រដូវកាលបោះឆ្នោតម្តងៗ គឺជាពេលវេលាមួយដែលពលរដ្ឋខ្មែរម្ចាស់ឆ្នោតអាចយល់ដឹងច្បាស់ពីស្បែកមុខ និងសារជាតិពិតប្រាកដរបស់អ្នកនយោបាយឱកាសនិយមមួយចំនួន ដែលគ្មានគោលការណ៍ច្បាស់លាស់។ អ្នកនយោបាយទាំងនោះ នាំគ្នាផ្លាស់ទ្រនំ ជាថ្នូរនឹងការទទួលបានមុខតំណែង ឋានៈ បុណ្យសក្តិ និងលាបសក្តារៈផ្ទាល់ខ្លួន និងក្រុមគ្រួសារ ជាជាងរក្សាជំហរការពារផលប្រយោជន៍ជាតិជាធំ។ ទោះជាយ៉ាងណា សម្រាប់សកម្មជនបក្សប្រឆាំងខ្លះ ការចុះចូលជាមួយគណបក្សប្រជាជនកម្ពុជា ក៏ដោយសារតែការគាបសង្កត់គ្រប់រូបភាពពីសំណាក់បក្សកាន់អំណាច។
ក្រុមអ្នកវិភាគថា ការផ្តាច់ខ្លួនរបស់អ្នកនយោបាយឱកាសនិយមនេះ ធ្វើឱ្យការតស៊ូ និងជីវិតនយោបាយរបស់ពួកគេត្រូវបញ្ចប់ និងក្លាយជារឿងអសារបង់ ខណៈពលរដ្ឋអស់ជំនឿលើពួកគេ។ អ្នកវិភាគខ្លះទៀត ព្រមានថា មុននិងក្រោយ គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន នឹងកម្ចាត់ពួកគេចេញវិញ នៅពេលដែលពួកគេលែងមានប្រយោជន៍ ឬមិនធ្វើតាមផែនការរបស់បក្ស។ ក្នុងទស្សនៈវិជ្ជមានសម្រាប់ក្រុមអ្នកនិយមប្រជាធិបតេយ្យវិញ ពួកគេថា ការផ្តាច់ខ្លួនរបស់អ្នកនយោបាយឱកាសនិយមនេះ ជាពេលវេលាមួយសម្រាំងចោលអ្នកនយោបាយមិនល្អចេញពីក្រុមខ្លួន។
តើប្រិយមិត្តស្គាល់អ្នកនយោបាយឱកាសនិយមណាខ្លះ ហើយតើជីវិតនយោបាយរបស់ពួកគេនឹងប្រែក្លាយទៅជាយ៉ាងណានាពេលអនាគត?
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។