབྱོར་གོང་འཕེལ་འགྲོ་བཞིན་པའི་ཐད་དེང་རྒྱ་ནག་གུང་གྲན་ཏང་གི་འགོ་ཁྲིད་ཚོས་དཔལ་འབྱོར་དང་སྟོབས་ཤུགས་ཁོ་ན་བསམ་བློ་གཏོང་གི་ཡོད་ཅིང་དེ་ནི་གཏོར་བཤིག་རང་བཞིན་ལྡན་པ་རེད་ཅེས་༸གོང་ས་མཆོག་གིས་བཀའ་གནང་འདུག།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.