យុវជនមួយក្រុមគ្រោងធ្វើកូដកម្មបង្អត់អាហារទាមទារប្រសិទ្ធភាពនៃការពន្យារពេលឱ្យពលរដ្ឋសងបំណុល
2020.05.08
អតីតសកម្មជនអង្គការមាតាធម្មជាតិ ឈ្មោះ ហ៊ុន វណ្ណៈ។ Photo courtesy of Mother Nature
Photo courtesy of Mother Nature
យុវជនមួយក្រុមដែលមានឈ្មោះថា “ខ្មែរថាវរៈ” គ្រោងជួបជុំគ្នាធ្វើកូដកម្មបង្អត់អាហារពេញមួយថ្ងៃ នៅថ្ងៃសៅរ៍ ទី៩ ឧសភា ដើម្បីទាមទារឱ្យរដ្ឋាភិបាល និងគ្រឹះស្ថានមីក្រូហិរញ្ញវត្ថុ អនុវត្តឱ្យមានប្រសិទ្ធភាពចំពោះការពន្យារពេលសងបំណុលរបស់ពលរដ្ឋ។
តំណាងក្រុមយុវជនខ្មែរថាវរៈ លោក ហ៊ុន វណ្ណៈ ប្រាប់អាស៊ីសេរីថា កូដកម្មបង្អត់អាហារនេះ នឹងធ្វើឡើងនៅមុខសាលាខេត្តបាត់ដំបង និងនៅមុខគ្រឹះស្ថានមីក្រូហិរញ្ញវត្ថុមួយចំនួនក្នុងក្រុងបាត់ដំបង។ លោកថា មូលហេតុដែលពួកលោកមិនធ្វើសកម្មភាពនេះនៅរាជធានីភ្នំពេញ ព្រោះបារម្ភខ្លាចអាជ្ញាធរក្រុងភ្នំពេញចេញមករារាំង ដូចករណីតវ៉ារបស់ពលរដ្ឋនាពេលកន្លងទៅដែរ ហើយម្យ៉ាងទៀត ក្រុមយុវជនខ្មែរថាវរៈមានបណ្ដាញច្រើននៅខេត្តបាត់ដំបង។ តំណាងយុវជនរូបនេះបញ្ជាក់ថា កូដកម្មបង្អត់អាហារនេះ គឺជាសារបង្ហាញទៅភាគីពាក់ព័ន្ធថា នៅពេលឆាប់ៗនេះ នឹងមានពលរដ្ឋខ្មែរជាច្រើនធ្លាក់ខ្លួនក្នុងភាពក្រីក្រ ខ្វះអាហារហូបចុក នៅពេលពួកគាត់គ្មានប្រាក់ចំណូល ហើយត្រូវគេបង្ខំឱ្យសងបំណុលគ្រឹះស្ថានមីក្រូហិរញ្ញវត្ថុ៖ «យើងអត់អាហារនេះ ដើម្បីឱ្យគាត់ដឹងថា អ្វីដែលគាត់ធ្វើកន្លងមកនេះហ្នឹង វាប្រាកដជាទៅថ្ងៃមុខឆាប់ៗនេះ មនុស្សអត់បាយហូបមែន។ អ៊ីចឹងយើងចង់ឱ្យគាត់ដឹងមុន ដូចដាស់គាត់ឱ្យភ្ញាក់ឡើងវិញអ៊ីចឹង។ សារាចររបស់ធនាគារជាតិក្ដី ការឆ្លើយតបរបស់សមាគមគ្រឹះស្ថានមីក្រូហិរញ្ញវត្ថុក្តីហ្នឹង គ្រាន់តែជាការនិយាយទេ ប៉ុន្តែការអនុវត្តវាអត់ដូច»។
កាលពីពេលថ្មីៗនេះ ធនាគារជាតិបានចេញសារាចរណែនាំឱ្យធនាគារឯកជន និងគ្រឹះស្ថានមីក្រូហិរញ្ញវត្ថុ ត្រូវរៀបចំឥណទានឡើងវិញ ឬពន្យារពេលសងបំណុលបណ្ដោះអាសន្នចំពោះអតិថិជនដែលរងផលប៉ះពាល់ជាក់ស្ដែងពីវិបត្តិជំងឺកូវីដ-១៩ ក្នុងវិស័យចំនួន៤ រួមមាន ទេសចរណ៍ កាត់ដេរ សំណង់ និងវិស័យដឹកជញ្ជូន។ ការពន្យារពេលសងនេះ មានសុពលភាពដល់ថ្ងៃទី៣១ ខែធ្នូ ឆ្នាំ២០២០។
ទោះជាយ៉ាងណា ក្រុមអង្គការសង្គមស៊ីវិល និងក្រុមយុវជន សង្កេតឃើញថា មានស្ថាប័នធនាគារ និងគ្រឹះស្ថានមីក្រូហិរញ្ញវត្ថុតិចតួចប៉ុណ្ណោះ ដែលបានអនុវត្តតាមសារាចរនេះ ពោលគឺភាគច្រើននៅតែបន្តទារបំណុលពីអតិថិជនដដែល ទោះជាពួកគេកំពុងបាត់បង់មុខរបរ ឬធ្លាក់ចុះប្រាក់ចំណូលយ៉ាងណាក្តី។ ក្រុមសង្គមស៊ីវិលបារម្ភថា នៅប៉ុន្មានខែខាងមុខទៀតនេះ បញ្ហាបំណុលធនាគារ និងមីក្រូហិរញ្ញវត្ថុនេះ អាចនឹងរុញច្រើនឱ្យពលរដ្ឋជាច្រើនលក់ដីសងបំណុល ឬធ្វើការងារដើម្បីតែដោះបំណុល ហើយករណីជួញដូរ និងរំលោភសិទ្ធិមនុស្សដទៃទៀត ក៏អាចនឹងកើតមានឡើងផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- ទស្សនជុំវិញពលរដ្ឋខ្មែរអាមេរិកកាំងយកស្បែកជើងគប់លោក ហ៊ុន សែន ក្នុងពេលជួបអ្នកគាំទ្រនៅអាមេរិក
- លោកស្រី សំ សុខា អតីតអ្នកជាប់ឃុំករណីគប់ស្បែកជើងលើរូបលោក ហ៊ុន សែន ស្នើលោកឱ្យពិចារណាកំហុសរបស់ខ្លួនឡើងវិញថា ហេតុអ្វីបានជាពលរដ្ឋគប់ស្បែកជើងដាក់លោក
- ពលរដ្ឋខ្មែរអាមេរិកកាំងម្នាក់យកស្បែកជើងគប់លោក ហ៊ុន សែន ក្នុងពេលជួបអ្នកគាំទ្រនៅសហរដ្ឋអាមេរិក
- បទសម្ភាសន៍៖ អំពីលទ្ធផលទស្សនកិច្ចលោក សម រង្ស៊ី ទៅប្រទេសអូស្ត្រាលី និងបច្ចុប្បន្នភាពនយោបាយ
- លោក ហ៊ុន សែន មិនឱ្យរៀបចំព្រះរាជពិធីច្រត់ព្រះនង្គ័លទេ នៅឆ្នាំ២០២២នេះ