ព្រះសង្ឃចំនួន ៥០០អង្គ មន្រ្តីរដ្ឋាភិបាល និងប្រជាពលរដ្ឋតិចតួច រួមគ្នាប្រារព្ធពិធីបង្សុកូល និងរាប់បាត្រថ្វាយព្រះវិញ្ញាណក្ខន្ធព្រះករុណា «ព្រះបរមរតនកោដ្ឋ» គម្រប់ខួប ២ឆ្នាំ នៅមុខព្រះបរមរាជវាំង នៅព្រឹកថ្ងៃទី១៥ តុលា។ ពិធីនេះពុំមានការរឹតត្បិតការចូលរួមពីសាធារណជនទូទៅឡើយ ជាពិសេស ប្រពលរដ្ឋទូទៅអាចចូលរួមរាប់បាត្របាន។
ទោះយ៉ាងណា ក្នុងពិធីនោះពុំឃើញមានវត្តមានមន្រ្តីជាន់ខ្ពស់រាជរដ្ឋាភិបាលចូលរួមរាប់បាត្រច្រើនទេ ក្រៅពីប្រធានរដ្ឋសភា និងនាយករដ្ឋមន្តរី។ ចំណែកតំណាងរាស្រ្តមកពីបក្សប្រឆាំងក៏ពុំឃើញមានវត្តមានក្នុងពីធីនោះដែរ។
នៅព្រឹកម៉ោង ៧ព្រឹក ថ្ងៃទី១៥ ខែតុលា តំណាងមន្រ្តីគ្រប់ក្រសួង ស្ថាប័ននានា និងប្រជាពលរដ្ឋ បានតម្រៀបជាជួររង់ចាំរាប់បាត្រថ្វាយព្រះសង្ឃ ចំណែកភ្លេងពិណពាទ្យ ក៏បានបន្លឺយ៉ាងរងំកដរពិធីនៅមុខព្រះបរមរាជវាំងនោះ។
«សំឡេងភ្លេង»
ក្រោយពីព្រះសង្ឃចំនួន ៥០០អង្គនិមន្តគ្រប់ចំនួន គណៈកម្មាធិការបុណ្យបាននិមន្តព្រះសង្ឃទៅបង្សុកូលនៅក្រៅរបងវាំងចំពីមុខព្រះឆាយាល័ក្ខណ៍ ព្រះករុណាព្រះបរមរតនកោដ្ឋ រួចហើយទើបរៀបចំពិធីរាប់បាត្រ។
«សំឡេងសូត្រធម៌»
លោកយាយ ស្វាយ សុវណ្ណ ដែលបានចូលរួមរាប់បាត្រក្នុងពិធីនេះដែរ មានប្រសាសន៍ថា ការចូលរួមនេះដើម្បីឧទ្ទិសកុសលថ្វាយព្រះវិញ្ញាណក្ខន្ធព្រះករុណាព្រះបរមរតនកោដ្ឋ។ លោកយាយ ស្វាយ សុវណ្ណ បន្តឲ្យដឹងទៀតថា ជារៀងរាល់ថ្ងៃសីល លោកយាយតែងតែដុតធូបបួងសួងសុំឲ្យព្រះវិញ្ញាណក្ខន្ធព្រះអង្គបានទៅដល់ឋានសុគតិភព និងនៅតែរក្សាទឹកដីកម្ពុជា៖ « ល្ងាចមិញបបួលគ្នាថាបានបីនាក់ ឥឡូវថាគេមិនមក ក៏យាយមកដែរ ប្តេជ្ញាថាមកធ្វើខួបឲ្យសម្តេចម្ចាស់ទឹកម្ចាស់ដីផែនដីកម្ពុជា។ នឹកឃើញគាត់ខ្ញុំហូរទឹកភ្នែក។ ខ្ញុំឧទ្ទិសកុសលឲ្យព្រះករុណាឲ្យបានទៅចាប់ជាតិខ្ពស់ ហើយបានធ្វើជាស្តេចផែនដីតទៅមុខទៀត។ ប្រាប់កូនប្រាប់ចៅទៀតថា អ្ហែង ! អុជធូបកុំភ្លេចសម្តេចព្រះបិតាជាតិយើង » ។
អ្នកចូលរួមពិធីនេះ ពាក់អាវ ខោ ឬសំពត់ពណ៌ខ្មៅ អ្នកខ្លះយកចង្ហាន់មកពីផ្ទះ អ្នកខ្លះទៀតរាប់បាត្រដោយមីកញ្ចប់និងថវិកា។ អ្នកស្រី សន សាប៊ីន បានសម្តែងការត្រេកអរនៅពេលបានចូលរួមព្រះរាជពិធីរបស់ព្រះមហាវីរក្សត្រ។ តាមរយៈពិធីរាប់បាត្រនេះ អ្នកស្រី សន សាប៊ីន ឧទ្ទិសកុសលថ្វាយព្រះវិញ្ញាណក្ខន្ធសម្តេចតា ដើម្បីជាការតបស្នងចំពោះការដឹកនាំប្រទេសរបស់ព្រះមហាវិរក្សត្រើ៖ « ថ្ងៃនេះខ្ញុំមានសេចក្តីត្រេកអរជាខ្លាំងដែលនាងខ្ញុំបានចូលរួមគោរព្វវិញ្ញាណក្ខន្ធ ពិធីរាប់បាត្រ ព្រោះវាកម្រ មិនងាយថាបានមកទេ ដូច្នេះ កម្មវិធីមួយៗ ហើយនេះជាកម្មវិធីព្រះមហាក្សត្រ។ ឲ្យព្រះអង្គបានទៅចាប់ភព ទៅរកសេចក្តីសុខសេចក្តីចម្រើនរបស់ព្រះអង្គ ណាមូយឲ្យប្រជាពលរដ្ឋបានសេខក្តីសុខផង ព្រោះប្រជាពលរដ្ឋទាំងអស់មានទំនុកចិត្តលើព្រះអង្គខ្លាំងណាស់កាលពីព្រះអង្គនៅមានព្រះជន្ម»។
ពិធីប្រារព្ធគោរពខួប ២ឆ្នាំនៃព្រះវិញ្ញាណក្ខន្ធព្រះបរមរតនកោដ្ឋ នៅថ្ងៃទី១៥ ខែតុលា នេះ នៅក្នុងព្រះបរមរាជវាំង ក៏មានពិធីរាប់បាត្រ និងធ្វើពិធីសាសនាដែរ។ លោក ហេង សំរិន ប្រធានរដ្ឋសភា លោកនាយករដ្ឋមន្រ្តី ហ៊ុន សែន និងថ្នាក់ដឹកនាំសំខាន់ៗរបស់ស្ថាប័នរដ្ឋ បានអញ្ជើញចូលរួមព្រះរាជពិធីនេះក្នុងព្រះបរមរាជវាំង ប៉ុន្តែគេមិនឃើញមានវត្តមានមន្រ្តីបក្សប្រឆាំងចូលរួមទេ។
ភិក្ខុ ស៊ុន ឡី គង់នៅវត្តបទុមវតី ដែលបាននិមន្តក្នុងពិធីរាប់បាត្រ មានថេរដីកាថា ព្រះអង្គបានសូត្រធម៌បង្សុកូល ឧទ្ទិសបុណ្យកុសលថ្វាយព្រះវិញ្ញាណក្ខន្ធព្រះបរមរតនកោដ្ឋ។ ព្រះតេជព្រះគុណមានថេរដីកាទៀតថា កាលណាអ្នកថ្វាយទានមានទឹកចិត្តសប្បាយជ្រះថ្លាក្នុងការថ្វាយទាន បុណ្យកុសលនឹងអាចបានទៅដល់ព្រះវិញ្ញាណក្ខន្ធព្រះបរមរតនកោដ្ឋ៖ « សម្រាប់អាត្មាភាពផ្ទាល់ នៅពេលអាត្មាភាពបាននិមន្តចូលរួមបែបនេះ គឺបានទន្ទេញភាវនាក្នុងចិត្តជានិច្ចថា បុណ្យកុសលទាំងឡាយទាំងពួងដែលអាត្មាបានធ្វើពីអតីតកាលរហូតដល់បច្ចុប្បន្ន អាត្មាបានឧទ្ទិសក្នុងចិត្តខ្លួនឯង ឲ្យដល់ជាពិសេសគឺព្រះករុណា ព្រះបាទ សីហុន តែម្តង » ។
ស្របពេលមានពិធីរាប់បាត្រនៅមុខព្រះបរមរាជវាំង និងនៅក្នុងព្រះបរមរាជវាំង មន្រ្តីស្ថាប័នរដ្ឋប្រមាណ ៣០ស្ថាប័ន គ្រងសម្លៀកបំពាក់ឯកសណ្ឋានជាសំពត់ផាមួង អាវស ក្រមាពានាពណ៌តាមថ្នាក់ បានទៅចូលរួមពិធីថ្វាយកម្រងផ្កាព្រះបរមរូបព្រះបរមរតនកោដ្ឋ នៅខាងកើតវិមានឯករាជ្យ។
«សំឡេងភ្លេងត្រែ»
ប្លែកអីតំណាងរាស្រ្តគណបក្សសង្គ្រោះជាតិ មិនត្រូវបានអញ្ជើញឲ្យចូលរួមទេ។ អ្នកនាំពាក្យគណបក្សសង្រ្គោះជាតិ លោក យឹម សុវណ្ណ បានឲ្យដឹងថា គណៈកម្មាធិការជាតិរៀបចំបុណ្យជាតិ អន្តរជាតិ មិនបានអញ្ជើញតំណាងរាស្រ្តគណបក្សសង្រ្គោះជាតិ ចូលរួមពិធីនេះទេ។ លោក យឹម សុវណ្ណ យល់ថា នៅក្នុងកាលៈទេសៈនេះ តំណាងរាស្រ្តគណបក្សសង្រ្គោះជាតិ គួរត្រូវបានអញ្ជើញចូលរួម ព្រោះជាពិធីបុណ្យជាតិ ហើយស្ថានការណ៍នយោបាយក៏ល្អឡើងវិញដែរ៖ «យើងមិនត្រូវបានការអញ្ជើញ ខ្ញុំក៏មិនដឹងមូលហេតុអីដែរ បើទោះជាយ៉ាងណាក៏ដោយ គណបក្សសង្រ្គោះជាតិ តំណាងរាស្រ្តគណបក្សសង្រ្គោះជាតិ ព្រមទាំងថ្នាក់ដឹកនាំ សកម្មជន សកម្មនារី បានប្រារព្ធធ្វើពិធីគោរព្វព្រះវិញ្ញាណក្ខន្ធនៅទីស្នាក់ការគណបក្សសង្រ្គោះជាតិ កាលពីព្រឹកមិញ»។
វិទ្យុអាស៊ីសេរី មិនអាចសុំការកញ្ជាក់ពីគណៈកម្មាធិការជាតិរៀបចំបុណ្យជាតិ អន្តរជាតិ ចំពោះបញ្ហានេះបានទេ នៅថ្ងៃទី១៥ ខែតុលា នេះ។
ព្រះបរមរតនកោដ្ឋ បានយាងចូលទិវង្គតនៅថ្ងៃទី១៥ ខែតុលា ឆ្នាំ២០១២ ក្នុងព្រះជន្ម ៩០ព្រះវស្សា នាទីក្រុងប៉េកាំង ប្រទេសចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។