អ្នក​ជំនាញ​រក​ឃើញ​សំណល់​ឆ្អឹង​សត្វ​អាយុ​រាប់​លាន​ឆ្នាំ​នៅ​ខែត្រ​កំពត

អ្នក​ជំនាញ​ខ្មែរ​-​បារាំង​បាន​រក​ឃើញ​សំណល់​ឆ្អឹង​សត្វ​ដែល​ជាប់​នឹង​ថ្ម​ជា​ច្រើន ដែល​មាន​អាយុ​កាល​តាំង​ពី​រាប់​លាន​ឆ្នាំ មុន​គ្រិស្ត​សករាជ​ទៅ​ទៀត នៅ​ឯ​ស្ថានីយ​បុរាណ​វិទ្យា​មួយ​ក្នុង​ខែត្រ​កំពត ខណៈ​ដែល​អ្នក​ស្រាវជ្រាវ​ខ្មែរ និង​បារាំង​កំពុង​ធ្វើ​ការ​សិក្សា​ស្រាវជ្រាវ​នៅ​ទី​នោះ។
ដោយ ឱម ឧត្ដម
2010-06-29
អ៊ីម៉ែល
មតិ
Share
បោះពុម្ព

ព្រឹទ្ធ​បុរស​នៅ​មហា​វិទ្យាល័យ​បុរាណ​វិទ្យា នៃ​សាកល​វិទ្យាល័យ ភូមិន្ទ​វិចិត្រ​សិល្បៈ លោក ផេង ស៊ីថា ដែល​បាន​ចូលរួម​នៅ​ក្នុង​ការងារ​ស្រាវជ្រាវ​នេះ មាន​ប្រសាសន៍​ឲ្យ​អ្នក​យក​ព័ត៌មាន​វិទ្យុ​អាស៊ី​សេរី ដឹង​នៅ​ថ្ងៃ​ទី​២៩ មិថុនា ថា ការ​រក​ឃើញ​នេះ​គឺ​ធ្វើ​ឡើង​តាមរយៈ​ព័ត៌មាន​របស់​អ្នក​ស្រាវជ្រាវ​បារាំង​ជំនាន់​មុន ដែល​បាន​បន្សល់​ទុក ហើយ​ការ​ស្រាវជ្រាវ​នេះ​គឺ​ជា​ការ​រក​ឃើញ​លើក​ដំបូង​បំផុត​នៅ​កម្ពុជា។

លោក ផេង ស៊ីថា ថ្លែង​បន្ត​ថា ៖ «យើង​បាន​ប្រទះ​ឃើញ​ឆ្អឹង​សត្វ​ពី​សម័យ​នៃ​ការ​កកើត​ភ្នំ ទឹក​ដី​ខ្មែរ​យើង​ដំបូង! យើង​បាន​ប្រទះ​ឃើញ​ឆ្អឹង​សត្វ​សម័យ​បុរាណ បុរាណ​មែនទែន មិន​មែន​បុរាណ​ត្រឹម​តែ ១​ពាន់ ២​ពាន់​ឆ្នាំ​អី​ប៉ុណ្ណឹង​ទេ ឬ​រាប់​ម៉ឺន​ឆ្នាំ​ទេ! ដល់​រាប់​លាន​ឆ្នាំ​ឯ​ណោះ! អ្នក​ដែល​គេ​ឯកទេស​ខាង​ឆ្អឹង​សត្វ​ហ្នឹង គេ​បាន​ឲ្យ​ដំណឹង​មក​ថា ជា​ការ​កត់​សម្គាល់​បណ្ដោះ​អាសន្ន អាច​មាន​សត្វ​អណ្ដើក អាច​មាន​សត្វ​រមាស សត្វ​កាំប្រមា ហើយ​យើង​ធ្វើ​ការ​សិក្សា​ទៅ​លើ​ដី​ដែល​ជាប់​ជាមួយ​នឹង​ថ្ម​ហ្នឹង រួម​ជាមួយ​នឹង​ឆ្អឹង​សត្វ...»

ការ​ស្រាវជ្រាវ​នេះ​បាន​ចាប់ផ្ដើម​ធ្វើ​តាំង​ពី​ថ្ងៃ​ទី​២៥ ខែ​មិថុនា ឆ្នាំ​២០១០ ហើយ​នឹង​ត្រូវ​បញ្ចប់​នៅ​ថ្ងៃ​ទី​១៤ កក្កដា ខែ​ក្រោយ​នេះ។

លោក ផេង ស៊ីថា បញ្ជាក់​បន្ថែម​ថា ការ​ស្រាវជ្រាវ​នេះ​រៀបចំ​ដោយ​ក្រសួង​វប្បធម៌ និង​វិចិត្រ​សិល្បៈ ដោយ​មាន​ការ​ចូលរួម​ពី​សាកល​វិទ្យាល័យ ភូមិន្ទ​វិចិត្រ​សិល្បៈ និង​សារមន្ទីរ​ធម្មជាតិ​របស់​ប្រទេស​បារាំង។ លោក​ថ្លែង​បន្ត​ថា គម្រោង​ស្រាវជ្រាវ​នេះ​ត្រូវ​ធ្វើ​នៅ​ស្ថានីយ ២ គឺ​ស្ថានីយ ភ្នំ​ក្បាល​រមាស ដែល​មាន​ទីតាំង​ស្ថិត​នៅ​ក្នុង​ភូមិ​អង្គ ឃុំ​ត្រពាំងព្រីង ស្រុក​ទឹកឈូ ខែត្រ​កំពត និង​ស្ថានីយ ភ្នំ​ល្អាង ស្ថិត​ក្នុង​ស្រុក​ដងទង់ ខែត្រ​កំពត​ដែរ។

លោក ផេង ស៊ីថា បញ្ជាក់​បន្ថែម​ថា ស្ថានីយ​ភ្នំ​ក្បាល​រមាស​កំពុង​តែ​ធ្វើ​ស្រាវជ្រាវ។ ដោយឡែក​ចំពោះ​ភ្នំ​ល្អាង​វិញ នៅ​មិន​ទាន់​បាន​ចូល​សិក្សា​នៅ​ឡើយ​ទេ ដោយសារ​មិន​ទាន់​ទទួល​ការ​អនុញ្ញាត​ពី​ក្រុមហ៊ុន ថៃប៊ុនរ៉ុង ដែល​គ្រប់គ្រង​នៅ​តំបន់​ភ្នំ​នោះ។ លោក​បន្ថែម​ថា ការ​រក​ឃើញ​នេះ​ជា​ភស្តុតាង​បញ្ជាក់​ឲ្យ​ឃើញ​ពី​ភាព​ចំណាស់​របស់​ទឹក​ដី​ខ្មែរ៕

ព័ត៌មាន (0)
Share
គេហទំព័រ​ទាំងមូល