ជីវ​ប្រវត្តិ​របស់ កាំង ហ្កិចអ៊ាវ ហៅ ឌុច (ភាគ៤)

នៅ​ពេល​ដឹង​ថា ឌុច អតីត​ជា​កម្មាភិបាល​ធំ​ម្នាក់​នៅ​គុក​ទួល​ស្លែង ចិន​បាន​បញ្ចប់​កិច្ចសន្យា និង​ទិដ្ឋាការ​របស់​គាត់ ហើយ​ត្រឡប់​មក​ព្រំដែន​កម្ពុជា-ថៃ វិញ ដែល​ពេល​នោះ ឌុច​បាន​ប្តូរ​ឈ្មោះ​ទៅ​ជា ហង់ ពិន វិញ។
ដោយ មាន ឫទ្ធិ
2009-04-04
Share
ឌុច​303 អតីត​មេគុក​ទួលស្លែង​នៃ​របប​ខ្មែរ​ក្រហម កាំង ហ្កិចអ៊ាវ ហៅ ឌុច (រូប​កណ្ដាល) បង្ហាញ​ខ្លួន​នៅ​ក្នុង​សវនាការ​នៃ​អង្គជំនុំ​ជម្រះ​វិសាមញ្ញ​ក្នុង​តុលាការ​កម្ពុជា នា​ថ្ងៃ​ទី​១៧ កុម្ភៈ ២០០៩។
AFP Photo

តើ កាំង ហ្កិចអ៊ាវ ហៅ ឌុច ដែល​ពេល​នេះ​មាន​ឈ្មោះ​ជា ហង់ ពិន មាន​ប្រវត្តិ​ដូច​ម្តេច​ទៀត?

បន្ទាប់​ពី​កិច្ច​ព្រមព្រៀង​សន្តិភាព​នា​ទីក្រុង​ប៉ារីស សម្រាប់​ប្រទេស​កម្ពុជា ក្នុង​ឆ្នាំ ១៩៩១ មក ហង់ ពិន និង​ភរិយា​ឈ្មោះ រ៉ុម ព្រមទាំង​កូន​ប្រុស​ចំនួន​ពីរ​នាក់​និង​កូន​ស្រី​ម្នាក់ បាន​ត្រឡប់​មក​រស់​នៅ​ក្នុង​ភូមិ​ផ្គាំ ឃុំ​តាសាញ់ ស្រុក​សំឡូត ខេត្ត​បាត់ដំបង វិញ។ ហង់ ពិន ក៏​បាន​ជួប​ប្អូន​ស្រី​ពៅ និង​ក្រុម​គ្រួសារ​របស់​គាត់​នៅ​ទីនោះ​ផង​ដែរ។

នៅ​ក្នុង​ស្រុក​សំឡូត ហង់ ពិន គឺ​ជា​គ្រូ​បង្រៀន​ដ៏​ល្អ​ម្នាក់ ដែល​តែង​តែ​ឆ្លៀត​ពេល​ជួយ​បង្រៀន​សិស្ស​ក្រៅ​ម៉ោង​ដោយ​មិន​យក​កម្រៃ។ ក្រៅ​ពី​នេះ​គាត់​ក៏​ប្រកប​របរ​ផ្សេង​ទៀត​ដែរ ដូច​ជា​លក់​ថ្នាំ​ពេទ្យ និង​ចង​ការ​ប្រាក់​ជា​ដើម។ ស្ថានភាព​រស់​នៅ​របស់​ក្រុម​គ្រួសារ​គាត់​នៅ​ទី​នោះ​ហាក់​ដូច​ជា​មាន​ភាព​ល្អ​ប្រសើរ​គ្រាន់​បើ។

ប៉ុន្តែ​នៅ​ឆ្នាំ ១៩៩៥ ក្រុម​គ្រួសារ​របស់ ហង់ ពិន បាន​ជួប​នឹង​រឿង​សោក​សៅ​មួយ គឺ​ប្រពន្ធ​របស់​គាត់​ឈ្មោះ រ៉ុម ត្រូវ​ចោរ​ប្លន់​សម្លាប់។ ចំណែក ហង់ ពិន វិញ ត្រូវ​បាន​បញ្ជូន​ទៅ​មន្ទីរ​ពេទ្យ​ដោយសារ​មាន​របួស​ធ្ងន់ធ្ងរ​នៅ​លើ​ខ្នង។ ក្រោយ​ពេល​ចេញ​ពី​មន្ទីរពេទ្យ ហង់ ពិន បាន​ចាប់​ផ្តើម​ចូល​រួម​សូត្រ​ធម៌​ព្រះ​យ៉េស៊ូ នៅ​ក្នុង​ក្រុង​បាត់ដំបង ដែល​នៅ​ទី​នោះ​មាន​លោក​អាចារ្យ គ្រីស្តូហ្វ័រ ឡាប៉ែល ជា​គ្រូ​ប្រដៅ​សាសនា។

ដោយ​មាន​ការ​ជាប់​ចិត្ត​នឹង​សាសនា​នេះ ហង់ ពិន បាន​ស្នើ​ឲ្យ​លោក​អាចារ្យ គ្រីស្តូហ្វ័រ ឡាប៉ែល បំបួស​គាត់ ហើយ​ក៏​បាន​ក្លាយ​ជា​គ្រិស្ត​សាសនិក​ម្នាក់​ក្នុង​សាសនា​យ៉េស៊ូ ចាប់​ពី​ពេល​នោះ​មក។ កូនៗ​របស់​គាត់​ទាំង​អស់​ក៏​បាន​ក្លាយ​ជា​សាវ័ក​របស់​សាសនា​នេះ​ផង​ដែរ។ ហង់ ពិន បាន​ក្លាយ​ជា​មនុស្ស​ម្នាក់​ដែល​ឈាន​មុខ និង​លះ​បង់​ខ្ពស់​សម្រាប់​សាសនា​នេះ។

លោក​អាចារ្យ គ្រីស្តូហ្វ័រ ឡាប៉ែល បាន​កោត​សរសើរ​ដល់ ហង់ ពិន ថា​ជា​មនុស្ស​ដែល​គោរព​ប្រតិបត្តិ​ប្តូរ​ផ្តាច់​ដល់​ព្រះ​យេស៊ូ​គ្រិស្ត​យ៉ាង​ខ្ជាប់ខ្ជួន​មូយ​រូប ៖ "គេ​បាន​ក្លាយ​ទៅ​ជា​មនុស្ស​ម្នាក់​ផ្សេង​ទាំង​ស្រុង។ សម្តី​របស់​ព្រះ​បាន​ជះ​ឥទ្ធិពល​ទៅ​លើ​រូប​គេ​យ៉ាង​ខ្លាំង។ ឌុច ជា​អ្នក​ដែល​កត់ត្រា​បាន​ល្អ​ជាង​គេ​បំផុត ជា​មនុស្ស​គួរ​ឲ្យ​ឆ្ងល់ មាន​របៀប​រៀប​រយ​ណាស់"

ក្រោយ​មក ហង់ ពិន បាន​លក់​ទ្រព្យ​សម្បត្តិ​ទាំង​អស់​ដែល​មាន​នៅ​ភូមិ​ផ្គាំ ហើយ​ក៏​នាំ​កូន​ចៅ​របស់​គាត់​ទៅ​រស់​នៅ​ឯ​ស្រុក​សា្វយ​ចេក ខេត្ត​បន្ទាយ​មាន​ជ័យ​វិញ។ នៅ​ទី​នោះ​គាត់​ក៏​ជា​គ្រូ​ម្នាក់​ដែល​បង្រៀន​នៅ​អនុ​វិទ្យាល័យ​ក្នុង​ស្រុក​ស្វាយ​ចេក ផង​ដែរ។ នៅ​ស្វាយ​ចេក ហង់ ពិន ក៏​នៅ​តែ​មាន​ជំនឿ​យ៉ាង​មុត​មាំ​លើ​សាសនា​ព្រះ​យ៉េស៊ូ​គ្រិស្ត​ដដែល។ រៀង​រាល់​ថ្ងៃ​អាទិត្យ គាត់​តែង​តែ​ទៅ​សូត្រ​ធម៌​ជា​ប្រចាំ​នៅ​ឯ​ព្រះវិហារ​ក្នុង​ទី​រួម​ស្រុក​សិរីសោភ័ណ ហើយ​រូប​គាត់​តែង​តែ​ឆ្លៀត​ពេល​អូស​ទាញ​សិស្ស ព្រម​ទាំង​គ្រូៗ​ជា​ច្រើន​នាក់​ទៀត នៅ​ក្នុង​សាលា​ឲ្យ​ចូល​សាសនា​នេះ​ជាមួយ​គាត់​ដែរ។

នៅ​ក្នុង​ព្រឹត្តិការណ៍​នៃ​ការ​ប្រយុទ្ធ​គ្នា​ក្នុង​ក្រុង​ភ្នំពេញ កាល​ពី​ថ្ងៃ​ទី ៥-៦ ខែ​កក្កដា ឆ្នាំ ១៩៩៧ ហង់ ពិន និង​កូនៗ​របស់​គាត់ ព្រមទាំង​ប្អូន​ស្រី​ពៅ​និង​ក្រុម​គ្រួសារ​គាត់ បាន​ភៀស​ខ្លួន​ទៅ​នៅ​ជំរំ​បានម៉ាក់មួន ក្នុង​ប្រទេស​ថៃ។ នៅ​ទី​នោះ ហង់ ពិន ត្រូវ​បាន​ជ្រើស​រើស​ឲ្យ​ធ្វើ​ជា​ជំនួយ​ការ​របស់​អ្នក​ស្រី ទេស ព្រំបុត ដែល​ជា​មន្ត្រី​របស់​គណៈ​កម្មាធិការ​ជន​ភៀស​ខ្លួន​អាមេរិក (American Refugee Committee) ឬ​ហៅ​កាត់​ថា ARC ដោយសារ​តែ​គាត់​អាច​និយាយ​ភាសា​បារាំង អង់គ្លេស និង​ថៃ បាន​ល្អ ហើយ​គាត់​ក៏​ជា​មនុស្ស​ម្នាក់​ដែល​បំពេញ​ការងារ​បាន​ល្អ​ណាស់​ដែរ។

នៅ​ចុង​ឆ្នាំ ១៩៩៨ ហង់ ពិន បាន​វិល​ត្រឡប់​មក​ប្រទេស​កម្ពុជា ដូច​ជា​ជន​ភៀស​ខ្លួន​ដទៃ​ទៀត​ដែរ។ នៅ​ពេល​ត្រឡប់​មក​ដល់​ភូមិ​អណ្តើកហែប ស្រុក​រតនមណ្ឌល ក្នុង​តំបន់​សំឡូត ហង់ ពិន បាន​ចូល​បម្រើ​ការងារ​ជា​មន្ត្រី​របស់​អង្គការ​ទស្សនៈ​ពិភពលោក (World Vision)។ ក្រោយ​មក​ទៀត​គាត់​បាន​ចូល​បម្រើ​ការងារ​ក្នុង​វិស័យ​អប់រំ ដោយ​មាន​មុខ​តំណែង​ជា​ប្រធាន​ការិយាល័យ​អប់រំ​ស្រុក​សំឡូត។

ក្នុង​ខែ​ឧសភា ឆ្នាំ​១៩៩៩ នៅ​ក្នុង​ស្រុក​សំឡូត​ដដែល ហង់ ពិន បាន​ជួប​នឹង​អ្នក​សារព័ត៌មាន​ជន​បរទេស​ពីរ​រូប គឺ នីក ដងឡុប និង ណេត ស្សេអឺ ដែល​បាន​ស្វះស្វែង​រក​គាត់​អស់​ពេល​ជា​យូរ​ឆ្នាំ​មក​ហើយ។ អ្នក​យក​ព័ត៌មាន នីក ដងឡុប ដែល​មាន​រូប​របស់​ឌុច កាល​ថត​នៅ​គុក​ទួល​ស្លែង ដែល​មាន​វ័យ​ក្មេង​ជាង​រូប​នៅ​ក្រៅ​នោះ បាន​ព្យាយាម​តាម​ឈ្លេច​សួរ ហង់ ពិន ដោយ​មិន​ចំហ​រហូត​ដល់ ហង់ ពិន ដែល​បាន​ព្យាយាម​លាក់​អត្ត​សញ្ញាណ​របស់​ខ្លួន​ជា​យូរ​ឆ្នាំ​មក​នោះ សុខ​ចិត្ត​សារភាព​អំពី​អតីត​កាល​របស់​ខ្លូន។

ណេត ស្សេអឺ អ្នក​យក​ព័ត៌មាន​ឲ្យ​ទស្សនាវដ្តី​សេដ្ឋកិច្ច​ចុង​បូព៌ា​ដដែល​បាន​ឲ្យ​ដឹង​ថា ឌុច ជា​មនុស្ស ដែល​ជឿ​និង​ដាក់​ចិត្ត​ទាំង​ស្រុង​ទៅ​លើ​អ្វី​ដែល​គាត់​ជួប​ប្រទះ ហើយ​អ្វី​ដែល​ធ្វើ​ឲ្យ​គាត់​សារភាព​នោះ គឺ​ព្រះ​យេស៊ូ​គ្រិស្ត ៖ "នៅ​ឆ្នាំ​១៩៩៥ ឌុច ក៏​បាន​ប្រែ​ក្លាយ​ជា​គ្រិស្ត​សាសនិក គឺ​អ្នក​កាន់​គោរព​និង​ប្រតិបត្តិ​សាសនា​ព្រះ​យេស៊ូ​គ្រិស្ត​យ៉ាង​ស៊ប់​ងប់ងល់​ម្នាក់។ សាសនា​ព្រះ​យេស៊ូ​គ្រិស្ត គឺ​ថា​ដើម្បី​ឲ្យ​ព្រះ​អាច​ជួយ​សង្រ្គោះ​ជីវិត​របស់​អ្នក អ្នក​ត្រូវ​តែ​ធ្វើ​ការ​សារភាព​ពី​អំពើ​បាប​របស់​អ្នក អ្នក​ត្រូវ​តែ​ស្វែង​រក​ការ​ជួយ​សង្រ្គោះ ឬ​ការ​រំដោះ​ខ្លួន​របស់​អ្នក​ពី​អំពើ​បាប​ដោយ​ការ​លាង​បាប។ ដើម្បី​លាង​បាប​គឺ​ត្រូវ​តែ​ធ្វើ​ការ​សារភាព​នូវ​អំពើ​បាប​របស់​អ្នក​ដែល​បាន​ប្រព្រឹត្ត​កន្លង​មក។ ឌុច បាន​ប្រែ​ក្លាយ​ជា​គ្រិស្ត​សាសនិក ហើយ​ក៏​ជា​គ្រិស្ត​សាសនិក​ម្នាក់​ដែល​មាន​ការ​ជឿ​យ៉ាង​ស៊ប់។ គាត់​ជឿ​ថា​ដើម្បី​បាន​ឡើង​ទៅ​ឋាន​សួគ៌ គាត់​ត្រូវ​តែ​ទទួល​ខុស​ត្រូវ​ចំពោះ​ទង្វើ​ដែល​គាត់​ធ្លាប់​បាន​ធ្វើ"

ក្រោយ​ពី​បាន​សារភាព​ដល់​អ្នក​កាសែត​បរទេស​ទាំង​ពីរ​រូប​នេះ​អំពី​សកម្មភាព​ធ្វើ​ទារុណកម្ម និង​សម្លាប់​មនុស្ស​នៅ​មន្ទីរ​ស.២១ ឬ​គុក​ទួល​ស្លែង​នោះ​មក ដំណឹង​អំពី​សមមិត្ត ឌុច ក៏​បាន​លេច​ឮ​ខ្ចរ​ខ្ចាយ​ដល់​រាជ​រដ្ឋាភិបាល​ក្រុង​ភ្នំពេញ។ នៅ​ក្នុង​ខែ​ឧសភា ឆ្នាំ​១៩៩៩ ដដែល ឌុច ត្រូវ​បាន​ចាប់​ខ្លួន​នៅ​ក្នុង​ខែត្រ​បាត់ដំបង។

រហូត​មក​ដល់​ពេល​នេះ កាំង ហ្កិចអ៊ាវ ឬ គៀវ ឬ ហង់ ពិន ហៅ សម​មិត្ត ឌុច អតីត​អ្នក​គ្រប់​គ្រង​គុក​ទួល​សែ្លង ឬ​មន្ទីរ ស-២១ ដែល​បាន​ធ្វើ​ឲ្យ​មាន​មនុស្ស​ស្លាប់​ប្រមាណ​ជិត​ពីរ​ម៉ឺន​នាក់​នោះ បាន​ជាប់​ឃុំ​ឃាំង​អស់​រយៈ​កាល​ជិត ១០​ឆ្នាំ​ហើយ។ បច្ចុប្បន្ន ឌុច ស្ថិត​នៅ​ក្រោម​ការ​ឃុំ​ខ្លួន​របស់​សាលាក្តី​ខ្មែរ​ក្រហម ដោយ​ជាប់​ចោទ​ក្នុង​បទ​ឧក្រិដ្ឋកម្ម​ប្រឆាំង​មនុស្ស​ជាតិ និង​ឧក្រិដ្ឋកម្ម​សង្រ្គាម។ ករណី​របស់ ឌុច ត្រូវ​បាន​សាលាក្តី​ខែ្មរ​ក្រហម គ្រោង​នឹង​លើក​យក​ទៅ​ជំនុំ​ជម្រះ នៅ​ថ្ងៃ​ទី ៣០ ខែ​មីនា ឆ្នាំ ២០០៩ នេះ៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល