និស្សិតមួយក្រុមនៅខេត្តសៀមរាប បង្កើតអាជីវកម្មលក់កាហ្វេចល័ត ទាក់ទាញអ្នកទេសចរតំបន់អង្គរ
2024.11.30
កាហ្វេចល័តលើកូនឡាន ស្លាកយីហោ «The ROZA CARAVAN» ដែលជាអាជីវកម្មលក់កាហ្វេចល័តបង្កើតឡើងដោយនិស្សិតមួយក្រុម ដើម្បីបង្កើតឱកាសការងារដល់និស្សិតក្រីក្រ ក្នុងខេត្តសៀមរាប។ រូបថតថ្ងៃទី២៩ ខែវិច្ឆិកា ឆ្នាំ២០២៤។
រូបពីពលរដ្ឋ
ដើមឈើធំៗ ជះម្លប់ត្រជាក់ស្រឹបដុះតាមបណ្ដោយដងស្ទឹងសៀមរាប ផ្តល់បរិយាកាសធម្មជាតិស្រស់បំព្រង គឺជាទីតាំង ដែលនិស្សិតមួយក្រុមជ្រើសយកកន្លែងនោះ លក់កាហ្វេចល័តបម្រើសេវាកម្មជូនអ្នកទេសចរ។
កាហ្វេចល័តកូនឡានស្លាកយីហោ «The ROZA CARAVAN» បានបង្កើតអាជីវកម្មលក់កាហ្វេចល័តតាមរថយន្តមួយគ្រឿង អាចបង្កើតឱកាសការងារដល់និស្សិតក្រីក្រ ក្នុងខេត្តសៀមរាប។
នៅសងខាងស្ទឹងសៀមរាប មានដើមឈើតូចធំៗ ច្រើនស្អេកស្កះ កំពុងក្លាយជាទីតាំង ដែលអ្នកទេសចរអង្គុយកម្សាន្តទទួលទានកាហ្វេគយគន់ទេសភាព។
និស្សិតមួយក្រុមកំពុងមមាញឹកលក់កាហ្វេចល័តតាមរថយន្តជូនអ្នកទេសចរនៅជាប់មាត់ស្ទឹងសៀមរាបក្នុងតំបន់នោះ។
និស្សិតសិក្សានៅសកលវិទ្យាល័យមួយក្នុងក្រុងសៀមរាប ឆ្លៀតធ្វើការក្រៅម៉ោងក្នុងហាងកាហ្វេនេះ គឺកញ្ញា ផាន់ សុផាណា ប្រាប់វិទ្យុអាស៊ីសេរី នៅថ្ងៃទី២៩ ថា ភ្ញៀវទេសចរជាតិ និងអន្តរជាតិចូលចិត្តអង្គុយមាត់ស្ទឹងសៀមរាប ជជែកលេងកម្សាន្តស្រូបយកបរិយាកាសធម្មជាតិ ដោយភាគច្រើនពួកគាត់ទទួលទានកាហ្វេ។
កញ្ញាថា អាជីវកម្មនេះនឹងរួមចំណែកបង្កើនឱកាសការងារ ផ្តល់បទពិសោធន៍ និងប្រាក់ចំណូលដល់និស្សិតក្រីក្រ ដើម្បីផ្គត់ផ្គង់ការសិក្សា ថ្នាក់មហាវិទ្យាល័យ។
កញ្ញា ផាន់ សុផាណា៖ «ខ្ញុំសង្កេតឃើញភ្ញៀវមកពីភ្នំពេញ ពួកគាត់ចូលចិត្តបរិយាកាសនៅខេត្តសៀមរាប ព្រោះនៅភ្នំពេញ អត់មានដើមឈើ និងកន្លែងអង្គុយលេងច្រើនអ៊ីចឹងទេ។ ដូច្នេះ ពេលពួកគាត់មកលេង ពួកគាត់អង្គុយតាមមាត់ស្ទឹងអ៊ីចឹងទៅ ទទួលបានអារម្មណ៍ល្អ ហើយស្ទឹងក៏គេស្ដារបានស្អាត»។
កាហ្វេចល័តកូនឡាន ដែលបិទស្លាកយីហោ «The ROZA CARAVAN» បង្កើតឡើងជាងកន្លះឆ្នាំមកហើយ ដោយនិស្សិតមួយក្រុមរស់នៅខេត្តសៀមរាប ផ្ដួចផ្ដើមគំនិតច្នៃប្រឌិត។
ស្ទើរជារៀងរាល់ថ្ងៃ គេតែងប្រទះឃើញកូនឡានពណ៌បៃតង ដឹកម៉ាស៊ីនកិនកាហ្វេ និងសម្ភារៈលក់កាហ្វេ។ អាជីវកម្មនេះ មានបុគ្គលិកបម្រើការងារ ៥នាក់ ជានិស្សិត ដោយលក់កាហ្វេទទួលបានចំណូលចាប់ពី ៥០ដុល្លារ រហូតដល់ជាង ១០០ដុល្លារអាមេរិកក្នុងមួយថ្ងៃ។
ជាមួយគ្នានេះ កញ្ញា ផាន់ សុផាណា បន្ថែមថា កាហ្វេមួយកែវមានតម្លៃ ៤ពាន់រៀល ឬប្រមាណ ១ដុល្លារ ដោយក្នុងមួយថ្ងៃអាចលក់បានចន្លោះពី ៥០កែវ រហូតដល់ជាង ១០០កែវ។
កញ្ញាបន្ថែមថា ហាងកាហ្វេចល័តនេះមានសេវាកម្មល្អ ផ្សារភ្ជាប់នឹងសម្រស់ធម្មជាតិធ្វើឱ្យភ្ញៀវមានអារម្មណ៍ស្រស់ស្រាយ ហើយសិស្ស-និស្សិតតែងតែអង្គុយអានសៀវភៅ និងធ្វើកិច្ចការសាលា។
ចំណែកឯសហស្ថាបនិកកាហ្វេកូនឡាន លោក ស្រ៊ុន រ៉ូហ្សា និយាយថា ពួកលោករួមគ្នាបង្កើតអាជីវកម្មនេះ ក្នុងបំណងបង្កើតគំនិតច្នៃប្រឌិតថ្មី អាចបង្កើតឱកាសការងារដល់និស្សិតក្រីក្រ ឆ្លៀតមកធ្វើការក្រៅម៉ោង ទទួលបានប្រាក់ចំណូលសម្រាប់បង់ថ្លៃសិក្សា។
លោកស្រមៃថា នឹងចង់ពង្រីកអាជីវកម្មនេះ មានស្តង់ដារខ្ពស់ ទាំងគុណភាព និងអនាម័យ តម្លៃសមរម្យ ក៏ប៉ុន្តែមានឧបសគ្គខ្លះៗ ដោយសារទីតាំង ដែលពួកលោកកំពុងលក់ដូរ ប្រឈមនឹងអាជ្ញាធររារាំង ដោយលើកហេតុផលថា ប៉ះពាល់សណ្ដាប់ធ្នាប់សាធារណៈ។
លោក ស្រ៊ុន រ៉ូហ្សា៖ «នេះណាមួយសេដ្ឋកិច្ចធ្លាក់ចុះអ៊ីចឹងទៅ ពួកយើងមិនអាចធ្វើជាកន្លែងហាងបានទេ ទើបពួកខ្ញុំឌីហ្សាញជាប្រភេទកាហ្វេលក់តាមចិញ្ចើមផ្លូវ ព្រោះពួកយើងចង់ឱ្យមានការប្លែកខុសពីគេលក់ក្នុងតម្លៃសមរម្យមែនទែន ធ្វើឱ្យភ្ញៀវទូទៅ ក៏អាចអង្គុយញ៉ាំបានដូចក្នុងហាង»។
ភ្ញៀវទេសចរម្នាក់កំពុងទទួលទានកាហ្វេកូនឡាន លោក សេត សុវណ្ណ ថ្លែងថា លោកចូលចិត្តអង្គុយជជែកគ្នាលេងក្នុងរង្វង់ការងារ និងបញ្ហាសង្គមជាតិ នៅហាងកាហ្វេជាប់មាត់ស្ទឹងសៀមរាប ព្រោះមានបរិយាកាសធម្មជាតិ ស្ដាប់សំឡេងទឹកហូរ។
លោកយល់ថា អាជីវកម្មនេះ ជាទីចាប់អារម្មណ៍របស់អ្នកទេសចរ មកកម្សាន្តនៅខេត្តសៀមរាបប្លែកភ្នែក ព្រោះមានដើមឈើធំៗ អមដោយខ្យល់អាកាសត្រជាក់ ដែលជាទីមនោរម្យឱ្យអ្នកទេសចរ អង្គុយទទួលទានកាហ្វេកម្សាន្ត ជាផ្នែកមួយលម្អទីក្រុងអង្គរ។
លោក សេត សុវណ្ណ៖ «ការអង្គុយញ៉ាំកាហ្វេតាមមាត់ស្ទឹង ធ្វើឱ្យអារម្មណ៍ខ្ញុំស្រស់ថ្លា ដល់អង្គុយទៅ ខ្យល់បក់មកធ្វើឱ្យខួរក្បាលខ្ញុំល្ហើយ ត្រជាក់ស្រួលសម្រាប់ខួរក្បាល»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអភិបាលខេត្តសៀមរាប លោក ប្រាក់ សោភ័ណ បាននៅឡើយទេនៅថ្ងៃទី២៩ វិច្ឆិកា ដោយទូរស័ព្ទហៅចូលតែគ្មានអ្នកលើក។
ជុំវិញរឿងនេះ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ លោក វន់ ពៅ យល់ថា និស្សិតបង្កើតអាជីវកម្ម ដោយខ្លួនឯងជារឿងល្អ ស្របពេល ដែលស្ថានភាពសេដ្ឋកិច្ចកំពុងធ្លាក់ចុះ ដែលអាចផ្តល់ប្រយោជន៍ដល់សង្គម។ លោកថា គំនិតច្នៃប្រឌិតនេះ រដ្ឋាភិបាលគួរតែជួយជ្រោមជ្រែងឱ្យរីកចម្រើន ហើយអាជ្ញាធរខេត្តត្រូវបង្កលក្ខណៈងាយស្រួល ធ្វើយ៉ាងណាឱ្យពួកគាត់អាចលក់ដូរ ដោយគ្មានការរារាំង។
លោក វន់ ពៅ៖ «អាជ្ញាធរខេត្តគួរតែគាំពារបង្កលក្ខណៈឱ្យគាត់ និងចៀសវាងការរារាំងដោយប្រការណាមួយ ឬក៏មានជនខិលខូចណាមកទារប្រាក់ ដោយគំរាមសំអាងថា ខូចសណ្ដាប់ធ្នាប់។ អ៊ីចឹង ត្រូវគាំទ្រពួកគាត់ និងជួយផ្សព្វផ្សាយបន្ថែមទៀត អំពីមុខរបររបស់គាត់ ជាពិសេស ក្រសួងទេសចរណ៍ ដើម្បីបង្កើតប្រាក់ចំណូលពួកគាត់ផង និងទាក់ទាញទេសចរណ៍ផង»។
ក្រុមនិស្សិតចាត់ទុកស្ទឹងសៀមរាប ជាកន្លែងស្រូបទាញភ្ញៀវទេសចរយ៉ាងសំខាន់ ដែលជាជ្រុងមួយ រួមចំណែកជំរុញសេដ្ឋកិច្ចវិស័យទេសចរណ៍ក្នុងតំបន់ប្រវត្តិសាស្ត្រនេះ។ ហេតុនេះពួកគាត់ស្នើដល់អាជ្ញាធរឱ្យយកចិត្តទុកដាក់កែលម្អសម្រស់បរិស្ថានស្ទឹងនេះ ដោយត្រូវទប់ស្កាត់ការបង្ហូរទឹកកខ្វក់ចូលស្ទឹង ដែលនាំឱ្យមានក្លិនស្អុយ ប៉ះពាល់អារម្មណ៍ភ្ញៀវទេសចរ និងអាជីវកម្មរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី