រូបត្លុកនយោបាយ៖ ពី «មហាវិថី ស៊ី ជីនពីង» ឆ្ពោះទៅ «ផ្លូវលំ ស៊ី ជីនពីង»?
2024.07.25
រូបត្លុកនយោបាយ៖ ពី «មហាវិថី ស៊ី ជីនពីង» ឆ្ពោះទៅ «ផ្លូវលំ ស៊ី ជីនពីង»?
រូប៖ RFA
កម្ពុជាក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១៩ ខែកក្កដា បានសម្ពោធបង្គោលស្លាកឈ្មោះផ្លូវមួយខ្សែដោយប្រសិទ្ធនាមថា «មហាវិថី ស៊ី ជីនពីង»។ បើទោះបីជាកម្ពុជាខ្ចីបុលលុយពីចិនក្នុងតម្លៃ ២៧៣លានដុល្លារ ដើម្បីសាងសង់ផ្លូវនេះក៏ដោយ ក៏ការយកឈ្មោះមេដឹកនាំចិនមកដាក់លើឈ្មោះផ្លូវខ្មែរនេះ ត្រូវរដ្ឋាភិបាលកម្ពុជាអះអាងថា ដើម្បីជា «ការដឹងគុណ» របស់កម្ពុជា ចំពោះចិន។ ផ្លូវក្រវាត់ក្រុងទី៣ ប្រវែងជាង ៤៧គីឡូម៉ែត្រនេះ នឹងប្រទាក់ក្រឡាគ្នាជាមួយបណ្តាញផ្លូវជាតិ និងផ្លូវខេត្តសំខាន់ៗ ដូចជាផ្លូវអាស៊ានហាយវ៉េយ ផ្លូវល្បឿនលឿនភ្នំពេញ-ក្រុងព្រះសីហនុ និងផ្លូវល្បឿនលឿនភ្នំពេញ-បាវិត ដែលនឹងត្រូវសាងសង់នាពេលខាងមុខ។
ការសម្ពោធស្លាកឈ្មោះ «មហាវិថី ស៊ីជីនពីង» នេះ កើតមានឡើងស្របពេល ដែលចិនកំពុងពង្រីកឥទ្ធិពលកាន់តែខ្លាំងឡើងៗ នៅក្នុងប្រទេសក្រីក្រមួយនេះ ជាពិសេសលើវិស័យការពារជាតិ។ ការធ្វើទំនើបកម្មនៅកំពង់ផែកងទ័ពជើងទឹករាមក្រោមជំនួយរបស់ចិន កំពុងបង្កឱ្យមានការសង្ស័យពីចេតនាពិតប្រាកដរបស់រដ្ឋាភិបាលកម្ពុជា ខណៈសហរដ្ឋអាមេរិក និងប្រទេសលោកខាងលិចមួយចំនួនចោទថា ចិនប្រើប្រាស់ផ្នែកមួយនៃកំពង់ផែរាមនេះ «ផ្តាច់មុខ» ដើម្បីធ្វើជាមូលដ្ឋានទ័ពនៅក្រៅប្រទេសរបស់ខ្លួន។
ក្រុមអ្នកវិភាគមួយចំនួន ព្រួយបារម្ភថា ចិនបង្កើនការសាងសង់ហេដ្ឋារចនាសម្ព័ន្ធ ជាពិសេសផ្តោតលើវិស័យយោធានេះ អាចជាផ្នែកមួយនៃយុទ្ធសាស្ត្រភូមិសាស្ត្រនយោបាយរបស់ចិន ដើម្បីធ្វើជា «ផ្លូវលំ ស៊ី ជីនពីង» ក្នុងករណីមានសង្គ្រាមដណ្តើមយកកោះតៃវ៉ាន់ ឬប្រជុំកោះនៅសមុទ្រចិនខាងត្បូងនាពេលអនាគត។ ពួកគេព្រមានថា បើកម្ពុជាក្លាយជា «ផ្លូវលំ ស៊ី ជីនពីង» នោះកម្ពុជានឹងដើរជាន់ដានប្រវត្តិសាស្ត្រមិនខុសពីសម័យសង្គ្រាមវៀតណាម ដែលកាលនោះ កម្ពុជាបានអនុញ្ញាតឱ្យវៀតណាមខាងជើងប្រើប្រាស់ទឹកដី និងកំពង់ផែកំពង់សោម ជាផ្នែកមួយនៃ «ផ្លូវលំ ហូ ជីម៉ិញ» ធ្វើជាឈ្នាន់ដើម្បីធ្វើសង្គ្រាមវាយរំលំវៀតណាមខាងត្បូង។ ជាលទ្ធផល កម្ពុជាបានធ្លាក់ចូលក្នុងសង្គ្រាមស៊ីវិល និងរបបប្រល័យពូជសាសន៍ខ្មែរក្រហម ដែលបានបណ្តាលឱ្យមនុស្សយ៉ាងហោចណាស់ជិត២លាននាក់ស្លាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា