༄༅༎ཕྱི་ལོ་ ༡༩༡༤ ཕྱི་ཟླ་བདུན་པའི་ཚེས་ ༣ ཉིན་བོད་དང་རྒྱ་གར་དབྱིན་ཇིའི་གཞུང་ དེ་བཞིན་རྒྱ་ནག་བཅས་ཀྱི་སྐུ་ཚབ་དབར་ཡོངས་གྲགས་སུ་སིམ་ལའི་ཆིངས་ཡིག་ཅེས་པ་དེ་བཞག་སྟེ་ ལོ་ ༩༤ འཁོར་བའི་དུས་དྲན་རྗེས་དྲན་དང་ ཆིངས་ཡིག་དེའི་མཇུག་འབྲས་ཀྱི་ཤུགས་རྐྱེན་ཇི་བྱུང་སྐོར་ རྒྱ་གར་གྱི་རྒྱལ་ས་ལྡི་ལིའི་ནང་ལྷན་ཚོགས་ཤིག་བསྐོར་ཚོགས་གནང་འདུག

ལྷན་ཚོགས་འདིའི་ཐོག་ཇཧ་ལྦར་ལལ་ ནེཧ་རུ་མཐོ་སློབ་ཁང་གི་སྤྱི་ཚོགས་ཤེས་ཡོན་སྡེ་ཚན་གྱི་སློབ་དཔོན་སྐུ་ཞབས་ ཨ་ནན་ཀུ་མའར་ དང་ གཞུང་ཚབ་ཟུར་པ་ རྡ་ལིབ་མེ་ཊ་ སོགས་ཆབ་སྲིད་དང་ཁྲིམས་ལུགས་མཁས་པའི་མི་སྣ་ཁག་ཅིག་ཆེད་ཕེབས་གནང་འདུག

ཕྱི་ལོ་ ༡༩༡༤ ལོར་དབྱིན་ཇིའི་རྒྱ་གར་གཞུང་གི་དྲུང་ཆེ་ ཧེན་རི་མེཀ་མེན་ དང་ བོད་ཀྱི་བློན་ཆེན་བཤད་སྒྲ་ དཔལ་འབྱོར་རྡོ་རྗེ་ རྒྱ་ནག་གི་སྐུ་ཚབ་ ཨི་ལྦན་ཁྲེན་ བཅས་སིམ་ལར་མཇལ་འཛོམས་གནང་སྟེ་ དབྱིན་ཇི་དང་རྒྱ་ནག་གི་སྐུ་ཚབ་གཉིས་དབར་དབྱིན་ཇིའི་གཞུང་གིས་བོད་འདི་རྒྱ་ནག་གི་མིང་ཙམ་གྱི་ཆ་ཤས་ཤིག་ཡིན་པར་ངོས་འཛིན་བྱ་རྒྱུ་དང་ འོན་ཀྱང་རྒྱ་ནག་གིས་བོད་ཀྱི་འཛིན་སྐྱོང་ཐད་ཐེ་བྱུས་བྱེད་མི་ཆོག་རྒྱུ་ཞེས་སོགས་འཁོད་ཆིངས་དོན་ཞིག་ལ་མིང་རྟགས་བཀོད་ཡོད་པ་རེད་ ལྷག་པར་དུ་རྒྱ་གར་གཞུང་གིས་ད་ལྟ་ཡང་ རྒྱ་གར་དང་བོད་ཀྱི་ས་མཚམས་ཀྱི་ས་ཐིག་འདི་སྐབས་དེ་དུས་གཏན་འབེབས་བྱས་པ་དེ་གར་ངོས་འཛིན་བྱེད་བཞིན་ཡོད་པ་དང་ རྒྱ་ནག་གཞུང་གིས་ས་ཐིག་དེར་ངོས་འཛིན་བྱེད་ཀྱི་མེད་སྟབས་ རྒྱ་དཀར་ནག་གཉིས་དབར་གྱི་ས་མཚམས་ཀྱི་དཀའ་རྙོག་དེ་ད་དུང་ཡང་སེལ་ཐུབ་ཀྱི་མེད་པ་རེད།