ក្រសួង​មហាផ្ទៃ​បន្ត​អនុវត្ត​ផែនការ​ភូមិ​ឃុំ​សុវត្ថិភាព

ក្រសួង​មហាផ្ទៃ​ប្រទេស​កម្ពុជា កំពុង​តែ​អនុវត្ត​ផែនការ "ភូមិ ឃុំ សុវត្ថិភាព" នៅ​ក្នុង​ភូមិ ឃុំ​ចំនួន ១.៦២៦​កន្លែង នៅ​ទូទាំង​ប្រទេស​កម្ពុជា ដើម្បី​លុប​បំបាត់​បទល្មើស និង​ឧក្រិដ្ឋកម្ម​នានា នៅ​ក្នុង​ប្រទេស​កម្ពុជា។
ដោយ សុខ សេរី
2011.01.25
Share on WhatsApp
Share on WhatsApp

ផែនការ​នោះ​គឺ​ផ្ដោត​លើ​ការ​បង្ក្រាប​បទល្មើស​ចំនួន ៥​ប្រភេទ ដូច​ត​ទៅ ទី​១ បទល្មើស លួច ឆក់ ប្លន់​គ្រប់​ប្រភេទ ទី​២ បទល្មើស​ផលិត​ចែកចាយ​គ្រឿង​ញៀន​ខុស​ច្បាប់ ទី​៣ បទល្មើស​អនាចារ ជួញដូរ​ស្ត្រី និង​អំពើ​ហិង្សា​ក្នុង​គ្រួសារ ទី​៤ បទល្មើស​ក្មេង​ទំនើង និង​ទី​៥ បទល្មើស​ល្បែង​ខុស​ច្បាប់​នៅ​តាម​ភូមិ​ឃុំ។

ផែនការ​នេះ​ត្រូវ​បាន​លោក​នាយករដ្ឋមន្ត្រី ហ៊ុន សែន បាន​ប្រកាស​ឲ្យ​អនុវត្ត​កាល​ពី​ថ្ងៃ​ទី​១៦ ខែ​ឧសភា ឆ្នាំ​២០១០។

អគ្គស្នងការ​រង​នគរបាល​ជាតិ​កម្ពុជា លោក​ឧត្ដមសេនីយ៍​ឯក សុខ ផល បាន​មាន​ប្រសាសន៍​នៅ​ក្នុង​ពិធី​កម្ទេច​ឌីវីឌី និង​វីស៊ីឌី​ខុស​ច្បាប់​ចំនួន​ជាង ២៥០.០០០​បន្ទះ កាល​ពី​ថ្ងៃ​ទី​២៤ ខែ​មករា​ថា បទល្មើស​ព្រហ្មទណ្ឌ​ធំៗ​បាន​ថយ​ចុះ​នៅ​ឆ្នាំ​២០១០ កន្លង​ទៅ​នេះ។

លោក​បន្ត​ថា ៖ «បទល្មើស​នានា​ដែល​កត់​សម្គាល់​ចុះ​ថយ គឺ​មាន​បទល្មើស​លួច មាន​ស្ថាន​ទម្ងន់ គេ​ហៅ​ថា បទល្មើស​ប្លន់​ថយ​ចុះ ២៤៤​លើក។ បទល្មើស​ឃាតកម្ម​ថយ​ចុះ ៥០​លើក។ បទល្មើស​លួច​ថយ​ចុះ ១៧៣​លើក។ បទល្មើស​ហិង្សា​ក្នុង​គ្រួសារ បង្ក​របួស​ស្នាម​នានា​ថយ​ចុះ ៨១​លើក។ ប៉ុន្តែ​ដោយ​ឡែក​បទល្មើស​សេពសន្ថវៈ​នៅ​ទូទាំង​ប្រទេស​ពុំ​ទាន់​មាន​ការ​ថយ​ចុះ​នៅ​ឡើយ»

ប្រតិកម្ម​ទៅ​នឹង​របាយការណ៍​នេះ ប្រជាពលរដ្ឋ​ឈ្មោះ ឆូយ វ៉ាត អាយុ ៤៨​ឆ្នាំ នៅ​ភូមិ​ព្រៃទទឹង ឃុំ​ចន្ត្រី ស្រុក​រមាសហែក ខេត្ត​ស្វាយរៀង ថ្លែង​ថា បទល្មើស​អំពើ​ហិង្សា​ក្នុង​គ្រួសារ​មាន​ការ​ថយ​ចុះ​មែន ប៉ុន្តែ​បទល្មើស​លួច​នៅ​កើត​មាន​ជា​រឿយៗ ៖ «នៅ​រដូវ​ប្រាំង​នេះ នៅ​តាម​វាល​ស្រែ​រាំង​ស្ងួត អ៊ីចឹង​ពួក​ចោរកម្ម​វា​ងាយ​ចល័ត ធ្វើ​ចលនា អ៊ីចឹង​ប្រជាជន​មាន​ការ​ព្រួយ​បារម្ភ​ច្រើន​ដែរ។ សំណូមពរ​របស់​ខ្ញុំ សំណូមពរ​ដល់​រាជ​រដ្ឋាភិបាល មេត្តា​ជំរុញ​ដល់​នគរបាល​ប៉ុស្តិ៍ មេត្តា​ចល័ត ប៉ុន្តែ​ខ្ញុំ​មើល​ឃើញ​បញ្ហា​សព្វ​ថ្ងៃ​ហ្នឹង នគរបាល​ប៉ុស្តិ៍​មាន​កម្លាំង​តិច ហើយ​ភូមិ ១៨​ភូមិ ម្ល៉ោះ​ហើយ​នគរបាល​មាន​ការ​ហត់នឿយ​ច្រើន»

ប្រទេស​កម្ពុជា មាន​កម្លាំង​នគរបាល​ជាតិ​ចំនួន​ជាង ៥០.០០០​នាក់ ដើម្បី​រក្សា​សណ្ដាប់ធ្នាប់ និង​ការពារ​សន្តិសុខ សុវត្ថិភាព ជូន​ប្រជាពលរដ្ឋ។

របាយការណ៍​របស់​អគ្គស្នងការ​រង​នគរបាល​ជាតិ បាន​បង្ហាញ​ថា នៅ​ឆ្នាំ​២០១០ កន្លង​ទៅ បទល្មើស​ធំៗ​នៅ​ទូទាំង​ប្រទេស​កម្ពុជា មាន​ការ​ថយ​ចុះ​ជាង​ឆ្នាំ​២០០៩ កន្លង​ទៅ​ចំនួន ៣៦៩​ករណី គឺ​ឆ្នាំ​២០០៩ មាន​ចំនួន ៣.០៨៧​ករណី ប្រៀបធៀប​ឆ្នាំ​២០១០ ចំនួន​ជាង ២.៧០០​ករណី។

បទល្មើស​ដែល​បាន​ថយ​ចុះ​នោះ មាន​បទល្មើស​ប្លន់ បទល្មើស​ឃាតកម្ម បទល្មើស​លួច និង​បទ​ល្មើស​ហិង្សា​បង្ក​របួស​ស្នាម ប៉ុន្តែ​បទល្មើស​រំលោភ​សេពសន្ថវៈ បាន​កើន​នៅ​ឆ្នាំ​២០១០ កន្លង​ទៅ​ចំនួន ៣១០​ករណី ប្រៀបធៀប​ឆ្នាំ​២០០៩ មាន​តែ​ចំនួន ២៤១​ករណី។

លោក​ឧត្ដមសេនីយ៍​ឯក សុខ ផល បាន​បញ្ជាក់​ថា តាម​ការ​សិក្សា​ស្រាវជ្រាវ​របស់​សមត្ថកិច្ច​បាន​បង្ហាញ​ថា មូលហេតុ​សំខាន់ៗ ដែល​នាំ​ឲ្យ​កើន​បទល្មើស​នេះ គឺ​បណ្ដាល​មក​ពី​ជនល្មើស​សេព​គ្រឿង​ស្រវឹង សេព​គ្រឿង​ញៀន និង​ការ​មើល​ខ្សែ​ភាពយន្ត​អាសអាភាស។

បទល្មើស​នេះ​មាន​លក្ខណៈ​កាន់តែ​សាហាវ គឺ​រំលោភ​ដោយ​ក្រុម​មនុស្ស​ច្រើន។ របាយការណ៍​បាន​ឲ្យ​ដឹង​ទៀត​ថា ជន​រងគ្រោះ​ភាគ​ច្រើន​ជា​អនីតិជន។

លោក​បាន​សន្យា​ថា នឹង​ពង្រីក​ការ​បង្ក្រាប និង​រឹប​អូស​វីដេអូ​អាសអាភាស នៅ​ទូទាំង ២៤​ខេត្ត ក្រុង នៅ​ឆ្នាំ​២០១១​នេះ នៅ​គ្រា​ដែល​ឆ្នាំ​២០១០ កន្លង​ទៅ ការ​បង្ក្រាប និង​រឹប​អូស គឺ​ផ្ដោត​លើ​ខេត្ត​ក្រុង​ចំនួន​៧៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
គណបក្ស​ចំនួន​៣ ចូលរួម​ប្រកួត​ដណ្ដើម​កៅអី​ក្រុមប្រឹក្សា​ស្រុក​ក្រុង​ទើប​បំបែក​ថ្មី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។