ការបិទវិទ្យុសំឡេងប្រជាធិបតេយ្យ វីអូឌី (VOD) យ៉ាងតក់ក្រហល់ដោយប្រើពេលមិនដល់ ២៤ម៉ោង ដែលផ្ទុយពីច្បាប់ស្តីពីរបបសារព័ត៌មាន គឺជាយុទ្ធនាការចុងក្រោយមួយនៃកេរ្តិ៍ដំណែលបំផ្លាញប្រជាធិបតេយ្យរបស់លោកនាយករដ្ឋមន្ត្រី ហ៊ុន សែន។
បើទោះជាកន្លងទៅលោកធ្លាប់មានប្រសាសន៍ថា លោកមិនយកអ្នកសារព័ត៌មានធ្វើជា«សត្រូវ»ក៏ដោយ ក៏ក្រោមការដឹកនាំរបស់លោក ប្រព័ន្ធផ្សព្វផ្សាយឯករាជ្យនៅកម្ពុជាមិនតិចទេបានរងនូវការធ្វើទុក្ខបុកម្នេញ និងបង្ខំចិត្តបិទការិយាល័យក្នុងប្រទេស ក្នុងនោះមានដូចជា សារព័ត៌មាន ឌឹ ខេមបូឌា ដេលី (The Cambodia Daily) និងវិទ្យុអាស៊ីសេរី (RFA) ជាដើម។
រីឯសារព័ត៌មានខ្លះទៀតដូចជាកាសែត ភ្នំពេញ ប៉ុស្តិ៍ (Phnom Penh Post) បានផ្លាស់ប្តូរជំហររបស់ខ្លួនដើម្បីអាចបន្តជីវិតក្នុងស្រុកបាន។ ក្រៅពីនោះក៏មានការចាប់ចងអ្នកកាសែតដាក់គុកផងដែរ។
«ល្បិចចាស់គំរិល»ដើម្បីធានាជ័យជម្នះទុកជាមុននៅមុនពេលបោះឆ្នោតជាតិម្តងៗ និងការភ័យស្លន់ស្លោមិនចង់ឱ្យខូចផែនការផ្ទេរអំណាចតពូជប្រចាំត្រកូលរបស់លោក អាចជាហេតុផលចម្បងដែលធ្វើឱ្យលោក ហ៊ុន សែន ឈានទៅបិទវិទ្យុ VOD យ៉ាងតក់ក្រហល់បែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។