កសិករ​ជាង​១០០​គ្រួសារ​នៅ​កំពង់ធំ​តវ៉ា​នឹង​ថៅកែ​អាង​ទឹក

នៅ​គ្រា​ដែល​ប្រព័ន្ធ​ធារាសាស្ត្រ​របស់​រដ្ឋាភិបាល​កម្ពុជា មិន​ទាន់​បាន​សាង​សង់​សំបូរ​បែប គឺ​មាន​ក្រុមហ៊ុន​ឯកជន​មួយ​ចំនួន​ឆ្លៀត​ឱកាស​កសាង​អាង​ស្តុក​ទឹក ដើម្បី​ទាញ​យក​ផល​ចំណេញ​ពី​កសិករ។
ដោយ សុខ សេរី
2011-03-30
Share

កសិករ​នៅ​ក្នុង​ខេត្ត​កំពង់ធំ បាន​ឲ្យ​ដឹង​ថា គ្រួសារ​កសិករ​ជាង ១០០​គ្រួសារ នៅ​ស្រុក​កំពង់​ស្វាយ ខេត្ត​កំពង់ធំ​បាន​រង​គ្រោះ​ដោយ​សារ​ថៅកែ​អាង​ទឹក​ឯក​ជន​មួយ បាន​ទាម​ទារ​ឲ្យ​កសិករ​មួយ​គ្រួសារ បង់​ថ្លៃ​ទឹក​ជា​ស្រូវ​ចំនួន ១​តោន ជា​ថ្នូរ​និង​ការ​បញ្ចូល​ទឹក​ក្នុង​ស្រែ ប៉ុន្តែ​ទឹក​នោះ​មិន​គ្រប់គ្រាន់ ចំណែក​ឯ​ការ​បញ្ចូល​ទឹក​ក្នុង​ស្រែ​កន្លង​មក គឺ​កសិករ​ជា​អ្នក​បូម និង​ចេញ​សោ​ហ៊ុយ​ដោយ​ខ្លួន​ឯង។

គ្រួសារ​កសិករ​ដែល​បាន​រង​គ្រោះ​កន្លង​មក គឺ​រស់​នៅ​ក្នុង​ភូមិ​អូរ​លួង ភូមិ​អូរ​សំបួរ ភូមិ​អូវ៉ាយ និង​ភូមិ​មួយ​ចំនួន​ទៀត នៅ​ស្រុក​កំពង់ស្វាយ ខេត្ត​កំពង់ធំ។ ការ​ទាម​ទារ​បែប​នេះ​បាន​ចាប់​ផ្ដើម​តាំង​ពី​ឆ្នាំ​២០០៧ កន្លង​មក។

កសិករ​នៅ​ស្រុក​កំពង់​ស្វាយ ខេត្ត​កំពង់ សុំ​មិន​ប្រាប់​ឈ្មោះ បាន​ថ្លែង​ប្រាប់​វិទ្យុ​អាស៊ី​សេរី​នៅ​ថ្ងៃ​ទី​៣០ ខែ​មីនា ថា​ប្រជា​ពល​រដ្ឋ​សុំ​ឲ្យ​ក្រុមហ៊ុន​អនុគ្រោះ​បន្ថយ​ថ្លៃ​ទឹក ពី​ចំនួន​ស្រូវ ១​តោន មក​ត្រឹម ៥០០​គីឡូក្រាម ឬ​៧០០ គីឡូក្រាម​វិញ នៅ​ពេល​ណា​កសិករ​ធ្វើ​ស្រូវ​មិន​បាន​ផល​ល្អ ដោយ​សារ​ខ្វះ​ទឹក ៖ "ដល់​ពេល​បាន​ផល គាត់​មក​ជំរិត​យក។ ខ្ញុំ​ចង់​ឲ្យ​រដ្ឋាភិបាល​គាត់​ជួយ​មើល​ផង បើ​សិន​គេ​គាប​ដល់​ថ្នាក់​ហ្នឹង​ហើយ។ យើង​បូម​ទឹក​ដោយ​ខ្លួន​យើង ហើយ​គេ​នៅ​តែ​យក​ប៉ុណ្ណឹង​ទៀត"

កសិករ​នោះ​បាន​ឲ្យ​ដឹង​ថា គាត់​ដាំ​ដុះ​ស្រូវ​ចំនួន ២​ហិកតារ និង​ប្រមូល​ផល​ស្រូវ​បាន​ចំនួន ១០​តោន ប៉ុន្តែ​ម្ចាស់​អាង​ទឹក​ទាម​ទារ​ឲ្យ​គាត់​បង់​ថ្លៃ​ទឹក ដោយ​គិត​ជា​ស្រូវ​មាន​ចំនួន ២​តោន​ជា​កំហិត។

កសិករ​ឈ្មោះ ប៉ុន សុជា បាន​ថ្លែង​ថា ការ​ទាម​ទារ​បែប​នេះ​កន្លង​មក កសិករ​មិន​បាន​ចំណេញ​ទេ ៖ "ដោយ​ឆ្នាំ ឆ្នាំ​ណា​មាន​ភ្លៀង​ធ្លាក់ គឺ​គ្រប់គ្រាន់ ឆ្នាំ​ណា​អត់​មាន​ភ្លៀង​ធ្លាក់ អត់​គ្រប់គ្រាន់​ផង"

មេ​ការ​ក្រុមហ៊ុន​អាង​ទឹក​៨០០ គឺ​លោក ណៅ ទត អាយុ​៥៩​ឆ្នាំ បាន​មាន​ប្រសាសន៍​បំភ្លឺ​ថា កន្លង​មក​ក្រុមហ៊ុន​បាន​អនុគ្រោះ​ដល់​គ្រួសារ​ប្រជា​ពល​រដ្ឋ​ណា ដែល​ធ្វើ​ស្រូវ​មិន​បាន​ផល​ល្អ ៖ "កាល​ពី​ធ្វើ​ស្រែ​ឆ្នាំ​២០០៩ ២០១០ រួច​យើង​បាន​ជុំ​គ្នា​ម្ដង។ សម្រេច​ទាំង​អស់​គ្នា ស្រែ​ណា ដែល​កើត ឲ្យ​អ្នក​ម្ចាស់​អាង ១​តោន​ស្រូវ ក្នុង​មួយ​ហិកតារ ហើយ​ស្រែ​ណា​ដែល​មិន​កើត យើង​ពិនិត្យ​តាម​ជាក់​ស្ដែង។ ស្រែ​ដែល​អ្នក​ធ្វើ​មិន​ទាន់​គេ ស្រូវ​នៅ​មិន​ទាន់​ទុំ​ទេ។ អាច​ចុះ​ទៅ ៥០០​គីឡូក្រាម​ក៏​មាន"

សមាជិក​ក្រុម​ប្រឹក្សា​ឃុំ​កំពង់គោ ស្រុក​កំពង់​ស្វាយ ខេត្ត​កំពង់ធំ លោក ស្រី ណោង អាយុ​៥៦​ឆ្នាំ បាន​មាន​ប្រសាសន៍​ថា កិច្ច​សន្យា​រវាង​កសិករ និង​តំណាង​ក្រុមហ៊ុន​អាង​ទឹក​នោះ មិន​ត្រូវ​បាន​ឲ្យ​អាជ្ញាធរ​មូលដ្ឋាន​ដឹង​ឭ​ទេ ៖ "បើ​សិន​ជា​គាត់ ប្រជា​កសិករ​គាត់​ទាក់​ទង​ថា ត្អូញត្អែរ​ទឹក​ថា​ថ្លៃ​យ៉ាង​ម៉េច មក​ទាក់​ទង​ឃុំ ឃុំ​អាច​ចុះ​ទៅ​ជួយ​បាន នៅ​ក្នុង​ភូមិសាស្ត្រ​ឃុំ​កំពង់គោ។ កន្លង​មក​អត់​មាន​អី"

ប្រភព​ពី​មេ​ការ​ក្រុមហ៊ុន​អាង​ទឹក​បាន​ឲ្យ​ដឹង​ថា អាង​ទឹក​នេះ មាន​ទំហំ​បណ្ដោយ ៨០០​ម៉ែត្រ និង​ទទឹង ៥០០​ម៉ែត្រ ដែល​បាន​ទទួល​អាជ្ញាប័ណ្ណ​ពី​អភិបាល​កំពង់ធំ លោក ណាំ ទុំ កាល​ពី​ឆ្នាំ​២០០៦ កន្លង​មក និង​បាន​ដំណើរ​ការ​នៅ​ឆ្នាំ​២០០៧។

កន្លង​មក រដ្ឋាភិបាល​បាន​កំណត់​ឲ្យ​អាជ្ញាធរ​ខេត្ត​កំពង់ធំ​លប់ និង​ឈូស​ចោល​អាង​ទឹក​នានា​មួយ​ចំនួន ដែល​កសាង​ដោយ​មិន​ត្រឹម​ត្រូវ បណ្ដាល​ឲ្យ​ប៉ះពាល់​ដល់​ព្រៃ​លិច​ទឹក ដែល​ជា​ជម្រក​របស់​ត្រី​ពង​នា​រដូវ​ទឹក​ឡើង៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល