បទវិភាគ៖ ដល់​វេលា​ដែល​លោក ហ៊ុន សែន គ្មាន​ជម្រើស​អ្វី ក្រៅពី​លះបង់​ដើម្បី​សង្គ្រោះជាតិ

ដោយ មួង ណារ៉េត
2020-06-10
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន (ឆ្វេង) ទៅ​ទទួល​ព្រះមហាក្សត្រ នៅ​ព្រលាន​យន្តហោះ​អន្តរជាតិ​ភ្នំពេញ កាល​ពី​ថ្ងៃ​ទី១១ ខែ​ឧសភា ឆ្នាំ​២០២០។
លោក​នាយករដ្ឋមន្ត្រី ហ៊ុន សែន (ឆ្វេង) ទៅ​ទទួល​ព្រះមហាក្សត្រ នៅ​ព្រលាន​យន្តហោះ​អន្តរជាតិ​ភ្នំពេញ កាល​ពី​ថ្ងៃ​ទី១១ ខែ​ឧសភា ឆ្នាំ​២០២០។
រួប​ហ្វេសប៊ុក ហ៊ុន សែន

កម្ពុជា​កំពុង​ជាប់​ផុង​ជ្រៅ​ក្នុង​រណ្ដៅ​នៃ​វិបត្តិ​ផ្ទួនៗ​គ្នា​ចំនួន​ពីរ គឺ​ទី​មួយ​វិបត្តិ​នយោបាយ នៃ​ការរំលោភ​សិទ្ធិមនុស្ស និង​បំផ្លាញ​ប្រជាធិបតេយ្យ ដែល​នាំ​ឱ្យ​សហភាព​អឺរ៉ុប នឹង​ចាប់ផ្ដើម​ដក​ការ​អនុគ្រោះ​ពន្ធ EBA ២០% នៅ​ខែ​សីហា។ ទីពីរ​គឺ​វិបត្តិ​សេដ្ឋកិច្ច​ធ្ងន់ធ្ងរ ដោយសារ​ការ​រីក​រាលដាល​នៃ​ជំងឺ​កូវីដ-១៩។

ក្នុង​ស្ថានភាព​យីអ៊ុន​ដាក់​អារក្ស​ជាន់​បែបនេះ ទាំង​ពលរដ្ឋ​ខ្មែរ និង​ប្រទេសជាតិ​ទាំងមូល ត្រូវការ​សង្គ្រោះ​បន្ទាន់។ ដូច្នេះ ដល់​វេលា​ដែល​លោក ហ៊ុន សែន គ្មាន​ជម្រើស​អ្វី ក្រៅពី​លះបង់​ដើម្បី​សង្គ្រោះជាតិ។

ពាក្យ​លះបង់​ដើម្បី​សង្គ្រោះ​ជាតិ​នេះ អាច​ពិបាក​ទទួល​យក​បាន​ណាស់ សម្រាប់​លោក ហ៊ុន សែន និង​មន្ត្រី​បក្ស​កាន់អំណាច ព្រោះ​វា​មាន​បង្កប់​ពាក្យ​”​សង្គ្រោះ​ជាតិ​” ដែល​ជា​ឈ្មោះ​របស់​គណបក្ស​ប្រឆាំង​ដែល​មន្ត្រី​បក្ស​នេះ រួមគ្នា​រម្លាយ​ចោល កាលពី​ឆ្នាំ​២០១៧ ដោយសារតែ​គណបក្ស​កាន់អំណាច ថយ​ប្រជាប្រិយ ឯ​គណបក្សប្រឆាំង កើន​ការ​គាំទ្រ​យ៉ាង​សម្បើម​ពី​ប្រជាពលរដ្ឋ​ស្ទើរ​ពាក់​កណ្ដាល​ប្រទេស ក្នុង​ការ​បោះឆ្នោត​ឃុំ​សង្កាត់ កាលពី​ខែ​មិថុនា ឆ្នាំ​២០១៧។ បក្ស​កាន់អំណាច រម្លាយ​បក្ស​ប្រឆាំង​ចោល ៥​ខែ ក្រោយ​បោះឆ្នោត​នោះ។

ដោយសារតែ​ការ​រម្លាយ​គណបក្សប្រឆាំង​នេះ​ហើយ ទើប​សហភាព​អឺរ៉ុប​សម្រេច​ដាក់​ទណ្ឌកម្ម​កម្ពុជា។

ដូច្នេះ ក្នុង​​ចំណោម​វិបត្តិ​ធំៗ​ទាំងពីរ ដែល​ជាតិ​កំពុង​ប្រឈម​នោះ មាន​វិបត្តិ​មួយ គឺ​របប​ក្រុងភ្នំពេញ​ជា​បង្កើត​វា នោះ​គឺ​វិបត្តិ​នយោបាយ ដោយសារ​ការរំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ​ធ្ងន់ធ្ងរ​នោះ​ឯង។

ឯ​វិបត្តិ​ទីពីរ គឺជា​វិបត្តិ​សាកល ដែល​កម្ពុជា​រងគ្រោះ​នឹង​គេ​ដែរ ហើយ​រងគ្រោះ​ខ្លាំង​ជាងគេ​ផង ដោយសារតែ​សេដ្ឋកិច្ច​យើង ពឹងផ្អែក​ទាំងស្រុង​ទៅលើ​បរទេស ជាពិសេស​វិស័យ​នាំចេញ​សំលៀកបំពាក់ និង​ស្បែកជើង និង​វិស័យ​ទេសចរណ៍ ដែល​ជា​ប្រភព​ចំណូល ដ៏​ធំ​បំផុត​របស់​កម្ពុជា។

វិបត្តិ​ទី​ពីរ​នេះ ដែល​កើតឡើង​ដោយសារ​ជំងឺ​កូវីដ-១៩ កម្ពុជា​មិន​​អាច​ធ្វើ​អ្វី​បាន ក្រៅ​តែ​អង្គុយ​បន់ស្រន់ ឱ្យ​ពិភពលោក​ឆាប់​ជាសះស្បើយ​ទាំងស្រុង​ពី​ជំងឺ​នេះ តែប៉ុណ្ណោះ។ ទោះជា​យ៉ាង​នេះ​ក្តី វិបត្តិ​ទី​ពីរ​នេះ ក៏​មាន​ភាព​ពាក់ព័ន្ធ​គ្នា​ច្រើន ទៅ​នឹង​វិបត្តិ​ទីមួយ​ដែរ ព្រោះ​វា​ធ្វើ​ឱ្យ​លោក ហ៊ុន សែន បាត់បង់​មូលដ្ឋាន​បង្អែក​ផ្នែក​សេដ្ឋកិច្ច​ដ៏​ធំ​មួយ ដែល​លោក​តែងតែ​យក​មក​ធ្វើជា​ខែល ដើម្បី​ទប់ទល់​នឹង​ទណ្ឌកម្ម​អន្តរជាតិ ជាពិសេស​សហភាព​អឺរ៉ុប។

ភាសា​ដែល​លោក​ធ្លាប់​ប្រើ​រត់មាត់​នោះ គឺ​លោក​តែងតែ​អួត​ថា កម្ពុជា​មាន​កំណើន​សេដ្ឋកិច្ច​ខ្លាំងក្លា ប្រាក់ចំណូល​ពន្ធ​រាប់ពាន់​លាន​ដុល្លារ​ក្នុង​មួយឆ្នាំៗ មាន​ប្រាក់​បម្រុង​រាប់ពាន់​លាន​ដុល្លារ និង​មាន​មាស ៣០​តោន​ជាដើម។

មិន​តែ​ប៉ុណ្ណោះ រៀងរាល់​ពេល​ជួប​កម្មករ​រោងចក្រ ដែល​ព្រួយចិត្ត​រាល់ថ្ងៃ​រឿង​គេ​ដក​ការ​អនុគ្រោះ​ពន្ធ លោក​តែងតែ​លើក​ទឹក​អ្នក​ទាំងនោះ ឱ្យ​ជឿ​លើ​តួលេខ​របស់​លោក​ថា កម្ពុជា​នឹង​ក្លាយ​ជា​ប្រទេស ដែល​ប្រជាជន​មាន​ប្រាក់​ចំណូល​មធ្យម​កម្រិត​ខ្ពស់ ត្រឹម​ឆ្នាំ ២០៣០ ជាដើម។

ប៉ុន្តែ អ្វី​ដែល​លោក ហ៊ុន សែន មិន​ដែល​ប្រាប់​ការពិត​ដល់​កម្មករ និង​ប្រជាកសិករ​នោះ​គឺ កម្ពុជា​ពឹង​ពាក់​ទាំងស្រុង​លើ​ដង្ហើម​បរទេស ហើយ​កម្ពុជា​នឹង​ជួប​វិបត្តិ​ធ្ងន់ធ្ងរ ពិបាក​នឹង​ងើប​រួច បើ​ពិភពលោក​មាន​វិបត្តិ​ធ្ងន់ធ្ងរ ដូច​បញ្ហា​កូវីដ-១៩​នេះ នោះ​ទេ។

អម្រែក​នៃ​វិបត្តិ​ទាំងពីរ​នេះ គឺ​ជា​បន្ទុក​ដ៏​សែន​ធ្ងន់​សម្រាប់​ជាតិខ្មែរ​ទាំងមូល ព្រោះ​ប្រជាពលរដ្ឋ​ខ្មែរ​ច្រើន​ណាស់ រង​ផល​ប៉ះពាល់​យ៉ាង​ដំណំ​ដល់​ជីវភាព​ប្រចាំថ្ងៃ ដោយសារតែ​បាត់បង់​ការងារ និង​បាត់បង់​មុខរបរ​ចិញ្ចឹម​ជីវិត។ អ្នក​ដែល​រង​ផល​ប៉ះពាល់​ខ្លាំង​ជាងគេ គឺ​កសិករ និង​កម្មករ​រោងចក្រ។កម្មករ​រោងចក្រ​រង​ផល​ប៉ះពាល់​ផ្ទួនៗ គឺ​ទីមួយ​ការបាត់បង់​ការងារ​ធ្វើ និង​ប្រាក់ចំណូល ដោយសារ​រោងចក្រ​ព្យួរ និង​បិទទ្វារ ទី​ពីរ​គឺ​ភាព​មិន​ច្បាស់លាស់ ថា នឹង​មាន​ការងារ​ធ្វើ​វិញ ទោះ​ស្បើយ​ជំងឺ​កូវីដ​-១៩ ដោយសារ​ចាប់ពី​ថ្ងៃទី១២ ខែ​សីហា តទៅ។ មាន​ន័យថា បើ​ទោះ​បី​ពិភពលោក​ស្បើយ​ជំងឺ​នេះ​ក៏ដោយ ក៏​សហភាព​អឺរ៉ុប​នឹង​ដក​ការ​ប្រព័ន្ធ​អនុគ្រោះ​ពន្ធ EBA ២០% ពីលើ​មុខទំនិញ ៤០ មុខ​ពី​កម្ពុជា។

មិនមែន​តែ​កម្មករ​ទេ​បារម្ភ ថោ​កែ​រោងចក្រ​ក៏​មើល​ឃើញ​ពី​ហានិភ័យ​ធំ​នៅ​ចំពោះ​មុខ​នេះ​ដែរ។ សមាគម​រោងចក្រ​កាត់ដេរ​កម្ពុជា (GMAC) កាលពី​ដើម​ខែ​មិថុនា​នេះ បាន​សរសេរ​លិខិត​ប្រធាន​គណៈកម្មការ​អឺរ៉ុប សុំ​ឱ្យ​ពន្យារពេល​នៃ​ការ​ដក​ប្រព័ន្ធ​អនុគ្រោះ​ពន្ធ​នោះ យ៉ាងហោចណាស់​ពន្យារ​មួយ​ឆ្នាំ​សិន​ដែរ ព្រោះ​វិស័យ​កាត់ដេរ​កំពុង​ជួប​វិបត្តិ​ធំ ដោយ​ការ​បញ្ជា​ទិញ​ដើម​ឆ្នាំ ២០២០ នេះ បាន​ធ្លាក់​ចុះ​រហូតដល់ ៦០ % ដែល​ធ្វើ​ឱ្យ​រោងចក្រ​ប្រមាណ ២៥០ រោងចក្រ ព្យួរ​ការងារ និង​ធ្វើ​ឱ្យ​កម្មករ​ជាង ១៣០,០០០ បាត់បង់​ការងារ។

ជា​ការ​ឆ្លើយតប បួន​ថ្ងៃ​ក្រោយ​មក តំណាង​គណៈកម្មការ​អឺរ៉ុប បដិសេធ​សំណើ​នេះ ដោយ​ប្រាប់​តាម​សារព័ត៌មាន​ជប៉ុន Nikkei Asian Review ថា បើ​កម្ពុជា​ចង់បាន​ប្រព័ន្ធ​អនុគ្រោះ​ពន្ធ EBA ពេញលេញ​ដូចដើម​វិញ គឺ​ទាល់តែ​បង្ហាញ​ចំណាត់​ការ​ជា​ដុំកំភួន ក្នុង​ការ​ស្ដារ​សិទ្ធិមនុស្ស និង​ប្រជាធិបតេយ្យ​ឡើង​វិញ។

តាម​ពិត​នេះ​មិនមែន​ជា​លើកទីមួយ​ទេ ដែល​សហភាព​អឺរ៉ុប រក្សា​ជំហរ​ដដែល​នេះ​។ តាំង​ពីមុន​សម្រេច​ដក​ប្រព័ន្ធ​អនុគ្រោះ​ពន្ធ​នេះ​មក​ម្ល៉េះ សហភាព​អឺរ៉ុប តែងតែ​ដាស់តឿន​លោក ហ៊ុន សែន ជារឿយៗ ថា​កូន​សោរ គឺ​ស្ថិត​លើ​ដៃ​លោក ហ៊ុន សែន មិនមែន​លើ​គណៈកម្មការ​អឺរ៉ុប​ទេ។

កូន​សោរ​នោះ គឺ​លោក ហ៊ុន សែន ត្រូវ​ស្ដារ​ប្រជាធិបតេយ្យ​ឡើងវិញ ដោយ​ឱ្យ​គណបក្ស​សង្គ្រោះ​ជាតិ បើក​ដំណើរការ​ឡើងវិញ និង​ដោះលែង​ប្រធាន​គណបក្ស​នេះ​ជាដើម។

គណៈកម្មការ​អឺរ៉ុប ថាបើ​លោក ហ៊ុន សែន ធ្វើ​ដូច្នេះ​បាន ពួកគេ​នឹង​មិន​ដក​ការ​អនុគ្រោះ​ពន្ធ​នេះ​ទេ គឺ​ឱ្យ​កម្ពុជា​វិញ​ទាំងស្រុង​។ សារ​នេះ មាន​ភាព​សាមញ្ញ និង​ងាយ​យល់ ហើយ​ងាយ​ស្ដាប់!

កូន​សោ​គឺ​នៅ​លើ​ដៃ​លោក ហ៊ុន សែន។ វិបត្តិ​នយោបាយ ដោយសារ​ការរំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ គឺ​លោក ហ៊ុន សែន ជា​បង្កើត ព្រោះ​រម្លាយ​គណបក្ស​សង្គ្រោះ​ជាតិ។

ដូច្នេះ ដើម្បី​ស្ដារ​ស្ថានការណ៍​នេះ​ឡើងវិញ លោក ហ៊ុន សែន គ្មាន​ជម្រើស​អ្វី ក្រៅពី​លះបង់​ដើម្បី​សង្គ្រោះជាតិ។ គឺ​ព្រួញ​មួយ បាញ់​បាន​សត្វ​ពីរ​។ ទីមួយ​គឺ​សង្គ្រោះ​ជាតិ​ប្រជាជាតិ​ខ្មែរ ឱ្យ​រួច​ផុត​ពី​វិបត្តិ​មួយ​ជាន់ និង​ទី​ពីរ​គឺ​អនុញ្ញាត​ឱ្យ​គណបក្ស​សង្គ្រោះ​ជាតិ បើក​ដំណើរការ​ឡើងវិញ។

បើ​លោក ហ៊ុន សែន ពិតជា​អះអាង​ថា ខ្លួន​លោក ពិតជា​បិតា​នៃ​នយោបាយ​ឈ្នះ​-​ឈ្នះ​ពិតប្រាកដ​មែន​នោះ ពេលនេះ គឺជា​ពេលវេលា​ដ៏​សមស្រប​បំផុត​មួយ ដែល​លោក​ត្រូវ​បង្ហាញ​ភាព​ពិត និង​ភាព​ស្មោះត្រង់​ថា លោក​ធ្វើ​ដើម្បី​ខ្មែរ​ឈ្នះ គឺ​ដើម្បី​ប្រយោជន៍​កម្មករ​កម្មការិនី​ខ្មែរ និង​ប្រយោជន៍​ពលរដ្ឋ​ខ្មែរ​រាប់​លាន​នាក់​ទៀត ដែល​ទទួល​ផល​ពី​ការ​អនុគ្រោះ​ពន្ធ EBA និង​ឈ្នះ​បាន​ស្ដារ​សិទ្ធិមនុស្ស និង​ប្រជាធិបតេយ្យ​ឡើងវិញ ដែល​ជា​ស្មារតី​នៃ​កិច្ចព្រមព្រៀង​សន្តិភាព​ទីក្រុង​ប៉ារីស​ផង។

ការ​ងាក​មក​ស្ដារ​សិទ្ធិមនុស្ស និង​ប្រជាធិបតេយ្យ​នៅ​ពេល​នេះ មិន​អាច​លាង​ជម្រះ និង​កែប្រែ​មុខ​មាត់​កម្ពុជា លើ​ឆាក​អន្តរជាតិ ឱ្យ​បាន​ល្អ​ឡើងវិញ​ទាំងស្រុង​នោះ​ទេ ប៉ុន្តែ​វា​អាច​ជួយ​ស្អំ​បេះដូង​ខ្មែរ ដែល​កំពុង​រង​ទុក្ខ​ខ្លាំង ដោយសារតែ​វិបត្តិ​ផ្ទួនៗ​គ្នា​នេះ​ខ្លះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល