ជនជាតិដើមភាគតិចនៅស្ទឹងត្រែងធ្វើបុណ្យភ្ជុំបិណ្ឌឧទ្ទិសកុសលជូនបណ្ឌិត កែម ឡី
2016.10.01
ជាតិដើមភាគតិចកួយ រស់នៅភូមិអន្លង់ក្រមួន ឃុំស្រែឫស្សី ស្រុកថាឡាបរិវ៉ាត់ ខែត្រស្ទឹងត្រែង ផ្តល់បទសម្ភាសន៍ដល់អាស៊ីសេរី នៅថ្ងៃទី១ ខែតុលា ឆ្នាំ២០១៦ ទាក់ទិននឹងពិធីបុណ្យភ្ជុំបិណ្ឌ។
RFA/Men Sothyr
ជនជាតិដើមភាគតិចកួយ និងពលរដ្ឋខ្មែរនៅខែត្រស្ទឹងត្រែង ដែលប្រតិបត្តិព្រះពុទ្ធសាសនា បាននាំគ្នាយកចង្ហាន់ទៅប្រគេនព្រះសង្ឃគង់នៅវត្តនានាក្នុងពិធីបុណ្យភ្ជុំបិណ្ឌ នៅថ្ងៃទី១ ខែតុលា ដើម្បីឧទ្ទិសកុសលជូនវិញ្ញាណក្ខន្ធបុព្វការីជនរបស់ពួកគេ។ ទន្ទឹមនឹងនេះ ជនជាតិដើមភាគតិចមួយចំនួនក៏បានឧទ្ទិសកុសលផលបុណ្យទាំងនេះជូនវិញ្ញាណក្ខន្ធលោកបណ្ឌិត កែម ឡី ផងដែរ។
ជនជាតិដើមភាគតិចកួយ រស់នៅភូមិអន្លង់ក្រមួន ឃុំស្រែឫស្សី លោក ថាន់ វ៉ន ឲ្យដឹងនៅថ្ងៃទី១ ខែ តុលា ថា បើទោះបីលោកបណ្ឌិត កែម ឡី ពុំមែនជាសាច់ញត្តិរបស់ពួកគេក្ដី តែពួកគេចាត់ទុកលោកបណ្ឌិត កែម ឡី ជាអ្នកស្នេហាជាតិ និងជាអ្នកមានគុណូបការៈចំពោះជាតិខ្មែរ។ លោករំឭកថា លោកបណ្ឌិត កែម ឡី ក៏ធ្លាប់ដឹកនាំចលនាយុវជនចុះស៊ើបអង្កេតស្ថានភាពព្រៃឡង់ខែត្រស្ទឹងត្រែង កាលពីឆ្នាំ២០១៥ ហើយលោកក៏ធ្លាប់បណ្ដុះបណ្ដាលជនជាតិដើមភាគតិចនៅខែត្រស្ទឹងត្រែង ឲ្យជ្រាបពីសិទ្ធិរបស់ខ្លួនក្នុងការពារធនធានធម្មជាតិ។
លោកចាត់ទុកថា សកម្មភាពការងាររបស់លោកបណ្ឌិត កែម ឡី មានគុណធំធេងសម្រាប់ជាតិខ្មែរ និងបម្រើផលប្រយោជន៍សាធារណៈ។ លោក ថាន់ វ៉ន រំពឹងថា កុសលបុណ្យដែលលោកបានឧទ្ទិសតាមរយៈព្រះសង្ឃនឹងបានដល់ដួងវិញ្ញាណក្ខន្ធបណ្ឌិត កែម ឡី៖ «ខ្ញុំប៉ងប្រាថ្នាទី១ គឺខ្ញុំចង់ធ្វើបុណ្យ ឧទ្ទិសដល់ជីដូនជីតា ញាតិកាទាំងប្រាំពីរសន្ដាន។ ទីពីរមកទៀត គឺខ្ញុំចង់ឧទ្ទិសដល់អ្នកការពារជាតិ ឬអ្នកស្នេហាជាតិ ដែលអនិច្ចកម្មទៅហើយ»។
ព្រះតេជព្រះគុណ ហេង សុធន គង់នៅវត្តពោធិយារាម ហៅវត្តចាស់ រាជធានីភ្នំពេញ មានថេរដីកាថា លទ្ធិព្រះពុទ្ធសាសនា ប្រសិនបើបុគ្គលណាយកទេយ្យវត្ថុមានបាយ និងសម្លជាដើម យកទៅប្រគេនព្រះសង្ឃ ឬបុគ្គលប្រតិបត្តិសីលខ្ជាប់ខ្ជួន ហើយឧទ្ទិសជូនលោកបណ្ឌិត កែម ឡី នៅក្នុងពិធីបុណ្យភ្ជុំបិណ្ឌ មគ្គផលបុណ្យទាំងនោះនឹងបានទៅដល់លោកបណ្ឌិត កែម ឡី៖ «ឥឡូវគាត់មានចង្ហាន់អ្វីខ្លះដើម្បីប្រគេនដល់ព្រះភិក្ខុសង្ឃ ហើយគាត់ថា បុណ្យទាំងឡាយ ឬក៏ចង្ហាន់ទាំងឡាយដែលខ្ញុំបានប្រគេនតាមរយៈព្រះភិក្ខុសង្ឃក្នុងពេលនេះ បំណងរបស់ខ្ញុំគឺសូមឧទ្ធិសចំពោះវីរជនទាំងអស់ដែលមានឈ្មោះដូចតទៅ ទី១ លោកបណ្ឌិត កែម ឡី ទី២ គឺលោក ឈុត វុទ្ធី ឲ្យចំៗឈ្មោះអ៊ីចឹងគឺបានដល់គាត់ហើយ»។
មិនត្រឹមតែមានជនជាតិដើមភាគតិចកួយ នៅឃុំក្បាលរមាស ប៉ុណ្ណោះទេ ចំណែកជនជាតិដើមភាគតិចព្នង ជនជាតិភាគតិចឡាវ ជនជាតិដើមភាគតិចខិះ និងជនជាតិភាគតិចចិន នៅខេត្តស្ទឹងត្រែង ក៏ប្រារព្ធពិធីបុណ្យភ្ជុំបិណ្ឌដែរ។ តែដោយឡែកជនជាតិភាគតិចវៀតណាម គេសង្កេតឃើញថា ភាគច្រើនពុំបានប្រារព្ធពិធីបុណ្យភ្ជុំបិណ្ឌនោះទេ។
ជនជាតិដើមភាគតិចកួយ មានជំនឿថា ការធ្វើបុណ្យភ្ជុំបិណ្ឌបែបព្រះពុទ្ធសាសនា អាចជួយរំដោះបាបកម្មឱ្យអ្នកស្លាប់ទៅដោយឧទ្ទិសមគ្គផលតាមរយៈព្រះសង្ឃ។
គណៈកម្មការអាចារ្យវត្តវេឡុវ័ន ហៅវត្តស្រែឫស្សី លោក ស្វាយ យឹម មើលឃើញថា បើទោះបីជាជនជាតិដើមភាគតិចកួយនៅឃុំអន្លង់ក្រមួន ភាគច្រើនមានជីវភាពខ្វះខាតក្តី ក៏ពួកគេនាំគ្នាប្រារព្ធពិធីបុណ្យភ្ជុំបិណ្ឌលក្ខណៈព្រះពុទ្ធសាសនា ដើម្បីឧទ្ទិសកុសលផលបុណ្យដល់បុព្វការីជនដែលបានស្លាប់បាត់បង់ជីវិត និងវីរជនស្នេហាជាតិមួយចំនួនឲ្យមកទទួលយកចំណីអាហារតាមរយៈព្រះសង្ឃដែលបានបង្សុកូលបញ្ជូនទៅដួងព្រលឹងបុព្វការីជនទាំងនោះ ឆាប់បានចាប់ជាតិទៅកាន់សុគតិភព។
លោកមើលឃើញថា ជនជាតិដើមភាគតិចកួយ ហាក់សប្បាយរីករាយនៅគ្រាដែលប្រារព្ធពិធីបុណ្យភ្ជុំបិណ្ឌ តែបង្កប់នូវក្ដីព្រួយបារម្ភដោយសារបាត់បង់ព្រៃឈើ ដែលជាអាយុជីវិតរបស់ពួកគេធ្លាប់អាស្រ័យផលតាំងពីដើមមក៖ «ឲ្យបានរួចរំដោះឋាននរក ឲ្យមកនៅឋានលើ ឬឋានកណ្ដាលអី ចែកឋានទៅ ម៉ែ-ឪ និងតាយាយ ចែកឋានទៅឲ្យបានមកបាយទឹកដែលកូនចៅមកធ្វើនេះ»។
ប្រជាពលរដ្ឋទូទាំងប្រទេសមានជំនឿតៗគ្នា ជាយូរលង់មកហើយថា នៅរដូវបុណ្យភ្ជុំបិណ្ឌ គឺយមរាជបានដោះលែងព្រលឹងសាច់ញាតិរបស់គេដែលស្លាប់ទាំងអស់ បើទោះបីជាព្រលឹងខ្លះមានបាបកម្មធ្ងន់ធ្ងរ ហើយធ្លាក់ខ្លួនទៅជានរកប្រេតក្តី ឱ្យមកទទួលយកកុសលបុណ្យ និងបាយទឹក នំចំណី ដែលកូនចៅនៅរស់បានឧទ្ទិសឱ្យតាមរយៈព្រះសង្ឃ ក៏ប៉ុន្តែប្រសិនកូនចៅមិនបានយកចង្ហាន់ទៅវត្តប្រគេនព្រះសង្ឃទេ គឺព្រលឹងអ្នកស្លាប់ខ្លះដែលក្លាយទៅជាប្រេតកំពុងស្រេកឃ្លាន មិនបានទទួលអ្វីទាល់តែសោះនោះ នឹងយំទួញសោក ព្រមទាំងដាក់បណ្ដាសាផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
- បទសម្ភាសន៍៖ អតីតមនុស្សជំនិតសម្ដេចក្រុមព្រះថា លោក ហ៊ុន សែន ជ្រៀតជ្រែកព្រះមហាក្សត្រលើការតែងតាំងរដ្ឋមន្ត្រីក្រសួងព្រះបរមរាជវាំងថ្មី