༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྦན་ཀི་མུན་མཆོག་གཟའ་ཕུར་བུའི་ཉིན་འབར་མའི་ནང་ཕེབས་རྒྱུར་གྲ་སྒྲིག་གནང་བཞིན་ཡོད་པ་དང་སྤྱི་ཁྱབ་དྲུང་ཆེ་མཆོག་གཟའ་པ་སངས་ཉིན་འབར་མའི་ནང་ཕེབས་འབྱོར་གནང་གི་ཡོད་པ་དང་དུས་ཡུན་ཉིན་གྲངས་གཉིས་རིང་འཚམས་གཟིགས་གནང་རིང་གཙོ་བོ་འབར་མ་དམངས་གཙོ་ཚོགས་པའི་ཚོགས་གཙོ་ལྕམ་ཨང་སང་སུའི་ཀིས་གཙོས་པའི་འབར་མ་དྲག་པོའི་གཞུང་གིས་བཙོན་འཇུག་བྱེད་བཞིན་པའི་ཆབ་སྲིད་བཙོན་པ་ཚོ་གློད་བཀྲོལ་ཡོང་ཐབས་ལ་དམིགས་རྒྱུ་ཡིན་པ་འཛམ་གླིང་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་དཔོན་རིགས་ནས་གནས་ཚུལ་གསུང་ཡོད་པ་རེད།

སྐུ་ཞབས་སྦན་ཀི་མུན་འབར་མའི་ནང་ཕེབས་རིང་འབར་མ་དྲག་པོའི་གཞུང་གིས་དཔོན་རིགས་དང་དེ་བཞིན་ཕྱོགས་འགལ་དམངས་གཙོ་ཚོགས་པའི་དཔོན་རིགས་སོགས་དང་མཇལ་མོལ་གནང་འཆར་ཡོད་པ་དང་ཡིན་ནའི་ད་ལྟའི་ཆར་འབར་མ་དམངས་གཙོ་ཚོགས་པའི་ཚོགས་གཙོ་ལྕམ་ཨང་སང་སུ་ཀི་དང་མཇལ་འཕྲད་གནང་རྒྱུའི་འཆར་གཞི་མེད་པ་འབྲེལ་ཡོད་དཔོན་རིགས་ནས་གསུང་བཞག ལྕམ་ཨང་སང་སུ་ཀི་ཉེ་ཆར་ཨ་རིའི་མི་སེར་ཞིག་ཁོང་གི་གཟིམ་ཁང་དུ་སླེབས་པའི་གནད་དོན་གྱིས་རྐྱེན་པས་འབར་མ་དྲག་པོའི་གཞུང་གིས་གྱོད་དོན་དེར་གྱོད་ཞིབ་བྱེད་བཞིན་ཡིན་པ་མ་ཟད་ཁོང་གཟིམ་ཁང་ནས་དངོས་སུ་བཙོན་ཁང་དུ་བཙོན་འཇུག་བྱེད་བཞིན་ཡིན་པ་དང་འགྲོ་བ་མིའི་ཐོབ་ཐང་ཚོགས་པ་ཁག་གིས་གསུངས་ན་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ལྕམ་ཨང་སང་སུ་ཀི་གློད་བཀྲོལ་དགོས་པའི་དགོས་འདུན་འབར་མ་དྲག་པོའི་གཞུང་ལ་བཏོན་གནང་ཡོད་ན་ཡང་འབར་མ་དྲག་པོའི་གཞུང་གིས་ལྕམ་ཨང་སང་སུ་ཀི་བཙོན་ཁང་ནས་བསྐྱར་དུ་རང་ཁྱིམ་དུ་བཟང་བཙོན་དུ་གཏོང་རྒྱུར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁས་ལེན་མ་གནང་བར་ལྕམ་ཨང་སང་སུ་ཀི་དངོས་སུ་གློད་བཀྲོལ་ཐུབ་རྒྱུར་འབད་བརྩོན་གནང་དགོས་པའི་འབོད་སྐུལ་གནང་གི་ཡོད་པ་རེད། འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྦན་ཀི་མུན་མཆོག་ནས་ད་རེས་འབར་མའི་ནང་ཕེབས་རིང་འབར་མ་དྲག་པོའི་གཞུང་གིས་དམངས་གཙོའི་ལམ་དུ་བསྐྱོད་རྒྱུའི་དཔེ་རིས་གཞིར་བཟུང་ལས་དོན་སྤེལ་གོ་ཚུགས་དགོས་པའི་སྐུལ་མ་ཡང་གནང་རྒྱུ་ཡིན་པ་རེད།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.