លោក អ៊ុក ចិត អាយុ ៥២ឆ្នាំ ដែលជាជនរងគ្រោះក្នុងអំពើប្លន់នៅភូមិទួលអង្គ្រង ឃុំខ្នារទទឹង ស្រុកបាកាន ខេត្តពោធិ៍សាត់ បានមានប្រសាសន៍ប្រាប់អ្នកយកព័ត៌មានវិទ្យុអាស៊ីសេរី ដែលបានចុះទៅដល់ទីនោះថា ពួកចោរក៏បានរុករើផ្ទះគាត់យកអស់ប្រាក់ ៦លាន៨សែនរៀល មាសសុទ្ធ ៦ជី និងប្លាទីន ៦ជី។
លោក អ៊ុក ចិត បានឲ្យដឹងថា ៖ «លុយហ្នឹងខ្ញុំការកូន ខាងប្រុសគេប្រគល់មកឲ្យ យកលុយមកទិញទំនិញការ។ ខ្ញុំអត់បានមើលឃើញច្បាស់ដែរ ព្រោះខ្ញុំចុចពិលទៅ ចុចចំមុខវា ដល់ហើយវាឲ្យខ្ញុំទម្លាក់ភ្លើងចុះ គ្រាន់តែខ្ញុំងាកភ្លើង វាបាញ់ខ្ញុំបណ្ដោយ បាញ់អត់ត្រូវ..។. ខាងប៉ូលិស ខាងប៉េអឹមគេចុះយកកំណត់ហេតុ»។
ស្រ្តីអ្នកលក់គ្រឿងទេសឈ្មោះ នៃ ផាន អាយុ ២៩ឆ្នាំ ប្រជាពលរដ្ឋនៅភូមិរំលេច ឃុំរំលេច ស្រុកបាកាន ខេត្តពោធិ៍សាត់ មានប្រសាសន៍ថា បន្ទាប់ពីមានការប្លន់អ្នកភូមិជិតខាងគាត់ ធ្វើឲ្យគាត់មានការភ័យខ្លាចយ៉ាងខ្លាំង។
អ្នកស្រី នៃ ផាន បានបញ្ជាក់ថា ៖ «ព្រួយណាស់ មិនសូវហ៊ាននៅលក់យប់ៗដូចរាល់ដង។ រាល់ដងបើកលក់យប់ៗជ្រៅដែរ ម៉ោង៩ ម៉ោង១០អី បានបិទទ្វារ តែឥឡូវព្រលប់ឡើងដឹងតែបិទទ្វារហើយ»។
ប្រភពពីអ្នកភូមិបាននិយាយថា ថ្មីៗនេះអំពើប្លន់ប្រដាប់អាវុធបានកើតឡើងផ្ទួនៗនៅភូមិដាច់ស្រយាលនៃឃុំមួយចំនួនក្នុងស្រុកបាកាន បានបង្កការព្រួយបារម្ភដល់ប្រជាពលរដ្ឋយ៉ាងខ្លាំង។
អាជ្ញាធរប៉ូលិសបានឲ្យដឹងថា ករណីប្លន់ប្រដាប់អាវុធបានកើតមានចាប់ពីខែវិច្ឆិការហូតមកទល់ថ្ងៃ១៧ ធ្នូនេះ មានចំនួន ៥ករណី ២ករណីកើតមាននៅក្នុងខែវិច្ឆិកា និង ៣ករណីទៀតកើតមានថ្មីៗក្នុងខែធ្នូនេះ។
អធិការនគរបាលស្រុកបាកាន លោក ប៉ែន ទុង មានប្រសាសន៍ថា ប៉ូលិសចាប់ក្រុមឧក្រិដ្ឋជនបានមួយចំនួនហើយ ហើយកំណត់បានមុខសញ្ញានិងកំពុងសុំដីកាចាប់ខ្លួនមួយចំនួនទៀត។
លោក ប៉ែន ទុង បានអះអាងថា ៖ «យើងក្ដាប់បានហើយមុខសញ្ញាហ្នឹង គេកំពុងតាមបំផ្លាញហើយ ហើយអាថ្មីៗនេះទៀត យើងចាប់បានម្នាក់ហើយ ប៉ុន្តែគ្នាវាដល់ទៅ ៥នាក់ វាគេចខ្លួន។ អ៊ីចឹងយើងកំពុងតែធ្វើសំណុំរឿងបញ្ជូនទាំងមនុស្ស ទាំងសំណុំរឿង ទៅតុលាការដើម្បីឲ្យតុលាការចេញជាដីកាឲ្យយើងតាមចាប់អាបីបួននាក់នេះទៀត...»។
ពាក់កណ្តាលនៃដើមខែធ្នូ នៅស្រុកបាកាន ករណីប្លន់កើតមានជាបន្តបន្ទាប់ចំនួន ៣លើក ថ្ងៃ៨ ធ្នូ ករណីប្លន់នៅភូមិខ្វាវ ឃុំរំលេច បណ្តាលឲ្យជនរងគ្រោះអស់ប្រាក់ ១២លានរៀល លើកទី២ ថ្ងៃ១៣ ធ្នូ ប្លន់ផ្ទះប្រធានភូមិអណ្តូងសំបួរ ឃុំស្នាមព្រះ ក្រុមចោរបានបាញ់សម្លាប់ភរិយាប្រធានភូមិ និងលើកចុងក្រោយនេះបានកើតឡើងនៅថ្ងៃ ១៥ ធ្នូ នៅភូមិទួលអង្ក្រង ឃុំខ្នារទទឹង៕