ពលរដ្ឋមួយចំនួនប្រារព្ធពិធីបុណ្យភ្ជុំបិណ្ឌដោយឧទ្ទិសកុសលជូនវិញ្ញាណក្ខន្ធបណ្ឌិត កែម ឡី
2016.10.01
ម្ដាយរបស់បណ្ឌិត កែម ឡី លោកស្រី ភោគ សេ ជជែកជាមួយលោក ឃួន សេរីវុធ ដែលមកគោរពវិញ្ញាណក្ខន្ធកូនប្រុសរបស់គាត់នៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ កាលពីថ្ងៃទី២៧ កញ្ញា ឆ្នាំ២០១៦។
RFA
ប្រជាពលរដ្ឋខ្មែរដែលគោរពពុទ្ធសាសនា បាននាំគ្នាទៅវត្តប្រារព្ធពិធីបុណ្យកាន់បិណ្ឌ និងភ្ជុំបិណ្ឌ ចាប់តាំងពីថ្ងៃទី ១រោច ដល់ទី ១៥រោច ខែភទ្របទ។ ការទៅវត្តនេះ គឺដើម្បីឧទ្ទិសកុសលជូនដល់វិញ្ញាណក្ខន្ធជីដូនជីតា និងបុព្វការីជនរបស់ពួកគេ។ ទោះបីជាយ៉ាងណា ពលរដ្ឋមួយចំនួនក៏បានឧទ្ទិសមគ្គផលទាំងឡាយទៅឱ្យដួងវិញ្ញាណក្ខន្ធបណ្ឌិត កែម ឡី ដូចគ្នា ដោយសារពួកគេចាត់ទុកបណ្ឌិត កែម ឡី ថាជាអ្នកមានគុណមួយរូបដែរ គឺមានគុណសម្រាប់ជាតិខ្មែរទាំងមូល។
បន្ទាប់ពីយកចង្ហាន់ទៅប្រគេនព្រះសង្ឃនៅវត្តអំឡុងពិធីបុណ្យកាន់បិណ្ឌ និងភ្ជុំបិណ្ឌ ប្រជាពលរដ្ឋមួយចំនួន ដែលខ្លះជាអ្នកស្រុកតាកែវ និងខ្លះទៀតជាអ្នកស្រុកឆ្ងាយ បានឆៀងចូលគោរពវិញ្ញាណវិញ្ញាណក្ខន្ធបណ្ឌិត កែម ឡី ដែលស្ថិតនៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ។
ស្ថិតក្នុងសម្លៀកបំពាក់អាវដៃវែងពណ៌ស ខោជើងវែងពណ៌ខ្មៅ ទើបនឹងចេញមកពីពិធីកាន់បិណ្ឌនៅវត្តមួយជិតទីរួមខេត្តតាកែវ លោក ឃួន សេរីវុធ ដែលជាអតីតអ្នកស្រុកត្រាំកក់ និងបច្ចុប្បន្នជាមន្ត្រីរាជការម្នាក់បម្រើការនៅខេត្តស្វាយរៀង បានឌុបភរិយារបស់លោកដោយម៉ូតូមកគោរពវិញ្ញាណក្ខន្ធបណ្ឌិត កែម ឡី។
លោក ឃួន សេរីវុធ ថ្លែងថា លោកចាត់ទុកបណ្ឌិត កែម ឡី ជាវីរបុរស និងជាអ្នកមានគុណូបការៈចំពោះជាតិខ្មែរ ដូចនេះលោកសង្ឃឹមថា មគ្គផលដែលលោកបានឧទ្ទិសទៅតាមរយៈព្រះសង្ឃនឹងអាចបានទៅដល់ដួងវិញ្ញាណក្ខន្ធបណ្ឌិត កែម ឡី៖ «ខ្ញុំឧទ្ទិស គឺទីមួយសម្រាប់ញាតិមិត្ត និងអ្នកមានគុណ ទីពីរ គឺអ្នកស្នេហាជាតិ និងអ្នកមានគុណប្រយោជន៍សម្រាប់ជាតិទាំងអស់តាំងពីមុនៗមកដែលគាត់មានគុណូបការៈសម្រាប់ជាតិ។ ក្នុងការវេរដាសម្រាប់ព្រះសង្ឃ លោកអាចារ្យក៏បានឧទ្ទិសមគ្គផលទាំងហ្នឹងសម្រាប់អ្នកមានគុណរបស់ជាតិ»។
ដោយមិនប្រកាន់និន្នាការនយោបាយ លោក ឃួន សេរីវុធ យល់ឃើញថា បុគ្គលរូបណាក៏ដោយដែលមានគុណបំណាច់ចំពោះជាតិ បានធ្វើសកម្មភាពដើម្បីជាប្រយោជន៍ជាតិមាតុភូមិ គួរត្រូវបានគោរព ឱ្យតម្លៃ និងមានការតបស្នងទៅពួកគាត់វិញ។
អ្នកខេត្តតាកែវ ម្នាក់ទៀត គឺលោកស្រី សួន សូភី ដែលជាអ្នកគាំទ្រ និងចូលចិត្តការវិភាគរបស់បណ្ឌិត កែម ឡី ពេលលោកនៅមានជីវិត ថ្លែងដោយទឹកភ្នែករលីងរលោងថា លោកស្រីនឹកបណ្ឌិត កែម ឡី ជាខ្លាំង ពិសេសគឺនឹកសំឡេង និងការវិភាគស៊ីជម្រៅរបស់លោក។ រយៈពេលជិត ៣ខែកន្លងទៅនេះ លោកស្រីមិនទាន់អស់ចិត្តទេថា បណ្ឌិត កែម ឡី បានបែកកាយរំលាយក្ខន្ធពីប្រជាពលរដ្ឋខ្មែរ ដែលជាអ្នកនិយមស្ដាប់លោកតាមប្រព័ន្ធផ្សព្វផ្សាយជារៀងរហូតមិនត្រឡប់មកវិញ៖ «នៅតែនឹកអាណិត ព្រោះវានៅថ្មីៗអ៊ីចឹង។ កាលពីពីរបីខែមុន ខ្ញុំហូបបាយអត់បានសម្រាន្តក៏មិនលក់ដែរ។ សម្រាន្តទៅស្រាលខ្លួន មួយយប់ៗចេះតែប្រែខ្លួននឹកឃើញតែគាត់ អាណិតតែគាត់។ ស្ដាយចំណេះគាត់ស្ដាយអ្នកដែលរកមិនបានបែបនេះ»។
ដើម្បីជាការតបស្នង លោកស្រី សួន សូភី ដែលជាអ្នកស្អប់ខ្ពើមអំពើអយុត្តិធម៌ក្នុងសង្គម និងតែងចែករំលែកព័ត៌មានតាមកន្តាញសង្គមរបស់ខ្លួនបញ្ជាក់ថា បន្ទាប់ពីឧទ្ទិសមគ្គផលទាំងឡាយជូនសាច់សាលោហិតរួចហើយ។ លោកស្រីមិនដែលភ្លេចឡើយចំពោះការឧទ្ទិសកុសលផលបុណ្យជូនវិញ្ញាណក្ខន្ធបណ្ឌិត កែម ឡី។
លោកស្រីតែងបួងសួងសុំឱ្យវិញ្ញាណក្ខន្ធអ្នកស្រាវជ្រាវខាងការអភិវឌ្ឍសង្គមរូបនេះបានទៅដល់ទីបរមសុខ៖ «បួងសួងឱ្យគាត់ទៅកាន់សុគតិភព ជាតិក្រោយកុំឱ្យដូច្នេះទៀត កុំឱ្យអាយុខ្លី (អាយុ) កាន់តែវែង។ កុំឱ្យមានឧបទ្ទវហេតុអ៊ីចឹងកើតឡើងឱ្យកើតជាខ្មែរទៀត ឱ្យខ្ពង់ខ្ពស់ជាងនេះទៀត ហើយដឹកនាំខ្មែរដោយសុខសាន្ត»។
ទាក់ទងនឹងការបួងសួងសុំអោយដួងវិញ្ញាណក្ខន្ធលោកបណ្ឌិត កែម ឡី បានកើតជាខ្មែរនេះ អ្នកនិពន្ធបទភ្លេង និងជាអ្នកចម្រៀងមួយរូបក៏បានច្រៀងបួងសួងអោយលោកកើតជាខ្មែរដែរ៖ «សំឡេងចម្រៀង»។
ចំណែកឯបុរសវ័យចំណាស់ម្នាក់ដែលបើកឡានតាំងពីខេត្តកំពត មកគោរពវិញ្ញាណក្ខន្ធបណ្ឌិត កែម ឡី នៅឯស្រុកត្រាំកក់ ខេត្តតាកែវ លោក នឿ គុណ វិញ បញ្ជាក់ថា លោកបានទៅប្រារព្ធពិធីកាន់បិណ្ឌ និងភ្ជុំបិណ្ឌ ជាច្រើនវត្តរួចមកហើយ ហើយជារៀងរាល់ពេលលោកមិនដែលភ្លេចរំលឹកគុណបណ្ឌិត កែម ឡី នោះទេ៖ «ចំពោះខ្ញុំ និងអ្នកស្និទ្ធស្នាលធ្លាប់ទំនាក់ទំនង ក៏ឧទ្ទិសដូចគ្នា ព្រោះយើងឃើញអត្តសញ្ញាណរបស់គាត់ ការងាររបស់គាត់ត្រឹមត្រូវ យុត្តិធម៌ ជាក់ស្ដែង។ គេនឹងទទួលស្គាល់ហើយនិងស្រឡាញ់គាត់ ស្ដាយគាត់ អាណិតគាត់ ដោយសារគាត់យុត្តិធម៌ក្នុងសង្គមរបស់យើងទាំងមូល»។
បណ្ឌិត កែម ឡី ត្រូវបានឃាតកបាញ់សម្លាប់កាលពីព្រឹកថ្ងៃទី១០ កក្កដា ក្នុងហាងលក់ទំនិញ ស្តារម៉ាត (Star Mart) នៅក្បែរស្តុបបូកគោ រាជធានីភ្នំពេញ។ សពរបស់លោកត្រូវបានតម្កល់នៅវត្តចាស់ អស់រយៈពេល ២សប្ដាហ៍ មុននឹងត្រូវក្រុមគ្រួសារ និងប្រជាពលរដ្ឋប្រហែល ២លាននាក់ ដង្ហែមកកាន់ស្រុកកំណើតនៅឯខេត្តតាកែវ នៅថ្ងៃទី២៤ ខែកក្កដា និងត្រូវបានបញ្ចុះនៅព្រឹកថ្ងៃបន្ទាប់។
សម្រាប់ក្រុមគ្រួសារបណ្ឌិត កែម ឡី ពិធីបុណ្យកាន់បិណ្ឌ និងភ្ជុំបិណ្ឌឆ្នាំនេះ ប្រព្រឹត្តទៅដោយក្រៀមក្រំបំផុត។ ស្ថិតក្នុងវ័យជាង ៧០ឆ្នាំ លោកស្រី ភោគ សេ គឺជាម្ដាយបង្កើតរបស់បណ្ឌិត កែម ឡី។ អង្គុយលើគ្រែនៅពីមុខទីកប់សពបណ្ឌិត កែម ឡី លោកស្រី ភោគ សេ ថ្លែងដោយទឹកភ្នែកថា គាត់នឹកអាណិតកូនរបស់គាត់ជាខ្លាំងដែលធ្វើតែអំពើល្អ ប៉ុន្តែត្រូវជួបគ្រោះអាក្រក់បែបនេះ។
លោកស្រីរំលឹកថា បណ្ឌិត កែម ឡី តែងតែមកជួបជុំគ្រួសារនៅរៀងរាល់ពិធីបុណ្យកាន់បិណ្ឌ និងភ្ជុំបិណ្ឌ ហើយជូនគ្រឿងឧបភោគ បរិភោគ និងបច្ច័យដល់លោកស្រីដែលម្ដាយមិនដែលអាក់ខាន ប៉ុន្តែឆ្នាំនេះលោកស្រីលែងបានជួបជុំជាមួយកូនម្នាក់នេះតទៅទៀតហើយ នៅឡើយតែរូបថត និងអនុស្សាវរីយ៍ដែលមានពីមុនៗមក៖ «ជូន (គ្រឿងឧបភោគ បរិភោគ និងបច្ច័យ) ហើយ ជួនកាលទៅលេងកែប ទឹកឈូ កំពង់សោម។ រាល់ឆ្នាំសប្បាយជួបជុំគ្នា វេចនំអន្សមហូបអ៊ីចឹង។ ហូបហើយ វា (បណ្ឌិត កែម ឡី) ដាក់យកទៅហូបនៅផ្ទះទៀត»។
វិធីរំងាប់ទុក្ខសម្រាប់លោកស្រី ភោគ សេ គឺការបដិបត្តិធម៌តាមឱវាទពុទ្ធសាសនា។ ជារៀងរាល់ថ្ងៃសីល លោកស្រី និងកូនចៅបាននាំគ្នានិមន្តព្រះសង្ឃមកបង្សុកូល ឧទ្ទិសកុសលដល់វិញ្ញាណក្ខន្ធបណ្ឌិត កែម ឡី ហើយក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ លោកស្រីតែងយកចង្ហាន់ទៅប្រគេនព្រះសង្ឃ និងបួងសួងឱ្យវិញ្ញាណក្ខន្ធកូនប្រុសលោកស្រីបានទៅកើតនៅឋានសុគតិភព។
ជុំវិញឃាតកម្មលើបណ្ឌិត កែម ឡី នេះ អ្វីដែលក្រុមគ្រួសារ សាច់ញាតិ និងពលរដ្ឋចង់ឃើញបំផុតនោះ គឺយុត្តិធម៌ ពោលគឺការវែកមុខចាប់ជនដៃដល់ និងអ្នកនៅពីក្រោយខ្នងឃាតកម្មនេះ យកមកផ្ដន្ទាទោសតាមផ្លូវច្បាប់ ដែលមិនមែនជាការប្រឌិត ឬការកប់សំណុំរឿងចោល ដូចករណីឃាតកម្មមុនៗនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់