༄༅༎འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་གྱི་བལ་ཡུལ་གྱི་སྐུ་ཚབ་ཚོགས་པ་ཞིག་བཞུགས་སྒར་རྡ་རམ་ས་ལར་འཚམས་འདྲིར་ཕེབས་ཏེ་བཙན་བྱོལ་བོད་མི་ཚོར་གདུང་སེམས་མཉམ་སྐྱེས་ཡོད་པ་དང་བལ་ཡུལ་ནང་གནས་སྡོད་བོད་མིའི་བཙན་བྱོལ་བ་ཚོའི་འགྲོ་བ་མིའི་ཐོབ་ཐང་ཡར་རྒྱས་གཏོང་རྒྱུར་རོགས་སྐྱོར་བྱ་རྒྱུའི་གསལ་བསྒྲགས་སྤེལ་ཡོད་པ་རེད།

དེ་ཡང་ཕ་ཡུལ་ཞེས་པའི་འཕྲིན་གཏོང་དྲ་རྒྱའི་གསར་འགྱུར་ཐོག་ལ་ད་རེས་བཞུགས་སྒར་རྡ་རམ་ས་ལར་འཚམས་འདྲིར་ཕེབས་པའི་བལ་ཡུལ་ནས་འགྲོ་བ་མིའི་ཐོབ་ཐང་གི་སྐུ་ཚབ་ཚོགས་པ་དེ་ནི་བལ་ཡུལ་གྱི་ནུབ་ཕྱོགས་པོ་ཀ་རཱ་ས་གནས་ནང་རྟེན་གཞི་བྱེད་པའི་གཞུང་འབྲེལ་མ་ཡིན་པའི་ཚོགས་པ་ཞིག་ཡིན་ཞིང་ཁོང་ཚོས་འགྲོ་བ་མིའི་ཐོབ་ཐང་ཡར་རྒྱས་གཏོང་བའི་ལས་དོན་ནང་དངོས་སུ་ཞུགས་པ་དང་བལ་ཡུལ་གྱི་འགྲོ་བ་མིའི་ཐོབ་ཐང་ཚོགས་པའི་ལྷན་དུ་འགྲོ་བ་མིའི་ཐོབ་ཐང་ཡར་རྒྱས་ཐོག་མཉམ་ལས་གནང་མཁན་ཞིག་ཡིན་པ་རེད། ཁོང་ཚོས་ད་རེས་བཙན་བྱོལ་བོད་གཞུང་གི་ལྟེ་གནས་བཞུགས་སྒར་རྡ་རམ་ས་ལར་འཚམས་འདྲི་ཕེབས་པ་དེ་ནི་བཙན་བྱོལ་བོད་མི་ཚོའི་གནས་སྟངས་ཤེས་རྟོགས་ཡོང་ཐབས་དང་བོད་ཀྱི་གནད་དོན་ཐོག་རྒྱབ་སྐྱོར་བྱེད་པའི་ལས་དོན་གོམ་པ་དང་པོ་ཡིན་པའི་འགྲེལ་བརྗོད་བྱས་ཡོད་ཅིང་སྐུ་ཚབ་ཚོགས་པ་དེའི་ནང་དུ་ཚོགས་མི་བཅུ་ཡོད་པ་དང་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་གྱི་རྩོམ་བྲིས་པ་དང་གསར་འགོད་པ།ཆེད་ལས་མཁས་དབང༌།སྤྱི་ཚོགས་ཀྱི་བདེ་དོན་ཐོག་ཕྱག་ལས་གནང་མཁན་སོགས་ལས་གནས་མི་འདྲ་བ་ཡིན་པ་དང་ཁ་ས་སྔ་དྲོ་ཕོ་བྲང་དུ་བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་ཏེ་༸གོང་ས་མཆོག་གི་བཀའ་སློབ་གནང་ཡོད་པ་རེད། ད་དུང་བཙན་བྱོལ་བོད་མི་དམངས་ཀྱི་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་དང་དྲིལ་བསྒྲགས་བཀའ་བློན་ལྕམ་སྟག་ལྷ་སྐལ་བཟང་དབྱངས་སྐྱིད་ལགས་གཙོས་པའི་བོད་གཞུང་གི་འགོ་ཁྲིད་ཁག་ཅིག་དང་མཇལ་འཕྲད་ཞུས་པ་དང་རེས་གཟའ་ཉི་མའི་ཉིན་བཙན་བྱོལ་བོད་མི་དང་ཁོང་ཚོའི་བར་ལ་བོད་ཀྱི་གནད་དོན་ཐོག་གོ་རྟོགས་སྤེལ་བའི་གྲོས་མོལ་ནང་མཉམ་ཞུགས་གནང་བ་མ་ཟད་ཁོང་ཚོའི་ངོས་ནས་བཟོ་སྐྲུན་བྱས་པའི་བལ་ཡུལ་མི་དམངས་ཚོར་བོད་ཀྱི་གནད་དོན་གོ་རྟོགས་སྤེལ་ཐབས་དང་དེ་བཞིན་བལ་ཡུལ་ནང་གི་བོད་མི་བཙན་བྱོལ་བ་ཚོའི་སྐོར་གྱི་དངོས་ཤུས་གློག་བརྙན་གཟིགས་འབུལ་ཞུས་ཡོད་པ་རེད།

ཁ་ས་སྐུ་ཚབ་ཚོགས་པས་གསར་འགོད་གསལ་བསྒྲགས་ཤིག་འགྲེམས་སྤེལ་བྱས་ཏེ་ང་ཚོས་ད་རེས་༸གོང་ས་ཏཱ་ལའི་བླ་མ་མཆོག་དང་བཙན་བྱོལ་བོད་གཞུང་གི་དབུ་ཁྲིད་ཁག་ཅིག་དང་མཇལ་འཕྲད་ཞུས་པ་དེ་ནི་ལོ་རྒྱུས་ཀྱི་གལ་འགངས་ཆེན་པོ་ཞིག་ལ་ངོས་འཛིན་ཞུ་གི་ཡོད། ང་ཚོ་བལ་ཡུལ་དུ་ཕྱིར་ལོག་བྱས་པའི་རྗེས་བལ་ཡུལ་གཞུང་ཐོག་གནོན་ཤུགས་སྤྲོད་རྒྱུ་དང་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་བྱ་སྤྱོད་མཚམས་འཇོག་ཡོང་ཐབས་ལ་བལ་ཡུལ་མི་དམངས་ཚོའི་རྒྱབ་སྐྱོར་སྐུལ་སློང་བྱ་རྒྱུ་ཡིན་ཞེས་གསུང་ཡོད་པ་རེད།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.