តុលាការ​កោះ​ហៅ​ពលរដ្ឋ​នៅ​បុរី​កីឡា​៥​នាក់​ទៅ​សាកសួរ

ពលរដ្ឋ​រស់​នៅ​បុរី​កីឡា ៥​នាក់ ត្រូវ​តុលាការ​រាជធានី​ភ្នំពេញ កោះ​ហៅ​សាកសួរ​នៅ​ព្រឹក​ថ្ងៃ​ទី​១២ ខែ​កក្កដា ឆ្នាំ​២០១១។ ប្រជាពលរដ្ឋ​បុរី​កីឡា​ជាង ១០០​នាក់​ផ្សេង​ទៀត​បាន​លើក​គ្នា​មក​ជាមួយ ដើម្បី​ជួយ​ធ្វើ​សាក្សី​ក្នុង​រឿង​ជម្លោះ​រវាង​ស្ត្រី​ចុង​ចោទ​ទាំង ៥​រូប និង​មេ​សហគមន៍​បុរី​កីឡា។
ដោយ អ៊ុក សាវបូរី
2011.07.12
Share on WhatsApp
Share on WhatsApp

ស្ត្រី​ចុង​ចោទ​ទាំង ៥​នាក់ ដែល​តុលាការ​កោះ​ហៅ​ទៅ​សាកសួរ មាន​ឈ្មោះ​អ្នកស្រី អ៊ុយ ណាវី, ភួង សុភាព, ជួន សុផុន, ទុំ ស្រីម៉ៅ និង​អ្នកស្រី ហោ ចិន្តា។

អ្នកស្រី អ៊ុយ ណាវី ដែល​ជា​មនុស្ស​ម្នាក់​ក្នុង​ចំណោម​ស្ត្រី​ទាំង ៥​នាក់ ដែល​តុលាការ​កោះ​ហៅ​សាកសួរ​បាន​ឲ្យ​ដឹង​ថា រឿង​ហេតុ​នាំ​ឲ្យ​កើត​មាន​ការ​ប្ដឹង​នេះ គឺ​មេ​សហគមន៍​បុរី​កីឡា​មួយ​រូប ឈ្មោះ កង សេត បាន​ប្ដឹង​ពួក​គាត់​ថា បាន​បង្ក​ជម្លោះ​ជាមួយ​អ្នកស្រី ហឹង វណ្ណា ជា​ភរិយា​លោក កង សេត។

អ្នកស្រី អ៊ុយ ណាវី បន្ត​ថា ជម្លោះ​នោះ​បាន​បង្ក​ឡើង​ក្រោយ​ពី​អ្នកស្រី ហឹង វណ្ណា បាន​ជេរ​ប្រមាថ​ពួក​គាត់​នៅ​ពេល​ពួក​គាត់​ដើរ​កាត់​មុខ​ផ្ទះ ៖ «មាន​ផ្ទៃ​ពោះ វា​ចាប់​បោក​ខ្ញុំ។ ឥឡូវ​ចេះ​តែ​ចុក ខ្ញុំ​ទៅ​ពេទ្យ គ្រូ​ពេទ្យ​ចេញ​ក្រដាស​ថ្នាំ នៅ​តាម​ដាន​រាល់​ថ្ងៃ។ គាត់​ថា ចាំ​មើល​ទៅ​មុខ​ទៀត...។ វា​ប្រុស​ពីរ​នាក់​បោក​ខ្ញុំ»

មេ​សហគមន៍​បុរី​កីឡា លោក កង សេត និង​ជា​អ្នក​ដើម​បណ្ដឹង​បាន​បំភ្លឺ​ថា ក្រុម​ស្ត្រី​ដែល​គាត់​បាន​ប្ដឹង គឺ​ចោទ​ពី​បទ​ប៉ុនប៉ង​ធ្វើ​ឃាត​ដោយ​គិត​ទុក​ជា​មុន ព្រោះ​ភរិយា​គាត់​កំពុង​សម្រាក​ក្នុង​ផ្ទះ​ត្រូវ​ពលរដ្ឋ​ដើរ​កាត់​មុខ​ផ្ទះ លើក​គ្នា​មក​វាយ​ដំ​ភរិយា​គាត់​តែម្ដង ៖ «ទី​១​ខ្ញុំ​នៅ​ផ្ទះ​ខ្ញុំ ទី​២ គាត់​នៅ​ម្នាក់​ឯង ទី​៣ អ្នក​ដែល​មាន​បញ្ហា​អី​ហ្នឹង មិន​មែន​នៅ​ផ្ទះ​ខ្លួន​ទេ គឺ​មក​ធ្វើ​សកម្មភាព​នៅ​ផ្ទះ​ខ្ញុំ​តែម្ដង។ ខ្ញុំ​អត់​ទទួល​ខុស​ត្រូវ​រឿង​អស់​ទាំង​ហ្នុង​ទេ ព្រោះ​ខ្ញុំ​អត់​ដឹង រឿង​ពោះ​ធំ​អី​ទេ...។ ខ្ញុំ​ទទួល​ស្គាល់​ថា​គាត់​ប៉ុនប៉ង​សម្លាប់​ប្រពន្ធ​ខ្ញុំ ព្រោះ​គាត់​នៅ​ផ្ទះ​តែ​ឯង គាត់​អត់​បាន​ចេញ​ពី​ផ្ទះ​ទៅ​ផ្ទះ​អ្នក​អស់​ហ្នឹង​ទេ»

ក្រុម​ចុង​ចោទ​ទាំង ៥​រូប​បាន​អះអាង​ថា នៅ​ថ្ងៃ​២៤ ខែ​មិថុនា ឆ្នាំ​២០១១ ពួក​គាត់ ៣៨៤​គ្រួសារ រស់​នៅ​បុរី​កីឡា មិន​ទាន់​បាន​អគារ​រស់​នៅ​ទេ ព្រោះ​ក្រុមហ៊ុន​ផានអ៊ីម៉ិច ដែល​មាន​សិទ្ធិ​អភិវឌ្ឍន៍​បុរី​កីឡា​​មិន​ទាន់​សង់​អគារ​ឲ្យ​ពលរដ្ឋ ១.៧៧៦​គ្រួសារ​បាន​រស់​នៅ​តាម​ចំនួន​ស្នើ​សុំ​ទៅ​នាយករដ្ឋមន្រ្តី ១០​អគារ​នៅ​ឡើយ។ ពួក​គាត់​បាន​ទាមទារ​ឲ្យ​នាយករដ្ឋមន្ត្រី​ជួយ​អន្តរាគមន៍ ក្រោយ​មក​មេ​សហគមន៍ ១​រូប ក្នុង​ចំណោម​មេ​សហគមន៍ ១០​រូប បាន​បដិសេធ​ថា ពួក​គាត់​មិន​បាន​រស់​នៅ​ក្នុង​បុរី​កីឡា​ទេ។ ពួក​គាត់​លើក​គ្នា​យក​ឯកសារ​បញ្ជាក់​ការ​ស្នាក់​នៅ​ទៅ​បង្ហាញ​មេ​សហគមន៍​ដែល​បដិសេធ​ពួក​គាត់​នោះ ហើយ​បាន​ដើរ​កាត់​មុខ​ផ្ទះ អ្នកស្រី ហឹង វណ្ណា ស្រាប់​តែ​អ្នកស្រី  ហឹង វណ្ណា បាន​ជេរ​ប្រមាថ​ពួក​គាត់ និង​ប្រើ​ហិង្សា​មក​លើ​ស្ត្រី​មាន​ផ្ទៃ​ពោះ​ឈ្មោះ អ៊ុយ ណាវី ទើប​អ្នក​រួម​ដំណើរ​ជួយ​ឃាត់ ប៉ុន្តែ​ក្រុម​អ្នក​ឃាត់​ត្រូវ​គេ​ប្ដឹង​ទាំង​អស់។

តែ​ទោះ​យ៉ាង​ណា នៅ​ថ្ងៃ​អង្គារ ទី​១២ កក្កដា តុលាការ​សាលា​ដំបូង​រាជធានី​ភ្នំពេញ បាន​លើក​ពេល​សាកសួរ ដោយសារ​មន្ត្រី​តុលាការ និង​ដើម​បណ្ដឹង​អវត្តមាន។

ក្រុម​ពលរដ្ឋ​ដែល​ចូល​រួម​ធ្វើ​សាក្សី​នៅ​មុខ​តុលាការ​រាជធានី​ភ្នំពេញ ​បាន​ឲ្យ​ដឹង​ថា មេ​សហគមន៍​បុរី​កីឡា​បាន​ជូន​ដំណឹង​មក​ថា ផ្ទះ​ពួក​គាត់​ដែល​មិន​ទាន់​មាន​​​អគារ​ថ្មី​​សម្រាប់​រស់​នៅ ដែល​ត្រូវ​សាងសង់​ដោយ​ក្រុមហ៊ុន​ផានអ៊ីម៉ិច​នោះ នឹង​ត្រូវ​ឈូស​​ចោល​​នៅ​ចុង​សប្ដាហ៍​នេះ៕

រឿង​ដែល​គេ​អាន​​ច្រើន​បំផុត
RFA
លោក គា សុគន្ធ អ្នក​និពន្ធ​គំរូ​ក្នុង​ការ​ឆ្លុះ​បញ្ចាំង​ការ​ពិត និង​បណ្ដុះ​ស្មារតី​ស្នេហា​ជាតិ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។