ពលរដ្ឋនៅខេត្តកោះកុងចោទមន្ត្រីរដ្ឋបាលព្រៃឈើថាចាប់យកជ័រចុងពួកគាត់
2012.12.14
ពលរដ្ឋដែលមានជីវភាពក្រលំបាកខ្វះខាតស្បៀងអាហារនៅឃុំជីខលើ ខេត្តកោះកុង បាននាំគ្នាចូលព្រៃដើរប្រមូលកំណកជ័រចុងយកទៅលក់ សម្រាប់ទិញអង្ករបរិភោគប្រចាំថ្ងៃ ប៉ុន្តែសកម្មភាពនេះត្រូវបានមន្ត្រីរដ្ឋបាលព្រៃឈើនៅទីនោះចាប់ពួកគាត់យកជ័រដែលរកបានទាំងអស់ ដោយចោទថាពួកគាត់ប្រកបរបរជ័រចុងខុសច្បាប់។
ប្រជាពលរដ្ឋភូមិឈូក ឃុំជីខលើ ស្រុកស្រែអំបិល ខេត្តកោះកុង ចោទថា មន្ត្រីរដ្ឋបាលព្រៃឈើនៅទីនោះបានចាប់យកដុំជ័រចុងចំនួន ១០៨គីឡូក្រាម ខណៈគាត់ដឹកពីព្រៃ ដើម្បីយកទៅលក់។
លោក ហង់ ធឿន អាយុ ៥៥ឆ្នាំ នៅភូមិឈូក ថ្លែងថា កាលពីថ្ងៃទី៣ ខែធ្នូ មន្ត្រីរដ្ឋបាលព្រៃឈើមួយរូបឈ្មោះ ថា បានចាប់យកជ័រចុងពីគាត់ចំនួន ៣បាវ មានទម្ងន់ ១០៨គីឡូក្រាម។ លោកថាមន្ត្រីចាប់យកដុំជ័រចុងនោះប្រាប់ថា ច្បាប់ព្រៃឈើហាមរកស៊ី និងចោទគាត់រកស៊ីខុសច្បាប់។ លោក ហង់ ធឿន អះអាងថា ដុំជ័រចុងនោះគាត់មិនបានចោះដើមឈើយកជ័រទេ គឺគាត់ដើររើសកំណកជ័រដែលជ្រុះពីដើមឈើតំបន់ព្រៃភ្នំតូច នៅខាងលិចវត្តគងឆា។ នៅពេលគាត់ដឹកដុំជ័រចុង ៣បាវ មកដល់វត្តគងឆា មន្ត្រីរដ្ឋបាលព្រៃឈើឈ្មោះ ថា ក៏ចាប់យកតែម្តង៖ «បងប្អូនរកតាំងពីដូនតា ដល់ដែលអ្នកណាចាប់ ដល់ពេលមេព្រៃចាប់ ចោទថាខ្ញុំខុសច្បាប់ ខ្ញុំសុំអង្វរគេដែរ តែគេមិនព្រមឲ្យខ្ញុំសោះ»។
អ្នកភូមិម្នាក់ទៀតឈ្មោះ តេង កៅ អាយុ ៥២ឆ្នាំ អះអាងថា ព្រោះតែការអភិវឌ្ឍដំណាំអំពៅនៅក្នុងឃុំ បានធ្វើឲ្យអ្នកភូមិបាត់បង់ដីដាំដំណាំ។ អ្នកភូមិខ្លះខ្វះស្បៀង និងខ្វះថវិកាចាយប្រចាំថ្ងៃ ទើបអ្នកភូមិចូលព្រៃរើសជ័រចុងជាអនុផលព្រៃឈើ ដើម្បីប្រើបិតក្ដារទូក និងលក់ក្នុងតម្លៃ ១គីឡូក្រាម ២ពាន់រៀល។ លោកថា តាំងពីដូនតាមក ជ័រចុង រដ្ឋមិនបានហាមធ្វើអាជីវកម្មទេ តែមន្ត្រីរដ្ឋបាលព្រៃឈើបែរជាចាប់យក ហើយចោទថារកស៊ីខុសច្បាប់៖ «គឺខាងរដ្ឋបាលព្រៃឈើចាប់ គាត់ថាខុសច្បាប់។ ខ្ញុំសួរថាច្បាប់ តើមាត្រាទីប៉ុន្មានដែលខុសហ្នឹង?»។
វិទ្យុអាស៊ីសេរី មិនអាចទាក់ទងមន្ត្រីរដ្ឋបាលព្រៃឈើឈ្មោះ ថា នោះបានទេនៅថ្ងៃទី១៤ ខែធ្នូ។
ប៉ុន្តែពាក់ព័ន្ធបញ្ហានេះ មន្ត្រីរដ្ឋបាលព្រៃឈើនៃក្រសួងកសិកម្ម លោក ថន សារ៉ាត់ បានថ្លែងប្រាប់នៅព្រឹកថ្ងៃទី១៤ ខែធ្នូ ឆ្នាំ២០១២ ថា ជ័រចុងជាអនុផលព្រៃឈើដែលរដ្ឋាភិបាលបើកទូលាយឲ្យពលរដ្ឋអាចប្រមូលយកទៅប្រើប្រាស់បាន និងគ្មានទោសពៃរ៍នោះទេ៖ «គេអនុញ្ញាតទាំងអស់ ជាអនុផលព្រៃឈើ គឺគេចង់ឲ្យអនុផលចេញពីដើមឈើនោះឲ្យបានច្រើនផង អត់មានចាប់អត់មានឃាត់មានអីទេ ត្រូវជួយលើកទឹកចិត្តថែម។ បើអ្នកខាងខ្ញុំចាប់ សុំឈ្មោះមក ហើយប្រាប់មក ខាងខ្ញុំអត់មានឲ្យចាប់ ផលអីនោះទេ មានតែជួយលើកទឹកចិត្ត ហើយរៀបចំបែបបទជូនទៀត»។
ក្រុមប្រឹក្សាឃុំជីខលើ អ្នកស្រី ទិត ហៀង ថ្លែងថា ក្នុងឃុំនោះមានចំនួនភូមិ៤ មានពលរដ្ឋរស់នៅជាង ១ពាន់គ្រួសារ។ ក្នុងនោះមានពលរដ្ឋជាង ២០០គ្រួសារ កំពុងខ្វះខាតដីដាំដុះ ដោយសារការផ្តល់ដីសម្បទានសេដ្ឋកិច្ចដំណាំអំពៅ។ អ្នកស្រីថា បច្ចុប្បន្នអ្នកភូមិខ្លះបានធ្វើកម្មករចម្ការអំពៅ ប៉ុន្តែទទួលបានកម្រៃឈ្នួលទាប គឺ ១ម៉ឺនរៀលក្នុង១ថ្ងៃ។ ប្រាក់ ១ម៉ឺនរៀលនោះ កម្មករត្រូវកាប់អំពៅឲ្យបាន ១០០បាច់ ក្នុង ១បាច់ ២០ដើម ហើយសកស្លឹកផង និងលើកដាក់រថយន្តផង។ អ្នកស្រីថា អ្នកភូមិកាន់តែច្រើនឡើង កំពុងខ្វះស្បៀង ដោយសារកម្រៃឈ្នួលកាប់អំពៅថោក ទើបគ្រួសារខ្លះចេញទៅរករើសជ័រចុង ខ្លះចេញទៅស៊ីឈ្នួលនៅប្រទេសថៃ ដែលគេឲ្យកម្រៃខ្ពស់ជាងនៅក្នុងស្រុក។
អ្នកស្រីថា ជាលើកទីមួយហើយ ដែលមន្ត្រីរដ្ឋបាលព្រៃឈើចាប់ជ័រចុងពីអ្នកភូមិ ពីមុនមកមិនមានមន្ត្រីណាចាប់យកជ័រចុងពីប្រជាពលរដ្ឋនោះទេ៖ «ខាងខ្ញុំហ្នឹង ទៅរកជួបរដ្ឋបាលព្រៃឈើ តែគេគេចអត់ឲ្យយើងជួប»។
តំណាងសហគមន៍ឃុំជីខលើ លោក អាន ថៃយ៉ា ថ្លែងថា សុំឲ្យស្ថាប័នរដ្ឋ និងអង្គការនានាជួយបង្រៀនច្បាប់នានាដល់ប្រជាពលរដ្ឋ ដើម្បីឲ្យពលរដ្ឋបានចេះដឹង និងចេះដោះស្រាយបញ្ហាកើតនៅក្នុងតំបន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មនុស្ស ៤នាក់ស្លាប់ និង ៥នាក់ទៀតរបួសធ្ងន់ ពេលប្រជ្រៀតគ្នាយកអាំងប៉ាវនៅភូមិគ្រឹះលោក សុខ គង់
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
អត្ថបទពេញនិយម
ព័ត៌មានថ្មីៗ
- លោក ហ៊ុន ម៉ាណែត បដិសេធមិនពាក់ព័ន្ធនឹងឃាតកម្មលើលោក លិម គិមយ៉ា
- ភរិយា លោក លិម គិមយ៉ា រៀបរាប់ពីសកម្មភាពនៅលើឡានក្រុង មកទីក្រុងបាងកក មុនពេលឃាតកបាញ់សម្លាប់ប្ដី
- ជនសង្ស័យ៥នាក់ត្រូវបានឃាត់ខ្លួនករណីក្លែងបន្លំឯកសណ្ឋានសមត្ថកិច្ចដើរជំរិតទារប្រាក់
- អ្នកឃ្លាំមើលថា លោក ហ៊ុន ម៉ាណែត អសមត្ថភាពរកទីផ្សារជូនពលរដ្ឋ ទើបងាកទៅទម្លាក់ការទទួលខុសត្រូវលើបក្សប្រឆាំង
- ពលរដ្ឋខ្មែរនៅប្រទេសជប៉ុនទាមទារយុត្តិធម៌ជូនសពលោក លិម គិមយ៉ា