༄༅༎ཐའེ་ལྦན་ནང་ཨ་མི་རི་ཀའི་གཞུང་ཚབ་ཆེན་མོ་བ་གསར་པ་བསྐོ་བཞག་གནང་ཡོད་པ་རེད།

ཐའེ་ལྦན་ནང་ཨ་མི་རི་ཀའི་གཞུང་འབྲེལ་གྱི་ཐོག་ནས་གཞུང་ཚབ་ངོ་མ་མེད་ནའང་རྒྱལ་ས་ཐའེ་པེ་རུ་རྟེན་གཞི་བྱས་པའི་ཨ་རི་ལྟེ་གནས་ཞེས་པ་དེས་ཨ་རིའི་གཞུང་ཚབ་དང་ཁྱད་མེད་ཀྱི་ལས་དོན་གྲུབ་ཀྱི་ཡོད་པ་རེད།

ལྟེ་གནས་ཁང་དེས་ཁ་ས་གསར་འགོད་གསལ་བསྒྲགས་ཤིག་སྤེལ་བའི་ནང་ལྦི་ལིཡེམ་སི་ཀྲེན་ཊོན་ཞུ་བས་དེ་སྔ་ལྷོ་ཀོ་རི་ཡའི་ནང་ཨ་མི་རི་ཀའི་གཞུང་ཚབ་སྐུ་གཞོན་གནང་མྱོང་མཁན་དེ་ཐའེ་ལྦན་ནང་ཨ་རིའི་ལྟེ་གནས་ཁང་གི་འགན་འཛིན་དུ་བསྐོ་བཞག་གནང་སྟེ་གཞུང་ཚབ་ལྟ་བུའི་འགན་འཁུར་བཞེས་རྒྱུ་ཡིན་པར་ངོ་སྤྲོད་བྱས་འདུག གནས་ཚུལ་ནང་བཀོད་པར་གཞིགས་ན་སྐུ་ཞབས་ལྦི་ལི་ཡེམ་སི་ཀྲེན་ཊོན་ཐའེ་ལྦན་ནང་ཨ་རིའི་གཞུང་ཚབ་ཏུ་གསར་དུ་བསྐོ་བཞག་གནང་བ་དེས་ད་ལྟའི་ཐའེ་ལྦན་གྱི་སྲིད་འཛིན་མཱ་དབྱིང་ཇའུ་ཡི་སྲིད་གཞུང་དང་ཨ་རི་གཉིས་དབར་འབྲེལ་ལམ་ཡར་རྒྱས་ཀྱི་རྣམ་པ་མཚོན་གྱི་ཡོད་པ་རེད། སྲིད་འཛིན་ཟུར་པ་ཁྲེན་ཧྲོ་པེན་གྱི་སྲིད་གཞུང་སྐབས་ཐའེ་ལྦན་རང་བཙན་རྒྱལ་ཁབ་ཀྱི་འདོད་ཚུལ་ཤུགས་ཆེ་འདིན་པའི་སྲིད་ཇུས་དང་དེ་བཞིན་ཐའེ་ལྦན་དེ་བཞིན་མཉམ་འབྲེལ་རྒྱལ་ཚོགས་ནང་འཛུལ་བཞུགས་བྱེད་དགོས་མིན་སོགས་ཀྱི་སྐོར་མང་ཚོགས་ཁྲོད་བསམ་ཤོག་འདུ་ལེན་གྱི་ལས་དོན་ལ་སོགས་པའི་རྙོག་གླེང་གི་གནད་དོན་ཇེ་མང་ལ་བརྟེན་ནས་ཨ་རི་དང་རྒྱ་ནག་སྐམ་ས་ཆེན་མོ་གཉིས་ཕྱོགས་དང་འབྲེལ་ལམ་ཉམ་ཆགས་སུ་སོང་ཡོད་པ་རེད། ད་ལྟའི་ཐའེ་ལྦན་གྱི་སྲིད་འཛིན་མཱ་དབྱིང་ཇའུ་ཡིས་སྲིད་འཛིན་གྱི་འགན་འཁུར་བཞེས་པ་ནས་བཟུང་རྒྱ་ནག་སྐམ་ས་ཆེན་པོ་དང་མཐུན་འབྲེལ་གྱི་སྲིད་བྱུས་བཟུང་ཏེ་མཚོ་གླིང་དེའི་ནང་རྙོག་གླེང་གི་གནད་དོན་ཉུང་རུ་སོང་ཡོད་པ་དང་དེས་ཤུགས་མ་ཐུབ་ཀྱིས་ཐའེ་ལྦན་དང་ཨ་རི་གཉིས་ཀྱི་འབྲེལ་བའི་ཐད་བཟང་ཕྱོགས་ཀྱི་ཤུགས་རྐྱེན་ཐེབས་ཡོད་ལུགས་གནས་ཚུལ་ནང་བཀོད་འདུག།

Comments

You can add a comment by filling out the form below. Plain text formatting. Please note that comments must be approved by a moderator and will not appear on this page in real time. Please check back soon to see if your comment has been posted.