ក្រុម​ថៅកែ​រោងចក្រ​នឹង​ជជែក​នឹង​រដ្ឋាភិបាល​រឿង​កាត់​បន្ថយ​ថ្លៃ​ដើម​ផលិត ក្រោយ​ប្រឈម​នឹង​ការ​បាត់​EBA

ដោយ សុ ជីវី
2020-02-21
អ៊ីម៉ែល
មតិ
Share
បោះពុម្ព
អគ្គលេខាធិការ​នៃ​សមាគម​រោងចក្រ​កាត់ដេរ​នៅ​កម្ពុជា លោក ខេន លូ ផ្ដល់​បទសម្ភាសន៍​ កាល​ពី​ថ្ងៃ​ទី​៩ កញ្ញា ឆ្នាំ​២០១៦។
អគ្គលេខាធិការ​នៃ​សមាគម​រោងចក្រ​កាត់ដេរ​នៅ​កម្ពុជា លោក ខេន លូ ផ្ដល់​បទសម្ភាសន៍​ កាល​ពី​ថ្ងៃ​ទី​៩ កញ្ញា ឆ្នាំ​២០១៦។
RFA

សមាគម​រោងចក្រ​កាត់ដេរ​នៅ​កម្ពុជា (GMAC) អះអាង​ថា ប្រសិនបើ​ការ​សម្រេច​ដក​ផ្នែក​ខ្លះ​នៃ​ប្រព័ន្ធ​អនុគ្រោះ​ពន្ធ EBA ពី​កម្ពុជា ចូល​ជា​ធរមាន​មែន នោះ​អ្នក​ដែល​ត្រូវ​បង់ពន្ធ គឺ​ក្រុមហ៊ុន​បញ្ជា​ទិញ មិនមែន​ថៅកែ​រោងចក្រ​នៅ​កម្ពុជា​ទេ។ ក៏ប៉ុន្តែ GMAC ថា ផលវិបាក​សម្រាប់​ថៅកែ​រោងចក្រ​នៅ​ស្រុក​ខ្មែរ​នោះ គឺ​ក្រុមហ៊ុន​បញ្ជា​ទិញ​មួយ​ចំនួន​អាច​នឹង​ដក​ការ​បញ្ជាទិញ​ខ្លះ​ពី​កម្ពុជា ប្រសិនបើ​ពួកគេ​ត្រូវ​បង់ពន្ធ​។ សហជីព​យល់​ថា មានតែ​ការ​រក្សា​បាន​នូវ​ប្រព័ន្ធ​អនុគ្រោះ​ពន្ធ​នេះ​ទេ ទើប​ភាគី​នីមួយៗ​មិន​ខាត​បង់​ផលប្រយោជន៍​របស់​ខ្លួន។

អគ្គលេខាធិការ​សមាគម​រោងចក្រ​កាត់ដេរ​នៅ​កម្ពុជា (GMAC) លោក ខេន លូ ឱ្យ​អាស៊ីសេរី​ដឹង​ថា ផលិតផល​សំលៀកបំពាក់ ស្បែក​ជើង និង​កាបូប ត្រូវ​ជាប់​ពន្ធ​សរុប​ប្រមាណ ១៥០​លាន​ដុល្លារ​អាមេរិក ក្នុង​មួយ​ឆ្នាំ ប្រសិនបើ​ការសម្រេច​របស់​គណៈកម្មការ​អឺរ៉ុប​ចូល​ជា​ផ្លូវការ​នៅ​ខែ​សីហា ខាងមុខ​។ ក្នុង​នោះ​សំលៀកបំពាក់​តែឯង នឹង​ត្រូវ​ជាប់​ពន្ធ​ប្រមាណ​១២០ លាន​ដុល្លារ​អាមេរិក​ក្នុង​មួយ​ឆ្នាំ។

ទោះជា​យ៉ាងណា លោក ខេន លូ បញ្ជាក់​ថា លោក​មិនដឹង​ថា តើ​កាតព្វកិច្ច​ពន្ធ​នេះ​នឹង​ប៉ះពាល់​ដល់​រោងចក្រ ឬ​កម្មករ​ច្រើន​ប៉ុនណា​នោះ​ទេ ពីព្រោះ​វា​អាស្រ័យ​ទៅ​លើ​ការសម្រេចចិត្ត​របស់​ក្រុមហ៊ុន​បញ្ជា​ទិញ​ថា តើ​ពួកគេ​ដក​ការ​បញ្ជា​ទិញ​ពី​កម្ពុជា​ដែរ​ឬមួយ​ក៏​អត់ ហើយ​បើ​ដក​មែន តើ​ដក​ចំនួន​ប៉ុន្មាន​ភាគរយ​?​។ លោក​អះអាង​ថា សមាគម​ថៅកែ​រោងចក្រ​នៅតែ​ចង់​ឱ្យ​សហភាព​អឺរ៉ុប​ផ្តល់​ការ​អនុគ្រោះ​ពន្ធ​ទាំងស្រុង​ដដែល ដើម្បី​ភាព​ប្រកួតប្រជែង​នៃ​ផលិតផល​របស់​កម្ពុជា៖ «បើ EU ដក​ការ​អនុគ្រោះ​ពន្ធ មាន​ន័យថា អ្នកបញ្ជា​ទិញ​ដែល​នៅតែ​កុម្ម៉ង់​ពី​ស្រុក​ខ្មែរ​ចង់​នាំ​ចូល​ទៅ​អឺរ៉ុប គាត់​អ្នក​ត្រូវ​បង់ពន្ធ​។ អ៊ីចឹង​ពេល​ដែល​គាត់​ត្រូវ​បង់ពន្ធ អាច​គាត់​គិត​ថា តម្លៃ​កុម្ម៉ង់​ទិញ​ពី​ប្រទេស​កម្ពុជា អាច​ថ្លៃ​ជាង​គាត់​កុម្ម៉ង់​ទិញ​ពី​ប្រទេសជិតខាង ឬក៏​ប្រទេស​ផ្សេងៗ​។ អ៊ីចឹង​បញ្ហា​ដែល​និយោជក​នៅ​ស្រុក​ខ្មែរ​អាច​ជួប​ផល​លំបាក មានន័យថា អ្នកបញ្ជា​ទិញ​អាច​ដក​បញ្ជា​ទិញ​មួយ​ចំនួន»

លោក ខេន លូ ឱ្យ​ដឹង​ទៀត​ថា សមាគម​រោងចក្រ​កាត់ដេរ​កំពុង​រក​វិធីសាស្ត្រ​កាត់បន្ថយ​ថ្លៃដើម​ផលិត ហើយ​គ្រោង​ជជែក និង​លើក​ជា​សំណូមពរ​ពាក់ព័ន្ធ​នឹង​បញ្ហា​នេះ​ទៅកាន់​រដ្ឋាភិបាល​។ លោក​បញ្ជាក់​ថា វិធានការ​របស់​រដ្ឋាភិបាល​កាល​ពី​ពេល​កន្លង​ទៅ អាច​ជួយ​និយោជក​បាន​មួយ​ផ្នែក ប៉ុន្តែ​មិនបាន​ទាំងស្រុង​នោះ​ទេ៖ «អ្នកបញ្ជា​ទិញ​ពីមុន ឧទាហរណ៍​ថា គាត់​ទិញ​អីវ៉ាន់ ១​រៀល អត់​ត្រូវ​បង់ពន្ធ​ទេ អ៊ីចឹង​បូក​ទាំងអស់​នៅតែ​១ រៀល ប៉ុន្តែ​ឥលូវ​គាត់​ទិញ​១ រៀល​ហើយ ត្រូវ​បង់​ឧទាហរណ៍​១០% ពន្ធ វា​ឡើង​ទៅ​១ រៀល ១ កាក់​។ ប៉ុន្តែ​បើ​យើង​រោងចក្រ​នៅ​ស្រុក​ខ្មែរ​អាច​លក់​អីវ៉ាន់​ចុះ​ពី ១​រៀល សល់​៩ កាក់ ឬក៏​៩ កាក់ ៥ សេន ឬក៏​យ៉ាងម៉េច អាច​ចុះ មានន័យថា តម្លៃ​សរុប​ទាំងអស់​ក៏​អាច​ប្រកួតប្រជែង​ជាមួយ​អ្នក​ផ្សេង​បាន​ដែរ។ យើង​មិនមែន​បាត់​ទីផ្សារ​នោះ​ទេ យើង​នៅតែ​មាន​ទីផ្សារ​អឺរ៉ុប គ្រាន់តែ​ថា យើង​បាត់​ការ​អនុគ្រោះ​ពន្ធ​។ ប្រសិនបើ​រដ្ឋាភិបាល​អាច​ជួយ​កាត់បន្ថយ​ចំណាយ​រោងចក្រ​នៅ​ស្រុក​ខ្មែរ ហើយ​យើង​អាច​ពង្រឹង​ការ​កើន​ឡើង​ផលិតផល អ៊ីចឹង​យើង​នៅតែ​អាច​ប្រកួតប្រជែង​ពី​ប្រទេស​ផ្សេងៗ»

រដ្ឋាភិបាល​លោក ហ៊ុន សែន បាន​ដាក់​ចេញ​នូវ​វិធានការ​មួយ​ចំនួន​ដើម្បី​លើកទឹកចិត្ត​ដល់​អ្នក​វិនិយោគ​ឱ្យ​បន្ត​រកស៊ី​នៅ​កម្ពុជា​តទៅទៀត ប្រឈមមុខ​នឹង​ការបាត់បង់​ប្រព័ន្ធ​អនុគ្រោះ​ពន្ធ EBA ពី​សហភាព​អឺរ៉ុប​។ វិធានការ​ទាំងនោះ រួមមាន ការ​បញ្ចប់​តួនាទី​របស់​អគ្គនាយកដ្ឋាន​កាំកុងត្រូល​នៅ​តាម​ទី​កន្លែង​ត្រួតពិនិត្យ​ទំនិញ ការ​លុបចោល​ភ្នាក់ងារ​កម្ពុជា​នាវាចរណ៍ (CAMSAB) ការ​បញ្ចុះ​ថ្លៃ​អគ្គិសនី​សម្រាប់​រោងចក្រ​ឧស្សាហកម្ម ការលុបចោល​ថ្ងៃ​ឈប់សម្រាក​៦ ថ្ងៃ​ចាប់ពី​ឆ្នាំ​២០២០ តទៅ ការ​បញ្ចុះ​ថ្លៃ​សេវា​លើកដាក់​កុងតឺន័រ និង​ការ​តាក់តែង​ច្បាប់​ថ្មី​ស្តីពី​ការ​វិនិយោគ និង​តំបន់​សេដ្ឋកិច្ច​ពិសេស ជាដើម​។

បន្ទាប់​ពី​ដាក់​ចេញ​វិធានការ​ទាំងនោះ​ហើយ លោកនាយក​រដ្ឋមន្ត្រី ហ៊ុន សែន បាន​ដង្ហោយ​ហៅ​ក្រុម​អ្នក​វិនិយោគ​នៅ​ប្រទេស​ចិន​ឱ្យ​មក​បណ្តាក់​ទុន​នៅ​កម្ពុជា ហើយ​ស្នើ​សុំ​ឱ្យ​រដ្ឋាភិបាល​ក្រុង​ប៉េកាំង​ជួយ​បើក​ទីផ្សារ​កាន់តែ​ធំ​ទៀត​សម្រាប់​ប្រទេស​កម្ពុជា​។ ទំនងជា​ដោយសារ​កត្តា​ទាំងនេះ ទើប​លោក ហ៊ុន សែន ហាក់​មាន​ទំនុក​ចិត្ត និង​ប្រកាស​ថា លោក​ទទួលយក​សេចក្តី​សម្រេច​ដក​ការ​អនុគ្រោះ​ពន្ធ​ផ្នែក​ខ្លះ​ពី​កម្ពុជា ដោយ​គ្មាន​ការ​អល់អែក៖ «ខ្ញុំ​អត់​មាន​អ្វី​តបត​ទេ អាហ្នឹង​សិទ្ធិ​នៅ​ក្នុង​ដៃ​គេ ប៉ុន្តែ​គេ​ក៏​ត្រូវ​គោរព​សិទ្ធិ​នៅ​ក្នុង​ដៃ​របស់​យើង​ដែរ​។ តែ​ប៉ុណ្ណឹង វា​ឆាប់​ចប់ កុំ​បាច់​ជជែក​សាំ​តាប៉ែ​អ្វី​។ ខ្មែរ​រស់​វេទនា​ណាស់ ទម្រាំ​បាន​ប៉ុណ្ណេះ ងើបឈរ​បាន​ប៉ុណ្ណេះ ហើយ​បង់ពន្ធ​ឱ្យ​គេ​ទៅ​។ ក្នុង​មួយ​ឆ្នាំ​១០០ លាន ជាង​១០០ លាន​បន្តិចបន្តួច ទៅ​បង់​ទៅ»។ទោះជា​យ៉ាង​នេះ​ក្តី នាយក​ប្រតិបត្តិ​មជ្ឈមណ្ឌល​សម្ពន្ធភាព​ការងារ និង​សិទ្ធិមនុស្ស (CENTRAL) លោក មឿន តុលា ជឿ​ថា វិធានការ​ទាំងនេះ មិន​អាច​ជួយ​ឱ្យ​ក្រុម​ថៅកែ​រោងចក្រ​បន្ត​ការ​វិនិយោគ​នៅ​ស្រុក​ខ្មែរ​បាន​ឡើយ ប្រសិនបើ​គ្មាន​ការ​អនុគ្រោះ​ពន្ធ EBA ហេតុដូច្នេះ​ទើប​បាន​ជា​ក្រុម​ថៅកែ​រោងចក្រ​ចេញ​សេចក្ដី​ថ្លែងការណ៍​បង្ហាញ​ពី​កង្វល់​របស់​ខ្លួន​នៅ​ពេល​គណៈកម្មការ​អឺរ៉ុប​សម្រេច​ដក​ការ​អនុគ្រោះ​ពន្ធ ២០% ពី​កម្ពុជា។

ទោះជា​យ៉ាងណា លោក មឿន តុលា សង្កត់ធ្ងន់​ថា រដ្ឋាភិបាល​មិន​អាច​ចេះតែ​សម្រប​តាម​ក្រុម​ថៅកែ​រោងចក្រ​នោះ​ទេ ពីព្រោះ​ចំណុច​ខ្លះ​ធ្វើ​ឱ្យ​បាត់បង់​ប្រយោជន៍​កម្មករ មាន​ជាអាទិ៍ ការ​លុប​ថ្ងៃ​ឈប់សម្រាក ៦ ថ្ងៃ និង​កែប្រែ​ច្បាប់​ការងារ​ឱ្យ​ប្រាក់ខែ​អ្នកធ្វើការ​វេន​យប់​ស្មើនឹង​ប្រាក់ខែ​វេន​ថ្ងៃ ជាដើម​។ លោក​បន្ថែម​ថា ជម្រើស​ល្អ​បំផុត​ដើម្បី​កុំ​ឱ្យ​ខាត​ទាំងអស់​គ្នា​នោះ គឺ​រដ្ឋាភិបាល​ត្រូវ​ព្យាយាម​ធ្វើ​យ៉ាងណា​រក្សា​ការ​អនុគ្រោះ​ពន្ធ EBA បន្ត​ទៅ​ទៀត៖ «វា​ពិបាក​សម្រាប់​ឱ្យ​ក្រុមហ៊ុន​បញ្ជា​ទិញ​ធំៗ​ហ្នឹង គេ​រៀបចំ​ជា​ផែនការ​អាជីវកម្ម​របស់​គេ​ក្នុង​ការ​ទម្លាក់​ការ​បញ្ជាទិញ​មក​ស្រុក​ខ្មែរ ហើយ​បើ​អត់​មាន​ការ​បញ្ជាទិញ​ច្បាស់លាស់​ទេ ចំនួន​នៃ​ការ​នាំចេញ​របស់​យើង​ហ្នឹង​វា​នៅ​តិច​នៅឡើយ ឬក៏​វា​អាច​ថយ​ចុះ​ថែមទៀត​។ បើ​ថយ​ចុះ​ថែមទៀត រដ្ឋ​យើង​គិតតែ​ពី​ចេញ​ខាត​។ កាលណា​យើង​ចេញ​ខាត​រហូត គឺ​ផល​ប៉ះពាល់​ហ្នឹង​វា​ប៉ះ​ទាំងអស់​។ អ្នក​រកស៊ី​ក៏​ប៉ះ ចំណូល​របស់​រដ្ឋ​ក៏​ថយ ហើយ​ចំណូល​របស់​ពលរដ្ឋ​ហ្នឹង​ក៏​មាន​ការ​ធ្លាក់​ចុះ ដូចជា គាត់​អត់​មាន​ការ​ងារ​ធ្វើ​ពេញ​លេញ ជួនកាល គាត់​អត់​មាន​លុយ​គ្រប់គ្រាន់​នៅ​ក្នុង​ការ​សង​បំណុល​មីក្រូហិរញ្ញវត្ថុ​ជាដើម វា​ប៉ះ​ទាំងអស់​ហ្នឹងឯង»

សមាគម​រោងចក្រ​កាត់ដេរ​នៅ​កម្ពុជា និង​សមាគម​ស្បែកជើង​កម្ពុជា នៅ​ពេល​ថ្មីៗ​នេះ បាន​ចេញ​សេចក្តី​ថ្លែងការណ៍​សម្ដែង​ការ​សោកស្ដាយ​ចំពោះ​ការសម្រេច​របស់​គណៈកម្មការ​អឺរ៉ុប​ដែល​ដកហូត​ផ្នែក​ខ្លះ​នៃ​ប្រព័ន្ធ​អនុគ្រោះ​ពន្ធ EBA ពី​កម្ពុជា ដែល​ធ្វើ​ឱ្យ​ប៉ះពាល់​ដល់​ផ្នែក​ទាំងពីរ​នេះ​។ ទាំង​សមាគម​រោងចក្រ​កាត់ដេរ និង​សមាគម​ស្បែកជើង សុទ្ធតែ​ស្នើ​ឱ្យ​គណៈកម្មការ​អឺរ៉ុប​ពិចារណា​ឡើងវិញ​ចំពោះ​ការ​ផ្តល់ EBA ទាំងស្រុង​ដល់​កម្ពុជា​វិញ ដើម្បី​ជួយ​លើកស្ទួយ​ជីវភាព​ពលរដ្ឋ​ខ្មែរ​ឱ្យ​រួច​ចាក​ផុត​ពី​ភាព​ក្រីក្រ។

ប្រធាន​សហភាព​ការងារ​កម្ពុជា (CLC) លោក អាត់ ធន់ ថ្លែង​ថា ការ​ប៉ាន់​ស្មានថា ការ​ដកហូត​ប្រព័ន្ធ​អនុគ្រោះ​ពន្ធ EBA ២០% អាច​នឹង​ប៉ះពាល់​ដោយ​ផ្ទាល់​ទៅលើ​រោងចក្រ​ប្រមាណ​៣០ ទៅ​៤០ រោងចក្រ ក្នុង​ចំណោម​រោងចក្រ​ទាំង​ធំ ទាំង​តូច​ជាង ១​ពាន់​រោងចក្រ​នៅ​កម្ពុជា ហើយ​បើ​គិត​ពី​កម្មករ​ដែល​ត្រូវ​ប្រឈម​នឹង​ហានិភ័យ​ការងារ គឺ​មាន​ចន្លោះ ៧ ទៅ ៨​ម៉ឺន​នាក់។

លោក​យល់ថា មាន​មធ្យោបាយ​មួយ​ចំនួន​ដែល​រដ្ឋាភិបាល និង​និយោជក​អាច​នឹង​ដាក់​ចេញ រួមមាន ការ​កាត់បន្ថយ ឬ​លើកលែង​ពន្ធ​លើ​វត្ថុធាតុដើម​ដែល​នាំចូល​ពី​ក្រៅ​ប្រទេស និង​ពន្ធ​លើ​ប្រាក់​ចំណេញ ជាដើម ក៏ប៉ុន្តែ​លោក​ថា ការ​ធ្វើ​របៀប​នេះ នឹង​ធ្វើ​ឱ្យ​រដ្ឋ​ត្រូវ​បាត់បង់​ចំណូល​ពន្ធ​ពី​ក្រុមហ៊ុន​។ ជម្រើស​មួយទៀត គឺ​ការកាត់បន្ថយ​អត្ថប្រយោជន៍​របស់​កម្ម​ករ និង​ដំឡើងថ្លៃ​ផលិតផល​ដែល​ត្រូវ​លក់​លើ​ទីផ្សារ ក៏ប៉ុន្តែ​ការ​ធ្វើ​បែប​នេះ លោក​ថា នឹង​ប៉ះពាល់​ដល់​កម្មករ ហើយក៏​ប៉ះពាល់​អតិថិជន​របស់​ពួកគេ​ដែរ​។ លោក អាត់ ធន់ ជឿ​ថា ជម្រើស​ដែល​ល្អ​បំផុត​នោះ គឺ​គ្មាន​អ្វី​ក្រៅពី​ការ​រក្សា​បាន​ប្រព័ន្ធ​អនុគ្រោះ​ពន្ធ EBA នោះ​ទេ ពីព្រោះ​ទាំង​កម្មករ និយោជក និង​រដ្ឋាភិបាល នឹង​នៅតែ​ទទួល​ផល​ប្រយោជន៍​ច្រើន​ពី​វិស័យ​កាត់ដេរ៖ «បើ​រដ្ឋាភិបាល​បញ្ចុះតម្លៃ​ពន្ធ ឬក៏​មិន​យកពន្ធ​សោះ​អំពី​ពន្ធ​លើ​ប្រាក់​ចំណេញ ឬក៏​អនុគ្រោះ​ពន្ធ​នាំចូល​វត្ថុធាតុដើម​។ ឧទាហរណ៍​ថា នាំ​អំបោះ នាំ​ក្រណាត់​ដែល​ត្រូវ​គិត​ពន្ធ​ហ្នឹង អត់​យក ដើម្បី​សម្រួល​ឱ្យ​ផលិត ហើយ​នាំ​ចេញ​ទៅ ដើម្បី​បង់ពន្ធ​ទៅ​សហភាព​អឺរ៉ុប​។ នេះ​ជា​វិធី​មួយទៀត​ដែរ តែ​ចំណូល​ជាតិ​អត់​បានទេ​។ អ៊ីចឹង​ក្រៅពី​អនុវត្ត​តាម​ការ​ស្នើ​របស់​សហភាព​អឺរ៉ុប​ដើម្បី​ទទួល​បាន​ប្រយោជន៍​ហ្នឹង គឺ​អត់​មាន​អ្វី​ចំណេញ​ទេ មានន័យថា ត្រូវ​ខាត​ទាំងអស់»

គិត​ត្រឹម​ថ្ងៃ​ទី​២១ កុម្ភៈ រដ្ឋាភិបាល​លោក ហ៊ុន សែន មាន​ពេល​ជាង​៥ ខែ​ទៀត មុន​ពេល​សេចក្ដី​សម្រេច​របស់​គណៈ​កម្ម​ការ​អឺរ៉ុប​ចូល​ជា​ធរមាន​នៅ​ថ្ងៃ​ទី​១២ សីហា ខាងមុខ​។ កម្ពុជា​អាច​មានឱកាស​ទទួល​បាន​ការ​អនុគ្រោះ EBA ទាំងស្រុង​ឡើងវិញ​ចំពោះ​ទំនិញ​នាំទៅ​សហភាព​អឺរ៉ុប ប្រសិនបើ​រដ្ឋាភិបាល លោក ហ៊ុន សែន ព្រម​កែ​លម្អ​កំណត់ត្រា​អាក្រក់​ផ្នែក​សិទ្ធិមនុស្ស​ស្រប​ទៅ​តាម​លក្ខខណ្ឌ​របស់​គណៈកម្មការ​អឺរ៉ុប។

ស្រប​ពេល​សេចក្ដី​សម្រេច​របស់​គណៈ​កម្ម​ការ​អឺរ៉ុប​មិនទាន់​ចូល​ជា​ធរមាន​នេះ ក្រុមហ៊ុន​បញ្ជា​ទិញ​ធំៗ​បាន​ស្នើ​យ៉ាង​ទទូច​ឱ្យ​រដ្ឋាភិបាល​លោក ហ៊ុន សែន បំពេញ​ទៅតាម​លក្ខខណ្ឌ​របស់​គណៈកម្មការ​អឺរ៉ុប ដើម្បី​ឱ្យ​អឺរ៉ុប​ផ្លាស់ប្ដូរ​ការសម្រេចចិត្ត​របស់​ខ្លួន​វិញ​។ ក្រុមហ៊ុន​បញ្ជា​ទិញ​បាន​ព្រមាន​ថា ប្រសិនបើ​ស្ថានភាព​អាក្រក់​នេះ​មិន​ត្រូវ​បាន​កែ​លម្អ​ទេ ហើយ EBA ត្រូវ​បាត់បង់​មែន នោះ​វា​នឹង​ប៉ះពាល់​ធ្ងន់ធ្ងរ​ដល់​សេដ្ឋកិច្ច និង​សង្គម​កម្ពុជា ជាពិសេស​គឺ​ប៉ះពាល់​ដល់​ទំនុក​ចិត្ត​នៃ​ការ​វិនិយោគ​របស់​ពួកគេ​នៅ​ប្រទេស​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល