༄༅༎ཕྱི་ཟླ་བདུན་པའི་ཚེས་དྲུག་རེས་གཟའ་ཟླ་བའི་ཉིན་བོད་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་༧༤ལ་ཕེབས་པའི་སྐུའི་འཁྲུངས་སྐར་ཉིན་མོར་རྒྱ་གར་བོད་ཀྱི་གྲོགས་པོ་ཚོགས་པས་ལྷོ་ཕྱོགས་མའེ་སོར་ཁུལ་བོད་ཀྱི་བདེན་པའི་གོ་རྟོགས་ཐོབ་པའི་ཉིན་མོ་སྲུང་བརྩི་ཞུས་གནང་རྒྱུ་ཡིན་འདུག

རྒྱ་གར་བོད་ཀྱི་གྲོགས་པོ་ཚོགས་པས་རྒྱ་གར་ལྷོ་ཕྱོགས་ཁུལ་གྱི་བོད་དོན་རྒྱབ་སྐྱོར་ཚོགས་པའི་ཚབ་ཞུས་ཏེ་གོང་ཞུས་ཉིན་མོ་དེ་སྲུང་བརྩི་གནང་རྒྱུ་ཡིན་ཞིང་རྒྱ་གར་བོད་ཀྱི་གྲོགས་པོ་ཚོགས་པའི་ཚོགས་གཙོ་དམག་དཔོན་ཟུར་པ་ཨེཇ་ར་ཇ་གོ་པ་ལས་གསར་འགོད་པ་ཚོར་བོད་ཀྱི་བདེན་པའི་གནས་ཚུལ་སྐོར་གོ་རྟོགས་སྤེལ་རྒྱུའི་དམིགས་ཡུལ་གཙོ་བཟུང་ཐོག་ནས་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་ཉིན་བོད་དོན་གོ་རྟོགས་སྤེལ་པའི་ཉིན་མོ་སྲུང་བརྩི་གནང་འཆར་ཡོད་པའི་སྐོར་གསུངས་འདུག ཡང་ཁོང་གིས་བོད་དེ་བཞིན་རྒྱ་དཀར་ནག་གཉིས་དབར་གྱི་བར་གནས་མངའ་ཁུལ་ཞིག་ཡིན་པའི་ཆ་ནས་རྒྱ་གར་གྱི་རྒྱལ་སྲུང་གནས་བབས་ཐད་གནད་འགག་ཆེན་པོ་ཆགས་ཀྱི་ཡོད་སྐོར་འགྲེལ་བརྗོད་གནང་འདུག

རྒྱ་གར་གྱི་སྦར་ཊི་ཡ་ཇ་ན་ཊ་ཚོགས་པའི་གྲོས་ཚོགས་འཐུས་མི་སྐུ་ཞབས་སི་ཐོན་ཏ་རྡར་ཡ་ཡིས་རྒྱ་གར་གྱིས་བོད་དོན་ཐད་ཐུགས་འཁུར་ཆེ་བཞེས་ཀྱིས་རྒྱ་ནག་གི་བཙན་འོག་ནས་བོད་ལ་རང་དབང་ཐོབ་ཐབས་ཀྱི་རྒྱབ་སྐྱོར་རོགས་རམ་གནང་དགོས་རྒྱུ་དང་རྒྱལ་སྤྱིའི་སྤྱི་ཚོགས་ཀྱིས་བོད་ཀྱི་གནད་དོན་ལ་དམ་འཛིན་ཡག་པོ་གནང་གི་མེད་པར་བརྟེན་རྒྱ་གར་མང་ཚོགས་ཀྱིས་བོད་མིའི་རང་དབང་འཐབ་རྩོད་ཀྱི་ལས་འགུལ་དེ་སྣེ་འཁྲིད་ངེས་པར་བྱ་གལ་ཆེ་སྐོར་གསུངས་ཏེ་རྒྱ་གར་གྱིས་འཛམ་གླིང་མཉམ་འབྲེལ་རྒྱལ་ཚོགས་ནང་བོད་ཀྱི་གནད་དོན་སྐོར་གླེང་སློང་ཙམ་ཡང་གནང་མེད་ལུགས་འགྲེལ་བརྗོད་གནང་བཞག

རྒྱ་གར་ལྷོ་ཕྱོགས་མའེ་སོར་མངའ་ཁུལ་དུ་ཇག་མོ་ཧན་པེ་ལེ་སི་ཞེས་པའི་ཚོགས་ཁང་ཆེན་མོའི་ནང་གོ་སྒྲིག་གནང་རྒྱུའི་བོད་དོན་གོ་རྟོགས་སྤེལ་བའི་ཉིན་མོ་སྲུང་བརྩིའི་འདུ་འཛོམས་ཐོག་ལྷོ་ཕྱོགས་ཀྱི་གསར་འགོད་པ་ཨེསི་གུ་རུ་མུར་ཐི་དང་སུ་ལྦ་མི་མུཀ་ཏི་རྡ་ནན་རྡ་རྣམ་གཉིས་ཀྱིས་གཏམ་བཤད་གནང་རྒྱུ་ཡིན་པའི་གནས་ཚུལ་ཐོན་འདུག།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.