༄༅༎མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྦན་ཀི་མུན་རིང་མིན་དྲག་པོའི་དབང་འཛིན་པའི་སྲིད་དབང་བཟུང་ཡུལ་འབར་མར་ཆེད་ཕེབས་སྐབས་ལྕམ་ཨང་སང་སུ་ཅི་མཆོག་དང་ངེས་པར་མཇལ་འཕྲད་གནང་དགོས་ལུགས་འབར་མའི་མང་གཙོ་ཚོགས་པས་གཟའ་མིག་དམར་ཉིན་འབོད་སྐུལ་ཞུས་འདུག

མཉམ་འབྲེལ་རྒྱལ་ཚོགས་ནས་གཟའ་ཟླ་བའི་ཉིན་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྦན་ཀི་མུན་འབར་མར་གཟའ་པ་སངས་དང་སྤེན་པ་བཅས་ཉིན་གྲངས་གཉིས་རིང་འཚམས་གཟིགས་གནང་རྒྱུ་དང་སྐབས་དེར་ཡུལ་དེའི་དྲག་པོའི་དབང་འཛིན་པ་ཚོར་ལྕམ་ཨང་སང་སུ་ཅི་གཙོས་འབར་མའི་ནང་གི་སྲིད་དོན་གྱི་བཙོན་པ་ཡོངས་རྫོགས་གློད་གྲོལ་འབྱུང་ཐབས་ཐད་བཀའ་བསྡུར་གནང་རྒྱུ་ཡིན་འདུག

རྒྱལ་ཚོགས་ཀྱི་དྲུང་ཆེ་འབར་མའི་ནང་ཕེབས་འབྱོར་གནང་རྒྱུའི་ཉིན་དེ་རང་ལ་དྲག་པོའི་གཞུང་གིས་བཙུགས་པའི་ཁྲིམས་ཁང་ནས་ལྕམ་ཨང་སང་སུ་ཅིའི་ཐོག་གི་ཁྲིམས་བཤེར་སླར་ཡང་འགོ་འཛུག་བྱ་རྒྱུ་ཡིན་འདུག ཟླ་བ་གཉིས་ཙམ་སྔོན་ཨ་མི་རི་ཀའི་མི་ཞིག་གིས་གསང་ཐབས་ཀྱིས་རྐྱལ་རྒྱབ་སྟེ་ལྕམ་ཨང་སང་སུ་ཅིའི་གཟིམ་ཁང་ནང་སིམ་འཛུལ་བྱས་ཤིང་དམག་མིས་མི་དེ་འཛིན་བཟུང་བྱས་ཡོད་པ་རེད། དྲག་པོའི་གཞུང་གིས་ལྕམ་ཨང་སང་སུ་ཅིས་བཟང་བཙོན་འོག་ཡོད་སྐབས་ཕྱི་རྒྱལ་གྱི་མི་དང་ཐུག་འཕྲད་གནང་པ་དེ་ནི་ཁྲིམས་འགལ་ནག་ཉེས་ཀྱི་ལས་དོན་ཞིག་ཡིན་པའི་སྙོན་འཛུགས་བྱས་ཡོད་པ་རེད།

འབར་མའི་མང་གཙོ་ཚོགས་པའི་མགྲིན་ཚབ་པ་ནིཡེན་ལྦིན་གྱིས་ང་ཚོས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཕེབས་རྒྱུར་དགའ་བསུ་ཞུ་གི་ཡོད་ཅེས་དང་མགྲིན་ཚབ་པ་དེས་མུ་མཐུད་ཁོང་འདི་གར་དོན་གནད་གཙོ་བོ་གསུམ་གྱི་ཐོག་ཕེབས་ཀྱི་ཡོད་ཅིང་དེ་ཡང་སྲིད་དོན་གྱི་བཙོན་པ་ཡོངས་རྫོགས་གློད་གྲོལ་འབྱུང་ཐབས་དང་ཞི་མོལ་འགོ་འཛུག་ཡོང་ཐབས་དེ་བཞིན་ཕྱི་ལོ་ཉིས་སྟོང་བཅུ་ལོར་རང་དབང་དང་དྲང་བདེན་གྱི་ཐོག་ནས་འོས་བསྡུ་འབྱུང་ཐབས་བཅས་ཡིན་པས་དོན་གནད་འདི་གསུམ་གྱི་ཐད་རྒྱལ་ཚོགས་ཀྱི་དྲུང་ཆེའི་ངོས་ནས་ལྕམ་ཨང་སང་སུ་ཅི་མཆོག་དང་ངེས་པར་བཀའ་བསྡུར་གནང་དགོས་ཀྱི་རེད་ཅེས་གསུངས་འདུག

མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་ལས་ཁུངས་ནས་གསར་འགོད་གསལ་བསྒྲགས་ཤིག་སྤེལ་ཡོད་པ་དེའི་ནང་རྒྱལ་ཚོགས་ཀྱི་དྲུང་ཆེ་སྐུ་ཞབས་སྦན་ཀི་མུན་མཆོག་ཉིན་གྲངས་གཉིས་རིང་འབར་མར་འཚམས་གཟིགས་གནང་སྐབས་གནད་ཡོད་ཀྱི་མི་སྣ་ཚང་མ་དང་ཐུག་འཕྲད་གནང་རྒྱུ་ཡིན་ཚུལ་གསུངས་པ་ལས་ལྕམ་ཨང་སང་སུ་ཅིའི་མཚན་དངོས་སུ་སྨོས་མེད་པ་རེད།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.