កសិករ​ម្នាក់​ស្លាប់​ដោយសារ​ភ្ជួរ​ដី​កិន​គ្រាប់​មីនតោន

កសិករ​ខ្មែរ​ម្នាក់​បាន​ទទួល​រង​គ្រោះ​ស្លាប់​ភ្លាមៗ​នៅ​នឹង​កន្លែង​កើត​ហេតុ នៅ​ពេល​ដែល​គាត់​បាន​បើក​ត្រាក់ទ័រ​ភ្ជួរ​ដី​កិន​ចំ​លើ​គ្រាប់​មីនតោន​ដែល​សេសសល់​ពី​សម័យ​សង្គ្រាម​មួយ​គ្រាប់​កប់​នៅ​ក្រោម​ដី ស្ថិត​នៅ​ចំណុច​ថ្លុកសង្កែ ភូមិ​អូរត្រាវជូរ ឃុំ​សិរីមានជ័យ ស្រុក​សំពៅលូន ខេត្ដ​បាត់ដំបង។
ដោយ សួន សុផលមុន្នី
2011.06.29
Share on WhatsApp
Share on WhatsApp

មេ​ឃុំ​សិរីមានជ័យ លោក ទៀង អំ បាន​មាន​ប្រសាសន៍​ឲ្យ​ដឹង​នៅ​ថ្ងៃ​ពុធ ទី​២៩ ខែ​មិថុនា ថា ហេតុការណ៍​គ្រោះថ្នាក់​មីន​តោន​នេះ បាន​កើត​ឡើង​កាល​ពី​វេលា​ម៉ោង ១១​ព្រឹក ថ្ងៃ​ទី​២៨ ខែ​មិថុនា ឆ្នាំ​២០១១។ ជន​រងគ្រោះ​មាន​ឈ្មោះ សុន ស៊ឹម ភេទ​ប្រុស អាយុ ៣៤​ឆ្នាំ មុខ​របរ​ជា​អ្នក​ស៊ី​ឈ្នួល​បើក​ត្រាក់ទ័រ​ភ្ជួរ​ដី រស់​នៅ​ភូមិ​អូរកណ្ដោល ឃុំ​សន្តិភាព ស្រុក​សំពៅលូន ខេត្ត​បាត់ដំបង ៖ «តាម​ពិត​ទៅ​គាត់​ភ្ជួរ ស៊ី​ឈ្នួល​ដី​ឲ្យ​គេ​នៅ​ភូមិសាស្ត្រ ឃុំ​សិរីមានជ័យ នៅ​ភូមិ​អូរត្រាវជួរ ប៉ុន្តែ​គាត់​ស៊ី​ឈ្នួល​គេ ភ្ជួរ​ធម្មតា អ្នក​មាន​ត្រាក់ទ័រ​គេ​ដើរ​ស៊ី​ឈ្នួល​គេ មីន​នៅ​ភូមិសាស្ត្រ និង​សំណល់​សល់​​ពី​សង្គ្រាម​ដែល​ដាក់​នៅ​តាម​ព្រៃ តាម​ដុប តាម​ផ្លូវ​តាម​អី»

លោក​មេ​ឃុំ​បន្ត​ថា នេះ​ជា​ករណី​ផ្ទុះ​គ្រាប់​មីនតោន​ដែល​នៅ​សេសសល់​កាល​ពី​សម័យ​សង្គ្រាម​ថ្មី​មួយ​ទៀត នៅ​ក្នុង​ភូមិសាស្ត្រ ឃុំ​សិរីមានជ័យ ស្រុក​សំពៅលូន ខេត្ត​បាត់ដំបង បន្ទាប់​ពី​ករណី​ផ្ទុះ​គ្រាប់មីន​នេះ​បាន​កើត​មាន​ឡើង​ចំនួន ៤​ករណី​ហើយ ចាប់​តាំង​ពី​បណ្ដាល​ឆ្នាំ​កន្លង​ទៅ។

លោក ហេង រតនា អគ្គនាយក​នៃ​មជ្ឈមណ្ឌល​កម្ចាត់​មីន​កម្ពុជា ហៅ​កាត់​ថា (CMAC)ថ្លែង​ឲ្យ​ដឹង​កាល​ពី​ពេល​ថ្មីៗ​នេះ​ថា ចំនួន​មនុស្ស​ស្លាប់​ដោយសារ​គ្រាប់​មីន និង​គ្រាប់​យុទ្ធភណ្ឌ​មិន​ទាន់​ផ្ទុះ​នៅ​ក្នុង​ខេត្ត​បាត់ដំបង នៅ​ឆ្នាំ​២០១១​នេះ មាន​ការ​កើន​ឡើង​ច្រើន​ជាង​ឆ្នាំ​កន្លង​ទៅ។

លោក​បន្ត​ថា ៖ «នៅ​ខេត្ត​បាត់ដំបង ចាប់​ពី​ខែ​មករា ដល់​ខែ​មេសា ឆ្នាំ​២០១១​នេះ មាន​ចំនួន ២៣​នាក់ បើ​ប្រៀបធៀប​ដូច​គ្នា​នៅ​ក្នុង​ឆ្នាំ​២០១០ មាន​ចំនួន​តែ ១៨​នាក់​ប៉ុណ្ណោះ មាន​ន័យ​ថា តួលេខ​ឆ្នាំ​នេះ​មាន​ការ​កើន​ឡើង​លើស​ពី​ឆ្នាំ​មុន ជា​ពិសេស​ការ​ផ្ទុះ​មីនតោន»

របាយការណ៍​មជ្ឈមណ្ឌល​កម្ចាត់​មីន​កម្ពុជា បាន​បង្ហាញ​ថា រហូត​ដល់​ឆ្នាំ​២០១១​នេះ ស៊ីម៉ាក បាន​ធ្វើការ​បោស​សម្អាត​ផ្ទៃ​ដី​ចម្ការ​មីន និង​យុទ្ធភណ្ឌ​មិន​ទាន់​ផ្ទុះ​នៅ​ក្នុង​ខេត្ត​បាត់ដំបង ទាំង​មូល បាន​ជិត ១​ម៉ឺន​ហិកតារ។ គិត​ផ្ទៃ​ដី​ដែល​ទទួល​រង​ការ​គំរាមកំហែង​ដោយ​គ្រាប់មីន និង​យុទ្ធភណ្ឌ​មិន​ទាន់​ផ្ទុះ​សរុប​មាន​ជាង ១១​ម៉ឺន​ហិកតារ​នៅ​ទូទាំង​ខេត្ត។ នៅ​សល់​ផ្ទៃ​ដី​ជិត ១០​ម៉ឺន​ហិកតារ​ទៀត​ដែល​ត្រូវ​ធ្វើការ​បោស​សម្អាត​ជា​បន្តបន្ទាប់។ ផ្ទៃ​ដី​មីន​ដែល​នៅ​សេសសល់​នេះ​ជាង ១០​ម៉ឺន​ហិកតារ​នៅ​តែ​គំរាមកំហែង និង​ជា​ឧបសគ្គ​ធ្ងន់ធ្ងរ​ក្នុង​ការ​ធ្វើ​កសិកម្ម និង​ការ​អភិវឌ្ឍ​​ក្នុង​ខេត្ត​បាត់ដំបង។

មជ្ឈមណ្ឌល​កម្ចាត់​មីន​កម្ពុជា បាន​បញ្ជាក់​ថា បច្ចុប្បន្ន​ស៊ីម៉ាក​កំពុង​អនុវត្ត​គម្រោង​កម្មវិធី​សមាហរណកម្ម​ការ​បោស​សម្អាត​មីន និង​យុទ្ធភណ្ឌ​មិន​ទាន់​ផ្ទុះ និង​ជួយ​គាំទ្រ​ការ​អភិវឌ្ឍ​សហគមន៍​ក្នុង​តំបន់​ដែល​ទទួល​ការ​គំរាមកំហែង​ដោយសារ​គ្រាប់​មីន​នៅ​ស្រុក​បវេល និង​ស្រុក​បាណន់ សម្រាប់​គម្រោង​រយៈពេល​បី​ឆ្នាំ ដែល​គាំទ្រ​ថវិកា​ដោយ​រដ្ឋាភិបាល​ប្រទេស​ជប៉ុន ស៊ីម៉ាក​នឹង​ធ្វើការ​បោស​សម្អាត​ផ្ទៃ​ដី ១.៨០០​ហិកតារ។

បញ្ហា​គ្រាប់​មីន និង​យុទ្ធភណ្ឌ​មិន​ទាន់​ផ្ទុះ ជា​បញ្ហា​រួម​របស់​សហគមន៍។ ​សព្វ​ថ្ងៃ​នេះ​ស៊ីម៉ាក​មាន​កម្លាំង​ស្ម័គ្រ​ចិត្ត​តាម​ភូមិ​ចំនួន​ជាង ៧០០​នាក់ នៅ​ក្នុង​ភូមិ ១៩២​ភូមិ។ ជាមួយ​​​គ្នា​នេះ ក្នុង​ឆ្នាំ​២០១១ ស៊ីម៉ាក​បាន​ធ្វើការ​អប់រំ​ផ្សព្វផ្សាយ​ដល់​ប្រជាពលរដ្ឋ​បាន​ជិត ១០.៥០០​នាក់​ឲ្យ​បាន​យល់​ដឹង​ពី​គ្រោះថ្នាក់​ដោយ​គ្រាប់​មីន និង​យុទ្ធភណ្ឌ​មិន​ទាន់​ផ្ទុះ​ដែល​នៅ​សេសសល់ និង​បន្សល់​ទុក​កាល​ពី​សម័យ​សង្គ្រាម៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
​ប្រតិភូ​ខ្មែរ​ក្រោម​​ប្រាប់​សន្និសិទ​អន្តរ​សាសនា​ស្តី​ពី​ការ​រំលោភ​សិទ្ធិ​សាសនា​ខ្មែរ​ក្រោម​
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។