ឯកអគ្គរដ្ឋទូតនៃសហរដ្ឋអាមេរិកប្រចាំកម្ពុជាលោក ប៉ាកទ្រីក ម័រហ្វី (Patrick Murphy) បានថ្លែងថាសហរដ្ឋអាមេរិកនៅតែបន្តធ្វើជាដៃគូដ៏សំខាន់ក្នុងកិច្ចសហប្រតិបត្តិការផ្នែកវប្បធម៌កេរដំណែលការអភិរក្ស ការជួសជុលនិងកិច្ចការពារលើប្រាសាទបុរាណនានានៅក្នុងប្រទេសកម្ពុជា។
ក្នុងរយៈពេលជាង២០ឆ្នាំមកនេះ សហរដ្ឋអាមេរិកបានជួយជ្រោមជ្រែងទៅលើគំរោងជួសជុលប្រាសាទភ្នំបាខែងនៅក្នុងខេត្តសៀមរាប និងប្រាសាទមួយចំនួនទៀតនូវទឹកប្រាក់ប្រមាណ ៤លានដុល្លារអាមេរិក។
ស្ថានទូតអាមេរិកប្រចាំកម្ពុជាជាមួយនឹងអង្គការវើលម៉ូញូមិនហ្វាន់ (World Monument Fund បាន ចុះហត្ថលេខាលើកិច្ចព្រមព្រៀងផ្ដល់មូលនិធិឯកអគ្គរដ្ឋទូតនូវទឹកប្រាក់ប្រមាណ៤៥ម៉ឺនដុល្លារដើម្បីយកទៅប្រើប្រាស់សម្រាប់ការអភិរក្សវប្បធម៌ និងគំរោងសម្រាប់ជួសជុលប្រាសាទភ្នំបាខែងក្នុងដំណាក់កាលទី៧នាឆ្នាំ២០២៣។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជាលោក ប៉ាកទ្រីក ម័រហ្វី (Patrick W.Murphy) មានប្រសាសន៍កាលពីព្រឹកថ្ងៃសុក្រទី១ ខែធ្នូ បន្ទាប់ពីបញ្ចប់ពិធីចុះហត្ថលេខាលើកិច្ចព្រមព្រៀងផ្ដល់មូលនិធិឯកអគ្គរដ្ឋទូតនោះថា នេះ គឺជាជំនួយដ៏សំខាន់ពីមូលនិធិស្ថានទូតសម្រាប់ការអភិរក្ស វប្បធម៌ នៅក្នុងតំបន់អាស៊ីប៉ាស៊ីហ្វិកក្នុងឆ្នាំ២០២៣។ នេះគឺជាជំនួយសម្រាប់និរន្តរភាពវប្បធម៌ ការអភិរក្ស និងការពារប្រាសាទបុរាណនៅគ្រប់ទីកន្លែងនៃប្រទេសកម្ពុជា។
លោកឯកអគ្គរដ្ឋទូតសហរដ្ឋអាមេរិកមានប្រសាសន៍ទៀតថា សហរដ្ឋអាមេរិកបានគាំទ្រគំរោង ជួសជុលប្រាសាទភ្នំបាខែង រយៈពេល២០ឆ្នាំមកហើយ លើការជួសជុលប្រាសាទការអភិរក្សថ្មការ ជួសជុលប្រព័ន្ធបង្ហូរទឹកបុរាណ និងការរៀបចំជញ្ជាំងនៃប្រាសាទភ្នំបាខែងឱ្យប្រសើរឡើងវិញ។
លោក ប៉ាកទ្រីក ម័រហ្វី៖ «ស្ថានទូតអាមេរិកនៅតែបន្តគាំទ្រចំពោះការអភិរក្សក៏ដូចជាការការពារជួសជុលប្រាសាទបុរាណហើយយើងក៏បានជួយការងារជួសជុលប្រាសាទព្រះវិហារមួយចំណែកផងដែរ។ យើងក៏មានអនុស្សរណៈនៃការយោគយល់គ្នាក្នុងការបញ្ជូនត្រឡប់មកវិញនូវរូបចម្លាក់សិល្បៈបុរាណមកកម្ពុជាវិញ ពីព្រោះរូបចម្លាក់សិល្បៈបុរាណទាំងនេះវាជាបេះដូង និងដួងព្រលឹងរបស់ប្រទេសកម្ពុជា»។
ប្រាសាទភ្នំបាខែងបានកសាងតាំងពីឆ្នាំ៩០៧ នៃគ្រីស្ដសករាជ ក្នុងរជ្ជកាលព្រះបាទយសោវរ្ម័នទី១។ ប្រាសាទនេះស្ថិតនៅចំពីលើកំពូលភ្នំធម្មជាតិមួយ ដែលមានទីតាំងនៅចំកណ្តាលទីក្រុង យសោធបុរៈស្ថិតនៅចន្លោះ ប្រាសាទអង្គរវត្ត និងក្រុងអង្គរធំ។
ដោយសារតែអាយុកាលច្រើនរយឆ្នាំសំណង់របស់ប្រាសាទនេះបានទ្រុឌទ្រោមជាច្រើនកន្លែង។
រដ្ឋមន្ត្រីក្រសួងវប្បធម៌ និងវិចិត្រសិល្បៈលោកស្រី ភឿង សកុណា មានប្រសាសន៍ថា ជាច្រើនឆ្នាំ មកហើយសហរដ្ឋអាមេរិកបានសហប្រតិបត្តិការលើផ្នែកវប្បធម៌ជាមួយកម្ពុជា ដោយមិនត្រឹមតែជួយលើគម្រោងជួសជុលប្រាសាទភ្នំបាខែងប៉ុណ្ណោះទេ គឺសហរដ្ឋអាមេរិកក៏បានជួយជួសជុល ជណ្ដើរផ្នែកខាងជើងរបស់ប្រាសាទព្រះវិហារហើយថ្មីៗសហរដ្ឋអាមេរិកក៏បានជួយបញ្ជូនវត្ថុបុរាណជាច្រើនឱ្យវិលត្រឡប់មកមាតុភូមិវិញផងដែរ។ លោកស្រី ភឿង សកុណា បញ្ជាក់ទៀតថា កិច្ចសហប្រតិបត្តិការផ្នែកអភិរក្សវប្បធម៌រវាងកម្ពុជា និងសហរដ្ឋអាមេរិកពេលនេះគឺជាការផ្តល់ ផលប្រយោជន៍យ៉ាងខ្លាំងដល់ប្រទេសទាំងពីរ ប្រសិនបើគ្មានសហរដ្ឋអាមេរិកជួយជ្រោមជ្រែងទេ គឺកម្ពុជាមានការពិបាកយ៉ាងខ្លាំង។
លោកស្រី ភឿង សកុណា៖ «ជាការពិតយើងចង់ឱ្យសហប្រតិបត្តិការអាមេរិកលើផ្នែកវប្បធម៌បន្តឱ្យបានច្រើនទៅមុខទៀត ហើយពេលថ្មីៗនេះការគាំទ្រគ្នាទៅវិញទៅមកនៅលើឆាកអន្តរជាតិក្នុងការបោះឆ្នោតជ្រើសរើសគណៈកម្មការប្រតិបត្តិនៅUNESCOរបស់អង្គការសហប្រជាជាតិ គឺកម្ពុជាក៏បានបោះឆ្នោតជូនអាមេរិក ដើម្បីឱ្យក្លាយទៅជាសមាជិកគណៈកម្មការប្រតិបត្តិរបស់អង្គការUNESCOដែរ»។
តំណាងអង្គការWorld Momument Fundប្រចាំកម្ពុជាលោកស្រី ជីននីវរ៉ា បូតូ (Ginevra Boatto) ឱ្យ ដឹងថា ក្នុងរយៈពេលជាង២០ឆ្នាំមកនេះសហរដ្ឋអាមេរិកបានផ្ដល់ជំនួយជាទឹកប្រាក់ប្រមាណ ៤លានដុល្លារអាមេរិកហើយ តាមរយៈអង្គការWorld Monument Fund សម្រាប់កិច្ចការជួសជុល អភិរក្ស និងការពារប្រាសាទបុរាណនៅភ្នំបាខែងនិងនៅតំបន់ដទៃទៀតក្នុងប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។