សង្គម​ស៊ីវិល​ស្នើ​​រដ្ឋាភិបាល​រើស​មន្ត្រី​ជំនាញ​កសិកម្ម​មាន​បទពិសោធន៍​ចេញ​ពី​សហគមន៍​មូលដ្ឋាន

ដោយ ឡេង ម៉ាលី
2023.08.31
សង្គម​ស៊ីវិល​ស្នើ​​រដ្ឋាភិបាល​រើស​មន្ត្រី​ជំនាញ​កសិកម្ម​មាន​បទពិសោធន៍​ចេញ​ពី​សហគមន៍​មូលដ្ឋាន រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក ឌិត ទីណា។
រូប៖ ហ្វេសប៊ុកលោក ឌិត ទីណា

មន្ត្រី​សង្គម​ស៊ីវិល​ស្នើ​ដល់​រដ្ឋាភិបាល ជ្រើសរើស​មន្ត្រី​ជំនាញ​កសិកម្ម​មាន​បទពិសោធន៍ ចេញ​ពី​សហគមន៍​ជា​អាទិភាព។ ការ​លើក​ឡើង​នេះ ក្រោយ​ពី​លោក​នាយករដ្ឋមន្ត្រី ហ៊ុន ម៉ាណែត ថ្លែង​សារ​នយោបាយ អំពី​ការ​បញ្ជូន​មន្ត្រី​ជំនាញ​កសិកម្ម​ទៅតាម​មូលដ្ឋាន ។

មន្ត្រី​សង្គម​ស៊ីវិល ស្នើ​ដល់​រដ្ឋាភិបាល ពិចារណា​ពី​លក្ខណៈ​សម្បត្តិ​របស់​មន្ត្រី​ជំនាញ​កសិកម្ម ដែល​នឹង​ត្រូវ​ចុះ​ទៅ​មូលដ្ឋាន តាម​ឃុំ​សង្កាត់​នានា​ដោយ ផ្ដល់​អាទិភាព​អ្នក​ស្ម័គ្រចិត្ត​នៅ​មូលដ្ឋាន ដែល​មាន​បទពិសោធន៍​ជាក់​ស្ដែង ក្នុង​ការ​ដាំដុះ និង​ចិញ្ចឹមសត្វ។

ប្រធាន​សមាគម​សម្ព័ន្ធ​សហគមន៍​កសិករ​កម្ពុជា​លោក ថេង សាវឿន ថ្លែង​នៅ​លើ​ហ្វេសប៊ុក (Facebook)ថា ដើម្បី​ជ្រើសរើស​មន្ត្រី​ជំនាញ​កសិកម្ម​នៅ​មូលដ្ឋាន រដ្ឋាភិបាល​ត្រូវ​ពិចារណា រើស​អ្នក ដែល​មាន​ទាំង​សញ្ញាបត្រ និង​បទពិសោធន៍​ជាក់ស្ដែង ថែមទាំង​មាន​សមត្ថភាព​ធ្វើ​ផែនការ ការ​កៀរគរ​ធនធាន និង​ប្រើប្រាស់​ធនធាន​សហគមន៍​ដែល​មាន។ លោក ថេង សាវឿន ឲ្យ​ដឹង​ទៀត​ថា អ្នក​ជំនាញ ដែល​ត្រូវ​ជ្រើសរើស​នោះ ត្រូវតែ​មាន​ជំហរ​ឯករាជ្យ មាន​ទំនាក់ទំនង​ល្អ​គ្រប់​ភាគី និង​ដឹង​ពី​តម្រូវការ និង​កង្វល់​របស់​កសិករ។

លោក ថេង សាវឿន៖ «គឺ​ថា​ត្រូវតែ​រៀបចំ​មន្ត្រី​ជំនាញ រួម​ជាមួយ​និង​អ្នក​ជំនាញ​វិស័យ​កសិកម្ម​ក្នុង​ការ​ចុះ​អន្តរាគមន៍ និង​ដោះស្រាយ​ភ្លាមៗ ហើយ​ពិសេស​ទៅ​ទៀត​នោះ គឺ​ការ​បណ្ដុះបណ្ដាល​មន្ត្រី​កម្រិត​ថ្នាក់​ស្រុក ថ្នាក់​ឃុំ និង​ថ្នាក់​ខេត្ត​ឲ្យ​មាន​ជំនាញ​ក្នុង​ការ​សម្របសម្រួល ជំនាញ​ក្នុង​ការ​រក​ស្វះស្វែង​ក្នុង​ការ​ដោះស្រាយ»

ការ​លើក​ឡើង​នេះ ក្រោយ​ពី​លោក​នាយករដ្ឋមន្ត្រី ហ៊ុន ម៉ាណែត ថ្លែង​សារ​ពី​ការ​ជ្រើសរើស​មន្ត្រី​ជំនាញ​កសិកម្ម​ ដើម្បី​បញ្ជូន​ទៅ​មូលដ្ឋាន។

លោក ហ៊ុន ម៉ាណែត៖ «អ៊ីចឹង​ការ​ពង្រឹង​មន្ត្រី​កសិកម្ម​ទៅ​ឃុំ​ សុំ​រើស​ឲ្យ​បាន​ត្រូវ តម្លាភាព យុត្តិធម៌​ឲ្យ​ចំ​ជំនាញ ហើយ​ការ​ពង្រាយ​មាន​ផែនការ​ច្បាស់​លាស់ ហើយ​ធានា​ឲ្យ​បាន​នូវ​ប្រសិទ្ធភាព​ការងារ​ឲ្យ​បងប្អូន ធានា​ក្របខណ្ឌ​ថវិកា ធានា​អី​ដើម្បី​ជួយ ជំនាញ​បន្ត​ទៀត»

វិទ្យុ​អាស៊ីសេរី​ពុំ​អាច​ទាក់ទង​រដ្ឋមន្ត្រី​ក្រសួង​កសិកម្ម​លោក ឌិត ទីណា ដើម្បី​សុំ​ការ​ឆ្លើយតប​ចំពោះ​បញ្ហា​នេះ​បាន​នៅ​ឡើយ​ទេ នៅថ្ងៃ​ទី​៣០ សីហា។

ទាក់ទង​នឹង​បញ្ហា​នេះ កសិករ​ដាំ​ស្រូវ នៅ​ខេត្ត​បាត់ដំបង​លោក នី វណ្ណៈ រីករាយ​នៅ​ពេល​ដែល​រដ្ឋាភិបាល​គ្រោង​នឹង​ដាក់​មន្ត្រី​ជំនាញ​កសិកម្ម​ទៅ​តាម​ឃុំ​នី​មួយ។ លោក​ស្នើ​ដល់​ក្រសួង​កសិកម្ម​ស្វែងរក​ទីផ្សារ​កសិកម្ម ដើម្បី​លើក​កម្ពស់​ជីវភាព​កសិករ។

លោក នី វណ្ណៈ៖ «អាហ្នឹង​កាន់​តែ​ល្អ​បង យើង​មាន​អ្នក​ឲ្យ​យោបល់​យើង​កាន់​តែ​ច្រើន យើង​កាន់​តែ​ល្អ​ហើយ​បង។ ជា​ចុងក្រោយ​ហ្នឹង​គ្មាន​អ្វី​ទេ​មាន​តែ​ចង់​សំណូម​ពរ​ឲ្យ​តែ​ស្រូវ​ថ្លៃ​ប្រហែល​តែ​ឆ្នាំ​នេះ រាល់​ឆ្នាំ​ទៅ​បាន​ហើយ»

ប្រទេស​កម្ពុជា​មាន​ឃុំ​សង្កាត់​ចំនួន ១៦៥២។ រដ្ឋាភិបាល​អាណត្តិ​ទី៧​នេះ មាន​ផែនការ​ដាក់​ពង្រាយ​មន្ត្រី​ជំនាញ​កសិកម្ម​នៅ​គ្រប់​ឃុំ​សង្កាត់​នៅ​ទូទាំង​ប្រទេស​ជាពិសេស​ឃុំ​សង្កាត់​ណា ដែល​មាន​សក្ដានុពល​ខ្ពស់​ផ្នែក​កសិកម្ម។ ទោះជា​បែប​នេះ ក្ដី​សង្គម​ស៊ីវិល ស្នើ​ដល់​រដ្ឋាភិបាល​ពិចារណា​ជ្រើសរើស​មន្ត្រី ដែល​មាន​ទាំង​ចំណេះដឹង និង​បទពិសោធន៍ ជាពិសេស​ធ្លាប់​ទទួល​បាន​ជោគជ័យ​ពី​ការ​ធ្វើ​កសិកម្ម ក្នុង​សហគមន៍​មូលដ្ឋាន​របស់​ខ្លួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។