RFA
ក្រសួងពាណិជ្ជកម្ម ពន្យល់ថា ការឡើងថ្លៃប្រេងសាំងនៅកម្ពុជា ដោយសារតែតម្លៃប្រេងឥន្ធនៈអន្តរជាតិឡើងថ្លៃ ហើយបញ្ហានេះជាបញ្ហាសាកល។ ក្រសួងពាណិជ្ជកម្ម អះអាងថា តម្លៃប្រេងសាំង បានឡើងថ្លៃលើទីផ្សារអន្តរជាតិនៅទូទាំងពិភពលោក មិនមែនតែកម្ពុជាទេ។ សង្គមស៊ីវិល ចង់ឲ្យរបបក្រុងភ្នំពេញ បញ្ចេញថវិកាជាតិ ទប់កុំឲ្យប្រេងសាំងឡើងថ្លៃពេក ព្រោះអាចប៉ះពាល់ដល់ជីវភាពពលរដ្ឋ។
ប្រធានសមាគមសេដ្ឋកិច្ចក្រៅប្រព័ន្ធ លោក វ៉ន់ ពៅ លើកឡើងថា វិធានការរបស់របបលោក ហ៊ុន សែន ជាការចាំបាច់នៅពេលនេះ ព្រោះមេដឹកនាំរបបក្រុងភ្នំពេញ ធ្លាប់បានបញ្ចេញថវិកាជាតិ ទប់តម្លៃប្រេងសាំងកុំឲ្យឡើងថ្លៃ៖ «ធ្វើបាន ទី១ យើងឃើញ ដូចប្រទេសឡាវ វៀតណាមអី គេមិនថ្លៃខ្ពស់ដូចយើង អ៊ីចឹងគេអាចធ្វើបាន។ អ៊ីចឹងខ្ញុំគិតថា អាចធ្វើបាន ទី១គឺបញ្ចុះតម្លៃពន្ធប្រេងឥន្ធនៈ។ ទី២ គឺរដ្ឋាភិបាលត្រូវពិនិត្យទៅលើប្រេងឥន្ធនៈគេចពន្ធ។ ទី៣នោះ គឺខ្ញុំគិតថា រដ្ឋាភិបាលត្រូវមាន កញ្ចប់ថវិកា ដើម្បីឧបត្ថម្ភធំ ទៅលើប្រេងឥន្ធនៈ ដើម្បីកុំឲ្យវាឡើងថ្លៃ។ នេះជាយន្តការសំខាន់ អ៊ីចឹងខ្ញុំគិតថា ចុះពន្ធប្រេងសាំងទៅ ខ្ញុំគិតថា អាចធ្វើបាន ហើយទៅឡើងពន្ធផ្សេងៗ លើរបស់មិនចាំបាច់ ដូចជាបារី ដូចជាស្រាអីហ្នឹង ខ្ញុំគិតថា រដ្ឋាភិបាលអាចធ្វើបាន»។
ក្រសួងពាណិជ្ជកម្ម កាលនៅថ្ងៃទី៣ តុលា ថា មូលហេតុនៃការឡើងថ្លៃតម្លៃសាំង បណ្ដាលមកពីការប្រឈមមុខរវាងប្រទេសលោកខាងលិច និងប្រទេសផលិតប្រេងធំៗ លើពិភពលោក។ ក្រសួងពាណិជ្ជកម្មបន្ដថា ការប្រឈមមុខរវាងប្រទេសលោកខាងលិច និងប្រទេសផលិតប្រេងធំៗ ដែលប្រការនេះ បានជះឥទ្ធិពលដល់តម្លៃប្រេងឥន្ធនៈលក់រាយនៅទូទាំងពិភពលោក រួមទាំងនៅប្រទេសកម្ពុជាដែរ ព្រោះកម្ពុជា ក៏ជាប្រទេសនាំចូលប្រេង ពីទីផ្សារអន្តរជាតិ ដូចប្រទេសដទៃទៀតដែរ។
បើទោះជាក្រសួងពាណិជ្ជកម្ម តែងជូនដំណឹងពីថ្លៃលក់រាយប្រេងឥន្ធនៈតាមស្ថានីយ ប៉ុន្តែ ក្រសួងនេះ បញ្ជាក់ថា ខ្លួនមិនមែនជាអ្នកកំណត់ថ្លៃលក់រាយប្រេងឥន្ធនៈនៅកម្ពុជាទេ គឺមានភារកិច្ចត្រឹមតែស្រង់តម្លៃឡើងចុះនៃប្រេងឥន្ធនៈទៅតាមទីផ្សារអន្តរជាតិ មកគណនាតាមប្រកាសអន្តរក្រសួងប៉ុណ្ណោះ។
ក្រសួងពាណិជ្ជកម្មឲ្យដឹងថា គិតចាប់ពីពាក់កណ្ដាលខែកញ្ញា ប្រេងសាំងមួយធុង ឬហៅថា មួយប៉ារ៉ែល ចំណុះ១៥៩លីត្រ មិនទាន់បូកបញ្ជូនពន្ធ បានឡើងថ្លៃពី៨៦.៩៨ដុល្លារសហរដ្ឋអាមេរិក ដល់៨៩.៥២ដុល្លារ។ ឯប្រេងម៉ាស៊ូត ចំណុះដូចគ្នា មិនទាន់បូកបញ្ជូលពន្ធ បានឡើងថ្លៃពី៩២.១៧ដុល្លារសហរដ្ឋអាមេរិក ដល់៩៦.៦៨ដុល្លារ។ ក្រសួងពាណិជ្ជកម្ម បន្ដថា តម្លៃប្រេងឥន្ធនៈនេះ នឹងត្រូវបញ្ចុះថ្លៃចំនួន៤សេន ស្មើនឹង១៦០រៀល ក្នុង១លីត្រ នៅពេលលក់រាយ ដើម្បីឲ្យស្របតាមការណែនាំរបស់ លោក ហ៊ុន សែន មេដឹកនាំរបបក្រុងភ្នំពេញ។
អ្នកនាំពាក្យក្រសួងពាណិជ្ជកម្ម លោក សេង ថៃ ប្រាប់អាស៊ីសេរីថា កន្លងមក ទីផ្សារប្រេងសាំងនៅកម្ពុជាធ្លាប់ជួបបញ្ហានេះម្ដងហើយ ក្រោយមកក្រសួងបានកោះហៅក្រុមហ៊ុនឯកជន មកប្រជុំ ដើម្បីកាត់បន្ថយថ្លៃចំណេញ តាមការណែនាំពីមេដឹកនាំរបបក្រុងភ្នំពេញ។ អ្នកនាំពាក្យក្រសួងពាណិជ្ជកម្មរូបនេះ បន្តថា ដើម្បីស្វែងរកការបញ្ចុះថ្លៃប្រេងសាំងនៅកម្ពុជាម្ដងទៀត ក្រសួងពាណិជ្ជកម្ម នឹងកោះអញ្ជើញក្រុមហ៊ុននាំចូលប្រេងឯកជន មកប្រជុំ នៅក្រោយពិធីបុណ្យភ្ជុំបិណ្ឌ ក្នុងគោលបំណងស្នើសុំឲ្យក្រុមហ៊ុនទាំងនោះ កាត់បន្ថយថ្លៃចំណេញ ដើម្បីបញ្ចុះថ្លៃប្រេងសាំងលើទីផ្សារនៅកម្ពុជា៖ «ចង់ ប៉ុន្តែយើងក្រសួង អត់អាចចុះ(ថ្លៃ)បានទេ។ ក្រសួងដូចជាបានបញ្ជាក់នៅលើហ្នឹងអ៊ីចឹង (សេចក្ដីជូនដំណឹង) គ្រាន់តែជាអ្នកស្រង់តម្លៃទីផ្សារអន្តរជាតិ មកផ្សព្វផ្សាយ។ តែយើងអាចជជែកគ្នា ជាមួយវិស័យឯកជន ព្រោះកន្លងទៅយើងបានជជែកគ្នា កន្លងហើយ លទ្ធផលដូចខ្ញុំបានជម្រាបជូនអ៊ីចឹង»។
បើទោះជា របបក្រុងភ្នំពេញ អះអាងថា តម្លៃប្រេងឥន្ធនៈនៅកម្ពុជាឡើងថ្លៃ ដោយសារទីផ្សារអន្តរជាតិឡើងថ្លៃក៏ដោយ ប៉ុន្តែតម្លៃប្រេងសាំងលក់រាយលើទីផ្សារនៅ ថៃ ឡាវ និង វៀតណាម មានតម្លៃថោកជាង កម្ពុជា ប្រហែល១ពាន់រៀល ក្នុងមួយលីត្រ៕
It's ridiculous...what's the heck comrade Pen Sophak"trading interior ministry"try to bullying Khmer pple around.Obviously,all Hun Sen's CCP officials always used this kind of word when they couldn't solved any problems"irresponsibility"and big blame game to other.There is very simple thing and easily to understand in every time they commenting into public views"bias"rather than tell everybody the truth"insane",why it says increasing the gas priced in recent day Because they're prepare the worst scenario coming ahead"FACING WORLD ECONOMIC SANCTIONS"with many more bad things are popping up on the way right now"million of fingers pointing to dictator Hun Sen fascist commie govm't" before it would be sinks down into hellhole at anytime soon.
Oct 05, 2018 10:38 AM
