មន្ត្រីរៀបចំបុណ្យជាតិ-អន្តរជាតិ បានអះអាងថា ថ្ងៃចាប់ផ្ដើមដំបូងនៃព្រះរាជពិធីបុណ្យអុំទូកនៅទន្លេចតុមុខ នាវេទិកាទល់មុខព្រះបរមរាជវាំងឆ្នាំនេះបានដំណើរដោយរលូន ប៉ុន្តែមិនសូវមានប្រជាពលរដ្ឋ ឬភ្ញៀវទេសចរជាតិ និងអន្តរជាតិ ចូលរួមទស្សនាការប្រណាំងទូកច្រើនទេ។
មន្ត្រីរៀបចំបុណ្យជាតិ ស្នើមិនបង្ហាញឈ្មោះបានព្យាករថា បុណ្យអុំទូកឆ្នាំនេះ ទំនងជាមិនមានប្រជាពលរដ្ឋធ្វើដំណើរមកពីតាមបណ្ដាខេត្តនានាច្រើនចូលមកទស្សនាការប្រណាំងទូកនៅមុខព្រះបរមរាជវាំងទេ។
ស្រដៀងគ្នានេះដែរ សមត្ថកិច្ចនគរបាល និងកងរាជអាវុធហត្ថរាជធានីភ្នំពេញ មួយចំនួនដែលប្រចាំការនៅតាមបណ្ដោយផ្លូវជាតិសំខាន់ៗមួយចំនួន មានផ្លូវជាតិលេខ៣ ផ្លូវជាតិលេខ៤ និងផ្លូវជាតិលេខ៥ ជាដើម បានឲ្យដឹងដែរថា នៅថ្ងៃដំបូងពិធីបុណ្យអុំទូកឆ្នាំនេះ ពិតជាមិនសូវមានប្រជាពលរដ្ឋធ្វើដំណើរតាមរថយន្តចូលមករាជធានីភ្នំពេញ ច្រើនពិតមែន។ ផ្ទុយទៅវិញ បែរជាមានប្រជាពលរដ្ឋធ្វើដំណើរតាមរថយន្តច្រើនសន្ធឹកសន្ធាប់ ចាកចេញពីរាជធានីភ្នំពេញ ចេញទៅក្រៅក្រុងមានចំនួនច្រើនកុះករទៅវិញ៖ «»។
គណៈកម្មាធិការរៀបចំបុណ្យជាតិ-អន្តរជាតិ បានឲ្យដឹងថា ព្រះរាជពិធីបុណ្យអុំទូកង មានរយៈពេល ៣ថ្ងៃ គឺចាប់ពីថ្ងៃទី២ ដល់ថ្ងៃទី៤ ខែវិច្ឆិកា ឆ្នាំ២០១៧។ ពិធីប្រណាំងទូកនៅតាមថ្ងៃនីមួយៗ ចាប់ផ្ដើមនៅម៉ោង ១១ព្រឹក រហូតដល់ម៉ោង ៥ និង ៣០នាទី នៅតាមដងទន្លេសាប មុខព្រះបរមរាជវាំង រាជធានីភ្នំពេញ។ ការប្រណាំងទូកនេះ មានចំនួន ២ជើង គូដដែល ដោយដូរខ្សែទឹកខាងក្នុង ខាងក្រៅ។
ព្រះរាជពិធីបុណ្យអុំទូកឆ្នាំនេះ ព្រះមហាក្សត្រ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ស្ដេចយាងទតការប្រណាំងទូក និងព្រះរាជប្រទានភ្លើងទៀនជ័យលើប្រទីបព្រះបរមរាជវាំង នៅម៉ោង ៦ និង ៣០នាទីល្ងាច ដោយមានវត្តមានលោកនាយករដ្ឋមន្ត្រី ហ៊ុន សែន និងភរិយា ព្រមទាំងថ្នាក់ដឹកនាំជាន់ខ្ពស់ក្នុងជួររាជរដ្ឋាភិបាលជាច្រើនស្ថាប័នទៀតចូលរួម។
ព្រះរាជពិធីបុណ្យអុំទូកឆ្នាំ២០១៧ នេះ មានប្រទីបចំនួន ១៣ រួមមាន ប្រទីបព្រះបរមរាជវាំង ប្រទីបព្រឹទ្ធសភា ប្រទីបរដ្ឋសភា ប្រទីបរាជរដ្ឋាភិបាល និងប្រទីបរបស់ក្រសួងនានាមួយចំនួនទៀត។
បញ្ជីផ្គូផ្គងការប្រណាំងទូកប្រចាំថ្ងៃរបស់គណៈកម្មាធិការជាតិរៀបចំបុណ្យជាតិ-អន្តរជាតិ បង្ហាញថា ព្រះរាជពិធីបុណ្យអុំទូកឆ្នាំនេះមានទូកមកចូលរួមប្រកួតប្រជែងសរុបចំនួន ១៣៧គូ ឬស្នើ ២៧៤ទូក នៅទូទាំងប្រទេសដែលបានមកចូលរួម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។