ក្រសួង​ឧស្សាហកម្ម​ថា ការ​នាំចូល​អំបិល​ គឺ​ដើម្បី​ទប់​តម្លៃ​ទី​ផ្សារ​កុំ​ឱ្យ​ឡើង​ថ្លៃ

ដោយ សេក បណ្ឌិត
2018-11-30
អ៊ីម៉ែល
មតិ
Share
បោះពុម្ព
សកម្មភាព​ពលរដ្ឋ​ប្រមូល​ផល​អំបិល​កាល​ពី​​ថ្ងៃ​ទី​២៤ មករា ឆ្នាំ​២០១៦ នា​ខេត្តកំពត។
សកម្មភាព​ពលរដ្ឋ​ប្រមូល​ផល​អំបិល​កាល​ពី​​ថ្ងៃ​ទី​២៤ មករា ឆ្នាំ​២០១៦ នា​ខេត្តកំពត។
Photo: RFA

កម្ពុជា​​នាំចូល​អំបិលបរទេសចំនួន​ ៣ ម៉ឺនតោន ដោយអះអាងថាដើម្បី​​​បំពេញ​តម្រូវ​ការ​ក្នុង​ស្រុក​រយៈ​ពេល​​ ៣ខែ​នេះ មុន​ពេល​​កសិករ​ខ្មែរអាច​ផលិត​អំបិល​បាន នៅ​ដើម​ឆ្នាំ២០១៩ ខាង​មុខ។ អ្នក​ផលិត​អំបិល​ក្នុង​ស្រុក មិន​ជំទាស់​នឹង​ការ​នាំចូល​អំបិល​ពី​ក្រៅ​ប្រទេស​នេះ​ឡើយ​ ដោយ​សារការ​ខ្វះខាត​អំបិល​នៅ​ពេល​បច្ចុប្បន្ន​ ប៉ុន្តែអ្វី​ដែល​ពួក​គាត់​បារម្ភ​នោះ គឺ​ការ​ខ្វះខាត​កម្លាំង​ពលកម្ម​ធ្វើ​ការ​នៅ​ស្រែ​អំបិល ខណៈ​រដូវ​ធ្វើ​អំបិល​​បាន​ចាប់​ផ្តើម​ជាបណ្តើរៗ ហើយ។

អនុរដ្ឋ​លេខាធិការក្រសួងឧស្សាហកម្ម និង​សិប្បកម្ម លោក សុន​ សេងហួត ថ្លែង​ប្រាប់​អាស៊ី​សេរី​ថា រដូវ​ធ្វើ​អំបិល​កន្លង​ទៅ​នេះ កសិករ​ផលិត​អំបិល​បាន​តែ​ប្រមាណ ២ ទៅ ៣ពាន់​តោន ដោយសារ​មាន​ភ្លៀង​ធ្លាក់​ជាប់​ជា​ប្រចាំ ជាហេតុ​ធ្វើឱ្យ​មាន​ការ​ខ្វះ​ខាត​អំបិល​ប្រើប្រាស់​នៅ​ចុង​រដូវ​វស្សានៅ​ឆ្នាំ​នេះ។ លោក​​​ថា ក្រសួង​​បាន​អនុញ្ញាត​ឱ្យ​សហគមន៍​អ្នក​ផលិត​អំបិល​ខេត្ត​កំពត​កែប​ នាំចូលអំបិល​ពី​ក្រៅ​ប្រទេស ដើម្បី​ដោះ​ស្រាយ​បញ្ហា​ប្រឈម​​នេះ ហើយ​អំបិល​ដែល​នាំចូលនេះ​បាន​ឆ្លង​កាត់​ការ​ត្រួត​ពិនិត្យ​គុណភាព​ត្រឹម​ត្រូវ៖ «មូលហេតុ​ដែល​យើង​នាំ​ចូល​ហ្នឹង គឺ​យើង​នាំចូល​បណ្តោះអាសន្ន​ ដើម្បី​បម្រើ​សេចក្តី​ត្រូវ​ការ​ពេល​រដូវ​ត្រីប្រហុក​នេះ។ យើង​យក​មក​ដាក់​នៅ​ទីផ្សារ ដើម្បី​ទប់​ទល់​កុំ​ឱ្យ​ទីផ្សារហ្នឹង​វា​ឡើង​ថ្លៃ ក្នុង​គោល​បំណង​បម្រើ​សេចក្តី​ត្រូវ​ការ​ប្រជាជន​យើង ដែល​ត្រូវ​ការ​ជា​ចាំបាច់​ ក្នុង​ការ​ប្រឡាក់​ត្រី​ធ្វើ​ប្រហុក​នៅ​ពេល​ខាង​មុខ​ហ្នឹង។ អ៊ីចឹង​យើង​អនុញ្ញាត​ឱ្យ​សហគមន៍​អ្នក​ផលិត​អំបិល​ខេត្ត​កំពត-កែប​ហ្នឹង គាត់​នាំចូល​ ៣ ម៉ឺនតោន​សម្រាប់​បម្រើ​សេចក្តី​ត្រូវ​ការ​ក្នុង​រដូវ​ហ្នឹង។ ហើយ​បើ​ពិនិត្យ​មើល​ស្ថានភាព​ជាក់​ស្តែង​ ប្រសិន​បើ​ពេល​ខាង​មុខ​ដ៏​ខ្លី​នេះ អត់​មាន​ភ្លៀង​ទេ អំបិល​យើង​នឹង​ផលិត​ធម្មតាវីញ»

លោក​បញ្ជាក់​ថា អំបិល​ដែល​​បាន​បញ្ជាទិញ​ពីប្រទេសចិន​ចំនួន​ ៥ពាន់​តោន​នោះ បាន​ដឹក​ជញ្ជូន​មក​ដល់​កម្ពុជា​​ហើយ ដើម្បី​ឱ្យ​ទាន់​រដូវ​ធ្វើ​ប្រហុកផ្អក​​។ លោក​អះអាងថា អំបិល​នេះ​នឹង​មិន​មែន​នាំចូល​ពី​ប្រទេសចិន​តែមួយ​នោះ​ទេ ពោល​គឺ​ក្រសួង​កំពុង​ស្វែង​រក​ទីផ្សារ​អំបិល​ដទៃទៀត​ដែល​មាន​តម្លៃ​ថោក​ជាង និង​ស្រប​តាម​ស្តង់​ដារ​ដែល​ក្រសួង​បាន​កំណត់​។ មន្ត្រី​ជំនា​ញ​រូប​នេះ​រំពឹង​ថា រដូវ​ធ្វើ​អំបិល​នៅ​ពេល​ខាង​មុខ​ អាកាស​ធាតុ​អាច​នឹង​​ប្រសើរ​ជាង​ឆ្នាំមុន​ ពេល​នោះ​កម្ពុជា​នឹង​មិន​ចាំបាច់​នាំ​ចូល​​អំបិល​ពី​ក្រៅ​ទៀត​ឡើយ៖ «ប្រសិន​បើ​រដូវ​ក្តៅ​អំណោយ​ផល យើង​ធ្វើ​មួយ​ឆ្នាំ យើង​អាច​រក្សា​ទុក​ហូប​ចុក​ដល់​ទៅ​មួយ​ឆ្នាំកន្លះឯណោះ ព្រោះ​ក្នុង​មួយ​ឆ្នាំយើង​ត្រូវ​ការ​ប្រហែល​ជា​ជាង ១០ម៉ឺន​តោន​បន្តិច​បន្តួច​នោះ​ទេ។ ប៉ុន្តែ​ឥលូវ​នេះ​​ លទទ្ធភាព​ដី ៤ពាន់​ហិកតារ​ជាង​ហ្នឹង យើង​ធ្វើ​បាន​ដល់​ទៅ ១៥ម៉ឺន​តោន ជាមធ្យម​ អ៊ីចឹងបើ​មេឃ​ក្តៅ​មក​ នោះ​នឹង​មិន​ខ្វះ​ទេ។ ចំណុច​ទីពីរ យើង​មាន​ពិសោធន៍​ហើយ​ ឆ្នាំ​នេះ ប្រសិន​បើ​មេឃក្តៅ​ដូច​ ២០១៥ និង​ ២០១៦ ដែល​ទិន្នផល​អំបិល​ឡើង​ខ្ពស់​ហ្នឹង យើង​នឹង​រក​មធ្យោបាយ​ រក​កន្លែង​ស្តុក​បន្ថែម​ទៀត​ឱ្យ​បាន​ច្រើន​ ដើម្បី​រក្សា​ទុក​ឱ្យ​បាន​យូរ​ឆ្នាំ ព្រោះ​យើង​ឃើញ​ថា អំបិល​ជា​ទំនិញ​យុទ្ធសាស្ត្រមួយ​ ដែល​ខ្មែរ​យើង​ហៅ​ថា ជា​មាស​ស​ ដូច្នេះ​យើង​ខិត​ខំ​ការពារ​ណាស់»

កម្ពុជា​មាន​តម្រូវ​ការ​អំបិល​ប្រមាណ ១ម៉ឺន​តោន ក្នុង​មួយ​ខែ សម្រាប់​ការ​ប្រើប្រាស់​ជា​គ្រឿង​ផ្សំ​នៃ​ម្ហូប​អាហារ និង​ក្នុង​វិស័យ​ឧស្សាហកម្ម។ សព្វថ្ងៃ​នេះ កម្ពុជា​មាន​មណ្ឌល​ផលិត​អំបិល​ចំនួន ៧ នៅ​ក្នុង​ខេត្ត​កំពត និង​ខេត្ត​កែប ដែល​មាន​ក្រុម​ផលិត​ករ​ជិត​ ២០០ ក្រុម​ ខណៈដីស្រែ​អំបិល​មាន​ចំនួនជាង​​​ ៤ពាន់ហិកតារ។ ដីស្រែ​អំបិល​​​​ទាំងនោះ​ ត្រូវ​បានអាជ្ញាធរ​ហាម​ឃាត់​មិន​ឱ្យ​មាន​ការ​លក់​ដូរ​ធ្វើ​អាជីវកម្ម​ក្នុង​ទិសដៅ​ផ្សេង ក្រៅ​ពី​ការធ្វើ​អំបិល​នោះ​ឡើយ។

អ្នក​ផលិត​អំបិល​មួយ​រូប​នៅសង្កាត់​ត្រើយ​កោះ ក្រុង​កំពត លោក ពៅ សុន ថ្លែង​ថា ការ​នាំ​ចូល​អំបិល​ពី​ក្រៅ​ប្រទេស​​​ជា​រឿង​ចាំបាច់ ខណៈ​​អំបិល​ផលិត​ក្នុង​ស្រុក​មិន​អាច​បំពេញ​តម្រូវ​ការ​បាន​គ្រប់​គ្រាន់។ លោក​យល់​ថា រឿង​នេះ​នឹង​មិន​ប៉ះពាល់ដ​ល់​អ្នក​ផលិត​អំបិល​ក្នុង​ស្រុក​ឡើយ ប្រសិន​បើនេះ​ជា​ការ​នាំចូល​បណ្តោះ​អាសន្ន​មុន​​ពេល​កសិករ​ធ្វើ​អំបិល​បាន​នៅ​ពេល​ខាង​មុខ៖ «ប្រសិន​បើ​យើង​មាន​ ហើយ​នាំ​ចូល​ អាហ្នឹង​វា​ប៉ះពាល់​ដល់​អ្នក​ផលិត ហើយ​ប្រសិន​បើ​អត់​ វា​មិន​អាច​ប៉ះពាល់​ទេ ព្រោះ​ត្រូវ​តម្រូវ​ការ​ប្រជាជន។ បើ​យើង​ឆាប់ (ប្រមូល​ផល) បាន​ទៅ យើង​មិន​បាច់​នាំ​ចូល​ទៀត​ដែរ​ ប៉ុន្តែ​បើ​ក្របាន​ វា​ពិបាក​ដែរ។ យើង​មិន​ទាន់​ទស្សន៍​ទាយ​ត្រូវ​រឿង​ធាតុ​អាកាស​មិន​ដឹង​ថា​យ៉ាង​ម៉េច​នៅ​ឡើយ។ ប្រសិន​បើ​មេឃ​រាំង​ យើង​អាច​ធ្វើ​បាន​អ៊ីចឹង​ទៅ​ យើង​ក៏​​ឈប់​នាំ​ចូល វា​ក៏​ល្អម្យ៉ាង​ដែរ»

ទោះ​ជា​យ៉ាង​ណា​ក្ដី អ្នក​ធ្វើ​អំបិល​រូប​នេះ​ អះអាង​ថា បញ្ហា​ប្រឈម​ធំបំផុត​នៅ​ពេល​នេះ គឺ​កង្វះ​ខាត​កម្លាំង​ពល​កម្ម​​ធ្វើការ​នៅ​ស្រែ​អំបិល​ទៅវិញ​ទេ ព្រោះ​កម្មករ​ស្រែ​អំបិល​ជា​ច្រើន​បាន​នាំគ្នា​ទៅ​ធ្វើ​ការ​តាម​រោង​ចក្រ និង​សហគ្រាស​អស់​ទៅ​ហើយ។ កសិករ​រូប​នេះ អះអាង​ថា លោក​មាន​ដី​ស្រែ​អំបិល​ជាង ២០ហិកតារ ដែល​ត្រូវ​ប្រើកម្លាំង​ពលកម្ម​ជាង ១០នាក់ ធ្វើ​ការ​វិល​ជុំ​ ជាមួយ​តម្លៃ​ពលកម្ម​ ២ ម៉ឺន​រៀល​ក្នុង​មួយ​ថ្ងៃ។ ក៏​ប៉ុន្តែ​ពេល​នេះ កម្មករ​របស់​លោក​នៅ​សល់​តែ​ ២នាក់​ប៉ុណ្ណោះ ខណៈ​តម្លៃ​ពលកម្ម​កើន​ឡើង​ដល់ ៤ម៉ឺនរៀល​ក្នុង​មួយ​ថ្ងៃ។ លោក​យល់​​ថា បើ​ទោះ​ជា​អាកាសធាតុ​អំណោយ​ផល​ល្អ​ក៏​ដោយ​ ក៏​លោក និង​កសិករ​មួយ​ចំនួន​ទៀត​ ទំនង​ជា​​មិន​អាច​ធ្វើ​អំបិល​បាន​ច្រើន​ដូច​ពីមុន​ទៀត​ឡើយ៖ «ខ្លួន​ខ្ញុំ​មាន​ការ​ព្រួយ​បារម្ភ​ដែរ នឹក​ឃើញ​ថា ឥឡូវ​ហ្នឹង​បើ​មេឃ​រាំង​អំណោយ​ផល​អ៊ីចឹង ប៉ុន្តែ​មក​បញ្ហា​ប្រឈម​រឿង​កម្លាំង​ពលកម្ម រឿង​ការ​ប្រមូល​ផល​ រឿង​ការ​ផលិត​នេះ។ ឆ្នាំនេះ​ខ្ញុំ​ប្រហែល​ជា​អំបិល​នេះ​បាន​តិច​តួច​ទេ។ មាន​តែ​យើង​ដំឡើងថ្លៃ​ឱ្យ​គេ​ខ្ពស់។ ពេល​​ខ្ពស់​ទៅ ដល់​ពេល​យើង​ធ្វើទៅ ​អំបិលយើង​បាន​ថោក​ យើង​ទៅ​ធ្វើ​ម៉េច​កើត។ កាល​ណាយើង​លក់​ក្នុង​តម្លៃ​ខ្ពស់​ អំបិល​ (ប្រទេស)​ ជិត​ខាង​ គេ​ចូល​មក​។ វាពិបាក​អ៊ីចឹង»

កសិករ​នៅ​សង្កាត់​ត្រើយ​កោះ បាន​ចាប់​ផ្តើម​រៀប​ចំស្រែ ដើម្បី​ធ្វើ​អំបិល​តាំង​ពីដើម​ខែវិច្ឆិកាមក​ម៉្លេះ​ ហើយ​ប្រសិន​​​​បើ​គ្មាន​ភ្លៀង​ទេនោះ ពួក​គាត់​មួយ​ចំនួន​នឹង​អាច​ប្រមូលផល​​អំបិល​បាន​ជា​បណ្តើរៗនៅ​រវាង​ពីរ​សប្តាហ៍​ខាង​មុខ​ទៀត​នេះ។

មន្ត្រី​ជំនាញ​​​ក្រសួងឧស្សាហកម្ម លោក សុន​ សេងហួត ​បញ្ជាក់​ថា ប្រទេស​ជឿន​លឿន​មួយ​ចំនួន​បាន​ប្រើ​ប្រាស់​បច្ចេក​វិទ្យាទំនើប​ដើម្បី​ផលិត​អំបិល​ឱ្យ​បាន​ច្រើន​តាម​តម្រូវ​ការ ក៏​ប៉ុន្តែ​បច្ចេកវិទ្យា​ទាំង​នោះ មិន​ទាន់​អាច​​យក​មក​ប្រើប្រាស់​នៅកម្ពុជា​បាន​នៅ​ឡើយ​ ព្រោះ​ត្រូវ​ចំណាយ​ដើម​ទុន​ច្រើន។ ទោះ​ជា​យ៉ាងណា លោក​ថា ក្រសួង​ក៏​កំពុង​​រិះរក​មធ្យោបាយ និង​ច្ចេក​ទេស​ទេស​ថ្មីៗ បន្ថែម​ទៀត​ដែរ ដើម្បី​ផ្តល់​ជូន​ដល់​​កសិករ​អ្នក​ផលិត​អំបិល

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

stupid businessman VS jackass says

Why this trade industrial pm said import more salts into Cambodia is avoid the salty go up in the market price...that is a fair say or not?or just whatever he wants to say ,or just get away from irresponsible rather responsible or what?and where is the salty made from?or made from any materials or something else?...the salt is made from sea saltwater and Cambodia didn't have a sea saltwater like others or not?"shame on him".Cambodia have a sea saltwater that can product million tons of sea saltwater per year and why this jackass trade commercial says to import more salt to avoid it prices goes up in the market...very very stupid businessman on earth that why cause this poor country is still poorer fall far behind to any countries in the region"stupid businessman 4vever"this horrible man didn't know nothing about business at all"kick him out at anytime.

Dec 01, 2018 02:20 PM

គេហទំព័រ​ទាំងមូល