១. កូនប្រុសកូនស្រី ស្ដាប់ឪពុកស្ដី អំពីសំពះ
ខ្មែរយើងមានប្រាំ ចូរចាំឲ្យជាក់ កុំឲ្យធ្លោយធ្លាក់
ប្រាសចាកក្រឹត្យក្រម។
២. សំពះទីមួយ កូនលើកហត្ថស្ទួយ ទាំងពីរបង្គំ
ចំពោះមិត្តភ័ក្ដិ ឬអ្នកស្មើមុំ លើកដៃប្រណម
ដាក់ត្រង់ត្រឹមទ្រូង។
៣. សំពះទីពីរ លើកអញ្ជលី អារម្មណ៍អន្ទង
ដាក់ត្រង់ត្រឹមមាត់ ប្រណិប័តន៍រៀមច្បង ចាស់ទុំទាំងពួង
ឬចៅហ្វាយនាយ។
៤. សំពះទីបី ចូរកូនឃ្មាតខ្មី ឱនកាយវន្ទា
ដាក់ត្រឹមច្រមុះ ចំពោះឧបជ្ឈា មាតាបិតា
ដូនតាគ្រូផង។
៥. សំពះទីបួន ធ្វើខ្លួនសមសួន លើកហត្ថតម្រង់
ដាក់ត្រង់ចិញ្ចើម សម្រាប់ព្រះសង្ឃ អស់ក្សត្រគ្រប់អង្គ
វត្ថុសក្ដិសិទ្ធិ។
៦. សំពះទីប្រាំ ចូរកូនចងចាំ លើចិញ្ចើមពិត
សម្រាប់ទេវតា ឥន្ទព្រហ្មមានរិទ្ធិ បួងសួងក្នុងចិត្ត
សុំក្តីសុខសាន្ត៕