គណៈកម្មការ​អឺរ៉ុប​សម្រេច​ដាក់​បញ្ចូល​កម្ពុជា​ទៅ​ក្នុង​បញ្ជី​ខ្មៅ​លាង​លុយ​កខ្វក់

ដោយ មាន ឫទ្ធិ
2020-05-07
អ៊ីម៉ែល
មតិ
Share
បោះពុម្ព
ធនាគារ​ជាតិ​កម្ពុជា នា​រាជធានី​ភ្នំពេញ។
ធនាគារ​ជាតិ​កម្ពុជា នា​រាជធានី​ភ្នំពេញ។
Photo courtesy of National Bank of Cambodia's Facebook

គណៈកម្មការ​អឺរ៉ុប សម្រេច​ជា​ផ្លូវ​ការ ដាក់​បញ្ចូល​កម្ពុជា​ទៅ​ក្នុង​បញ្ជី​ខ្មៅ​នៃ​ក្រុម​ប្រទេស លាង​លុយ​កខ្វក់ ដែល​បង្ក​ការ​គំរាម​កំហែង​ខ្លាំង​ដល់​ប្រព័ន្ធ​ហិរញ្ញវត្ថុ​របស់​អឺរ៉ុប។ ការ​សម្រេច​នេះ ធ្វើ​ឲ្យ​កម្ពុជា ជាប់​ឈ្មោះ​ជាមួយ​ប្រទេស​មីយ៉ាន់ម៉ា ឬ​ភូមា ក្លាយ​ជា​ប្រទេស​ពីរ ក្នុង​តំបន់​អាស៊ី​អាគ្នេយ៍ ស្ថិត​ក្នុង​បញ្ជី​ខ្មៅ​របស់​អឺរ៉ុប ក្រៅ​ពី​ប្រទេស ១០ ផ្សេង​ទៀត​នៅ​លើ​ពិភពលោក ដែល​គណៈកម្មការ​អឺរ៉ុប ទើប​បញ្ចូល​ឈ្មោះ​ក្នុង​បញ្ជី​ខ្មៅ​លាង​លុយ​កខ្វក់​ក្នុង​ឆ្នាំ២០២០ នេះ។ អ្នក​ជំនាញ​កិច្ចការ​អន្តរជាតិ​ព្រមាន​ថា អ្នក​មាន​ខ្មែរ​ក្នុង​ជួរ​រដ្ឋាភិបាល ដែល​លួច​លុយ​ជាតិ នឹង​មិន​អាច​យក​លុយ​ទៅ​រក្សា​ទុក​ក្នុង​ធនាគារ​នៅ​អឺរ៉ុប​បាន​ទេ។

ដូច​តាម​ការ​គ្រោង​ទុក គណៈកម្មការ​អឺរ៉ុប​បាន​សម្រេច​ដាក់​បញ្ចូល​ឈ្មោះ​ប្រទេស​ចំនួន ១២ ទៅ​ក្នុង​បញ្ជី​ខ្មៅ​នៃ​ក្រុម​ប្រទេស​លាង​លុយ​កខ្វក់​ក្នុង​ឆ្នាំ២០២០ នេះ បន្ថែម​ទៅ​លើ​បញ្ជី​ចាស់ ដែល​មាន​ស្រាប់​កាល​ពី​ឆ្នាំ​កន្លង​ទៅ។ នៅ​តំបន់​អាស៊ី មាន កម្ពុជា មីយ៉ាន់ម៉ា និង​ម៉ុងហ្គោលី ដែល​ជាប់​ឈ្មោះ​ក្នុង​បញ្ជី​ខ្មៅ នៃ​ក្រុម​ប្រទេស​មាន​ហានិភ័យ​ខ្ពស់ ផ្នែក​អំពើ​លាង​លុយ​កខ្វក់ និង​ហិរញ្ញប្បទាន​ភេរវកម្ម​ បង្ក​ការ​គំរាម​កំហែង​ដល់​ប្រព័ន្ធ ហិរញ្ញវត្ថុ​របស់​អឺរ៉ុប។ ក្រៅ​ពី​នោះ នៅ​តំបន់​ផ្សេង​ទៀត មាន​ប្រទេស​ប៉ាណាម៉ា នីការ៉ាហ្គ័រ និង ហ្សីមបាវ៉េ ជា​ដើម។ គណៈកម្មការ​អឺរ៉ុប ហៅ​ក្រុម​ប្រទេស​ទាំង​នេះ​ថា ជា​ប្រទេស​ដែល​មាន​កង្វះ​ខាត ជា​យុទ្ធសាស្ត្រ​ផ្នែក​ក្រប​ខណ្ឌ​ប្រយុទ្ធ​ប្រឆាំង​នឹង​អំពើ​លាង​លុយ​កខ្វក់ និង​អំពើ​ហិរញ្ញប្បទាន ភេរវកម្ម។

អាស៊ី​សេរី​មិន​អាច​ទាក់ទង​សុំ​ប្រតិកម្ម​ពី​មន្ត្រី​នាំ​ពាក្យ​រដ្ឋាភិបាល លោក ផៃ ស៊ីផាន ជុំវិញ​រឿង​នេះ​បាន​ទេ ដោយ​លោក​មិន​លើក​ទូរស័ព្ទ កាល​ពី​ថ្ងៃ​ទី៧ ឧសភា។ រីឯអគ្គនាយក​បច្ចេកទេស​នៃ​ធនាគារ​ជាតិ​នៃ​កម្ពុជា អ្នកស្រី ជា សេរី ក៏​មិន​លើក​ទូរស័ព្ទ​ដូច​គ្នា។ យ៉ាង​ណា​ក៏​ដោយ កន្លងមក លោក ស ខេង រដ្ឋមន្ត្រី​ក្រសួង​មហាផ្ទៃ ធ្លាប់​ទទួល​ស្គាល់​ថា កម្ពុជា​នឹង​ប្រឈម​នឹង​ការ​លំបាក បើ​ស្ថាប័ន​អន្តរជាតិ​ផ្នែក​ឃ្លាំមើល អំពើ​លាង​លុយ​កខ្វក់​របស់​ពិភពលោក ដាក់​បញ្ចូល​កម្ពុជា​ទៅ​ក្នុង​បញ្ជី​ខ្មៅ។ រីឯ លោក​នាយក​រដ្ឋមន្ត្រី ហ៊ុន សែន វិញ​ធ្លាប់​ប្ដេជ្ញា​ថា នឹង​មិន​ឲ្យ​កម្ពុជា​ក្លាយ​ជា​ជម្រក​លាង​លុយ កខ្វក់​ឡើយ៖ «ទោះ​បី​យើង​មិន​មែន​ជា​គោលដៅ​នៃ​ការ​វាយ​ប្រហារ​ភេរវកម្ម តែ​ត្រូវ​ធ្វើ​ឲ្យ​ប្រទេស​កម្ពុជា​យើង កុំ​ក្លាយ​ទៅ​ជា​ប្រទេស​នៃ​ជម្រក ឬ​ការ​ឆ្លង​កាត់​របស់​ពួក​ភេរវកម្ម។ កុំឲ្យ​ប្រទេស​យើង​ក្លាយ​ទៅ​ជា​កន្លែង​ដែល​សម្អាត​ប្រាក់ ព្រោះ​អា​សំណុំ​បញ្ហា ការ​ជួញ​ដូរ​គ្រឿងញៀន ការ​ជួញ​ដូរ​អាវុធ ការ​ជួញដូរ​ការ​លាង​លុយ​កខ្វក់ គឺ​សំណុំ​រឿង​ទៅ​តែមួយ»

ការ​ប្ដេជ្ញា​ចិត្ត​របស់​លោក ហ៊ុន សែន នេះ មិន​បាន​ធ្វើ​ឲ្យ​កម្ពុជា​រួច​ផុត​ពី​បញ្ជី​ខ្មៅ​លាង​លុយ កខ្វក់​របស់​អឺរ៉ុប​ឡើយ។ គណៈកម្មការ​អឺរ៉ុប បញ្ជាក់​ក្នុង​សេចក្ដីប្រកាស​ព័ត៌មាន កាល​ពី​ថ្ងៃ​ទី៧ ឧសភា ថា ខ្លួន​នឹង​ដាក់​សេចក្ដីសម្រេចចិត្ត​នេះ ឲ្យ​សភា និង​ក្រុមប្រឹក្សា​អឺរ៉ុប​សម្រេច​បន្ត មុន​នឹង​ចាប់​ផ្ដើម​អនុវត្ត​ជា​ផ្លូវការ ចាប់​ពី​ថ្ងៃ​ទី១ ខែ​តុលា​ត​ទៅ ដោយសារ​តែ​ពិភព​លោក​កំពុង​ប្រឈម​នឹង​បញ្ហា​វិបត្តិ​ជំងឺ​រាតត្បាត​សាកល​កូវីដ១៩។ ទន្ទឹម​គ្នា​នេះ គណៈកម្មការ​អឺរ៉ុប ក៏​បាន​សម្រេច​ដាក់​ចេញ​វិធានការ​រួម ដើម្បី​ពង្រឹង​ការ​ប្រយុទ្ធ​ប្រឆាំង​នឹង​អំពើ​សម្អាត​ប្រាក់ ឬ​លាង​លុយ​កខ្វក់ និង​អំពើ​ហិរញ្ញប្បទាន​ភេរវកម្ម។ ក្រៅ​ពី​នេះ គណៈកម្មការ​អឺរ៉ុប ក៏​កំពុង​ពិចារណា​បង្កើត​ស្ថាប័ន​ប្រឆាំង​អំពើ​លាង​លុយ​កខ្វក់ ដាច់​ដោយឡែក​មួយ នា​ពេល​អនាគត មិន​ស្ថិត​ក្រោម​ចំណុះ​របស់​ធនាគារ​កណ្ដាល​អឺរ៉ុប។

អ្នក​ជំនាញ​ខាង​វិស័យ​ធនាគារ​ឯកជន បណ្ឌិត អ៊ិន ចាន់នី បដិសេធ​ផ្ដល់​ការ​អត្ថាធិប្បាយ ជុំ​វិញ​ការ​សម្រេច​ចិត្ត​របស់​គណៈកម្មការ​អឺរ៉ុប​នេះ ពីព្រោះ​លោក​មិន​ទាន់ បាន​អាន​ឯកសារ​នោះ។ ក៏ប៉ុន្តែ លោក​ថា វិស័យ​ធនាគារ​នៅ​កម្ពុជា​ទាំង​ផ្នែក​ឯកជន និង​ផ្នែក​រដ្ឋ តែង​តែ​អនុវត្ត​តាម​អនុសាសន៍ ដាក់​ចេញ​ដោយ​ស្ថាប័ន​ឃ្លាំមើល​អំពើ លាង​លុយ​កខ្វក់​របស់​ពិភព​លោក ពីព្រោះ​កម្ពុជា​មិន​អាច​ធ្វើ​អាជីវកម្ម​ហិរញ្ញវត្ថុ ដោយ​គ្មាន​ការ​គាំទ្រ​ជា​អន្តរជាតិ​នោះ​ទេ៖ «មិន​មែន​បាន​ន័យ​ថា យើង​មិន​ធ្វើ​តាម​ទេ គឺ​យើង​ធ្វើ​តាម ព្រោះ​យើង​ខ្វាយខ្វល់​ដូច​គ្នា។ ថ្នាក់​ជាតិ​ក៏​លោក​ខ្វាយខ្វល់ ថ្នាក់​ស្ថាប័ន​ឯកជន ក៏​យើង​ខ្វាយខ្វល់ ព្រោះ​យើង​មិន​អាច​ធ្វើ​អាជីវកម្ម​ហិរញ្ញវត្ថុ​ដោយ គ្មាន​ការ​គាំទ្រ​ជា​អន្តរជាតិ​បាន​ទេ ពី​ព្រោះ​ថា ច្រក​សំខាន់​ណាស់​សម្រាប់​សេដ្ឋកិច្ច​មួយៗ គឺ​ពឹង​ផ្អែក​គ្នា​ទៅ​វិញ​ទៅ​មក មិន​មែន​ថា ប្រទេស​យើង​មាន​ការ​រីក​ចម្រើន យើង​អាច​ធ្វើ​ការ​តែ​ម្នាក់​ឯង​នោះ​ទេ គឺ​យើង​ត្រូវ​ការ​ការ​ទូទាត់​ជា​អន្តរជាតិ»

បណ្ឌិត អ៊ិន ចាន់នី បន្ត​ថា ការ​ចាយ​វាយ​នៅ​កម្ពុជា​ស្ទើរ​តែ​ជាង ៨០% ពឹង​ផ្អែក​ខ្លាំង​លើ​រូបិយប័ណ្ណ​បរទេស​ដែល​ជា​ប្រាក់​ដុល្លារ។ ដូច្នេះ លោក​ថា កម្ពុជា​មិន​អាច​ធ្វើ​ឲ្យ​បាត់​បង់​មធ្យោបាយ ក្នុង​ការ​ផ្ទេរ​ប្រាក់​នោះ​ទេ។

ជុំវិញ​ការ​ដាក់​ចេញ​វិធានការ​តឹងរ៉ឹង​របស់​អឺរ៉ុប​នា​ពេល​នេះ សម្រាប់​អ្នក​ជំនាញ​កិច្ចការ​អន្តរជាតិ បណ្ឌិត អៀ សុផល វិញ លោក​យល់​ឃើញ​ថា ផល​ប៉ះ​ពាល់​ពី​ការ​ដាក់​បញ្ចូល​ក្នុង​បញ្ជី​ខ្មៅ​លាង​លុយ​កខ្វក់ របស់​សហភាព​អឺរ៉ុប​នេះ នឹង​មាន​សភាព​ធ្ងន់ធ្ងរ ហើយ​កាន់​តែ​ពិបាក សម្រាប់​ពួក​អ្នក​មាន​ខ្មែរ​ក្នុង​ជួរ​រដ្ឋាភិបាល ដែល​លួច​លុយ​ជាតិ យក​ទៅ​រក្សា​ទុក ក្នុង​ធនាគារ​នៅ​អឺរ៉ុប បន្ថែម​ពី​លើ​អ្វី​ដែល​សហរដ្ឋ​អាមេរិក​កំពុង​ឃ្លាំមើល​កម្ពុជា​ស្រាប់។ លោក​ថា ស្ថាប័ន​ថ្មី​របស់​អឺរ៉ុប​នេះ អាច​មាន​អំណាច​ដាក់​ទណ្ឌកម្ម និង​កំណត់​អត្តសញ្ញាណ​ចំពោះ​លំហូរ​សាច់​ប្រាក់​ទាំង​ឡាយ​ណា ដែល​គួរ​ឲ្យ​សង្ស័យ។

កាល​ពី​ឆ្នាំ២០១៩ នៅ​ទូទាំង​ពិភព​លោក មាន​ប្រទេស និង​ដែន​ដី​សរុប​ចំនួន ២៣ ជាប់​ឈ្មោះ ក្នុង​បញ្ជី​ខ្មៅ​របស់​សហភាព​អឺរ៉ុប​ខាង​ផ្នែក​លាង​លុយ​កខ្វក់ និង​ហិរញ្ញប្បទាន​ភេរវកម្ម។ សហភាព​អឺរ៉ុប​ចាត់​ទុក​ប្រទេស និង​ដែន​ដី​ទាំង​នោះ​ថា បង្ក​ការ​គំរាម​កំហែង​ធ្ងន់ធ្ងរ​ដល់​ប្រព័ន្ធ ហិរញ្ញវត្ថុ​របស់​ខ្លួន ដោយសារ​តែ​ក្រុម​ប្រទេស​ទាំង​នោះ​បាន​បរាជ័យ​មិន​បាន​ដោះ​ស្រាយ បញ្ហា​លាង​លុយ​កខ្វក់ និង​ហិរញ្ញប្បទាន​ភេរវកម្ម។

តាំង​ពី​ឆ្នាំ២០១៩ មក កម្ពុជា​ជាប់​ឈ្មោះ​ពីរ​ឆ្នាំ​ជាប់​គ្នា​ក្នុង « បញ្ជី​ប្រផេះ» នៃ​ក្រុម​ប្រទេស ឬ​ដែន​ដី​ដែល​មាន​កង្វះ​ខាត​ជា​យុទ្ធសាស្ត្រ​ក្នុង​ការ​ប្រយុទ្ធ​ប្រឆាំង​នឹង​អំពើ​លាង​លុយ​កខ្វក់ និង​ហិរញ្ញប្បទាន​ភេរវកម្ម ក្នុង​ចំណោម ១៨ប្រទេស របស់​ស្ថាប័ន​ឃ្លាំមើល​អំពើ​លាង​លុយ កខ្វក់​ពិភព​លោក​ដ៏​មាន​ឥទ្ធិពល ហៅ​កាត់​ថា FATF

ការសម្រេចដាក់​បញ្ចូល​កម្ពុជា​ទៅ​ក្នុង​បញ្ជី​ខ្មៅ​របស់​អឺរ៉ុប​នេះ ធ្វើ​ឲ្យ​កេរ្តិ៍ឈ្មោះ​កម្ពុជា ខាង​ប្រយុទ្ធ​ប្រឆាំង​នឹង​អំពើ​លាង​លុយ​កខ្វក់ និង​ហិរញ្ញប្បទាន​ភេរវកម្ម កាន់​តែ​អាក្រក់​នៅ​លើ​ឆាក​អន្តរជាតិ ស្រប​ពេល​ដែល​ប្រទេស​មួយ​នេះ សម្បូរណ៍​ដោយ​សែស្រឡាយ​អ្នក​លួច​ជាតិ យក​លុយ​ទៅ​លាក់​ទុក​នៅ​បរទេស ហើយ​ពួក​គេ​ខ្លះ​កំពុង​រង​ទណ្ឌកម្ម​បង្កក​ទ្រព្យសម្បត្តិ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល