༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་པ་ཆབ་སྲིད་ཀྱི་དོན་དུ་དུས་སྐབས་དང་མཐུན་པའི་དམངས་གཙོའི་བཅོས་བསྒྱུར་གྱི་དགོངས་གཞི་ཟབ་མོ་བཞེས་ཕྱོགས་སྐོར་ནིའུ་ཛི་ལེན་དྲི་ཧེ་རལ་དྲི་གསར་ཤོག་ཐོག་བསྔགས་བརྗོད་ཀྱི་དཔྱད་གཏམ་སྤེལ་འདུག

དེ་ཡང་གོང་གསལ་གསར་ཤོག་ཐོག་གསར་འགོད་པ་ག་ལྦེན་ཌ་ཡར་ཞུ་བས་དཔྱད་གཏམ་སྤེལ་བའི་ནང་ཏཱ་ལའི་བླ་མ་མཆོག་གིས་དམངས་གཙོའི་ལམ་སྲོལ་ཐོག་ནས་མི་མང་གི་ཐད་ཀར་འོས་འདེམས་བྱེད་པའི་ཆབ་སྲིད་ལམ་སྲོལ་བསྐྲུན་ཐབས་གནང་གི་ཡོད་པ་དང་དེ་ནི་ཕྱོགས་གཅིག་ནས་བོད་མིའི་སྤྱི་ཚོགས་ནང་ཚད་ལྡན་དམངས་གཙོའི་ལམ་སྲོལ་དར་སྤེལ་འབྱུང་ཐབས་དང་ཆབས་ཅིག་ཆོས་སྲིད་ཟུང་འབྲེལ་གྱི་ལམ་སྲོལ་དབྱེ་འབྱེད་གནང་ཐབས་ཡིན་པའི་སྐོར་འགྲེལ་བརྗོད་བྱས་འདུག དམིགས་ཀར་གོང་གསལ་གསར་འགོད་པའི་དཔྱད་གཞིའི་ནང་༸གོང་ས་ཏཱ་ལའི་བླ་མས་བོད་ཀྱི་སྲོལ་རྒྱུན་ནང་ཆོས་སྲིད་ཟུང་འབྲེལ་གྱི་གཞུང་སྲིད་དབྱེ་འབྱེད་གནང་རྒྱུའི་དགོངས་གཞི་དེ་བཞིན་མ་འོངས་ཏཱ་ལའི་བླ་མའི་ཡང་སྲིད་ངོས་འཛིན་ཞུ་ཕྱོགས་ནང་རྒྱ་ནག་གཞུང་གིས་ཐེ་གཏོགས་གང་ཉུང་འབྱུང་ཐབས་ཀྱི་མཛད་བྱུས་ཡིན་པ་རེད། ༸གོང་ས་ཏཱ་ལའི་བླ་མ་མཆོག་གིས་བཙན་བྱོལ་བོད་མིའི་ཆབ་སྲིད་ཀྱི་དབུ་འཁྲིད་དེ་མང་ཚོགས་ཀྱི་འོས་འདེམས་བྱས་པའི་བཀའ་བློན་ཁྲི་པར་ངོས་འཛིན་ཞུ་དགོས་ལུགས་བོད་མི་མང་སྤྱི་འཐུས་ལྷན་ཚོགས་ནང་སྔ་རྗེས་བཀའ་སློབ་ལན་མང་གནང་ཡོད་པ་དང་གནད་དོན་དེ་དག་ནན་བཤད་ཀྱི་དོན་དུ་སྔ་ལོ་བཞུགས་སྒར་རྡ་རམ་ས་ལར་སྐོང་ཚོགས་གནང་པའི་བོད་མིའི་དམིགས་བསལ་ཚོགས་ཆེན་སྐབས་སླར་ཡང་ནན་ཏན་བཀའ་སློབ་སྩལ་ཡོད་པ་རེད། གསར་འགོད་པ་གེ་ལྦེན་ཌ་ཡར་ཡིས་ཉེ་ལམ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་སྤྱི་ཚོགས་ནང་དམངས་གཙོའི་ལམ་སྲོལ་ཐོག་ནས་མི་མང་གི་ཐད་ཀར་འོས་འདེམས་བྱེད་པའི་ཆབ་སྲིད་ལམ་སྲོལ་དགོས་གལ་ཆེ་བའི་སྐོར་བརྙན་འཕྲིན་བརྒྱུད་བཀའ་སློབ་སྩལ་གནང་མཛད་པའི་ནང་དོན་ལུང་འདྲེན་བྱས་འདུག བརྙན་འཕྲིན་དེའི་ནང་༸གོང་ས་མཆོག་གིས་བཙན་བྱོལ་བོད་མིའི་ཆབ་སྲིད་ཀྱི་འགོ་འཁྲིད་དེ་མི་མང་ནས་ཐད་ཀར་འོས་འདེམས་བྱས་པའི་བཀའ་བློན་ཁྲི་པའི་སྐོར་ནན་བརྗོད་གནང་བ་མ་ཟད་རྒྱལ་མཆོག་སྐུ་ཕྲེང་རིམ་བྱོན་གྱི་ལམ་ལུགས་བརྒྱུད་འཛིན་བྱེད་མིན་ཡང་རྒྱ་ཆེའི་བོད་མི་མང་གི་འདོད་པ་དང་ཐག་གཅོད་བྱེད་དགོས་པའི་བཀའ་སློབ་སྔ་རྗེས་ཕེབས་པ་སོགས་མདོ་དོན་བོད་མིའི་ཆོས་དང་རིག་གཞུང་མི་ཉམ་རྒྱུད་འཛིན་དང་ཉམ་པ་སླར་གསོའི་ལས་དོན་ཆེད་དམངས་གཙོའི་ལམ་སྲོལ་སྲ་བརྟན་དགོལ་གལ་ཆེ་བའི་བཀའ་སློབ་ཀྱི་སྙིང་དོན་ནི་དེང་དུས་དང་མཚུངས་པའི་དགོངས་གཞི་ཟབ་མོ་ཡིན་སྐོར་བསྔགས་བརྗོད་ཞུས་འདུག།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.