ស្នងការសហភាពអឺរ៉ុបទទួលបន្ទុកភាពជាដៃគូអន្តរជាតិ អ្នកស្រី ជូតា យូភើលឡៃណាន់ (Jutta Urpilainen) មកបំពេញទស្សនកិច្ចនៅកម្ពុជា ដើម្បីផ្ដល់ជំនួយ និងជំរុញដល់រដ្ឋាភិបាលឱ្យស្ដារលទ្ធិប្រជាធិបតេយ្យឡើងវិញ។ មន្ត្រីសង្គមស៊ីវិលថារដ្ឋាភិបាលកម្ពុជាគួរងាកមកគោរពសិទ្ធិមនុស្ស និងស្ដារលទ្ធិប្រជាធិបតេយ្យដើម្បីផលប្រយោជន៍ពលរដ្ឋ។
អ្នកស្រី ជូតា យូភើលឡៃណាន់ បានមកបំពេញទស្សនកិច្ចនៅកម្ពុជា ពីថ្ងៃទី១២ ដល់ថ្ងៃទី១៣ មីនា ដើម្បីជំរុញប្រទេសកម្ពុជាឱ្យគោរពសិទ្ធិមនុស្ស ការអភិវឌ្ឍន៍ដោយនិរន្តរភាព និងការច្នៃប្រឌិតបៃតងជាស្នូល។
នៅចុងបញ្ចប់បេសកកម្ម អ្នកស្រី ជូតា យូភើលឡៃណាន់ ក៏បានជួបរដ្ឋមន្ត្រីក្រសួងការបរទេស លោក សុខ ចិន្តាសោភា និងនាយករដ្ឋមន្ត្រី លោក ហ៊ុន ម៉ាណែត លើកិច្ចពិភាក្សានៃកិច្ចសហប្រតិបត្តិការយូរអង្វែងរបស់សហភាពអឺរ៉ុបជាមួយរាជរដ្ឋាភិបាលកម្ពុជា។ អ្នកស្រី ជូតា យូភើលឡៃណាន់ ក៏បានលើកឡើងពីបញ្ហាសិទ្ធិមនុស្ស និងអភិបាលកិច្ចល្អជាមួយមេដឹកនាំកម្ពុជាផងដែរ។ នេះបើតាមការការលើកឡើងរបស់ អ្នកស្រី ជូតា យូភើលឡៃណាន់ (Jutta Urpilainen) នៅលើបណ្ដាញសង្គមអ៊ិក្ស (X)។
អ្នកស្រី ជូតា យូភើលឡៃណាន់ ក៏បានចូលរួមពិធីចុះកិច្ចព្រមព្រៀងហិរញ្ញប្បទានឥតសំណងដែលមានទឹកប្រាក់ ៧៩លានអឺរ៉ូ ឬប្រមាណ ៨៥លានដុល្លារលើកម្មវិធីថ្មីរបស់សហភាពអឺរ៉ុបចំនួន៤ ដើម្បីអភិវឌ្ឍវិស័យសំខាន់ៗ មានដូចជា កសិកម្ម សំលៀកបំពាក់ ស្បែកជើង និងទំនិញ ការធ្វើដំណើរ ការអប់រំ និងការស្រាវជ្រាវ ពាណិជ្ជកម្ម និងវិស័យឯកជនផងដែរ។
ទោះបីជាក្នុងជំនួបនេះមិនបានបញ្ជាក់លំអិតថា បញ្ហាសិទ្ធិមនុស្សក៏ដោយ តែកន្លងមកសហភាពអឺរ៉ុបតែងជំរុញឱ្យប្រទេសកម្ពុជាស្ដារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញ។ ប៉ុន្តែកាលពីថ្ងៃទី២១ ខែវិច្ឆិកា ឆ្នាំ២០២៣ គណៈកម្មការអឺរ៉ុបតាមរយៈរបាយការណ៍ចំនួន ២៤ទំព័រ ប្រាប់ឱ្យរដ្ឋាភិបាលកម្ពុជាអនុវត្តឱ្យឃើញជាក់ស្ដែងពីការស្ដារលទ្ធិប្រជាធិបតេយ្យ និងការគោរពសិទ្ធិមនុស្ស ដើម្បីទទួលបានការអនុគ្រោះពន្ធ (EBA) ពេញលេញឡើងវិញ ខណៈការដក ២០% នៃការអនុគ្រោះពន្ធអស់រយៈពេលជិត ៤ឆ្នាំមកនេះ បានធ្វើឱ្យសេដ្ឋកិច្ចកម្ពុជាខាតបង់។
វិទ្យុអាស៊ីសេរីមិនអាចសុំការឆ្លើយតបពី អ្នកនាំពាក្យក្រសួងការបរទេសកម្ពុជា លោក ជុំ សុន្ទរី និងអ្នកនាំពាក្យនាយករដ្ឋមន្ត្រី លោក មាស សោភ័ណ្ឌ បានទេ នៅថ្ងៃទី១៣ ខែមិនា។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា សហភាពអឺរ៉ុបគឺម្ចាស់ជំនួយធំមួយក្នុងការចូលរួមអភិវឌ្ឍន៍ប្រទេសកម្ពុជា ប៉ុន្តែលោកថាជំនួយរបស់សហភាពអឺរ៉ុបកន្លងមក ក៏បានភ្ជាប់នឹងលក្ខខណ្ឌឱ្យកម្ពុជាគោរពសិទ្ធិមនុស្ស និងស្ដារលទ្ធិប្រជាធិបតេយ្យផងដែរ។
លោក នី សុខា៖«ប្រសិនបើរដ្ឋាភិបាលយើងចង់ឱ្យមានទំនាក់ទំនងល្អ ហើយចង់បន្តឱ្យផ្ដល់នូវជំនួយ ជាពិសេស បញ្ហារឿងការពិនិត្យ ការពិចារណារឿង(EBA)ឡើងវិញ គិតថា រដ្ឋាភិបាលគួរតែមានការឆ្លើយតបឱ្យបានធ្វើយ៉ាងណាជាវិជ្ជមានតាមការស្នើឡើងរបស់សហគមន៍អឺរ៉ុប ដើម្បីជាផលចំណេញដល់ប្រទេសកម្ពុជាយើង»។
លោក នី សុខា បន្តថា រដ្ឋាភិបាលគួរតែដោះលែងអ្នកទោសមនសិការ បើកឱ្យមានការបោះឆ្នោត ដែលសហគមន៍ជាតិ និងអន្តរជាតិទទួលយកបាន និងការបើកលំហឱ្យពលរដ្ឋគ្រប់រូបអាចអនុវត្តសិទ្ធិរបស់ខ្លួនឱ្យបានពេញលេញ។ លោក នី សុខា ថា ការធ្វើបែបនេះ កម្ពុជានឹងទទួលបានអត្ថប្រយោជន៍បន្ថែមទៀតពីសហភាពអឺរ៉ុប រួមទាំងការទទួលបានប្រព័ន្ធអនុគ្រោះពន្ធ (EBA) ទាំងស្រុងមកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។