ប៉ូលិស​បញ្ជូន​មេការ​ខារ៉ាអូខេ​នៅ​សៀមរាប​៦​នាក់​ទៅ​តុលាការ

ប៉ូលិស​នៃ​ស្នងការ​នគរបាល​ខេត្ត​សៀមរាប បាន​បញ្ជូន​ខ្លួន​មេការ​ខារ៉ាអូខេ​នៃ​ក្លឹប វុនឌ័រ (Wonder) ចំនួន ៦​នាក់ ដែល​គេ​សង្ស័យ​ថា អាច​មាន​ជាប់​ពាក់ព័ន្ធ​នឹង​ការ​ទទួល​ផល​ពី​របរ​ពេស្យាចារ​ខុស​ច្បាប់​ទៅ​កាន់​តុលាការ​ខេត្ត​សៀមរាប កាល​ពី​ល្ងាច​ថ្ងៃ​ទី​២៤ ខែ​មីនា បន្ទាប់​ពី​ប៉ូលិស​បាន​នាំ​ខ្លួន​ស្ត្រី​ខារ៉ាអូខេ​ក្នុង​ក្លឹប​នោះ ៧៤​នាក់ មក​សាក​សួរ​ដើម្បី​ស្វែង​រក​ភស្តុតាង​ទៅ​លើ​បទ​សង្ស័យ​ថា ក្លឹប​ខារ៉ាអូខេ​នោះ​អាច​ជាប់​ពាក់ព័ន្ធ​នឹង​ការ​រក​ស៊ី​ផ្លូវ​ភេទ​ខុស​ច្បាប់​មក។
ដោយ ហង្ស សាវយុត
2011.03.25
Share on WhatsApp
Share on WhatsApp

លោក អ៊ុំ អមរា ស្នងការ​រង​ទទួល​បន្ទុក​ការិយាល័យ​កណ្ដាល​ប្រឆាំង​បទល្មើស​នៃ​ស្នងការ​នគរបាល​ខេត្ត​សៀមរាប បាន​មាន​ប្រសាសន៍​កាល​ពី​រសៀល​ថ្ងៃ​ព្រហស្បតិ៍ ទី​២៤ ខែ​មីនា ថា ប៉ូលិស​បាន​សង្ស័យ​ថា មេការ​ក្លឹប​ខារ៉ាអូខេ​ចំនួន ៦​នាក់​នោះ អាច​មាន​ជាប់​ពាក់ព័ន្ធ​នឹង​អំពើ​សញ្ចារកម្ម។

ចំណែក​ស្រ្តី​ខារ៉ាអូខេ​ទាំង​អស់​ដែល​ប៉ូលិស​បាន​សាកសួរ​រួច​ហើយ​គឺ​បាន​ប្រគល់​ឲ្យ​ទៅ​​មន្ទីរ​សង្គមកិច្ច និង​អង្គការ​ក្រៅ​រដ្ឋាភិបាល​មួយ​ចំនួន​ទទួល​យក​ទៅ​បណ្ដុះបណ្ដាល​វិជ្ជាជីវៈ និង​អ្នក​ដែល​មិន​ជាប់​ពាក់ព័ន្ធ​ខ្លះ​ទៀត​ត្រូវ​បាន​ដោះលែង ៖ «នៅ​ខារ៉ាអូខេ​ហ្នឹង​មាន​ជាប់​ទាក់ទង​នាំ​ភ្ញៀវ​អី​ចូល​បន្ទប់​អ៊ីចឹង​លួច​លាក់»

ចំណែក​មន្ត្រី​តុលាការ​ខេត្ត​សៀមរាប មិន​ទាន់​បញ្ជាក់​ឲ្យ​ច្បាស់លាស់​នៅ​ឡើយ​ទេ​ថា តើ​មាន​មនុស្ស​ប៉ុន្មាន​នាក់​ដែល​នឹង​ត្រូវ​ចោទ​ប្រកាន់​នៅ​ឡើយ​ទេ។

លោក ទី សុវិនថាល់ ព្រះរាជអាជ្ញា​អម​សាលា​ដំបូង​ខេត្ត​សៀមរាប បាន​មាន​ប្រសាសន៍​ថា លោក​មិន​ទាន់​បាន​ដឹង​នៅ​ឡើយ​ទេ​ថា តើ​អ្នក​ដែល​ប៉ូលិស​បញ្ជូន​ខ្លួន​ទៅ​កាន់​តុលាការ​នោះ ត្រូវ​បាន​សម្រេច​ឃុំ​ខ្លួន​បណ្ដោះអាសន្ន​ដើម្បី​បន្ត​ការ​ស៊ើប​អង្កេត ឬ​យ៉ាង​ណា?

លោក​បន្ត​ថា ៖ «ឃុំ ឬ​មិន​ឃុំ អា​ហ្នឹង​ស្ថិត​នៅ​លើ​ចៅក្រម ព្រោះ​ច្បាប់​ព្រហ្មទណ្ឌ​បញ្ជាក់​ថា ជន​សង្ស័យ​​ដែល​មក​ចំពោះ​មុខ​ចៅក្រម​​ជា​ដំបូង គឺ​គាត់​មាន​សិទ្ធិ​សម្រេច​ឃុំ ឬ​មិន​ឃុំ»

ប៉ូលិស​នៃ​ស្នងការ​នគរបាល​ខេត្ត​សៀមរាប បាន​ឲ្យ​ដឹង​ថា កាល​ពី​យប់​ថ្ងៃ​ទី​២២ ខែ​មីនា កន្លង​មក គេ​បាន​ស្នើ​សុំ​ទៅ​ព្រះរាជអាជ្ញា​អម​សាលា​ដំបូង​ខេត្ត​សៀមរាប ដើម្បី​ធ្វើការ​ឆែកឆេរ​ក្លឹប​ខារ៉ាអូខេ​មួយ​ឈ្មោះ វុនឌ័រ ដែល​មាន​ទីតាំង​នៅ​ភូមិ​បន្ទាយ​ចាស់ សង្កាត់​សាលាកំរើក ក្រុង​សៀមរាប បន្ទាប់​ពី​មាន​ការ​សង្ស័យ​ថា ក្លឹប​នោះ​​អាច​មាន​របរ​រក​ស៊ី​ផ្លូវ​ភេទ​លួចលាក់។

ក្នុង​ការ​ឆែកឆេរ​ក្លឹប​ខារ៉ាអូខេ​នោះ ប៉ូលិស​បាន​នាំ​ខ្លួន​ស្ត្រី​ខារ៉ាអូខេ​ចំនួន ៧៤​នាក់ និង​មេការ​ប្រមាណ ១០​នាក់​ទៀត ទៅ​សាកសួរ​នៅ​ស្នងការ​នគរបាល​ខេត្ត កាល​ពី​ថ្ងៃ​ទី​២៣ ខែ​មីនា។

អភិបាល​ក្រុង​សៀមរាប លោក ទេព ប៊ុនឆាយ បាន​មាន​ប្រសាសន៍​ថា អាជ្ញាធរ​ក្រុង​បាន​ប្រាប់​ឲ្យ​ក្លឹប​ខារ៉ាអូខេ វុនឌ័រ ផ្អាក​សកម្មភាព​នៃ​របរ​នេះ​​សិន​​នៅ​យប់​ថ្ងៃ​ទី​២៤ ខែ​មីនា​នេះ។

អនុ​ប្រធាន​ផ្នែក​ស៊ើប​អង្កេត​របស់​សមាគម​ការពារ​សិទ្ធិ​មនុស្ស​អាដហុក លោក ចាន់ សុវ៉េត បាន​មាន​ប្រសាសន៍​ថា លោក​សូម​ឲ្យ​ភ្នាក់ងារ​រដ្ឋាភិបាល​ធ្វើការ​លើ​បញ្ហា​នោះ​គួរ​តែ​ឲ្យ​បាន​ច្បាស់លាស់​តាម​ផ្លូវ​ច្បាប់ ដើម្បី​ឲ្យ​មាន​តម្លាភាព​ត្រឹមត្រូវ៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
គណបក្ស​ចំនួន​៣ ចូលរួម​ប្រកួត​ដណ្ដើម​កៅអី​ក្រុមប្រឹក្សា​ស្រុក​ក្រុង​ទើប​បំបែក​ថ្មី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។