༄༅༎རྒྱ་ནག་ནང་ཡོད་པའི་ཨ་རིའི་གཞུང་ཚབ་ཀྱིས་ཨ་རིའི་གསར་འགྱུར་བརྒྱུད་ལམ་ཁག་ནས་སྲིད་འཛིན་གྱི་གཟིགས་བསྐོར་གྱི་གནས་ཚུལ་བཀོད་ཕྱོགས་ལ་སྐྱོན་བརྗོད་གནང་ཡོད་འདུག

ཉེ་ཆར་ཨ་མི་རི་ཀའི་སྲིད་འཛིན་མཆོག་ཨེ་ཤ་ཡའི་ཡུལ་གྲུ་ཁག་ཅིག་དང་ལྷག་པར་དུ་རྒྱ་ནག་ལ་ཕེབས་པའི་སྐབས་རྒྱ་ནག་ནང་གི་གསར་ཤོག་ཁག་ནང་གནས་ཚུལ་ཧ་ཅང་ཁྱབ་ཆེན་པོ་བཀོད་ཐོན་བྱུང་ཡོད་པ་མ་ཟད་རྒྱ་ནག་མང་ཚོགས་ནས་ཨ་རིའི་སྲིད་འཛིན་ལ་དོ་སྣང་དང་དགའ་མོས་ཡོད་པའི་རྣམ་པ་བསྟེན་ཡོད་རེད། ཡིན་ནའང་ཨ་རིའི་གསར་འགྱུར་བརྒྱུད་ལམ་ཁག་ནང་དེ་ལས་ལྡོག་ཏེ་སྲིད་འཛིན་ངོས་ནས་གལ་ཆེའི་གནད་དོན་དཔེར་ན་ཨི་རན་གྱི་རྡུལ་ཕྲན་ནུས་ཤུགས་དང་གནམ་གཤིས་ཚ་དྲོད་འགྱུར་ལྡོག་གི་གནད་དོན་སོགས་ཀྱི་ཐོག་དོན་དམ་གྱི་བཀའ་མོལ་ཞིག་གནང་ཐུབ་མེད་པ་དང་། དེ་དང་ཕྱོགས་མཚུངས་འགྲོ་བ་མིའི་ཐོབ་ཐང་གི་གནད་དོན་ཐོག་ནུས་པ་ཐོན་པ་ཞིག་གསལ་པོ་གསུངས་མེད་ལུགས་སོགས་སྐྱོན་བརྗོད་དང་འབྲེལ་བའི་གནས་ཚུལ་བཀོད་ཐོན་བྱས་པ་དེ་ནི་དངོས་ཡོད་གནས་སྟངས་ཤེས་རྟོག་མེད་པའི་ཐོག་ནས་ཡིན་ལུགས་རྒྱ་ནག་ནང་ཡོད་པའི་ཨ་རིའི་གཞུང་ཚབ་ཆེན་མོ་བ་སྐུ་ཞབས་ཇོན་ཧན་སེ་མན་ནས་འགྲེལ་བརྗོད་གནང་འདུག

ཁོང་གིས་ཨ་རི་དང་རྒྱ་ནག་གི་དབུ་འཁྲིད་རྣམ་པའི་མཇལ་འཕྲད་སྐབས་གནད་དོན་དེ་དག་གི་ཐོག་ཞིབ་ཕྲའི་ཐོག་ནས་བཀའ་བསྡུར་གནང་ཡོད་རེད་ལ་མཇལ་འཕྲད་གནང་བའི་སྐབས་ཕྲན་རང་ཡང་མཉམ་ཞུགས་བྱས་ཡོད་ཅེས་དེ་རིང་གཙུག་ལག་སློབ་གྲྭ་ཆེན་མོ་ཞིག་ནང་སློབ་ཕྲུག་ཚོའི་དབར་བགྲོ་གླེང་གནང་བའི་སྐབས་ཤིག་གསུངས་གནང་ནས་གང་ལྟར་ཕྱི་ཕྱོགས་ནས་ཨ་རིའི་སྲིད་འཛིན་གྱི་གཟིགས་བསྐོར་ལམ་ལྷོང་ལྡན་པ་ཞིག་བྱུང་མེད་པའི་དཔྱད་ཞིབ་བྱེད་ཀྱི་ཡོད་ཀྱང་དོན་དམ་པའི་ཐོག་ནས་བཀའ་བསྡུར་ལྷུག་པོ་བྱུང་ཡོད་ལུགས་གཏམ་བཤད་སྤེལ་ཡོད་པ་རེད།