សាសនិកអ៊ិស្លាមបានថ្លែងដូច្នេះ ដោយសារប្រទេសទាំងនោះជាប្រទេសអ្នកកាន់សាសនាអ៊ិស្លាមដែលពួកគេមិនចង់ឲ្យកើតមានអំពីការសម្លាប់រង្គាលប្រជាពលរដ្ឋនោះទេ ទោះបីជាជាតិសាសន៍អ្វីក៏ដោយ បញ្ហាសំខាន់ពួកគេចង់ឲ្យពិភពលោកមានសន្តិភាព។
សូមជម្រាបថា លោកប្រធានាធិបតីថ្មីសហរដ្ឋអាមេរិកគឺលោក Barack Hussein Obama បានមានប្រសាសន៍ក្នុងសុន្ទរកថាសម្ពោធឡើងកាន់តំណែងរបស់លោក កាលពីថ្ងៃអង្គារ ទី២០ មករាថា បញ្ហាសង្រា្គមនៅប្រទេសអ៊ីរ៉ាក់ លោកបានប្រឆំាងទៅនឹងសង្រ្គាមនោះតាំងពីដើមទីមក ហើយចំពោះប្រទេសនៅមជ្ឈិមបូព៌ាវិញ លោកបានថ្លែងថា សហរដ្ឋអាមេរិកនឹងស្វែងរកមធ្យោបាយថ្មីមួយ ដើម្បីដោះស្រាយបន្តទៅទៀត ដែលឈរលើការគោរពផលប្រយោជន៍គ្នាទៅវិញទៅមក។
លោក Barack Obama ថ្លែងដូច្នេះថា ៖ «ខ្ញុំបានជំទាស់នឹងសង្រ្គាមនោះរហូត ពីឆ្នាំ២០០២, ២០០៣, ២០០៤, ២០០៥, ២០០៦, ២០០៧, ២០០៨ ហើយខ្ញុំនឹងបញ្ចប់សង្រ្គាមនោះក្នុងឆ្នាំ២០០៩»។
ប្រជាពលរដ្ឋឈ្មោះ ទត រំលី នៅភូមិជីនីក ឃុំជីនីក ស្រុកក្រូចឆ្មារ ខេត្តកំពង់ចាម បានមានប្រសាសន៍ថា លោកមានការសប្បាយចិត្តណាស់ដោយលោកប្រធានាធិបតីថ្មីរបស់សហរដ្ឋអាមេរិកបានថ្លែងថា លោកនឹងកែប្រែប្រព័ន្ធគ្រប់គ្រងនៃការដឹកនាំប្រទេសដែលគិតគូរអំពីបញ្ហាសេដ្ឋកិច្ចជាបញ្ហាចម្បងនោះ។
លោក ទត រំលី ថ្លែងដូច្នេះថា ៖ «ខ្ញុំសប្បាយចិត្តណាស់ដែលគាត់បាននិយាយលើកពីបញ្ហានេះ ក្នុងការអភិវឌ្ឍដែលគាត់បានគិតគូរ ហើយនិងគិតពីបញ្ហាសេដ្ឋកិច្ចនៅក្នុងពិភពលោកនេះ»។
ក្នុងវ័យជាង ៣០ឆ្នាំ ប្រជាពលរដ្ឋឈ្មោះ អ៊ុំ ម៉ី ដែលធ្វើដំណើរមកពីខេត្តពោធិ៍សាត់ បានថ្លែងឲ្យដឹងថា សហរដ្ឋអាមរិកជាប្រទេសមហាអំណាច ដែលធ្វើឲ្យពិភពលោកទាំងមូលប្រែប្រួលបាននូវវិស័យសេដ្ឋកិច្ច ប្រសិនបើប្រធានាធិបតីរូបនេះ បានអនុវត្តនូវអ្វីដែលខ្លួនបានសន្យាមែននោះ ៖ «ខ្ញុំយល់ឃើញថា លោក បារ៉ាក់ អូបាម៉ា ដែលជាប្រធានាធិបតីនៃសហរដ្ឋអាមេរិក គាត់ជាប្រធានាធិបតីមួយដ៏ល្អបំផុត ព្រោះគាត់នៅវ័យក្មេង គាត់មានការដោះស្រាយនូវបញ្ហានៅក្នុងប្រទេសរបស់គាត់ គាត់បានសន្យាថា គាត់នឹងបញ្ចប់សង្រ្គាមទាំងឡាយ»។
ប្រជាពលរដ្ឋមួយរូបទៀត ឈ្មោះ តិច យូសុះ នៅស្រុកកំពង់ត្រឡាច ខេត្តកំពង់ឆ្នាំង បានមានប្រសាសន៍ថា លោកមានការសប្បាយចិត្តដែលបានឮប្រធានាធិបតីអាមេរិកថ្មី ដែលសន្យាថា នឹងរកដំណោះស្រាយអំពីសង្រ្គាមនៅអ៊ីរ៉ាក់និងនៅអាហ្វហ្កានីស្ថាន។
លោក តិច យូសុះ មានប្រសាសន៍ថា ៖ «យើងខ្ញុំខ្មែរអ៊ិស្លាមដើមកំណើតចាមហ្នឹង អរគុណណាស់ដែលលោក បារ៉ាក់ អូបាម៉ា ថ្លែងហ្នឹង ត្រឹមត្រូវហើយ បើយើងគិតតែសង្រ្គាមទី១ យើងត្រូវអស់លុយកាក់ មួយថ្ងៃយើងចាយប៉ុន្មាន ហើយយើងប្រើរូបមន្តដែលយើងនិយាយគ្នាល្អៗវិញ អាហ្នឹងយើងបម្រើពិភពលោក ទាំងអ្នកកាន់សាសនាអ៊ិស្លាម ទាំងអ្នកកាន់សាសនាព្រះពុទ្ធ ទាំងអ្នកកាន់សាសនាគ្រិស្ត»។
និស្សិតឈ្មោះ ហ្វាអ៊ីហ្សះ បានមានប្រសាសន៍ថា ថ្នាក់ដឹកនាំប្រទេសមួយដែលមិនគិតអំពីសង្រ្គាម គឺធ្វើឲ្យសេដ្ឋកិច្ចរបស់ប្រទេសនោះ មានការរីកចម្រើន ប្រជាពលរដ្ឋរស់នៅប្រកបដោយសេចក្តីសុខសាន្ត ៖ «ខ្ញុំសូមឲ្យការសន្យារបស់គាត់ ឲ្យពិតប្រាកដ ដើម្បីឲ្យប្រទេសរបស់គាត់ ក៏ដូចជាពិភពលោកទាំងមូលមានសន្តិភាព ហើយនិងមានសេដ្ឋកិច្ចរីកចម្រើនគ្រប់ប្រទេសទាំងអស់»។
មន្រ្តីរាជការមួយរូបក្នុងទីក្រុងភ្នំពេញ សុំមិនបញ្ចេញឈ្មោះ បានមានប្រសាសន៍ថា អ្នកស្រីបានស្វាគមន៍ចំពោះការថ្លែងរបស់លោក បារ៉ាក់ អូបាម៉ា ដែលផ្តោតលើការស្តារវិស័យសេដ្ឋកិច្ច ជាងការធ្វើសង្រ្គាមនោះ។
អ្នកស្រីបន្តថា សង្រ្គាមនេះហើយ ដែលបង្កឲ្យមានអំពើភេរវកម្មដែលពិភពលោកបានថ្កោលទោសនិងបានធ្វើឲ្យប្រទេសពោរពេញទៅដោយភាពអសន្តិសុខ ៖ «ដរាបណាមានសង្រ្គាម អាចផ្ដោតទៅលើភេរវកម្ម ប៉ុន្តែបើសិនជាអត់មានសង្រ្គាមដកទ័ពចេញឲ្យអស់មក ហើយអត់មានសង្រ្គាមឈ្លោះគ្នាទៅ អ៊ីចឹងអត់មានភេរវកម្មដែរ។ ភេរវកម្មហ្នឹងដោយសារមានសង្រ្គាម ពិភពលោកក៏មានការស្អប់ខ្ពើមដែរនូវអំពើភេរវកម្ម»។
អ្នកស្រីបានមានប្រសាសន៍បន្តអំពីការដឹកនាំរបស់អតីតប្រធានាធិបតីសហរដ្ឋអាមេរិក យ៉ាងដូច្នេះថា ៖ «កាលពីរបបលោក ចច ដាប់ប៊ែលយូ ប៊ូស្ហ គាត់កាន់ជាប្រធានាធិបតីនៅសហរដ្ឋអាមេរិកនោះ ខ្ញុំថា មានការច្របូកច្របល់ ដោយសារថា លោក ប៊ូស្ហ គាត់ចូលចិត្តចង់បានធ្វើជាសង្រ្គាម ហើយអ៊ីចឹងគាត់មានអារម្មណ៍ថា ដូចថាមិនសូវល្អក្នុងការកាន់កាប់»។
កាលពីថ្ងៃពុធ ទី២១ មករា ដែលជាថ្ងៃទី១ នៃការកាន់តំណែងរបស់ប្រធានាធិបតីអាមេរិក លោក Barack Obama បានថ្លែងថា លោកនឹងរៀបផែនការថ្មីមួយសម្រាប់ប្រទេសអ៊ីរ៉ាក់ និងអាហ្វហ្កានីស្ថាន នឹងត្រូវលើកមកនិយាយច្រើនក្នុងរបៀបវារៈនយោបាយក្រៅប្រទេសរបស់លោក ហើយលោកក៏បានបញ្ជាក់ទៀតថា លោកនឹងប្រកាន់យកតួនាទីដ៏សកម្មមួយដើម្បីព្យាយាមដោះស្រាយជម្លោះរវាងអ៊ីស្រាអែលនិងប៉ាឡេស្ទីនផងដែរ។
គ្រូបង្រៀនផ្នែកសាសនាអ៊ិស្លាម ឈ្មោះ លី មហាំម៉ាត់ នៅភូមិទ្រា ឃុំទ្រា ស្រុកក្រូចឆ្មារ ខេត្តកំពង់ចាម បានមានប្រសាសន៍ដែរថា គ្រប់ជាតិសាសន៍ទាំងអស់មិនចង់ឃើញសង្រ្គាមកើតមាននៅលើសកលលោកនេះទេអ្វី ដែលប្រជាពលរដ្ឋចង់បាននោះ គឺប្រទេសមានសន្តិភាព។
លោក លី មហាំម៉ាត់ មានប្រសាសន៍ដូច្នេះថា ៖ «ព្រោះកន្លងមក ការបាត់បង់ជីវិតអ្នកចេះដឹងខ្ពង់ខ្ពស់ ហើយអ្នកស្លូតត្រង់ កាត់បន្ថយសេដ្ឋកិច្ចជាច្រើនកន្លងមក ដូច្នេះខ្ញុំសង្ឃឹមថា ពាក្យសម្ដីដែលគាត់ថា ដកទាហានចេញពីអ៊ីរ៉ាក់ និងអាហ្វហ្កានីស្ថាននេះ គឺជាប្រការមួយដ៏ល្អបំផុត»។
អ្នកតំណាងរាស្រ្តគណបក្សប្រជាជនកម្ពុជា គឺលោក ទ្រេស សារុំ បានមានប្រសាសន៍ប្រហាក់ប្រហែលនឹងប្រជាពលរដ្ឋខាងលើដែរថា ៖ «ការដឹកនាំដែលស្រលាញ់សន្តិភាព គឺជាការល្អប្រសើរ មិនគិតពីរឿងសន្ដិភាព គឺជាការល្អប្រសើរសម្រាប់ពិភពលោក ក៏ដូចជានៅប្រទេសនានា ដែលកំពុងតែមានសង្រ្គាមហ្នឹង»។
លោក Barack Hussein Obama ត្រូវបានជាប់ឆ្នោតជាប្រធានាធិបតីសហរដ្ឋអាមេរិកទី៤៤ និងបានប្រារព្ធពិធីចូលកាន់តំណែងជាផ្លូវការជាប្រធានាធិបតីសហរដ្ឋអាមេរិកកាលពីថ្ងៃ២០ មករាកន្លងទៅ នេះ គឺស្របពេលដែលពិភពលោកផ្តោតខ្លាំងលើរឿងភេរវកម្ម ហើយក៏ប្រឆាំងនឹងអំពើភេរវកម្ម ដែលគេតែងតែចោទប្រកាន់មកលើជនអ៊ិស្លាមនោះ។
លោក Obama ដែលមានអាយុ ៤៤ឆ្នាំ គឺជាជនជាតិអាមេរិកាំងដើមកំណើតអាហ្វ្រិកលើកដំបូងបង្អស់ហើយ ដែលបានជាប់ឆ្នោតជាប្រធានាធិបតីអាមេរិកនោះ។
លោកបានសន្យាយ៉ាងម៉ឺងម៉ាត់ផងដែរ ចំពោះពលរដ្ឋអាមេរិកាំងថា នឹងដឹកនាំសហរដ្ឋអាមេរិកឲ្យមានការផ្លាស់ប្តូរក្នុងកាលៈទេសៈមួយ ដែលប្រទេសនេះនិងពិភពលោកកំពុងជួបបញ្ហាធំៗជាច្រើន ជាពិសេសវិបត្តិហិរញ្ញវត្ថុពិភពលោកនិងបញ្ហាសង្គ្រាមនៅមជ្ឈិមបូព៌ាជាដើម៕